大仔大女媽媽會今日: 0|主題: 177860

收藏本版

發帖

返回列表

跳至頁

查看: 2074 | 回覆: 22

[2009年] 沉日生咗啦！報告一下先！ [複製鏈接]

chole16

男爵府

積分: 6450

1^#

發表於 09-4-9 21:48 |只看該作者 |正序瀏覽 |打印

預產期其實係12號，因為呢幾日我D血壓都KEEP住好高，所以星期二睇完醫生之後，醫生決定要我唔好等啦，沉日一早９點要入院催生。

入院之前果晚，真係瞓唔著架！因為成日要諗住有咩要帶，有咩會漏，聽日會點呢，入院後又會點呢... 所以我諗我瞓咗4粒鐘左右啦!

第二朝去咗食個早餐先入院，搞好晒D嘢，又要聽姑娘講一大堆資料，之後又要放大便，入房換吓衫呀，執吓嘢呀，搞到成11點幾先入預產室!

入到去，就要吊催生水，吊果D水隻手好痺（其實都幾痛吓），之後D陣痛就慢慢來啦！頭果兩個鐘都無乜嘢，直至醫生來幫我穿洋水（D洋水好暖架播！）。醫生check過都係開咗2度．穿完洋水之後，D陣痛真係唔同咗，覺得個肚好似慢慢一級一級咁收縮，之後就痛一陣。痛到4點咁上下，姑娘就問我要唔要聞氣。都好啦，咪聞囉。嘩，第一啖氣我覺得好臭囉，有陣膠味＋怪味... 吸咗一啖，就問姑娘，點解仲係痛嘅（我以為一聞就會唔痛架嗎...)？點知原來只係減輕痛楚。果時開到4度。又唔知過咗幾耐，不如打埋支止痛針啦，諗住又會痛少D，支止痛針仲無效，一D都唔止痛嘅，不過，佢就搞到我暈暈地咁，可以令到我响陣痛之間瞓吓... 又唔知過咗幾耐，D陣痛真係好勁，姑娘來睇過，我已經由4度好快咁開到8-9度。我淨係知道果時佢地就開始推我入產房!　我已經痛到唔理佢地做咩啦！果D陣痛，最後果下真係好想疴D嘢出來！

個醫生到last　minute先到，D姑娘仲要我忍住唔好疴，你話點忍啦！到最後聽佢地講幾時要PUSH，要大力，又要忍住度氣，又要繼續PUSH，個人都亂晒籠！搞咗一陣，醫生要吸亞B個頭仔，因為頭仔已出咗少少，但係卡住太耐唔得啦！亞B最後都順利出世，佢一出咗來，好似成個人鬆晒！！！　我老公話我推入產房到BB出世，其實係講緊15-20分鐘！都總算順利同快啦！

哈，好奇怪，生完之後好似好快就唔記得咗之前係點痛法！可能痛嘅時候自己都「溫溫鄧鄧」！生咗都不知幾精神！今朝已經落到床，係個傷口（下面剪咗1寸，縫咗3針）好似拿住拿住咁啫！今日好忙呀，又要去學餵人奶，又要去聽講座，又要去睇B！响醫院原來都可以咁忙嘅！

今晚一定要瞓返好幾粒鐘啦！聽日又有第二D嘢學LU!

如果你地未生嘅，我覺得真係要好好學吓點呼吸，因為要生嘅時候個人真係好亂，而且無人會知你幾時陣痛，佢地淨係叫你PUSH，又唔會知你幾時陣痛完！我估如果我之前有學過點呼吸，亞B出世應該會仲SMOOTH　D囉！

[ 本帖最後由 chole16 於 09-4-9 21:53 編輯 ]