自從屋企漏水整濕樓下天花一事, 我成日都心掛掛, 好想快啲搞掂, 無奈疫情未過, 只得繼續忐忑.
一日, 當家話佢有個朋友嘅屋企啱啱裝修完, 覺得裝修師父手工幾好, 可以介紹畀我哋, 當家問我意見. 初初我都係維持原意, 唔想喺呢段期間被陌生人進出家門, 後來經唔起佢游說(佢應該都係被朋友連番游說), 話純粹上嚟報個價, 可以心中有數喎.
其實就算啱價, 又唔開得工, 都唔知報嚟做乜, 話晒到真正動工嗰日, 起碼隔咗一大段時間, 到時價錢未必一樣, 所以而家報價根本冇意思. 不過既然人家咁有心, 唔好太過拒人千里, 就姑且畀師父上嚟報個價, 只係入屋睇幾睇, 應該問題不大.
原本只係更換廁所水管, 朋友提議何不連廚房都一併裝修, 因為部份水管要經廚房, 冇理由做啲唔做啲. 都好喎, 反正成日羨慕煮飯視頻網主們嘅廚房好靚, 正好趁此機會換上我心儀嘅樣式, 果然好提議呀吓.
師父游走於廚房與廁所之間, 加上我哋諸多問題與佢畀嘅意見, 唔駛半個鐘就離開, 隔咗無幾耐就來電報價, 盛惠六位數.
本來諗住只招呼呢位師父, 純為畀面朋友, 唔知係咪管理員見到我哋帶師父上門, 於是又話可以介紹. 唉, 一件污兩件穢, 唔爭在啦.
第二位師父入屋睇幾睇, 隨口就噏出一個數, 又係六位數. (事後管理員話因為師父做過同座不同層單位, 所以即刻報到價.)
兩位師父報嘅價相差無幾, 睇嚟應該係公價, 好貴呀!!
唔得, 咁大筆數, 點可以只格兩家呢, 繼續搵.
第三位師父曾經搵過佢驗窗, 做生不如做熟, 假如開價唔係貴太多, 心中諗住屬意佢做.
生意臨門, 佢一接到電話, 好快就出現.
睇完之後, 佢話要返去計過條數, 第二日至可以報到價.
雖然未諗住做, 但都想早啲歸納各人報價, 然後決定幫襯邊個, 預約定幾時開工, 咁就唔駛驚到時師父另有工程在身, 冇時間做我哋呢度.
翌日當家就急不及待追問師父報價, 回覆未得手, 好多嘢做緊, 要稍後時間至報.
或者係我哋太過心急, 好, 就等多一日.
當家再次致電追問, 又話未得, 唯有隔多幾個鐘再搵.
今次我親自致電, 以為佢會就吓小女子, 快快趣趣報價打發我走啦, 點知一樣不得要領. 無論我哋多番強調只係想知個大概價 (都預咗工程嘅嘢, 一日未完工一日都冇可能實牙實齒話幾錢, 佢話係實價我都唔信啦, 中途點都有變數, 視乎係多除定少補啫), 佢依然堅持一定要逐項清楚列明帳目, 然後當面向我哋詳細講解, 但係佢而家有工程喺身, 冇時間計價, 等佢得閒慢慢計好條數, 然後至覆我哋.
佢咁均真本來係好, 可惜言而無信呢, 既然忙到連價都報唔到, 不如連上門睇工程都咪鬼嚟啦, 仲話幾時會報價, 幾時可以開工, 結果都唔係嗰回事. 自己冇口齒, 語氣仲要唔耐煩. 我真係唔明, 咁多年經驗, 幾多個工人, 開幾多日工, 材料費幾多, 邊啲包邊啲唔包, 包幾多錢, 唔包又幾多錢....... 只係計呢啲最基本嘅約數都咁難咩? 報個價都推三推四, 真係要佢開工, 都唔知會唔會爛尾, 我最憎說話唔算數之人, 所以決定將佢摒出考慮之列. (奇怪嘅係, 收線前, 我依然請佢盡快報價, 但竞然從此音訊全無. 唔通佢有他心通, 知道無論報幾多錢我都唔會睬佢? 定係手上工程已排到2044, 根本唔得閒接呢單生意?)
當家唔死心, 繼續周圍搵, 有啲話唔做水喉, 有啲話唔做裝修, 乜唔係一條龍架咩?
終於畀佢諗起, 公司有個特約師父, 每逢有乜大小維修, 都會搵佢搞掂.
之前三位師父上嚟嘅時候, 我全程都跟住, 因為要向佢哋表達我嘅意向, 好等佢哋知道工程內容方便報價. 呢位師父嚟到我就避席, 一來當家已知道我想點, 二來都招呼咗咁多個, 冇心機再招呼, 反正價錢都係大同小異, 到時落在誰家先再算.
睇完唔駛兩個鐘, 師父就傳來報價 (嗱, 呢啲先係出嚟搵食架嘛, 就算幾唔得閒, 報咗價先, 其他細節可以慢慢傾, 你連報價誠意都冇, 其實可以唔駛撈), 出乎意料, 竟然只收五位數.
春有百花秋有月, 夏有涼風冬有雪, 若無煩事掛心頭, 便是人間好時節.