懷孕前後 今日: 11|主題: 330494

樓主, 大家都係男人, 年紀應該差唔多, 又都做左人地老豆, 所以我都有D同情你嘅處境。本來諗住人地家事費事出聲, 而家見攪成咁都忍唔住講返幾句。

一家唔知一家事, 你同阿嫂之間邊個著邊個唔著, 我真係唔識comment。但見你講得出 "我又有唔著, 佢又有唔著", 咁就得喇, 因為本住呢個立場, 你同阿嫂就仲有計傾。就算你唔念自己同個細嘅, 都應該諗下伯母佢老人家。從你地兩個寫嘅野中, 可見伯母係個好媽媽, 連阿嫂都讚佢係個好奶奶。咁一個好媽媽就梗係想自己個仔家庭美滿, 兒孫幸福, 都無謂要佢老人家煩多樣野喇, 係咪？

我唔知你同阿嫂感情點, 但係由你地兩個agree左生個BB出黎開始, 你地就係合作伙伴關係, 目標係夾手夾腳湊大個B佢。可能樓主覺得自己當初唔想要, 阿嫂係要拉埋你落疊, 到生左出黎又達唔到你要求, 而家仲走埋去, 令你好谷氣。但係照我睇, 阿嫂肯懷胎十月, 做未婚媽媽都要生個仔出黎, 已經係表現左誠意。你去打份工, 都唔會一返工就做到識飛喇, 要俾D時間大家。既然大家都有誠意, 其他野係有得傾嘅。兩個本來應該同舟共濟嘅人, 攪到其中一個要跳船, 對你冇好處, 對個B更加無好處, 所以當前第一急務係維持住個家嘅最基本運作, 其他野都係其次, 唔知你同唔同意？

係"維持最基本運作"嘅前提下, 其實好多野都有得傾。餵唔餵人奶？餵就當然好, 但唔餵亦唔見得有好大問題, 反而因為餵人奶而攪到鬧交甚至要分開, 咁對個B就真係好大傷害；三千蚊係多定少？夠唔夠駛？見人見智喇, 如果好似你咁講, 乜都係你買哂, 咁咪平心靜氣同阿嫂傾下D錢係點駛囉。老老實實, 我唔知你搵幾多, 不過條件許可嘅, 俾多少少大家開心又無妨嘅, 反正佢走左, 你請返個保姆隨時都唔止呢個價喇；條件唔許可嘅, 咪打下人情牌, 問下阿嫂兩公婆大家將就下得唔得？人心肉做, 咪攤開黎講囉。

湊細路係長期抗戰, 唔係講緊三五個月, 係講緊最少十幾二十年嘅事。阿嫂頭幾個月身體唔好心情唔靚做少D, 唔代表佢以後唔駛做或者唔會做喎...反而大部分情況都係細路阿媽後來會緊張D, 老豆就比較闊佬懶理。嘈完佢走左去, 就真係乜都你自己一個0肯哂。唔好同自己鬥氣, 今日一時衝動, 將來辛苦嘅咪又係你自己, 就算人地同情你都愛莫能助。

樓主, 我知道你覺得自己處境好慘, 心情唔好難免會火遮眼, 但你要明白, 你地嘅不幸唔係呢度D媽咪做成嘅。其實你POST得係度話阿嫂同佢屋企人, 你都預左佢會同你翻檯架喇！就算成個BK嘅人都支持你, 你就覺得阿嫂唔會走左去咩？咪玩喇, 我驚佢會走得仲快呀！

FORUM上面好自由嘅, 人地講嘅野聽唔聽隨便你, 當然你要咒要鬧要生要死亦都隨便你, 不過咁做法除左會令人諗起港女趙燕X之外, 就於事無補, 好快亦都冇人會再在意你講過D乜。人地講乜都係假嘅, 因為除左你自己之外, 其實無人可以幫到你。That's your life. Face the Music. 做男人就要勇於面對問題, 想辦法解決問題, 樓主都係諗下自己究竟想點喇。