好! 講過今日happy friday,就share多一次先! 之後就要聽日先更新啦~~~因為都真係要用力去諗下有咩好寫,各位jm都知,生完BB個人係會記憶力差左...
第二篇 - 做個勇敢日本人!
係我韓國留學嘅時間,我絕大部分都係同台灣人一齊玩嘅,但係同時我亦有一個好好嘅日本朋友,佢大我3年,花名 : 蛋糕姐姐,呢位蛋糕姐姐絕對係一位女中豪傑黎,對於我呢啲又要威又要戴頭盔嘅人黎講,我一直都真心佩服佢做人咁坦蕩蕩嘅
事件一 : 分班
話說呢位蛋糕姐姐性格好可愛,又直腸直肚嘅,每個學期嘅第一日學校都會係門口大堂貼分班結果,所有學生都會一早返學去睇自己分到邊班,再上班房上堂,而基本上分班係冇準則嘅,純粹打散我地再重組嘅啫,而係某一個學期嘅第一日呢,蛋糕姐姐睇完個分班結果就黑口黑面咁上左去班房,當老師一入門口打完句招呼,都仲未開始自我介紹嘅時候,蛋糕姐姐就舉手,跟住就同老師講 : "老師,你唔覺分班結果好有問題咩?!!! 點解我呢班有咁多中國人都仲要分我入黎呢一班啊?!!!"(佢個班大陸人佔左全班嘅一半) 當然,老師同同學呆哂,然後就敷衍左幾句話小息先再傾啦
跟住小息嘅時候,蛋糕姐姐就一個箭步追住老師黎要解釋,而老師就話學校一貫做法都係咁,唔覺得有問題等等...最後係放學嘅時候,蛋糕姐姐就殺到上去搵語言學院嘅院長,要求調班,其實位院長都幾女強人架(因為阿院長係教我個班嘅),但係都係抵唔住蛋糕姐姐嘅攻勢,最後俾佢開左咁多年先例,調左班!!!
事件二 : 同班同學
基本上每一班都一定會有中國學生架喇,雖然阿蛋糕姐姐爭取到去另一班冇咁多中國人嘅班,之但係始終避免唔到要同中國人同班嘅命運嘅,不過蛋糕姐姐個性格咁剛烈,又點會咁易屈服吖...我相信大家都知道同胞講嘢嘅時候分貝之高架喇,我亦唔使再解釋啦,試過有一次同班嘅兩、三位大陸同學開始高分貝講嘢嘅時候,蛋糕姐姐即刻雙手掩耳,極度厭惡嘅表情,再用盡全身嘅力發出... "SHHHHHHHHHHHHHHHH!!!!!!",唔單止個幾位大陸同學即刻收口,係全班都即刻靜哂...
過左幾日之後,個幾位同學又再高分貝、尾音"兒來兒去"嘅時候,蛋糕姐姐再用同一姿態表達佢嘅不滿,不過今次唔係發出 "SHH..." 嘅聲,而係... "啊啦啦啦啦啦啦啦" 然後再一串唔知日文韓文定中文嘅語言,配住同樣尾音 "兒來兒去" ,再加一聲尖叫... 呢一下獅吼功,令到成個學期都安靜無比...
事件三 : 獨島
大家如果有留意下韓國日本新聞,都或多或少會知道下日本同好多地方都有主權爭議嘅,好似我地就釣魚台啦,同韓國都有架喎,就係一個叫"獨島"嘅地方,日本人就叫"竹島",有一次,放學之後我同幾個台灣姐姐加埋蛋糕姐姐去左一間區內都ok出名嘅排骨湯店食飯,個間排骨湯店係老字號,好多公公婆婆上左年紀嘅叔叔嬸嬸去食嘅,而且間舖頭好大間,有幾十枱客,個日仲要係時值lunch hour,全場滿座...我地一坐低,舖頭入面嘅阿豬媽就過黎擺位喇,好似香港咁,食飯都會有濕紙巾供應,點知阿豬媽個頭一放低包濕紙巾,阿蛋糕姐姐就指住叫我地睇
其實咪又係一包濕紙巾...不過呢間舖頭個老細應該係十分愛國嘅,佢竟然係包紙巾上面印左大大隻"獨島是韓國的"!!! 阿蛋糕姐姐即刻面都僵埋,跟住好大聲咁講左句 : "唔係啊!!獨島係我地架!!!!!!!"
我地同枱嘅真係嚇到冷汗都標埋,勁驚隔離啲阿叔會衝過黎打我地...就係全場都望住我地嘅時候,蛋糕姐姐話要去廁所冷靜下,起身行左去,我地就即刻望住啲叔叔做哂口型咁講 "唔好意思,我朋友係日本僑胞,佢太愛國激動左少少...啊哈哈哈" 再配個天真笑容,跟住大家就當冇事發生繼續食飯...最後難為阿豬媽真心以為蛋糕姐姐係韓國人咁愛國,俾左大大舊排骨佢... 當然呢餐飯我地食到好心驚膽跳,怕唔知蛋糕姐姐又唔知會唔會爆幾句咩出黎,所以就快快手食完就走,仲要全程勁搵嘢講轉移佢視線...
後記 : 我同蛋糕姐姐仍然好friend,隔左咁多年都仲會互相關心問候,佢亦會黎香港探我,當然性格仲係咁敢愛敢恨...