印象中, 好似係佔中之後, 先至有黃絲與藍絲之分.
據我認知, 黃絲者係撐民眾, 而藍絲則撐政府.
經此一分後, 從此黃絲與藍絲壁壘分明, 各自為所撐一方發聲護航.
其實無論黃或藍都冇問題, 畢竟各人有各人嘅意見與想法, 但若然係有理冇理盲撐一通嘅話, 就未免過於"愚忠"了.
當民眾有錯處時, 黃絲需要加以指正. 反之政府有錯時, 藍絲都唔可以一味死撐.
就以今次反送中事件為例, 見盡黃藍雙方展開嘅罵戰, 實在令人不忍卒睹, 而其中尤以藍絲嘅言論更為刻薄.
首先, 佢哋將穿上黑衣示威者形容為曱甴, 責備佢哋破壞社會製造混亂, 又話佢哋有書唔讀出嚟搞搞震....... 盡是苛刻涼薄嘅說話.
我想話, 佢哋放棄玩樂嬉戲嘅日子, 選擇冒住吸催淚彈被打被捕嘅危險, 都要出嚟向政府表達訴求, 為嘅係乜嘢? 係為咗讓住喺香港嘅每一個人, 能生活喺一個民主社會, 唔駛逐步邁向獨裁統治嘅年代. 如果香港與內地無差別, 咁不如回去內地生活仲好啦, 可以住大屋, 物價又唔太高, 何必蝸居喺彈丸之地嘅香港呢?
香港矜貴之處, 除咗佔地利之優, 言論自由都係一個吸引處, 假如呢啲優點將會日漸消失殆盡, 試問香港仲有乜嘢優勢可言?
呢啲為後代設想嘅行動, 本應係由我哋呢代或上代去爭取, 就係我哋相信五十年不變, 可以馬照跑舞照跳, 又貪圖安逸生活, 致使廿多年來, 應有嘅自由正一點一滴被剝削了而不自覺或唔多理會, 因而令當局咄咄進逼.
你大可以講進逼得嚟都唔知咩世紀, 自己都未必見到, 但係我哋嘅後代呢? 佢哋將要比我哋活得苦, 承受嘅壓力比我哋更加沉重, 甚至講得嚴重啲, 有可能倒退回到文革, 難道你忍心佢哋要遭受上上代曾經受過嘅苦咩?
無論訴求最後能否成功, 期間年青人已先要面對被清算被控告被殘害被毒打嘅後果....... 佢哋唔係拍吓籮柚就走, 而係有可能要付出沉重代價, 點解佢哋有自唔在要攞苦嚟辛呢? 佢哋大可以做人們口中嘅廢青, 必要時攞綜援, 政府冇得唔理㗎喎. 但係佢哋都選擇出嚟做喉舌, 爭取訴求.
如果話佢哋係恩人, 未免過於言重, 但念在佢哋不辭勞苦不畏強權都要企出嚟嘅呢份勇氣, 請嗰啲開口閉口話佢哋係曱甴嘅人, 放下成見體諒吓佢哋嘅本意而口/筆/鍵盤下留情. 假如佢哋當中有行為失當或言行過火者, 應該由法律給予制裁, 唔好不知就裡就將之扣上暴徒之罪名. 況且身為局外人嘅平民百姓, 對於內裡存在住幾多真幾多假嘅角色扮演, 根本唔清楚底蘊, 又何來能公道批判?
當然, 咁大班人, 一定有害群之馬, 再加上有人刻意煽風點火, 令到件事本來和平示威, 變成喋血街頭, 我諗好多人都始料不及.
或者係我主觀啦, 總係認為每每有人遇襲嘅案件, 唔多唔少都係因為曱甴之喻植入腦筋, 致令反對派自我催眠, 以為只係打曱甴而已, 並無不妥, 結果就釀成多宗血案, 造成遺憾.
其次, 對於嗰啲唔理三七廿一嘅民眾, 對住警察大呼黑警, 我又係覺得唔公平.
須知道一人做事一人當, 若然親自見到某位警察無理使用暴力, 當然可以直接鬧佢啦, 但係以一竹篙打一船人嘅做法, 我覺得有欠公允. 好似上次紅土遊行, 見到四位警員行喺人群中被人鬧到狗血淋頭, 真係戥佢哋覺得委屈, 明明佢哋都冇做過啲乜嘢, 點解要咁樣對佢哋呢.
呢段期間發生咁多衝擊, 民眾因為情緒激動而仇警無可厚非, 但係如果將"外援"嘅暴行入埋畀香港警察, 就令佢哋變得無辜了.
同樣, 咁大團隊, 必然有枯枝, 為咗個別人格有問題嘅份子而怪罪所有, 未免以偏概全. 畢竟大多數香港警察都盡忠職守, 維護社會治安與除暴安良都做得非常出色, 唔可以抹殺佢哋嘅功勞.
逆轉思考, 如果站喺佢哋立場, 都覺得好無奈, 始終上頭有令, 就要執行命令, 一日吃呢口飯, 一日都係身不由己, 再加上家人受歧視威嚇, 難怪佢哋嘅士氣每況愈下.
可能部份藍絲心痛警察被辱而不分青紅皂白有理冇理力挺之, 咁又唔駛偏幫到咁出面, 始終有部份嘅處事手法確係令人髮指嘛. 雖然警察都係人, 都有情緒都需要發洩不滿, 但係一旦穿起制服, 無論環境幾惡劣, 只要唔危及自身安全, 全都要克制容忍. 就好似向一位被綑綁手腳嘅老者施以虐打, 對方破口大罵係唔啱, 因為咁而打佢嚟發洩, 成件事咪錯晒囉.
導致黃藍分歧, 始作俑者源於政府. 因為政府苛政不公高壓手段才有黃絲, 因為政府偏袒隱惡歪理連篇才有藍絲....... 特首口中嘅社會撕裂, 其實即係自打嘴巴.
大家有緣生活喺香港呢一片天空下, 應該團結齊心唔好分化. 黑衣人, 香港警察都係我哋嘅家人 (有心搞事者除外), 黃絲好, 藍絲好, 最緊要憑良心理性分析明辨是非黑白, 切勿盲目附從某一方或聽信片面之詞. 一隻手係拍唔響, 每件事嘅始末都係相對的, 所以就算唔認同對方, 都唔好惡意中傷, 以免中了有心人之離間計而自相殘殺.
香港人! 加油!!
春有百花秋有月, 夏有涼風冬有雪, 若無煩事掛心頭, 便是人間好時節.