區議會選舉完滿結束, 成績係反映大多數嘅民意, 眾望所歸, 唯一最遺憾嘅某幾位依然屹立不倒, 怪只怪有死忠/不問世事/唔想改變嘅街坊支持, 同埋對手唔係最理想人選, 因而令佢哋能夠順利連任. 還幸只係微勝, 而非以一貫慣例遠遠拋離, 所以嚴格嚟講勝之不武. 而落敗方能爭取票數, 僅以少數之微落差, 則雖敗猶榮.
換轉以前, 無論選乜, 我一概少理, 只係當某個時段有候選人企街拉票派傳單, 或間中聽到街上傳來廣播宣傳聲帶, 或電視播出呼籲市民前往投票..... 我先至知道 : 喔, 又選舉嘞....... 至於選乜嘢, 甚麽立法會區議會, 甚麽派系有何關係, 通通唔識, 更加唔知有咩分別.
今年適值多事之年, 以前唔理嘅嘢, 喺大趨勢下, 都要稍為瞭解一下, 就算冇可能知道全部, 至少亦要知道少許, 聽得多各方分析後, 才稍為得點零星知識.
呢場抗爭運動傷亡慘重, 除咗當權者責無旁貸之外, 為之護航說項, 顛倒黑白不斷打壓群眾嘅議員亦難辭其疚. 而佢哋居然仲可以厚顏無恥出嚟競逐連任, 實在覺得匪夷所思, 所以下意識裡, 根本唔想呢班人勝出, 否則佢哋將會更猖狂, 市民將會更受苦.
蒼天有眼, 呢班人嘅大多數節節落敗, 就算仍勝出嘅少數, 亦已經潰不成軍, 證明沉默不是懦弱, 選票結果已經透露民意取向.
對於勝出一方, 未必知佢係乜頭乜路, 佢嘅出現, 只係為咗要打低極權一方, 所以佢哋係邊個, 好多人覺得並唔重要.
其實點會唔重要, 佢哋能夠喺舊有政治框架下脫穎而出, 正正係代表人民想破舊立新, 唔想再受制於毫無話事權兼習慣使然下, 並且日漸被剝削公民權利嘅生活模式.
在此, 寄語一班新晉嘅區議員, 一旦進入議席, 就必須負起為民請命, 做人民喉舌嘅使命, 萬勿坐穩一席位後, 被名利沖昏頭, 將要肩付嘅任務拋諸腦後. 一定要時刻謹記毋忘初心, 實事實幹, 想市民所想, 急市民所急, 以免辜負投你一票嘅選民所托.
春有百花秋有月, 夏有涼風冬有雪, 若無煩事掛心頭, 便是人間好時節.
發表於 
返回列表
