曾被學校視為「毒物」嘅《yes!!》雜誌，7月31號喺社交網站宣布第1219期係最後一期嘅印刷版，為咗緊貼新聞電子化嘅趨勢，佢哋將會推出電子版，都算係一個時代嘅終結。
80、90後(甚至70後)都會認識《yes!!》呢本雜誌，佢曾經係同學們偷偷帶返學校嘅受歡迎刊物，入面嘅「校園投訴組」、「Miss Sex熱線」、「華少」、「少年古域」專欄更可能係各位讀者嘅集體回憶。當年本書仲係叫《Yes!》，創刊不久即深受青少年丶中學生歡迎，更創出每期逾10萬嘅銷售量。後來以藝人照片製作的Yes! Card更加係大受歡迎，其銷售量更代表藝人受歡迎嘅指標。Yes!Card高峯期試過月售500萬張。
《Yes!!》仲有一個極受歡迎嘅專欄名為『城市驚喜』，每期搵一個素人少女當模特兒拍照，有唔少上過呢個欄目嘅女仔更因此踏上星途。曾經上過『城市驚喜』嘅藝人包括鄧麗欣丶張柏芝丶蔡卓妍丶楊愛瑾丶陳自瑤丶李彩華丶徐子淇、李蘢怡、范萱蔚、裕美、賈曉晨等等。而當時13歲，仲係叫梁樂瑤嘅梁洛施更加係一鳴驚人，成為該期雜誌封面。
本書人氣旺，捧人掂，踩人都有一手。當年有傳雜誌老闆倪震不滿劉錫明公開表示對其緋聞女友周慧敏有好感，於是在《Yes!》力踩劉，並以諢號「毒瘤明」稱呼。劉錫明因此人氣大跌，要轉往台灣及內地市場發展。
《Yes!》於2004年賣盤，並改名為《yes!!》。今年7月下旬推出1219期之後久未有新一期推出，引來讀者查詢，雜誌終於宣佈停止出印刷版，將改以電子刊物形式推出。
**************************************************************************************************
Yes!終於都停刊了! 對於呢本雜誌, 真係有好多回憶!
發表於 
返回列表
