自從冇做嘢之後，我就習慣好早吃晚餐。
一來係由於早瞓嘅關係，如果太晏開飯會消化唔切； 二來因為太得閒，早啲預備晚餐，感覺冇咁無聊。
而吾兒就唔會同我哋一樣同時間開餐，不然以佢一向夜瞓，到晚黑實會嗌肚餓，到時一係要我煮宵夜，一係佢自己落街食，無論邊樣都唔好。
所以佢嘅晚餐，只好預先盛起，到佢要吃時才加熱。
如果係煎炒類別，例如炒粉炒麵炒飯煎餅等等，我會盡量用鑊嚟翻炒加熱，其他一啲較難翻動或唔能夠多番攪拌嘅食物，就會用微波爐加熱，藉以保持食物嘅賣相。
有時撞啱吾兒外出，又未知何時返歸，總囑咐佢要提早十分鐘通知，讓我可早啲翻熱，佢一抵達就可進食。
可是我嘅要求佢並唔太聽從，十次有九次都冇提早通知，直接就回家，激鬼死！
之所以要佢早通知，係怕佢遲一分鐘吃，就會遲一分鐘消化，無非係唔想影響佢作息時間，一啲都唔體諒老媽嘅用心良苦。
呢一晚，佢如常入門，我如常急急按下微波爐加熱。
兩分鐘後，加熱完成，微波爐發出提示聲。
我立即到廚房，急不及待想趁早取出熱辣辣嘅愛心晚餐，放在吾兒已坐定定在等吃嘅餐桌前。
打開門。。。。。。。咦！？ 碟飯呢？ 唔通傳送咗去第二個空間？ （當下腦中盡是一啲時空穿梭畫面，物件在機器內轉呀轉，鏡頭一轉就去咗第二度。）
霎時間，個腦空白咗幾秒，跟住先醒起，之前盛好碟飯後，為怕即時放入微波爐會焗住啲飯而產生大量水蒸汽，所以就先放在灶台邊，等叮嘅時候先放入爐內。
由於好多時係一早已放在微波爐內，以便一見吾兒就可即刻按掣叮，誰知今次稍為改動就出事。 （所以話呢，非必要時都唔好改變既定習慣。）
只好再按鍵加熱，臨到結束前，聽到不尋常提示聲，跟住見到時間顯示數字閃咗一閃。
我以為自己眼花，如常打開門，爐內一切正常，摸摸碟飯，仲係凍嘅，但個轉盤就好熱。
諗住只係一時失靈，唯有再按掣叮過，可是任何按鍵已經冇反應。
當務之急，係先解決碟飯畀吾兒吃，只好用最原始嘅隔水蒸熱法，擾攘一輪才告完成。
望住微波爐，幾分鐘前仲生勾勾，因為我嘅大意而整死佢，我覺得好內疚； 亦預先肉赤定，又要破費買過另一部。
後來當家上網查，微波爐係唔可以空轉，否則壞零件事少，最大件事係可能會引致爆炸。
無知嘅我原以為空轉，只係冇對象加熱，最多咪浪費電力，冇乜大不了啫，原來後果可以咁大鑊。 好在佢內部設定自動停止運作，否則累街坊之時亦會上港聞，真真抹一額汗！
靜止一段時間後，我戰戰兢兢用最遠距離嘗試再去按時間掣 （好驚會爆炸）。。。。。。
好咯，一切回復正常，可如常操作，唔駛買過部，鬆一口氣。
經此教訓後，每當關上微波爐門前，一定先望一望裡面有冇嘢，然後才放心㩒掣。
春有百花秋有月, 夏有涼風冬有雪, 若無煩事掛心頭, 便是人間好時節.
發表於 
返回列表
