本來今日家族成員有團拜, 但而家咁嘅環境, 盡可能都唔出街, 所以早幾日已經推咗, 話唔會出席.
昨晚其中一位成員致電, 想確認一下係咪真係唔出, 梗係啦, 明知另外幾位剛喺內地回港, 假如佢哋唔自律隔離, 將病毒傳播咪冚家散, 幾大都唔出啦, 正所謂留得生命在, 那怕冇會聚.
呢次疫症最得人驚嘅地方就係有潛伏期, 一日患者未病發, 你都唔知邊個係元兇, 就係因為人人都有可能係帶菌者, 所以先至人人自危, 盡量少接觸, 防患於未然.
沙士嗰年, 除咗出去人多地方先至戴口罩之外, 就算返工, 我都冇戴過口罩. 但係今次疫情, 專家講到來勢洶洶, 搞到我只要踏出家門, 就罩不離口, 亦不時狂洗手.
這邊廂, 雖然平時已經囤積食糧, 但總係嫌唔夠, 所以不時都要去街市超市兜個圈, 睇吓有冇得掃平貨.
唔知係咪新正頭本來菜價已經貴, 抑或係加上疫情令來貨唔充裕呢, 我發覺價錢比起平日貴咗幾倍, 根本買唔落手.
雖然貴咗咁多, 但師奶們依然眼都唔眨狂入貨, 當我還在搖頭嘆氣貴貴貴嘅時候, 所有菜已被全部清空, 令好多菜販提早收工.
那邊廂, 眼見多國已不斷改變政策防止疫症入境, 甚至鄰近地區亦做咗好多防範措施, 儘管香港市民好多強烈要求封關嘅呼聲, 可是偉大嘅林女士卻不為所動, 講咗好多歪理胡謅圓謊, 目的就係要與市民對着幹, 只為發洩一己之私心.
有好多人以為佢只係扯線公仔, 阿爺講乜佢就做乜, 所以有乜做得唔妥當, 都唔關佢本人事, 全是阿爺的錯.
無可否認, 大部份時間, 佢都係阿爺嘅傀儡, 但係對於今次疫情處理, 我覺得佢嘅角色並唔係被動, 反而係主動反擊.
老實講, 接二連三大受打擊, 再嚟到四面楚歌咁嘅局面, 阿爺都頭疼至束手無策, 但求每區首長有乜建設性提議, 只要能盡快阻隔疫症蔓延, 你話點就點啦.
從來都話女人記仇又小器, 回顧過去幾個月, 你哋將佢踩到如地底泥, 而家佢可以操生殺大權, 仲唔有仇報仇, 封關? 啋你都傻啦.
呢幾次出嚟, 從佢幸災樂禍嘅表情, 就知佢好心涼, 口話知道你哋想點, 放你哋嘅生命喺首位, 但係行動話你知佢唔只唔會令你得償所願, 而且樂見你哋呢班刁民繼續惶惶不可終日.
之前對佢嘅彈劾只限於口舌之爭, 食得鹹魚抵得渴, 任何當權者都在所難免. 但係對於一個自視甚高卻小家子氣嘅人嚟講, 絕對唔可以被批評, 一朝被彈, 記恨一世.
好似而家生死攸關嘅時刻, 佢以人道理由嚟掩飾背後暗藏更違反人道嘅危機, 藉以作為報復手段, 堅持唔封關, 由得你哋自生自滅.
萬一有人因佢公報私仇而不幸身故, 就讓我哋放長雙眼, 睇吓佢會得到咩報應.
春有百花秋有月, 夏有涼風冬有雪, 若無煩事掛心頭, 便是人間好時節.
發表於 
返回列表
