本帖最後由 cforchat 於 17-5-22 11:04 編輯
買咗豬骨準備煲湯, 汆水後隨意放喺灶旁備用.
期間狗狗多次進出廚房, 大意嘅我完全冇為意佢動機, 只顧喺飯廳與吾兒閒談.
談話間猛一回頭, 見到狗狗踮高後腳, 前腳攀到灶邊, 口已叼咗一塊豬骨, 被我發現後就急急走開, 我即刻追上, 目的係希望能搶回豬骨, 一來肉未熟二來怕佢被骨哽親.
一人一狗喺廳中追逐, 本來吾兒想幫手, 但我怕殃及池魚, 因為狗狗會為咗食物不惜一切, 到時被噬就得不償失, 所以阻止吾兒加入戰團.
平時帶狗狗去街, 每逢見到佢嘴郁郁似食緊街邊垃圾, 只要我以狗帶用少許力抽打佢後背旁, 佢就即刻將垃圾吐出, 萬試萬靈. 今次我照辦煮碗, 又用狗帶抽打, 但無論點打, 佢都係死咬骨頭唔放. 當我打佢時, 明明不斷向我狂吠㗎啦, 咁都仲可以含住骨頭唔跌出嚟, 佢都算好嘢. 而我相信只要我用力抽, 佢受痛之下一定會放口, 但我又唔忍心大力打, 所以只能喝止, 但美食當口, 佢邊度理我吖, 無計可施下, 我向佢大喊 : 你係狗就唔好走!
佢果然冇走到, 咁梗係唔係佢有自知之明啦, 只係我趁佢匿入琴底時, 將幾張櫈加上我堵塞住, 令佢冇處可逃竄.
估唔到將佢逼埋牆依然未能令佢張開口, 我試圖伸手去硬搶, 佢已發出㗅㗅聲, 一副誓死保衞豬骨嘅姿態, 見佢目露凶光, 為免我成為傷殘人士, 只好稍稍退後. 見我冇再咄咄進逼, 佢先至吐出骨頭, 趴喺地上慢慢品嚐.
既然搶骨無望, 我索性蹲喺度望佢食相, 肉就一早食晒, 剩下骨要慢慢咬碎, 見佢有幾次因為哽唔落而吐出嚟, 好想伺機搶, 不過未行動又已被佢放入口, 似乎唔食晒所有就唔肯罷休.
唉, 最衰都係自己疏忽, 點解咁粗心將豬骨放喺佢觸手能及嘅邊沿呢, 好在啲肉係咁意都烚過吓, 而佢所叼嘅骨又唔係三尖八角, 否則插穿腸胃都有之. 鬼咩!邊估到佢居然光天化日我棟喺度之下都夠膽行事至得㗎, 下次真係要好小心, 不然一個不留神又畀佢有機可乘.
見佢食完晒嘴舔舔, 仲未捨得離開案發現場, 我已經逼不及待攞濕紙巾抺拭地下, 以免有肉汁留下被佢踩到. 當抹到佢處叫佢借一借, 佢又㗅, 跟住一個唔該連張紙巾都食埋落肚, 仲好似好好味咁款, 畀佢激奀!
好! 唔抺地, 咁抹手腳啦, 怕佢剛才趴下時沾到肉汁, 到時又跳上床印來印去, 真係唔得死. 已經好溫柔同佢講要抺手手, 佢仲係以防護者自居, 唔只㗅, 仲向我齜牙咧齒, 樣子兇狠如臨大敵. 作死呀! 我係你敵人咩? 我係你米飯班主喎, 食骨頭食懵你呀?
平日乖巧可愛聰明, 令我視之為心頭肉嘅狗狗, 呢刻變為心頭刺, 令我恨不得將之拔除, 枉我咁愛錫佢, 有乜食都與佢分享, 居然視老娘為死敵, 簡直養唔熟!
隔咗無耐, 佢自行走入浴缸嘔, 嘔出一啲碎骨. 係咪衰呢, 明知自己年紀大難消化就唔好食骨頭啦, 好哋哋等煲熟至餵你食肉咪好囉, 阻止你仲想咬我㖭, 係要攞苦嚟辛.
幸好嘔咗一次就冇再嘔.
為咗表示我嬲, 我望都唔望佢, 平時大家四目交投, 佢總會走過來與我痴纏一番, 跟住就會得到零食. 可能佢亦知自己衰咗, 而我又有殺氣, 所以都唔敢過嚟, 只係無厘神氣俯伏喺地, 眼睛跟住我身影轉.
不過一到開飯, 佢又習慣性地走嚟我身邊, 我同佢講你仲好意思過嚟唔駛旨意我餵你. 佢並無氣餒, 繼續望住我...... 準備放入口嘅豬骨.
唉, 真係前世, 呢頭話唔餵, 嗰頭就一啖又一啖放入佢口, 唔駛一頓飯時間, 主僕關係就和好如初.
毫無疑問, 佢係主子, 我係狗奴才啦.
春有百花秋有月, 夏有涼風冬有雪, 若無煩事掛心頭, 便是人間好時節.