冇人想走出個comfort zone，始終都咁多年，已經習慣咗惡同鬧至會有人聽佢枝笛，問題係一個人生匆匆幾十年，阿伯退咗休，又有PT返，揸住過百萬，不愁衣食，只愁日子難過，而家有工返有朋友陪打牌又有女人埋身，完全唔係垂垂老人格局，又點會甘心返去個籠度做番隻金絲雀。樓主自己都五十到尾，做唔到十年都退休，原本係一對神仙眷屬，起碼唔駛憂柴憂米，得閒去下旅行，不知幾爽。
只不過人每個階段都會有心態改變，阿伯大樓主十年八年，行條路比樓主早D，一個退休打風流工，一個仲要捱多十年，心態又點會一樣，但冇人話心態唔同就唔可以相濡以沫，只要大家忍讓下，冇可能全部一個人啃晒，就算阿伯有唔著，樓主都唔見得啱晒。問題係大前提唔係再計較邊個對邊個錯，對幾多錯幾多，係要認清目標係咩，點做到目標，打個比喻：係唔離婚架啦，阿伯又係都唔會改架啦，咁如果樓主又企硬，最後只有攬炒，一拍兩散，冇人想臨老要一個人過咁慘啩。
咁多個條件：
1）唔離婚要兩個人都同意至得
2）阿伯唔改逼唔到，唔好再拉果D咩道德咩對錯去講，冇用架啦，阿伯要聽一早聽，要改一早改，而家佢樂不思蜀，睬你都傻
3）樓主企硬～呢個係唯一樓主自己可以掌握嘅又改變到嘅，所以咁耐以嚟咁多JM都叫樓主自己改變下，出去識下朋友搵下興趣
做人最緊要識變通，咁就算面對逆境都可以安然渡過，詩都有得吟：柳暗花明又一村。路不通人通，山不轉人轉，人生計劃係要有，但世界上變數太多，外在內在都可以隨時唔一樣，事事都要畫定個框框，一唔跟劇本發展就騰晒雞發爛渣有用咩？冇架，當然改變係一個開竅過程，有人要一年，有人要一個月，有人可能要一世，睇你自己想唔想幫自己，喜怒哀樂依賴一個人一件事，當果個人果件事唔再存在，咁你自己點？
講件真人真事你聽：有個朋友我同兩個死黨聯絡咗整整兩三年，一直都搵佢唔到，電話去咗留言，但冇覆過，因為最後一次見佢呻個仔同新抱，一怒之下由美國走咗番香港，我同死黨以為佢返咗香港未返。點知上個月，其中一個死黨通知我同另一個，原來朋友喺2015年8月過咗身，佢由發現有病到過世大概三個月，佢太太直到而家都接受唔到朋友已過世嘅事實，朋友太太話好後悔以前冇好好珍惜同丈夫一齊嘅日子，太過計較太過執著一D無謂嘢，太緊張個仔，忽略咗老公，而家至明白丈夫幾咁錫佢幾咁包容佢，但一切都太遲。當然我朋友個例子唔同樓主，我朋友係錫老婆錫到足，成日見到佢地兩公婆一齊撐枱腳，朋友成世人為家人為工作，總係忽略自己，最後都因為唔想打攪我地幾個朋友冇通知我地。。。佢走得急，留番晒D遺憾俾親友。
比起好多有老公有小三嘅JM，樓主呢單真係小巫見大巫，當然呢D嘢大小都好都係女人最唔想見到嘅，不過樓主好大程度係將件事搞到大大鑊，而家又唔知點收科。人生真係匆匆就幾十年過咗架啦，如果下一刻得番你一個，你又會唔會仲係記住阿伯點衰點衰？
唉，唔覺唔覺又咁晏，又要煲少一集劇。。。
花旗太太生活在花旗國，留意時差，你問我未必即時答到。
發表於 
唔好點評我,電話睇唔到點評
返回列表
