Baby Kingdom - 親子王國 香港 討論區 › 首頁 › 興趣嗜好› 閒來無事說些事.....

興趣嗜好

收藏本版
回覆 發帖
返回列表
跳至頁

首頁
3233343536...42

尾頁
   7
cforchat


大宅

積分: 2644


661#
發表於 20-5-25 10:32 |只看該作者
上次講咗住獨立屋與大廈嘅好處與唔好處之後, 話口未完, 即刻就出現壞處之一........被樓下投訴漏水, 滲入佢屋內. (假如住獨立屋, 係就係會顯得屋大孤清, 不過全部嘢都係自己話事, 唔駛驚被投訴, 又唔駛投訴人)

當家由管理員帶領下, 親自前往視察, 發現樓下天花牆邊位置明顯有水漬, 睇情況的確係關我哋事, 因為正常情況下, 天花位置唔應該有水喉位, 一定係我哋唔知邊度漏水, 先至會滲去人哋度.

返到屋企, 當家就逐一搜尋有冇漏水嘅地方, 但礙於幾乎全部水管唔係藏牆就係藏地下, 肉眼根本睇唔到邊度漏, 同埋究竟有冇漏, 真係老鼠拉龜無碇埋手. 最後只發現廚房門框下有一處漏洞, 當家懷疑唔知係咪平時洗地時, 地拖扭得唔太乾, 因而滲水入洞內, 日積月累就令到下層出現水漬.

其實照推算無論點計, 都覺得將責任推落呢個漏洞太牽強, 除非洗地係直接用水沖洗, 否則就算地拖濕極, 都唔足以多水到流入洞內, 不過既然冇其他可疑處, 唯有當住先, 所以就去買一啲英坭填補漏洞, 希望連滲水機會都導絕埋, 下層水漬自然就消失.

過咗一段日子相安無事, 以為真係關個漏洞事, 正在疑惑洗地竟然可以滲得咁厲害, 經填補後真係行得通. 當家果然好嘢, 可以一勞永逸唔駛再被投訴咯. 點知接到管理處通知, 下層水漬唔只冇消失, 反而仲更加嚴重, 驚我哋唔信, 更展示埋住客所拍嘅照片, 證明之前與之後嘅強烈對比, 當家睇完冇聲出.

事後當家話, 其實一直都想換晒全屋嘅喉管, 不過因未有實際需要, 所以冇動力坐言起行. 而家好啦, 人哋給力, 冇得擱置嘞, 既可證實係咪內藏水管爆裂漏水, 亦可順便換晒水喉, 唔駛成日得個想字卻唔付諸行動.

喺我嚟講, 唔係想撒賴, 只係諗住等疫情過後先至動工, 始終仲住喺度, 讓陌生人進進出出開工, 萬一係來自疫區或係帶菌者咁點算呢, 到時就千防萬防, 家疫難防. 所以只好請管理員同下層住客講聲, 請對方通融多一排, 一旦疫症消失, 會馬上搵人維修.

管理員亦算明事理, 知道而家風頭火勢, 肯定冇可能即刻搞得掂, 反正問題唔算嚴重到要即時解決不可, 只好大家將就一下, 容後再處理.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2644


662#
發表於 20-6-2 09:14 |只看該作者
因為疫情關係, 原本靠遊客帶旺場嘅地方, 紛紛出現結業潮, 例如藥房, 食肆..... 幸保不失嗰啲都唔好得去邊, 生意額直線下降, 能夠明哲保身不受影響少之又少.

而以遊客佔大多數嘅兩大樂園---------廸士尼與海洋公園, 由於地方大, 當中涉及大量工作人員薪金, 動物保健與飼料, 場地維修, 機械設施保養…… 幾乎日日喺度燒銀紙, 如果冇遊客入場消費幫補一下, 想繼續營運捱到疫情消失, 直至遊客再度重臨而解困境, 睇怕短期內都好難實現.

好多國家嘅疫情雖然已稍為緩和, 亦逐步慢慢回復正常生活, 但係多月來發生嘅一切, 群眾唔多唔少仍存有餘悸, 咁多死亡數字, 當中有幾多係佢哋嘅家人朋友呢? 試問喺哀傷陰霾籠罩下, 短期內又點會歡天喜地去旅行吖.

打開門口做生意, 就算只有小貓三四隻, 公園仍然要照常營業, 雖然來自幾隻小貓嘅收入, 連杯水車薪都講唔上, 只係好過零收入而已. 儘管已節流減少工作人員, 減少開放部份設施, 不過都無補於事, 因為成本實在太重皮嘞, 致令海洋公園不得不告急.

人生中第一次踏足海洋公園, 係讀緊小學一年班學校旅行. 見到纜車半天吊隨風飄搖, 覺得好牙煙, 好驚要坐上去, 幸好只得高年班先可以坐, 低年班就喺草地野餐.

第二次就係出嚟工作之後, 帶父母親去見識一下, 嗰次係農曆年前後, 好多遊客, 搞到想睇嘅表演, 要預定時間一早去霸位, 如果唔係唔只冇得坐, 連位都未必攝得入. 好似鸚鵡表演時, 因為遲咗少許到達, 結果父母要喺人頭湧湧之間嘅空罅望向表演臺, 辛苦之至.

多年以後, 因為貪平買咗全年套票, 為咗回本, 幾乎隔個星期就去一次. 每次一定會到有海獅海豚海狗出場嘅地方捧場, 因為佢哋實在太可愛, 表演又落力, 唔去探望一下驚佢哋唔開心, 所以係必看項目之一.

另一個必做就係乘坐纜車, 居高臨下飽覽四周風景, 一樂也. (雖然已坐過無數次, 不過當經過中途每段纜塔, 機器發出巨大隆隆聲, 個心不期然就離一離, 同時諗起一則細細個聽過嘅都市傳說 : 一家人乘坐纜車, 喺途中發生意外, 連人帶車跌落下面草叢, 當局為免引起恐慌而封鎖消息, 所以新聞從未報導過……不禁向下望, 萬一不幸發生意外, 跌喺邊度至可以減低受傷程度)

周圍走走逛逛, 跟住就會讓吾兒喺遊樂場玩耍, 亦讓我哋可乘機唞唞閒話家常, 磨到差不多關園至肯離開. 後來因為實在去得太密, 多少感到有啲悶, 但唔想蝕, 於是去到後期, 試過全日裡不斷來回坐覽車, 都算係另一種過癮之處.

假如海洋公園真係關閉, 我最唔捨得只有園內嘅所有動物, 對於是否集體回憶, 對我意義不大, 畢竟由年少至年老, 每一日都係回憶, 滄海桑田, 留在腦內就好, 不需靠實景實物才能喚起記憶.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

yinfai824


禁止訪問

積分: 190


663#
發表於 20-6-2 17:47 |只看該作者
提示: 作者被禁止或刪除 內容自動屏蔽
提示: 作者被禁止或刪除 內容自動屏蔽
私人傳訊回覆 引用

cforchat


大宅

積分: 2644


664#
發表於 20-6-8 09:24 |只看該作者
近數年來, 每到春去夏來季節, 我總會成身痕癢, 尤其是小腿, 奇癢難當. (父親話因為年紀大新陳代謝慢喎, 真直接!)

如果發生喺秋冬季, 顯然係天氣乾燥所引起, 但春夏之間痕, 本應算係濕疹之一, 不過我覺得唔係, 應該係因為出汗所引致. 但奇怪係, 全身都有出汗架啦, 點解多數都係小腿, 只偶有發生喺手臂呢, 真係摸不着頭腦.

每次癢起上嚟, 我係無所不用其極, 只為達到抓到癢處嘅舒暢感, 狂抓狂刮, 恁地已見血, 一日未過癢期, 依然不斷抓抓刮刮. (令我諗起狗狗抓癢時都係如此狠樣, 先爽而後已)

大部份時間感到痕癢, 多數係處於靜止狀態, 唔係勞動中, 或者做緊嘢時, 分散咗注意力, 到坐低休息嘅時候, 大腦就發出訊號知會我, 又身痕咯喎, 好抓癢嘞喂.

睇緊戲時, 小腿內側又痕, 當其時着住窄腳牛仔褲, 難以摺高讓我用一啲尖銳物件直接喺皮膚抓刮, 只好拈起癢處部份褲角, 藉着牛仔布磨擦力抓癢, 奇爽無比. 經過一輪死命地又搓又擦, 終於止到痕, 而抓過嘅位置同以前一樣, 都係感到炙熱.

每次如有皮膚被猛烈抓癢後, 當晚多數瞓得唔好, 因為會感到傷口疼痛而輾轉反側, 不過好在第二日已經唔多痛.

如常地, 呢晚又係覺得好痛, 唯有同自己講, 鬼叫你忍唔到痕咩, 為貪一時之爽唔理後來會痛, 自作自受, 活該! 點都要頂一晚架啦, 聽日咪冇事囉.

翌日, 痛楚程度並冇減輕, 平時我好少會望傷口(因為血肉模糊慘不忍睹, 只在洗澡時稍為瞄一瞄赤紅皮膚), 今次實在太痛, 忍唔住望吓…….. 傷口面積如兩隻手指大小, 以前經過一晚之後, 滲血位已乾涸, 但係今次唔只未乾涸, 仲滲出黏液, 周圍皮膚又紅又腫, 唔怪得咁痛啦.

以為隔咗一日, 第二晚應該都冇咁痛啦, 點知唔只痛到瞓唔好, 連落牀行步路都痛到跛吓跛吓. 唉, 未試過抓癢抓到如斯下場, 今次真係愈快樂愈大鑊.

另外, 除咗本身傷口痛之外, 連帶傷口下方嘅皮膚都覺得有種被撞傷後嘅痛, 由於痛感範圍大, 所以有時都分唔清痛處係來自傷口定係唔知幾時真係撞親所以痛.

幾日過去, 傷口唔只未埋口, 而且仍然滲黏液, 聽講糖尿病患者, 傷口好難埋, 唔通我有糖尿病? 嚇自己嘅同時, 亦要處理傷口, 就係以膠布棉紗包住, 望能早啲痊癒.

經過悉心呵護, 終於結焦. 另一邊廂, 第二處痕癢時, 仍然繼續抓刮, 不過就搵物件幫手, 唔再隔住衫褲.

多年來抓癢無數, 卻未試過如今次咁嚴重, 究其原因, 可能係牛仔褲嘅質地粗糙, 加上隔住層布, 落手失輕重(直接用物件反而可控制力度, 而且有啲衣服物料, 觸及皮膚本來就有痕癢感, 致變成愈抓愈癢), 不知不覺加大咗力度.

奇怪嘅係, 我應該冇撞傷過, 點解傷口附近會出現撞傷嘅瘀痛呢, 唯一可能, 就係當我瘋狂地抓時, 嚴重嘅就傷及真皮層破損流血, 次一級就只係傷及肌肉而冇傷口.

當家訓斥 : 你估自己仲後生咩, 老人家傷口已經難埋, 你仲抓得咁狼死, 唔爛肉算你好彩…….. (下刪九百字)

我眼望住佢講嘢, 碰巧小腿又痕, 我忍唔住又出手…….. 構成佢有佢講呀講, 我有我抓呀抓嘅畫面. (唉, 死性不改!)

春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

tuobaheng


禁止訪問

積分: 499


665#
發表於 20-6-8 10:47 |只看該作者
提示: 作者被禁止或刪除 內容自動屏蔽
私人傳訊回覆 引用

cforchat


大宅

積分: 2644


666#
發表於 20-6-17 10:23 |只看該作者
月光族朋友, 數年前千方百計想方設法又賒又借訪尋名醫, 終於人工授孕成功, 得償所願生咗一對女兒, 雖然超出預算要養多一個, 但都係一件開心事.

最近傳來消息, 又成功追多一胎, 又係打孖來, 一仔一女. (對有錢人家嚟講, 簡直係天大喜訊, 但對於基層家庭, 算唔算係晴天霹靂呢?)

我聽到後, 唔只冇戥佢哋開心, 反而戥四位小孩覺得悲哀, 生在一個月月清嘅家庭, 莫講話過奢華生活, 連基本生活都未必有着落, 唔難過就假.

為人父母, 養一對吃力之餘, 不失都有快樂處, 話晒有孩承歡膝下, 就算生活拮据, 應該都可稱得上苦中一點甜. 可是若然來多一雙就唔係咁講, 衣食住行供書教學, 每一樣支出都要計四份, 以今時今日物價高企嘅水平嚟講, 不可謂不百上加斤.

我問朋友, 既然已經有兩名, 點解仲要嚟多次, 佢答 : 我想第日老咗嘅時候, 有仔女作為依靠..... 吓!? 農村人就話養多幾個, 第時可以落田幫手耕種, 又或者有錢人想多幾個仔女傳宗接代. 但佢嘅目的居然係養兒防老, 會唔會諗多咗呀???

人哋話, 兒女到來, 一係報恩, 一係討債, 屬於邊種, 就要睇大家嘅前世係佢欠你定係你欠佢. 前者咪可以享清福囉, 後者喇喎, 能夠自給自足唔駛攤大手板攞錢已經萬幸, 仲旨意佢養? 睇吓下世有冇機會啦. 況且你將資源分薄晒, 佢唔怪你供不應求至奇, 想佢反饋, 真係想得美.

好嘞, 當四個仔女都聽教聽話好孝順, 但係喺佢哋未侍奉兩老之前, 係咪要先投資喺佢哋身上, 然後至有回報? 例如花金錢提升品格培養, 學業進修....... 而投資涉及風險, 可能全軍覆沒渣都冇. 若然唔投資, 就要視乎孩子是否天資聰穎, 係咪不需花分毫都可以擁有德智體群美, 就算唔係一門四傑, 只要其中一個生生性性肯睇住兩老, 靠佢頤養天年, 應該都唔難, 難就難在, 有冇嗰份福氣去享兒孫福啫.

假如我係佢嘅兒女, 一定會埋怨父母點解要生我出嚟, 一來年事已高, 二來經濟環境又唔好, 當我喺學業上最需要用錢嘅時候, 佢哋已經退休失去勞動力, 積蓄又所餘無幾, 畀得阿大嚟阿二就掹掹緊, 阿三阿四就更加排隊都未輪到. 話就話可以向政府申請援助, 但一闊三大, 顧得頭嚟顧唔到腳, 一個唔該兩老未等得切安享晚年就兩腳一伸, 留低四個自生自滅....... 只係想像都覺得坎坷.

我再問佢, 其實有冇家人幫手一起湊小孩呢, 因為除咗生活費之外, 人手都好緊要架嘛. 佢話阿媽同阿哥應承會幫手, 無論喺經濟上或照顧方面都會關照. (但阿伯母已經九十幾歲, 一直都係靠阿哥養, 而阿哥平時係大花筒, 仙都唔仙吓, 份工又搵朝唔得晚, 加上近年病痛纏身自顧不暇, 返一日工請四日假, 真係唔知點樣幫)

或者係我過於悲天憫人, 總認為既然決定將小生命帶來世上, 就要畀最好嘅佢, 生佢出嚟嘅原意係為咗疼愛佢, 而唔係要佢受苦, 為咗私利而要佢陪我過捉襟見肘嘅生活, 我覺得係一種非常不負責任嘅行為.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2644


667#
發表於 20-6-29 09:45 |只看該作者
接到長輩女兒嘅電話時, 我正在煮緊飯…….

佢語帶哭音話長輩而家喺醫院, 問我會唔會去睇吓.

乍一聽到, 個心離一離, 雖然與長輩感情一般, 只在過年時才喺家族宴上碰面, 其餘日子鮮有聯絡, 不過話晒叫做睇住我大, 突然被告知入咗院, 仲要情況看似好危急, 內心不免有點傷感, 唉, 人生無常, 話走就走, 實在令人唏噓.

放下話筒, 當我猶豫緊應該立即去定係食完飯至去嘅時候, 電話又響, 今次係長輩夫人, 兩母女輪流打嚟, 睇嚟情況真係唔太樂觀.

點知長輩夫人嘅語氣卻輕描淡寫, 與先前佢女兒告急嘅語調大相逕庭, 到底發生咩事呀?

原來長輩連日來感到難以唞氣, 行步路都唔夠氣, 最初以為係年紀大, 加上感冒引起氣管收縮而唔夠氣, 所以就去睇家庭醫生開咗啲藥嚟減輕不適感. 可惜服藥後情況並未有明顯改善, 而且呼吸時亦感到胸痛, 辛苦咗幾日, 終於忍唔住叫救護車送入院. 長輩夫人話, 連日來已不斷勸告長輩入院檢查, 但都遭長輩強烈抗拒, 而家居然肯主動提出, 可想而知佢已經頂唔順.

夫人話, 長輩交帶落, 如果親戚知道佢入院, 唔駛特登去探佢, 佢會喺出院後再約大家出嚟飯聚.

聽完長輩夫人一番說話後, 似乎情況冇想像中咁壞, 應該休養幾日就可以出院, 不過既然得知佢入院, 作為後輩點都要去探望吓, 所以就食埋飯至慢慢出發.

去到醫院, 見到幾位親戚已在走廊閒談, 我點吓頭先打個招呼, 等探望完長輩後再出嚟與佢哋寒暄.

長輩臉上被罩上幫助呼吸嘅儀器, 靜靜仰躺於牀上, 夫人與女兒立於牀邊, 默默無言地望住無知無覺嘅長輩. 據佢哋轉述醫生所講, 初步檢查唔到咩事, 只好先注射藥物, 令佢呼吸稍感暢順, 同時採集細胞樣本去種菌, 待知道屬何病菌, 才能對症下藥, 所以暫時冇嘢可以做, 只有維持原狀.

長輩係於凌晨時份叫救護車, 入院後一直等到黃昏至被送上病房, 早知要等咁耐才受理就早啲入啦, 平白要受多十幾個鐘頭苦, 幾唔抵呢.

又, 如果我係長輩夫人, 根本唔駛問佢肯唔肯入院, 直接叫救護車, 到時當救護員入咗屋, 一人一句專業意見, 唔到佢因為諱疾忌醫而寧願繼續忍痛都唔肯入院. (事後與父母親談起, 佢哋都話親戚們對於夫人冇及時行動, 致令長輩拖延病情都有些少微言.)
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2644


668#
發表於 20-7-17 09:31 |只看該作者
肺炎疫情又來了, 而且情況更加嚴峻, 實在令人擔心.

歸根究底, 或者與市民嘅防護意識降低咗都有啲關係.

就講我, 之前風頭火勢當刻, 出入步步為營, 例如搭升降機時, 會用紙巾按掣, 去超市購物時, 又會以紙巾覆蓋手推車手柄, 唔係要買嘅嘢, 盡量唔掂, 回到家第一時間狂洗手, 亦唔敢出街用膳.

後來見每日只有零星個案, 有時甚至零數字, 於是無論精神上或行動上都鬆懈下來. 搭升降機時冇再用紙巾, 改以小範圍嘅指尖按掣, 到超市購物如常地用手推車, 冇用紙巾覆蓋手柄, 就算唔買嘅嘢, 基於八卦都會攞上手研究一番, 回到家雖然都會洗手, 但只係求其地濕吓水就算, 叫做好過冇, 出街用膳嘅次數明顯多咗........

以為疫情將近結束, 所以就將崩緊多月嘅精神鬆懈下來, 逐漸地失去防範, 誰不知病毒又悄悄來襲, 令好多人中招.

之前個案, 大多數都係屬於有直接接觸嘅群組, 或者係外來人士, 容易追蹤得到而及時阻截. 但係今次多咗唔少原因不明嘅感染者, 根本唔知源頭, 何來可截呢, 所以今次爆發至咁得人驚嘅地方, 就係因為喺我哋四周圍, 可能存在着隱形帶菌者, 稍一疏忽, 隨時被傳染, 然後又傳播畀下一位, 幾何級數咁發展落去, 致使確診數字愈來愈多.

既然又嚟了, 即係又要打醒十二分精神去抗疫, 唔只繼續之前嘅防護, 甚至係有過之而無不及. 希望喺人人又恢復防禦措施之下, 疫症除咗好快可以控制之外, 亦盡快銷聲匿跡, 還我哋一個唔駛再戴罩嘅正常生活.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2644


669#
發表於 20-7-23 10:02 |只看該作者
屋企個雪櫃已經用咗好多年, 以前佢好修身, 唔會食得過飽, 因為我日日放工會買餸, 多數都係即買即煮, 加上嗰陣時需要雪藏嘅特價品唔係太多, 所以除咗基本煮食材料同埋剩飯剩菜之外, 雪櫃都算鬆動.

自從唔駛返工, 養懶咗個身, 非必要都唔想落街, 於是每當落街就盡可能買定幾日食材, 肉類蔬菜生菓一大堆, 令本身唔係好大容量嘅雪櫃, 除咗要容納必須品, 仲要額外兼顧突如其來特價品, 因而日漸發福起來, 唔只塞到爆, 有時甚至連門都閂唔埋, 要用封箱膠紙黐住, 才不至於泄出冷氣而令食物變壞.

雖然雪櫃運作如常, 製冷功能亦夠凍, 但話晒年事已高, 如再經我無日無之對佢施壓摧殘, 遲早實一命嗚呼, 到時內裡食物肯定遭殃. 所以要趁佢仲有氣息時開始尋覓替身, 以防佢突然猝逝, 唔駛揦手唔成世.

搵咗好一陣子, 終於搵到一部心儀款式, 外表係其次, 最緊要夠高大威猛, 可以滿足我苛索無度嘅需求.

格完一輪價, 決定扑搥落單, 點知冇貨, 新貨要個幾月至到, 如想即要, 就要問其他供應商攞貨, 不過價錢會較貴. 我見舊機仲食得吞得一切正常, 冇急切換機需要, 等個幾月問題不大, 無謂亦唔想額外要畀多啲錢.

天氣炎熱, 見超市有特價脆皮雪條, 於是就入咗貨, 由於入得唔多, 所以就限住自己一日只能吃一條.

呢日, 如常地攞起雪條品嚐, 點解一咬落感覺溶溶哋唔係好凍架呢, 早一日仲好硬淨架.

即刻打開雪櫃檢查, 有啲食物包裝袋表面有水珠物體, 通常溶雪至會有咁嘅情況. 再摸摸機身外圍, 每當製冷時會感到灼熱燙手, 亦會發出噪音, 但係而家冰涼如水, 沒半點聲響, 照此情況推斷, 死機可能性極大. 即刻晴天霹靂, 唔好喇啩, 霎時間叫我點處置內裡食物呀? 天氣凍還好一點, 但時值30幾度高溫, 放喺室溫稍為長啲時間尚且容易變壞, 更何況要放一段日子, 直至買到新雪櫃為止, 咁呢段時間啲嘢點算?

嗱, 係咪真正朋友, 呢一刻就係最好嘅考驗, 即刻問住喺附近嘅各方好友, 可唔可以騰出雪櫃空間嚟擺放幾日, 結果只得一個朋友可以闢出一角讓我暫放幾日. 明嘅, 始終一家一主, 個個屋企嘅雪櫃都有其作用, 換轉係我, 那怕只係借出一小角亦愛莫能助.

幸運地(或是不幸?), 終於搵到真正嘅朋友. 之所以猶豫緊係幸定不幸, 講白啲, 咪即係平日除咗煲水之外, 幾乎不舉炊不開爐, 雪櫃只用嚟放汽水嘅單身一族囉. 只有佢, 先可以喺一時三刻解我燃眉之急. 若然佢已有家室, 怕且都難以援助.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2644


670#
發表於 20-8-3 10:44 |只看該作者
唔萌起換雪櫃嘅念頭之前, 雪櫃仍然好地地, 一旦得知將要被撤換, 就即刻死畀我睇, 如果話只係啱啱碰着剛剛, 也未免太過巧合吧.

當初為咗慳嗰少少錢, 寧願等一頭半個月嘅新貨, 都唔肯畀貴啲喺第二間攞貨, 結果未等得及新貨, 雪櫃話死就死, 一啲都唔畀面. 如果有早知, 就會速速磅水, 唔駛搞到而家咁惆悵, 因為慳埋嗰啲錢, 唔夠我買頭痛藥.

好在有朋友伸出援手, 令部份食品有棲身之所, 總算冇咁閉翳, 於是就將一啲非雪藏不可嘅食品漏夜運送過去, 餘下食得就食煮得就煮, 盡量避免浪費.

而之前慳住食嘅脆皮雪條, 我驚中途已溶, 會弄髒朋友雪櫃, 只好即時解決. 由於已唔凍, 一咬即溶嘅口感我完全唔鍾意, 賸下兩條, 都唔知點處置. 當家拍心口話佢包, 難得佢唔嫌食熱雪條, 我先遞上一條為敬, 以防佢縮沙. 佢嘴舔舔一口咬下脆皮, 卒不及防內裡本已仲算係雪糕嘅固體已變成液體, 結果流到一地都係, 搞到佢急急走到廚房, 以鋅盆兜住雪糕水, 極度狼狽. 我問佢仲食唔食埋最後一條 (嚴格嚟講應該係飲), 佢硬住頭皮頂埋去, 鬼叫佢話包咩. 哈, 佢梗係以為可以慢慢舔慢慢嘆, 所以話全包, 誓估唔到居然係飲, 恨錯難返.

由發現雪櫃已死開始, 我不時地去摸摸周邊, 希望再次在製冷, 再次發出聲響在運作, 唔係期望佢死而復生, 只係希望能夠迴光反照幾日, 捱到新雪櫃到才正式壽終正寢, 可惜奇蹟並冇出現, 佢依然悄無聲息.

瞓至半夜, 見到廳中有燈光, 出去視察, 當家仲喺度睇電視, 見到我, 就以一種似怪責嘅口吻講 : 雪櫃又着番嘞……. 嗱, 我先唔理雪櫃何解會番生呢點, 我要搞清楚, 佢點解會用咁嘅態度同我講嘢. 喂! 雪櫃停止咗運作十幾個鐘, 期間佢自己都親自檢查過電掣插頭, 證明一切正常, 又不時左摸右摸期望有溫度, 最後兩個人四隻眼齊齊見證佢已打柴, 做乜而家好似係我一個人睇漏眼, 導致又要搵人收留食物, 又要另買一部咁大費周章, 關我鬼事咩, 我都唔知會咁架喎, 呢條友與雪櫃一樣, 都係神神哋.

大發雷霆剷完佢之後, 我就伸手去摸雪櫃四周, 並打開檢查一番, 果然回復正常狀態, 內裡食物紛紛開始凍結. 唉, 諗起四條脆皮雪條, 早知有機會硬番, 就唔好糟蹋佢哋啦.

本來諗住翌日去朋友處取回暫存食物, 轉念一想, 都係唔好住, 萬一雪櫃只係迴光反照, 即係唔凍得好耐, 到時唔通又去打攪人咩, 反正新機仲有幾日就到, 不如到時先直接安頓啲食物進駐新家啦.

既然雪櫃仍然正常, 我就老實不客氣, 繼續買少少日常嘢, 亦唔再急於要清存貨, 總算冇咁頻能.

過往經驗, 雪櫃多數喺未壞之前就已被更換, 從未試過用到死機, 今次竟然死而復生, 實在覺得好奇怪, 係佢哋天生有假死功能? 抑或係見我陷於困境而重生紓我愁容? 答案我不得而知, 我只知我需要感恩, 令所有食物能夠保存下來, 免除我浪費食物之罪名.

新機送到時, 舊機被運走, 望住佢背影, 我有啲唔捨得, 話晒佢硬食咗咁多唔係必須嘅乾濕貨, 直至最後依然拚命地為我工作, 實在有愧於佢. 聽運輸工人講, 若然舊機冇壞, 被翻新後會另有去處, 希望到時佢覓一主好人家(無飯家庭), 唔好再被摧殘, 輕輕鬆鬆頤養天年.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2644


671#
發表於 20-8-10 10:06 |只看該作者
自開埠以來, 香港從未禁止過市民堂食, 亦未限制過食肆招待客人準則. 近日基於疫情極度嚴峻之下, 政府為免加大人傳人風險, 於是實施禁堂食舉措, 亦規定食肆開放範圍與守則, 圖以隔絕傳播鏈.

實行首日, 從新聞片段所見, 放午飯時候, 街上好多地方都被手持飯盒嘅打工仔佔據, 公園行人路球場看台等等, 只要有得坐嘅地方就有人在吃飯. 若然搵唔到位或唔想行就索性捧住盒飯企喺度食, 有人甚至喺馬路邊席地而坐旁若無車, 一邊吃飯一邊吸入汽車排出嘅廢氣, 見到都牙煙.

時值盛暑烈日當空, 對於平日坐冷氣房嘅打工仔, 就算因種種原因, 唔可以喺辦公室開餐, 要喺街上同人爭一席位, 雖然都好熱, 但係午膳後, 又可以返公司繼續涼冷氣, 叫做辛苦極都有個譜. 最慘係由朝到晚喺戶外工作人士, 原本可以趁午飯時喺食肆涼住冷氣舒舒服服慢慢吃飯嘆杯茶, 乘機唞一唞, 點知而家唔只冇冷氣, 連坐都冇得坐, 辛苦搵來想吃口安樂茶飯都唔得.

片段中, 被訪問者大汗疊細汗, 表情無奈, 有啲自謔似乞兒, 有啲就話好折墮......雖然我未曾經歷過, 都不禁戥佢哋覺得可憐. 邊會諗到呢啲情景, 居然係發生喺現世代號稱世界金融中心兼科技發達嘅香港, 簡直諷刺.

政府出發點, 如單純地只想控制疫情而有此策略, 乃無可厚非. 問題係實行計劃前, 係咪應該設想周詳, 然後才付諸行動呢? 譬如當全日禁止堂食時, 早晚餐就話可以喺屋企食啫, 咁對於嗰啲做無定處平時去到邊食到邊嘅外勤人員如何解決午餐呢? (我諗高官們一定係一時疏忽諗漏咗, 以為人人都係坐冷氣房, 可以到會食物慢慢嘆, 完全未醒起仲有一大班基層群組要顧及, 所以就草率地話做就做.)

或者因為太過急就章, 致使午市當街開餐畫面成為十大奇景, 加上民怨沸騰, 於是又即刻剎停措施, 兩日後恢復早午市. 雖然朝令夕改使人無所適從, 但都好過繼續讓民憤升溫. 雖然食肆人數與空間都有限制, 起碼叫做有個落腳點, 唔駛咁陰公捧住盒飯當街當巷食.

憑良心講, 政府出此對策來禁止人流, 其實係冇辧法之中嘅辦法 (有辦法預防卻由得啲人來去自如無須檢疫呢啲衰嘢就唔好講啦), 畢竟除罩吃飯, 就算隔幾遠, 只要有帶菌者混在其中經空氣傳播, 無色無味細菌沾在餐具上食物上, 好容易就進入人體, 冇堂食, 風險相對就低咗. 問題係, 如果冇僱主配合, 讓僱員停工在家, 根本就唔成事.

當然, 好多行業都唔可以停下來, 否則就會七國咁亂, 所以政府亦只可以提議, 唔敢強逼私人機構必須停工. 而我所指, 亦都係可以在家工作, 非必要返公司嘅情況, 唔駛出門, 少咗人喺街, 自然就少咗傳播風險. 可惜好多老闆都唔想畀着數僱員, 結果全世界依然要喺疫情下繼續返工. (最衰都係嗰一小撮害群之馬累街坊啦, 明明在家工作, 卻唔生性地出外消遣, 仲要低智地有圖為證, 如此一來, 咪搞到僱主卻步, 寧願僱員日日冒險返工, 都唔想畀佢哋有躲懶機會)

假如政府決斷英明, 假有僱員都能自律, 假如僱主皆以僱員健康為重, 能體恤打工仔搵食艱難, 配合政府行動停工停市, 史書上就唔會記載折墮的一天嘅有關畫面流傳於後世.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

kakakitkit


複式洋房

積分: 172


672#
發表於 20-8-17 05:21 |只看該作者
cforchat 發表於 17-3-5 15:16
天氣預告話未來幾日將會潮濕, 所以呢兩日搏晒命將污衣床單被單枕頭套全部交畀洗衣達人(即係洗衣機), 希望佢 ...

-
私人傳訊回覆 引用

cforchat


大宅

積分: 2644


673#
發表於 20-8-17 15:54 |只看該作者
自從屋企漏水整濕樓下天花一事, 我成日都心掛掛, 好想快啲搞掂, 無奈疫情未過, 只得繼續忐忑.

一日, 當家話佢有個朋友嘅屋企啱啱裝修完, 覺得裝修師父手工幾好, 可以介紹畀我哋, 當家問我意見. 初初我都係維持原意, 唔想喺呢段期間被陌生人進出家門, 後來經唔起佢游說(佢應該都係被朋友連番游說), 話純粹上嚟報個價, 可以心中有數喎.

其實就算啱價, 又唔開得工, 都唔知報嚟做乜, 話晒到真正動工嗰日, 起碼隔咗一大段時間, 到時價錢未必一樣, 所以而家報價根本冇意思. 不過既然人家咁有心, 唔好太過拒人千里, 就姑且畀師父上嚟報個價, 只係入屋睇幾睇, 應該問題不大.

原本只係更換廁所水管, 朋友提議何不連廚房都一併裝修, 因為部份水管要經廚房, 冇理由做啲唔做啲. 都好喎, 反正成日羨慕煮飯視頻網主們嘅廚房好靚, 正好趁此機會換上我心儀嘅樣式, 果然好提議呀吓.

師父游走於廚房與廁所之間, 加上我哋諸多問題與佢畀嘅意見, 唔駛半個鐘就離開, 隔咗無幾耐就來電報價, 盛惠六位數.

本來諗住只招呼呢位師父, 純為畀面朋友, 唔知係咪管理員見到我哋帶師父上門, 於是又話可以介紹. 唉, 一件污兩件穢, 唔爭在啦.

第二位師父入屋睇幾睇, 隨口就噏出一個數, 又係六位數. (事後管理員話因為師父做過同座不同層單位, 所以即刻報到價.)

兩位師父報嘅價相差無幾, 睇嚟應該係公價, 好貴呀!!

唔得, 咁大筆數, 點可以只格兩家呢, 繼續搵.

第三位師父曾經搵過佢驗窗, 做生不如做熟, 假如開價唔係貴太多, 心中諗住屬意佢做.

生意臨門, 佢一接到電話, 好快就出現.

睇完之後, 佢話要返去計過條數, 第二日至可以報到價.

雖然未諗住做, 但都想早啲歸納各人報價, 然後決定幫襯邊個, 預約定幾時開工, 咁就唔駛驚到時師父另有工程在身, 冇時間做我哋呢度.

翌日當家就急不及待追問師父報價, 回覆未得手, 好多嘢做緊, 要稍後時間至報.

或者係我哋太過心急, 好, 就等多一日.

當家再次致電追問, 又話未得, 唯有隔多幾個鐘再搵.

今次我親自致電, 以為佢會就吓小女子, 快快趣趣報價打發我走啦, 點知一樣不得要領. 無論我哋多番強調只係想知個大概價 (都預咗工程嘅嘢, 一日未完工一日都冇可能實牙實齒話幾錢, 佢話係實價我都唔信啦, 中途點都有變數, 視乎係多除定少補啫), 佢依然堅持一定要逐項清楚列明帳目, 然後當面向我哋詳細講解, 但係佢而家有工程喺身, 冇時間計價, 等佢得閒慢慢計好條數, 然後至覆我哋.

佢咁均真本來係好, 可惜言而無信呢, 既然忙到連價都報唔到, 不如連上門睇工程都咪鬼嚟啦, 仲話幾時會報價, 幾時可以開工, 結果都唔係嗰回事. 自己冇口齒, 語氣仲要唔耐煩. 我真係唔明, 咁多年經驗, 幾多個工人, 開幾多日工, 材料費幾多, 邊啲包邊啲唔包, 包幾多錢, 唔包又幾多錢....... 只係計呢啲最基本嘅約數都咁難咩? 報個價都推三推四, 真係要佢開工, 都唔知會唔會爛尾, 我最憎說話唔算數之人, 所以決定將佢摒出考慮之列. (奇怪嘅係, 收線前, 我依然請佢盡快報價, 但竞然從此音訊全無. 唔通佢有他心通, 知道無論報幾多錢我都唔會睬佢? 定係手上工程已排到2044, 根本唔得閒接呢單生意?)

當家唔死心, 繼續周圍搵, 有啲話唔做水喉, 有啲話唔做裝修, 乜唔係一條龍架咩?

終於畀佢諗起, 公司有個特約師父, 每逢有乜大小維修, 都會搵佢搞掂.

之前三位師父上嚟嘅時候, 我全程都跟住, 因為要向佢哋表達我嘅意向, 好等佢哋知道工程內容方便報價. 呢位師父嚟到我就避席, 一來當家已知道我想點, 二來都招呼咗咁多個, 冇心機再招呼, 反正價錢都係大同小異, 到時落在誰家先再算.

睇完唔駛兩個鐘, 師父就傳來報價 (嗱, 呢啲先係出嚟搵食架嘛, 就算幾唔得閒, 報咗價先, 其他細節可以慢慢傾, 你連報價誠意都冇, 其實可以唔駛撈), 出乎意料, 竟然只收五位數.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2644


674#
發表於 20-8-21 12:42 |只看該作者
由上年開始，每隔一段短時間，就會有政府人員出嚟見記者，交代一啲當時情況。

而每次講完佢哋要講嘅嘢之後，例牌會有問答環節，讓在場記者提問。

就算已事先聲明被選中嘅記者只可以問一條問題，記者們依然唔守規矩，一口氣問出多條問題，因時間關係，自己要講得急之時，間中仲會被有關人員喝停，都幾尷尬。

或者記者以為連珠炮發問題，可以令被問者招架不住，既發揮自己口才，又可拋窒對方，不僅為自家公司省靚招牌，亦會被讚以口齒伶俐啩。

可是，佢哋面對嘅係一班做咗好多年嘢，見過好多風浪，食個好多鹽。。。。嘅老忠巨滑，點會咁容易被問倒吖，唔袋定十條八條包裝得美輪美奐嘅標準答案都唔會行出嚟啦係話。遇着啲冇準備到答案嘅問題，咪索性唔答，直接去下一題囉。

每次我見到啲記者如急口令般地第一條要問。。。。第二條想問。。。。第三條問吓。。。。第四仲想知。。。。。我就覺得煩。 點解唔可以一針見血問只問一條呢？你問咁多條，一來阻住其他人發問，二來一輪嘴，都聽唔清楚你問乜，三來問咁多條，條條差唔多，嘥quota，四來就係因為一次過問咁多條，偶然有一條半條較為尖銳，咪畀咗機會對方含糊其詞蒙混過去囉。 假如得一條，對方點都要硬住頭皮答，到時就可以因應佢回答而再下一城吖嘛。（當然，呢啲記者，可能從此被當局列為黑名單，不再被邀出席同類會議）

有時多並唔代表好，簡而精反而可將對方弄至措手不及失態於人前，話唔定無意中會得到真正答案。

可惜到今時今日，依然存在着多發問就係好嘅現象，loop來loop去大同小異，真正重點鮮有提問。 因此，我已經好耐好耐冇真真正正睇過任何一場記者會。
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2644


675#
發表於 20-8-24 12:50 |只看該作者
朋友所住嘅大廈, 最近頻頻停電, 一個月之內發生兩次, 每次起碼幾個鐘. 喺而家科技咁發達, 後備電源應該綽綽有餘應付呢啲突如其來嘅變數嚟講, 佢座大廈都算落後了.

時值盛暑, 朋友係嗰種一入屋就要開冷氣之人, 平時除咗行喺街上之外, 所到之處必定要有冷氣招待, 否則就感到悶熱難當, 心情特別暴躁.

好耐之前, 大家傾開嘆冷氣話題, 我同佢講, 我已經好幾年屋企冇開過冷氣, 佢感到不可思議, 問我點解, 我話一則環保, 二則以防停電時唔駛過唔到活. 佢當時嘅表情, 好似我講緊天方夜譚, 不置可否話香港地根本冇可能停電.

就係因為佢每日無冷氣不成, 而咁啱停電時間, 都係太陽最猛烈中午時份, 仲要維持幾個鐘, 對佢呢個冰人嚟講, 未熱溶算係執返條命.

曾幾何時, 我嘅屋苑都試過停電, 又係夏天, 由於平時只以風扇用作流通屋內熱空氣, 一旦冇得用, 只係覺得有少許熱, 並唔太難受, 時間再耐啲再熱啲時, 就用小紙扇手動撥涼, 當堂舒服晒. (當家與吾兒慶幸地話好彩平時冇開冷氣, 不然都好難頂)

呢個世界, 冇嘢係冇可能, 就好似朋友當時大言不慚話絕對冇可能停電, 結果呢, 接連發生兩次, 難保唔會有第三次. 所以我提議佢買定一啲有充電功能嘅電器, 日日充足準備, 以防再停電時, 可以用嚟頂住一陣先.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2644


676#
發表於 20-8-28 11:34 |只看該作者
一直有追開"田園生活分享", 之前唔係追得太貼, 近來就日日追, 因為佢哋兩夫婦又搬屋, 對於未知嘅環境與未來視頻嘅內容, 感到新鮮好奇, 想陪佢哋一齊去探索.

之所以講又搬屋, 係因為喺短短年幾間, 佢哋已經住咗兩處地方, 除咗最初嗰間屋之外, 其他都住唔夠一年, 又動起遷徙念頭, 真係佩服佢哋嘅毅力與決心. 換着我, 安定落嚟就唔想郁, 一動不如一靜.

好羡慕佢哋夫婦鰜鰈情深相敬如賓, 猶如神仙眷侶般嘅生活, 退休之齡, 卻無退休之態, 每日生活多姿多采, 談天說地煮吓飯遛吓狗樂也融融. 女兒又獨立孝順, 除咗人在異地對佢牽掛之外, 其餘無須煩心, 日子過得自在閒適.

再睇吓自己身世, 同樣係退休, 卻依舊要為口奔馳, 營役勞碌, 不時被一啲突如其來瑣碎零星雜事弄至心煩意亂. 或者係呢個原因, 所以將自己嘅主觀願望投放喺佢哋身上, 唔知幾時可以好似佢哋一樣, 無牽無掛, 活得寫意自在, 仲有心有力孜孜不倦計劃出行周遊列國.

田園與樵夫都係愛乾淨之人, 就算就快離開間屋, 都會執得企理四正, 原原本本交畀業主. 亦設想周到, 為未來住客預備少許食材用具, 以防人家初來乍到, 一時之間未準備充足, 都可以先解燃眉之急, 好貼心.

佢哋離開屋企當下, 唔知有冇一絲留戀呢, 我就有囉, 尤其是睇住佢哋將車徐徐開出, 背後家門逐漸遠去, 我竟然感到離愁別緒好唔捨得.

跟住佢哋就會自駕長征, 搬去另一處地方, 將沿途所見所聞發視頻分享, 好期待. (其實我好嚮往呢種踏上征途遠遊嘅日子, 帶上隨身物, 一家大細齊齊整整出發, 途中同看美麗風景同享各地美食, 每日嘻哈聲讚嘆聲渡過....... 諗起都心馳神往. 有生之年能有此遇, 足矣!! (不過我可以預知, 呢一世唔駛旨意, 因為香港冇得長征, 去外地冇本事自駕, 吾兒未必跟隨, 所以永遠冇辦法實現呢個願望.)
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2644


677#
發表於 20-8-31 11:06 |只看該作者
我對全民檢測嘅迷思。。。。。

政府為市民提供呢份免費服務，本應感恩戴德，但係坊間好多傳說，又令人卻步。

首先唔好理背後有咩動機，關唔關政治事，我只係以一個老百姓心態睇事件。

聞說有假陽性與假陰性嘅結果，假如係前者，一定嚇親死；假如係後者，就心安理得周圍走。

出現以上情況，更加死得人多，前者被嚇至抵抗力減低，明明無事都容易染疫；後者就不自覺周圍播毒，令接觸者防不勝防。

政府出動人力物力大量催谷宣傳，希望七百多萬人踴躍參加。 本來，參加唔係問題，可是檢測嘅同時，依然大開中門歡迎各界入境，咁有咩意思呢？

就好似屋企大堂，前門保衞森嚴，每逢有人入內都問長問短登記呢樣記錄嗰樣，看似防守得滴水不漏。可惜後門卻虛掩冇上鎖，因為要方便清潔人員進出。 咁嘅安排，仲保唔保障到住客嘅生命財產呢？

我見到有啲人會義正詞嚴講，檢測係為他人着想，唔想自己係隱性帶菌者而傳播開去。 講真，呢個諗法好偉大。 因為冇事冇幹要主動被人撩鼻撩喉，你估過程唔難受㗎咩。 不過呢，要先假設自己唔屬於假陰性，平時要乖乖在家，少與人接觸，市面上冇外來隱者。。。。 才能見到成效。 否則的話，呢頭測完冇事，嗰頭唔知喺邊度被傳染，成件事就錯晒，變得徒然。

如果檢測結果係冇事，係咪代表可以周圍走呢？相反結果係有事，係咪等如世界末日呢？

姑勿論最終檢唔檢測，我覺得依然要繼續提高警覺切勿掉以輕心，無事少出街，注意個人衞生，保持身心開朗。。。。呢啲先至係治本嘅方法。
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2644


678#
發表於 20-9-2 22:10 |只看該作者
聽講自願檢測嘅人唔太踴躍，搞到啲官要日日出嚟苦口婆心勸人前往，咁進取，都唔知為乜。

有人話係因為檢測咗之後，可以令想嚟香港嘅人安心，只要佢哋再度重臨，香港經濟就會振興起來，旅遊業就有望復甦。

據我所知，好多親戚都耍手擰頭，話好人好姐，無啦啦測乜啫，要喺公眾場所擘開喉嚨除低口罩已經唔想，仲話撩鼻時可能會導致打噴嚏，即係有機會喺空氣中吸入人哋嘅口水鼻涕飛沫啦，話就話只需兩分鐘，真係大吉利是中招嘅話，就係喺呢兩分鐘出事，到時問邊個追究？就算有人肯承擔責任都於事無補，受害嘅始終係自己，鬼可憐！ 亦有親戚話，檢測免問，打疫苗就仆倒去。

對於宣傳口號 ：做檢測救香港！ 佢哋異口同聲話：瀨咗嘢，邊個救我哋？根本最簡單就係封關，唔只救到香港，亦唔駛市民檢測，浪費人力物力財力。

既然說服唔到普羅大眾，無計可施下，聞說遲啲可能向教育界開刀，而且會用強硬手段，未必再以自願掛帥。 我問喺學校做緊兼職嘅朋友殺到埋身未，佢話暫時冇聽到任何聲氣，不過已經決定咗，一旦要強逼檢測，寧願辭職都唔會屈從。

吓！？要咁壯烈咩？ 佢解釋 ：話明係自願性質，冇理由因為達唔到標而強逼人去充數，咁已經違背咗當初嘅原意。 要知道，如果出發點真係為民着想，市民唔領情，係市民嘅損失，咪由得佢囉，點解要做到一時軟語勸告，一時又威逼利誘啫。 之前疫症高峰期又唔見佢哋咁積極，而家卻咁戮力，好難相信背後冇動機㗎囉。

希望佢能夠保住飯碗啦。
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2644


679#
發表於 20-9-6 22:59 |只看該作者
田園與樵夫由多倫多至溫哥華自駕遊記載，每日都成為我早餐良伴，諗起可以一邊睇佢哋一邊嘆早餐，就算只係普普通通嘅食品，都覺得份外滋味。

之前都講過，好享受自駕遊樂趣，希望有生之年能夠體驗一次。

與當家閒談間，我就問佢 ： 喂，不如等你退休後，我哋返大陸，睇吓買或者租架車。。。。。未等我講完，佢已經答 ： 好呀。。。。。（咦，佢幾時獲悉我心意，知我夢想有一日可自駕遊，居然咁快贊成？正當我滿心歡喜，想開口讚賞佢，點知佢接住落嚟講嘅係。。。。。）買架摩托車。

咩話！？摩托車？？

我本來係喺洗手間一邊洗手一邊同佢傾，聽完後，我即刻衝出嚟 ：我係話買或者租架車去遊歷大江南北五湖四海喎，你以為去買餸呀，摩托車！

好啦，以為佢如夢初醒，都有相同憧憬，咁大家就可以繼續吹落去，點知佢第一個反應係 ：自駕遊？好多大貨櫃車㗎喎。。。。如果係左軚，你揸呀，我唔揸！（表情與語氣明顯地欠揍！）

於是我火都嚟埋 ： 點解你第一嘢就係諗大貨櫃車？點解你唔諗吓兩個老嘢揸住架車攞住相機遊山玩水幾咁愜意，沿途欣賞山明水秀湖光山色，呢度影吓嗰度照吓幾咁寫意，旅途上互相扶持互相照顧幾咁溫馨？。。。。 人一出世都會死啦，咁你又唔坐喺度等死？屯門公路夠有好多貨櫃車啦，你又夠膽揸？（下刪破口大罵千萬字）

成日都係咁，遇着唔想做嘅嘢，就搵啲嘢嚟嚇你，等你諗都唔敢諗打消念頭，正中佢下懷。 相反，佢想做嘅嘢呢，你唔應承，佢會一路𦧲，真係不得要領，佢就黑面。（事實上，我已經算就佢，只要冇涉及我，十之九點九都由得佢，極少說不。）

日常裡，同類事件隔三差五就會發生，所以成日家嘈屋閉。（基本上都係我嘈多，皆因佢係點火人。）每次發洩過後，佢又主動逗我講嘢，好快大家就冇事。 但係今次我堅嬲，就算佢一如以往好似冇件事，主動向我示好，我都表現冷淡，除咗三餐照供應之外，全天候不瞅不睬。

之所以頂住度氣，原因係我只係話等佢退休，又唔係講到要即刻做，駛唔駛咁快落定閘呀。 況且，而家都係講吓啫，到真正退休，至少仲要十年八年，幾千日後，都唔知仲喺唔喺世上，又或者已經冇咗念頭都未定。 有時啲嘢，未必非要做到至開心，純粹煲吓冇米粥幻想一下已經好似真嘅一樣。 可惜佢連陪我吹吓水嘅心思都欠奉，真係好冇癮，失望加心淡。
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2644


680#
發表於 20-9-9 22:08 |只看該作者
每次同當家冷戰，跟住就想行開一下一個人靜吓，例如去吓旅行，咁就有幾日唔駛見到佢篤眼篤鼻。

可是次次都係正當諗緊去邊度，同邊個去嘅時候，又和好如初，結果邊度都去唔成。

由於今次我實在太嬲，縱使佢又想故技重施，當冇事發生過如常同我交談，我一於唔賣帳，繼續冷淡待之。 哼！憑咩你話激就激，話冇事就冇事，輪都輪到我反客為主，短期內唔駛旨意我會落搭。

其實話就話想去旅行，可是一直苦無旅伴，有家室嘅唔會同我去，單身嘅又有開自己嘅旅伴，自由身嗰啲呢又冇興趣，所以都好頭痕。

老實講吖，如果我能夠衝破一個人住酒店嘅心理關口，獨自去旅行應該好爽，尤其是我呢啲唔太識與人相處嘅人，多個人要事事作出遷就，自己想睇嗰啲，要顧及對方可能冇興趣，到對方想去朝聖嘅地方，我又未必啱，食嘢口味亦然。。。。。整個旅程可以講係貼錢買難受。

或者當家就係睇死我一個人飛唔起，所以有恃無恐，認為我點都會乖乖得喺屋企煮煮煮。

的確，一直以來，我嘅生活平淡如水，星期一至星期七全放喺糊口上，鮮有為自己籌謀。 雖然日日如是，除咗偶然覺得沉悶之外，亦安於現狀。

自從幾日前被當家潑冷水後，驟然間恍然大悟，大半生過去，除咗工作之外，其餘時間幾乎全投放喺屋企，由做女計起，已經煮咗幾十年，賸下時間，係咪要繼續喺爐灶前攞住鑊鏟直至入土呢？（我用拍電影手法幻想，鏡頭影住我喺廚房煮飯嘅背影，時間快速前進，窗外光線又明又暗，代表日夜交替，我就由烏黑長髮變為白髮蒼蒼，由腰板挺直變為傴僂身軀。。。。。然後，廚房空空，人已變成黑白照。）諗起都覺得悲哀。

所以呢，待疫情過後，我希望可以飛。 不過前提要先向朋友國內間屋借宿一宵壯壯膽熱身，只要習慣一人獨處，到時行走江湖就冇有怕。
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用


首頁
3233343536...42

尾頁

跳至頁
返回列表
回覆
發帖
高級模式 | 發表帖子
B Color Image Link Quote Code Smilies
你需要登錄後才可以回帖 登入 | 註冊

© 2024 Baby-Kingdom.com Limited.

網站： 聯絡管理員 廣告查詢 私隱政策 使用條款 免責聲明 使用意見