Baby Kingdom - 親子王國 香港 討論區 › 首頁 › 興趣嗜好› 閒來無事說些事.....

興趣嗜好

收藏本版
回覆 發帖
返回列表
跳至頁

首頁
2829303132...42

尾頁
   7
cforchat


大宅

積分: 2644


581#
發表於 19-6-21 10:48 |只看該作者
早兩日出街, 揹住個背囊方便裝嘢, 由於習慣揹單邊, 而揹單邊通常較容易跣落嚟, 所以就要用手傍住背囊帶.

迎面行嚟一個看似係中青年嘅人, 外表睇, 無論係行路嘅姿勢定係面部嘅表情, 都可以主觀地判斷佢應該係屬於有問題嘅人.

果不其然, 本來佢行色匆匆, 當佢偶然瞥見我傍住背囊隻手所戴住嗰隻錶嘅時候, 忽然一臉現出好奇表情.

初時我以為係自己多疑, 一來隻錶好普通, 二來如果唔係望隻錶, 身上又冇其他特別嘢值得吸引佢嘅目光喎. 雖然咁諗, 但都好自然地自我檢視一番, 冇乜嘢吖, 於是就繼續行唔理佢. 不過都因為唔放心, 所以就本能地回頭望吓佢嘅動向, 因為唔知會唔會被從後扑頭或對我有任何舉動.

正常情況, 大家行嘅方向應該係相反, 但佢居然喺我後面繞圍, 即係本來佢面向我行喺我嘅11點鐘方向, 跟住喺我身後經過, 行前去我嘅2點鐘方向, 當下嚇到我嘅心卜卜跳, 於是就索性企定定, 睇吓佢想點. 佢一直腳步未停, 只係專注地將眼光聚焦喺我隻錶處, 不斷地打量, 見我望住佢, 跟住就走咗嘞.

肯定咗佢走遠, 我先至放心繼續行.

我再次望吓手腕上隻錶, 爛鬼錶一隻, 有乜咁吸引呀? 仲要吸引佢不惜繞圈, 只為近距離睇多佢一眼?

基於呢個無以名之嘅原因, 我有理由相信, 對方是傻的!

還好佢只係對住隻錶痴痴地望, 若果佢對住我係以仇人嘅眼光視之, 真係畀佢扑一嘢都有可能㗎, 而最大問題係冇仇報呢吓至慘吖嘛, 所以就算當場捉住再將佢送官究治, 最終都會因為佢係傻嘅而不了了之.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2644


582#
發表於 19-6-23 11:41 |只看該作者
之前有講過, 好鍾意睇"泥土的清香"視頻, 因為對於農村嘅簡樸生活好羨慕, 一路睇可以一路幻想身在其中嘅寫意.

視頻被更新得好快, 幾乎每日都有新片, 有時甚至會多過一兩條, 當時一直追得好貼. 後來覺得來來去去嘅內容都差不多, 雖然依然繼續訂閱, 不過如果題目唔係太有興趣, 就唔會按入去睇.

以前每次睇, 好多時佢哋所養嘅金毛犬虎子都會入鏡, 無論喺庭院, 喺村路, 喺農地, 都會見到虎子嘅影蹤. 見到佢哋幫虎子洗澡或剪毛時, 虎子都好乖巧聽話, 完全任由主人擺佈, 我就會諗起自家狗狗, 完全係兩個極端. 莫講話洗白白咁簡單嘅活動尚且全程要同佢搏鬥, 剃毛呢家嘢就更加唔駛旨意埋到佢身, 真係硬來嘅話, 怕且會釀成血案...... 係我哋被咬至出血.

因為虎子嘅善解人意, 所以我好鍾意佢, 每次有佢出鏡嘅份兒, 我嘅眼光只係圍繞住佢, 旁若無人.

最近見到題目係虎子被車撞傷, 看似好嚴重, 所以我就即刻入去了解情況.

從畫面上見到清香姐滿面淚痕, 將虎子送院治理, 虎子軟弱無力地攤喺墊上, 時而發出痛苦呻吟聲, 見/聽到都心痛. 透過螢幕我都感到哀傷, 更何況喺現場嘅清香姐, 可以理解佢痛心嘅程度更甚.

跟住又有幾段平時吃喝嘅視頻更新, 我都姑且入去睇, 以為會有虎子嘅最新情況, 但係又冇喎. 我一路睇一路諗, 虎子可能唔太嚴重, 所以佢哋繼續吃喝玩樂嘻哈大笑, 而如果虎子依然危殆, 斷估清香姐都冇心機煮嘢食啦, 即係虎子無大礙, 咁就好咯.

點知忽然又插入一條片, 係運送虎子去搵專家求醫, 片末係經醫生轉介, 清香姐夫婦帶住虎子前往做手術嘅路途. 由於片頭見到虎子似乎有好轉跡象, 我相信佢一定會吉狗天相, 只要過多一段時間讓佢安心靜養療傷, 好快又會再見到佢龍精虎猛走來走去.

然後, 又有其他日常視頻更新, 我就以為一定係虎子手術成功, 雖然睇得出清香姐明顯地冇乜心機, 但我以為只係佢幾日來為虎子奔波忙碌, 又擔心佢嘅健康, 所以至臉露疲態.

正當好多人留言祝福虎子早日康復, 未幾就收到清香姐嘅留言回覆, 虎子走了! 當下我不禁發出吓一聲, 想起虎子之前生生猛猛圍住清香姐身邊團團轉嘅身影, 眼淚已忍唔住滴下來, 就好似自家狗狗走咗嘅不捨心情.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

crystal媽咪


寶石宮

積分: 329151

2024年龍年勳章 2024勳章 2023年兔年勳章 虎到金來勳章 2021可愛聖誕B勳章 牛年勳章 2018復活節勳章 2018母親節勳章 2018父親節勳章 畀面勳章 環保接龍勳章 BK Milk勳章


583#
發表於 19-6-23 13:35 |只看該作者
cforchat 發表於 19-6-21 10:48
早兩日出街, 揹住個背囊方便裝嘢, 由於習慣揹單邊, 而揹單邊通常較容易跣落嚟, 所以就要用手傍住背囊帶.

...

多咗好多唔同嘅人
近來我拎背囊，常常都畀人開袋。
小心
不要從別人的嘴裡去認識我
私人傳訊回覆 引用

cforchat


大宅

積分: 2644


584#
發表於 19-7-5 08:06 |只看該作者
回覆 crystal媽咪 的帖子

袋都畀人開埋?? 咁真係好猖狂喎.

春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

crystal媽咪


寶石宮

積分: 329151

2024年龍年勳章 2024勳章 2023年兔年勳章 虎到金來勳章 2021可愛聖誕B勳章 牛年勳章 2018復活節勳章 2018母親節勳章 2018父親節勳章 畀面勳章 環保接龍勳章 BK Milk勳章


585#
發表於 19-7-5 08:09 |只看該作者
cforchat 發表於 19-7-5 08:06
回覆 crystal媽咪 的帖子

袋都畀人開埋?? 咁真係好猖狂喎.

一日內開2次
或我太大意
近來膊頭痛才改用背囊，而家人多唯有放胸前
不要從別人的嘴裡去認識我
私人傳訊回覆 引用

寶娃婆婆


大宅

積分: 4411


586#
發表於 19-7-5 08:39 |只看該作者
背包多數放前面, 防盜之餘更防人扮撞到搏懵.
私人傳訊回覆 引用

cforchat


大宅

積分: 2644


587#
發表於 19-7-5 08:58 |只看該作者
朋友同我一樣, 都係股海明燈, 買邊隻跌邊隻, 沽邊隻升邊隻.

咁就死得啦, 兩條友都一樣, 即係唔駛指望可以透過對方嘅買賣而進行相反行動, 藉此賺一筆.

最近, 又聽到朋友哭股喪.

佢話貫徹以往, 又係買完貨之後直線下落, 本來諗住短炒又要變長揸, 把鬼火, 索性對市況不聞不問, 冇眼睇.

直至早排才發現所買嘅股竟然係十大升幅之一, 於是嗱嗱臨落盤沽貨.

假如佢係現價即走, 早已袋袋平安, 弊在佢總係要排高幾個位, 於是只有等.

試過好幾次, 喺臨收市前一兩分鐘至去到佢定嘅位, 可惜輪唔到佢, 只好明天請早. 果然第二日又見到佢前一日所排嘅價, 若然肯即走, 一早就搞掂, 可惜佢又係排高幾個位, 結果又係走唔到.

就係咁, 當現價做緊$10, 佢排$10.6, 到$10.6, 佢又排$11, 到$11, 佢又排$11.4, 永遠都要高幾個位. 佢話齋, 如果現價即走, 到時係咁升咪好揼心, 排高幾個位, 就算沽咗一樣升, 至少心理上覺得比原先已經賺多咗, 就唔會咁肉赤.

可惜人算不如天算, 當開始逆向, 佢連隨改變策略, 由$11退而排至$10.8, 繼續向下, 再由$10.8降到$10再降到$9.8, 結果都係沽唔出, 白白混一場吉.

聽到佢講, 我都戥佢頓腳搥胸, 呢啲感受我最能深切體會, 因為自己曾經都試過無數次, 而且仲係不斷循環輪迴, 從未試過一次肯乖乖以現價買或賣, 最終只落得飲恨連連.

但係我又唔覺得呢啲心態有問題, 始終人都有貪念, 買時想以最低價, 沽時想以最高價嘅想法無可厚非, 只要唔好因為買賣唔到而耿耿於懷影響心情就得嘞, 否則賺咗都唔夠買抗抑鬱藥.

我安慰朋友, 假如要繼續喺股場玩遊戲, 就要調節自己嘅心態, 買咗跌沽咗升, 就自我安慰當畀啲價位接你貨或放貨畀你嘅人賺吓, 你一買就升一賣就跌, 對方咪好慘, 有錢齊齊賺至開心㗎嘛.

朋友話佩服我情商高, 我話梗係啦, 之所以講得咁口響, 皆因我一早已離場笑看風雲吖嘛, 當然講乜都得啦, 若然仲喺股海浮沉, 哭股喪又點會少我嗰份呢.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2644


588#
發表於 19-7-9 10:15 |只看該作者
其實我並唔太習慣揹背囊, 因為攞嘢好唔方便, 每次都要大動作地由膊頭卸下整個背包, 跟住摷完一輪, 然後揹返上膊. 好多時喺擾攘之間, 總係唔記得將拉鍊拉上, 結果就大開中門請君入甕引人犯罪, 完全係自己大意.

試過好多次, 開咗拉鍊都不自知, 仲招搖過市行喺人多嘅地方, 如果唔係每次都多得有心人提點, 恐怕接二連三遭扒手光顧乃家常便飯.

曾經一段時間成日揹背囊, 而喺嗰段時間, 我成日被拍膊頭, 原因就係路人會好心提醒我背囊打開咗. 雖然揹後面危機重重, 但係我又唔鍾意揹向前面喎, 唔型吖嘛, 完全無視有實際需要. 所以講到尾, 我都係一個唔適合揹背囊嘅人.

以前好鍾意行旺角中心, 雖然聽過嗰度係扒手黑點, 不過只要小心自己嘅手袋, 加上大多數都係用斜揹袋, 可以將之放喺前面, 所以未能成為扒手嘅目標.

一次換上背囊, 同樣去行旺中, 由於每次去逛嘅時間, 都係人多擠逼嘅時候, 所以有時會被人流所阻, 因而行得比較慢. 忽然感到背囊似被人觸碰, 而呢種觸碰感, 並唔似係因人多被碰撞, 只有一瞬間嘅觸感, 而係感覺到有下文嘅移動. 當時即刻醒覺, 將背囊轉嚟前面, 才發現拉鍊冇拉上. 我唔肯定到底係自己大意又冇拉吖, 定係被人拉開, 好在冇任何損失, 如果唔係我可能以後都唔會再踏足旺中, 以懲戒自己嘅疏忽. (如果拉鍊係被打開, 即係扒手應該喺我後面, 我有想像當佢本來將近得手時, 忽然被對方發現而有所防範, 見財化水, 佢應該會喺度頓足一番)

其實如果小心謹慎, 背囊係舒服過斜揹, 斜揹雖然攞嘢較方便, 但係揹咗一段時間, 揹帶嗰邊嘅膊頭就會覺得痛, 要換另一邊膊頭, 所以有時逛幾個鐘頭街, 我就要多次轉換左右膊交替揹袋, 都幾煩. 而背囊因為兩邊膊頭一起承托, 力度平均, 所以就唔會覺得膊頭痛, 除非揹重嘢就另當別論.

平時如果只係落街買吓嘢, 我就揹腰包, 一來方便, 二來膊頭唔會痛, 三來就算打開咗, 由於袋口細, 唔容易被扒.

有時見人哋個袋仔細細, 卻執得好整齊企理, 而自己嘅袋就雜亂無章, 想摷嘢都要摷餐懵先摷到, 不過我又冇諗過要執拾妥當喎, 因為自己都咁難摷, 扒手就更加無從下手啦. (哈, 自己搵一個躲懶嘅藉口)
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2644


589#
發表於 19-7-12 17:50 |只看該作者
聽說有一位新入行嘅唱作歌手, 名字叫黃妍, 唱歌好好聽, 於是我就入youtube搜尋吓佢嘅歌曲.

的確, 聲音好甜美動聽, 而且仲幾靚女, 雖然佢作咗好多歌, 不過聽落覺得, 其實旋律都係大同小異.

其中一首係來自經典五十年, 佢所唱嘅"後來". 就咁睇歌名, 其實我唔知係咩歌, 但係聽咗之後, 先記得以前曾經聽過, 原唱者係劉若英.

於是我又搜尋劉若英嘅版本, 中途亦出現S.H.E.成員, Ella 嘅另一版本.

"後來"嘅歌詞, 大意係描寫一位女孩, 曾經被一位男孩深愛着, 可惜大家當時年紀小, 未懂得愛的真諦, 致使戀情無疾而終. 經過無數歲月, 當成長後, 再度緬懷過去, 雖已明瞭何謂愛, 卻回頭已是百年身, 往事只能回味......

綜合三個版本, 我最鍾意Ella嘅演繹, 佢略帶中性嘅嗓音唱出當中嘅滄桑無奈. 正如某些留言 : 初識不知曲中意, 再聽已是曲中人. 一旦成為曲中嘅主角, 倍感百般滋味在心頭, 邊聽邊回憶, 不自覺就會潸然淚下.

後來, 我總算學會了如何去愛, 可惜你早已遠去, 消失在人海.

後來, 終於在眼淚中明白, 有些人一旦錯過就不再.

在這相似的深夜裡, 你是否一樣, 也在靜靜追悔感傷.

如果當時我們能不那麽倔強, 現在也不那麽遺憾.

你都如何回憶我, 帶着笑還是很沉默.

這些年來, 有沒有人能讓你不寂寞.

永遠不會再重來, 有一個男孩, 愛着那個女孩......

就以上幾句歌詞, 係咪已經道出很多人埋在心坎裡嘅告白, 因而感觸良多呢?

而黃妍嘅演繹就似是娓娓道來, 溫柔地訴說過去一段情.

至於原唱, 我反而覺得係最普通, 起碼我聽嘅時候, 冇產生任何共鳴, 難怪當年聽到, 除咗覺得歌曲悅耳之外, 並冇令我留下任何印象啦. 至於是否乃 : 初聽不知曲中意, 再聽已是曲中人, 我覺得應該唔係, 因為當時嚟講, 已經算係曲中人, 或者係因為冇深入瞭解歌詞, 所以就錯過咗一首好歌咁多年.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2644


590#
發表於 19-7-18 11:15 |只看該作者
近來社會烏煙瘴氣, 每個星期唔係遊行就係抗議, 諸多訴求, 到處充斥戾氣, 搞到身處當中嘅市民, 好多都萌生移民他方嘅念頭, 包括朋友在內, 正積極查詢移民詳情.

其實天大地大, 去得邊呢, 遠嘅嫌太遠, 近嘅嫌冇意思, 講到底, 即係邊度都唔駛去, 留喺香港算啦.

曾經我都有諗過如果移民, 我想移去邊呢, 好大機會移去台灣, 或者星馬泰呢啲近近哋嘅國家.

不過除非真係有好大決心離開啦, 否則都係諗吓啫, 始終都係土生土長嘅地方, 點捨得走吖.

希望經過呢段多事之秋後, 好快會回復正常, 馬照跑, 舞照跳, 風繼續吹!
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2644


591#
發表於 19-7-20 12:17 |只看該作者
每到周五, 當家就歡天喜地講 : 好嘢, 又過咗一個禮拜, 好快又出糧.

我心裡暗忖, 時日如飛, 對於我哋呢啲坐四望六嘅人嚟講, 咪即係意味住嗰頭近囉, 傻佬!

一分鐘六十秒, 一小時六十分鐘, 一日廿四小時, 一年三百六十五日, 廿三十年, 仲有萬幾日.

萬幾日, 照字面睇, 好似仲有好多時間, 但係當睇住秒錶每分鐘飛快地跳, 你就會驚覺, 原來看似還有唔知幾多兆億秒, 正在一分一秒不斷溜走, 所以計算下來, 其實時日無多.

成日聽人講, 要喺有生之年達到乜乜夢想, 做一啲有意義嘅事, 才不枉此生云云.

對於我嚟講, 冇諗過有咩夢想或抱負 (名正言順鹹魚一條), 大半生過去, 一直都係營營役役, 每日平平淡淡過日子.

曾經羨慕嗰啲多姿多采生活嘅人, 曾經渴望能好似佢哋咁, 每日呼朋喚友暢所欲言大快朵頤. 不過久而久之, 我明白好多事都係因緣際會, 強求不得, 各有前因莫羨人, 所以後來我就乖乖接受事實, 同自己講, 平靜簡單嘅生活, 未嘗唔係一件好事.

雖然明知歲月如流金般矜貴, 但係我嘅日子都係如常咁過, 因為唔知何謂活得有意義. 或者無風無浪, 都算係另一種有意義嘅生活啩.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2644


592#
發表於 19-7-25 11:52 |只看該作者
朋友公司週年慶, 喺公司搞大食會, 知道我饞嘴, 於是就邀請我出席.

知我者莫若佢, 一講到食我就精神, 就算平日盡量足不出鐵閘, 都流住口水應承不迭.

由於係首次到朋友嘅公司, 基於主客之分, 就算大家熟絡, 佢都喺公司樓下等我, 以免我迷路. (哈, 果然夠朋友呀吓, 知道我係一名路痴)

到達公司, 未到開餐時間, 朋友就一盡地主之誼帶我到處參觀.

公司雖然唔算大, 不過一般辦公室器材設施都一應俱全, 而且仲有茶水間, 可以供員工休息唞唞氣, 亦有好多零食飲品供員工享用....... 見到咁嘅陣勢, 我一方面羨慕佢可以成為呢度嘅一員, 但另一方面我又慶幸自己唔喺呢度工作, 因為源源不絕供應嘅食品, 將會令一個好為食嘅人, 體重每日以千克計算地增長, 試用期未過, 身形已比象不足比豬有餘.

到會食品好快已被送到, 可惜卻未能開動, 因為要等高層陸續到來才可埋位.

望住枱上好多盆食物卻未能進食, 口水嘅分泌速度更加快, 因而搞到我要成日吞口水.

等到頸長兼飢腸轆轆, 終於都可以開餐, 雖然已經餓到飛起, 但為保持(所剩無幾嘅)儀態, 我都謙讓地排喺後面, 等其他人取完食物我至上前挑選美食.

食物種類唔算太多款, 亦唔算好特別, 都係一般到會嘅大路嘢, 所以經過一輪衝鋒陷陣之後, 好多人都停晒手/口. 賣相唔太美觀嗰啲, 直頭郁都冇郁過咁滯, 而一啲香口嘅炸物就一早被掃清, 想再安歌都冇.

見啲人散得七七八八, 朋友見仲有好多食物剩, 就問我有冇諗住打包帶走.

其實我知道逢係呢啲場合, 最終都會賸下唔少食物, 所以早有準備, 帶定幾個食物盒, 以備真係有得打包, 都唔駛浪費人哋嘅膠盒.

最初, 我諗住只係打包少許, 唔敢太放肆, 驚包得太多, 會剝削佢哋嗰份, 以為人哋呢刻食唔晒, 會將之放喺雪櫃, 留待第二日再食過. 點知朋友話佢哋唔會留, 如果冇人要的話, 就會全部倒掉.

唉, 難怪成日聽到啲乜乜調查報告, 香港人每日浪費喺食物上嘅數字係噸噸聲, 明明仲食得都話要扔掉, 莫怪乎堆填區吞吐量負荷不來.

雖然我已經好努力地將我帶去嘅食物盒裝得滿滿, 但枱上依然仲有好多, 例如一大盆冇乜人動過嘅白飯, 一大盆只被動過十份一嘅炒麵, 半盆賣相不甚討好嘅煙肉卷, 大半盆糕點, 小半盆咖哩肉.......

唔知點解, 諗到嗰啲將會被棄掉到垃圾桶嘅食物, 我有種想哭嘅感覺. 畢竟佢哋嘅使命係讓人裹腹, 而家卻直接就將之扔掉, 實在感到好可惜, 亦覺得好唔忍心.

我明白有啲人訂食物嘅份量, 係寧願多唔想少, 以免畀人小家子嘅感覺, 但係都要量人而為. 以我之見, 貴精不貴多, 讓人回味, 總好過讓人唾棄嘛. 當然, 除非啲食物名貴兼份量少, 又除非個個都係大食積, 否則點都會有剩餘. 如果人人可以一齊將賸下嘅食物打包帶走, 咁就多一分環保, 亦少一分浪費.

老實講, 每次我都希望所預備嘅食物盒用唔着, 因為咁即係代表食物全部被掃清, 我樂於見到呢個情況, 好過要為打包唔晒嘅食物惆悵.

雖然我從未試過捱餓嘅滋味, 但我明白每樣食物嘅來源, 都係經過無數人辛苦努力, 才可供給我哋每餐所需. 我哋感恩之餘, 亦應該珍惜所有, 不要浪費.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2644


593#
發表於 19-7-30 17:58 |只看該作者
本帖最後由 cforchat 於 19-7-30 20:27 編輯

喺逃犯條例首次集會遊行, 場面幾咁震撼, 全港市民都熱血沸騰, 深深感謝一班年青人, 於烈日當空下, 依然無畏無懼, 不怕艱辛, 為大眾站在最前線, 使我亦不禁在內心吶喊, 同志們, 辛苦了!!

高層遲遲未作出決斷回應, 只係以暫緩作為答覆, 以為先平息民怨, 等人們消化咗件事, 冇咁風頭火勢, 然後再加以包裝, 巧立明目之後再推陳出新.

點知今次市民完全唔收貨, 總之一日未撤, 一日就繼續每星期遊行及集會, 一於同政府拚到底.

眼見不撤回不罷休, 特首最終亦宣佈原先草案胎死腹中, 條例已經唔存在.

但係, 港人並未因此收手, 依然用唔同藉口集會遊行, 與當初反對條例嘅原意已經相去甚遠.

而家每到星期六日, 就會密切關注唔知又會發生乜嘢動亂. 因為喺動亂期間, 少不免出現暴力/血腥場面. 每次見到呢啲場面, 我都不無感慨, 幾時開始, 香港竟然變成一個安樂戰場??

身為人民公僕, 係為保護市民生命財產, 本應警民一家親, 可是而家警民關係屢起衝突. 而家警察除咗日常任務, 另一行動就係要對付市民. 究其原因, 都係因為有搞事嘅人, 警隊才奉命執勤, 誰知執行識務, 卻首當其衝成為謾罵/攻擊目標, 有啲甚至被查底細, 連家人都受牽連.

禍不及家人, 一人做事一人當, 唔明點解要去搞人哋屋企, 呢種做法太過了. 所以有時都戥警察們覺得委屈, 就係因為着住套制服, 因而一切行動都要克制容忍, 就算面對受襲/侮辱//譏諷等等無理行為, 外表依然要笑罵由人, 否則又會引起軒然大波. 當然, 你可以講吃得鹹魚抵得渴, 但係冇諗過渴係來自被保護嘅對象吖嘛. 即係呢頭啱啱畀黑衣人打咗一拳, 嗰頭同一個黑衣人向你報案佢被白衣人打, 你一樣要同佢落簿備案㗎 (走咗去當見唔到係另外一回事).

而家整個社會氣氛都好緊張, 每個禮拜總有唔同地方被一些滋事份子破壞, 搞到民不聊生, 之前對佢哋讚許感激, 已換來不勝其煩. 老實講, 破壞設施阻塞道路騷擾民生, 最終咪又係公帑埋單找數, 成件事根本已經本末倒置.

而遊行嘅口號, 今次要呢個嗰個下台, 下次要釋放邊個邊個, 來來去去都係莫須有, 永遠沒完沒了.

冀望嗰班有心人, 呢一役, 已經搞垮咗本來欣欣向榮嘅香港, 令香港元氣大傷嘞, 係時候放手, 讓香港人喘一口氣, 還香港人一個家啦, 唔該晒!!!
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2644


594#
發表於 19-8-2 20:21 |只看該作者
本帖最後由 cforchat 於 19-8-2 20:31 編輯

颱風韋帕來匆匆去慢慢, 為打工仔帶來額外半天假, 不過對於住處距離屋企頗遠嘅親戚, 佢就發牢騷, 唔放好過放.

話說, 佢係喺一間非牟利機構做兼職清潔工, 當佢前日早上收到天文台預告, 將考慮於十二點至兩點期間掛八號, 佢就諗住以佢返工時間十二點半, 斷估都唔駛返啦, 於是就一心一意等佢哋組長喺群組發放訊息, 只要一收到訊息, 佢就立即回牀上瞓佢個三五小時, 跟住至起身吃晚餐.

誰知等呀等, 都等唔到被告知唔駛返工, 而就算有其他同事喺群組主動詢問, 組長依然冇聲冇氣, 眼見距離出門時間逼近, 若然再唔出發肯定遲到, 等至最後一秒都冇動靜, 只好死死地氣好似平時咁搭車返工.

十二點半前返到公司, 有全職嘅同事帶笑問佢做乜返工, 佢就答 : 又冇人話唔駛返工, 咪局住返嚟囉, 否則到時上頭有心留難, 話天文台都未掛八號波, 問我做乜唔返咁點解釋呀?

原來公司幾個話事人, 咁啱都唔喺香港, 根本唔知打緊風, 所以安排唔到下屬提早放工或者唔駛返工, 搞到個個好似孤兒仔咁唔知點算好, 好彩後來組長終於蒲頭, 喺群組叫大家收工, 佢哋至齊齊走人.

親戚由打咭返工至打咭收工, 前後都唔夠一個鐘, 但係花喺交通時間, 卻用上兩三個鐘, 難怪佢大吐苦水.

佢重提上年山竹襲港時, 又係話自己黑仔.

當時佢新入職冇耐, 見好耐都未過過澳門, 於是一早約咗幾個老死, 買定船票過大海搏殺.

點知人算不如天算, 山竹來勢洶洶, 當佢十五十六照唔照原定計劃出發時, 佢幾個老死就話唔理佢, 反正佢哋會如常出發.

親戚見有人陪, 又難得有咁嘅機會, 況且根據天文台預測, 山竹喺周六最接近, 而佢哋嘅行程喺周日晚結束, 隔咗咁多個鐘, 應該可以順利回港啩. 就算要阻遲至周一至開船, 咁佢返工嘅時間係下午, 假如佢搭最早一班船, 幾個鐘綽綽有餘返到公司啦.

又一次人算不如天算, 星期日冇船, 要等到星期一, 而且仲唔係可以一早喎, 因為要等海關人員埋位才可以開櫃位安檢. 本來如果山竹仲未走, 咁梗係冇所謂啦, 問題係山竹已經離開, 八號風球已除下, 即係要照常返工.

親戚見咁嘅情況, 就算急如熱鍋上螞蟻都無補於事, 不如就索性請一日假. 點知人事部回覆, 由於親戚係新入職, 按規矩係唔可以請突發假, 除非紅白二事先至會批准 (我馬後炮 : 哈, 你點解唔同佢講, 如果逼到你走投無路就會跳海, 到時咪白事囉, 睇佢畀唔畀你請假). 若然佢唔返工, 就當曠工論, 可以即炒.

儘管親戚當時想喺電話理論, 最後都骨聲吞咗啖氣, 佢回心一諗, 只怪自己明知打風都仲要遠渡重洋玩樂去也而滯留喺碼頭, 因而阻礙工作, 既然係自己理虧, 就唔可以怪人哋揸正嚟做, 於是退而求其次, 問對方萬一自己未趕得切喺正常時間上班, 可否事後補回時差? 答覆係可以的, 不過下不為例. 雖然可以補回時差, 不過親戚都好心急, 盡量趕呀趕, 有乜車上乜車, 終於比原定時間遲咗一個鐘, 而喺第二日就提早返一個鐘補回之前所欠.

事後佢同其他同事傾開呢件事, 同事都好詫異, 紛紛講 : 吓!? 我哋嗰日有啲遲到有啲因為冇車而返唔到工, 都冇扣我哋任何假或者錢喎, 你一個鐘都要補返? 乜咁冇人情味㗎!

親戚聽完同事咁講之後愈諗愈激氣, 差啲想劈炮唔撈, 因為覺得公司處事不公. 後來冷靜下來諗, 自己只係一個新人, 冇任何福利都好正常, 佢哋唔扣我錢, 肯畀我補返一個鐘都算係咁嘞.

難得呢位親戚, 凡事都識得自圓其說自得其樂.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2644


595#
發表於 19-8-6 17:19 |只看該作者
呢排市面立立亂, 每次吾兒要出街, 我就好擔心.

之前講到明會喺邊區遊行, 只要避開唔去嗰邊就得. 但係而家趨勢卻分道揚鑣, 變成隨意四圍遊, 根本唔知邊區去不得, 唯有盡量有遊行集會嘅日子唔去街.

遇着吾兒需要外出, 我同當家就會千叮萬囑佢萬事小心, 如人多嘅地方最好繞路行, 千祈唔好加入人堆, 以防混亂時走避不及.

除此之外, 亦時刻留意集會情況, 每逢遊行嘅地方係吾兒有可能會經過, 都第一時間通知佢邊處唔可行, 邊度交通受阻...... 等佢有個預算.

不過時刻騷擾佢都唔係辦法, 因為呢一刻某區被堵, 下一刻可能已清場, 情況瞬息萬變. 有見及此, 我就留言畀吾兒, 叫佢臨走前才向我查詢, 等我指條生路佢行.

當然, 今時今日資訊發達, 佢駛鬼問我咩, 自己攞部手機搜尋一下都知啦, 所以最後佢都冇問過我, 自行搭車搭船轉地鐵, 順利返到屋企.

佢話曾經跟喺人群龍尾, 正當我準備倒吸一口涼氣, 然後薄斥佢為何要身陷險境時, 佢話龍尾根本一啲風險都冇, 啲人係慢慢散住步嚟行, 沿途有講有笑, 亦有好多情侶手拖手拍住拖嚟行, 當中氣氛就好似讀書時學校去旅行嘅愉快心情, 完全唔覺有任何危險存在.

吓!? 龍頭龍尾竟然差天共地? 當龍頭劍拔弩張與警察對峙, 又吃催淚彈又中膠子彈你打我我擲你, 大家媽來媽去, 上演緊六國大封相嘅場景時, 龍尾原來係笑聲笑聲滿載溫韾?

雖然吾兒強調只要唔行喺最前線, 其實應該安全, 但係我覺得都要睇條線幾長, 萬一只係得嗰幾行人仔, 容乜易就殺到後面吖, 所以可以的話, 最好連邊都唔好沾上.

我承認, 我係一個自私的媽媽.

每當從新聞片段見到一班站在前線嘅雙方, 當有任何行動時, 都係第一時間遭到襲擊, 我總係代佢哋嘅家人感到心驚肉跳, 目睹/想像兒女被打, 猶如切膚之痛.

奈何雙方立場不同各為其主, 只好祝願佢哋每個人都平平安安, 亦希望事件快快告一段落, 讓佢哋早日回家與家人團聚.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2644


596#
發表於 19-8-13 11:50 |只看該作者
前幾日, 朋友與同伴入夜後去咗西貢釣魚, 本來佢叫埋當家, 不過當家對釣魚冇興趣, 所以就唔同行.

第二日, 當家問朋友有冇釣到咩大魚, 朋友話都係啲普通魚仔, 不過回程時卻遇到疑似靈異物體.

大約凌晨時份, 佢嘅同伴負責揸車, 途經一處人煙罕至嘅路段, 二人同時見到路邊有個女人向佢哋招手. 由於二人曾經當過警察, 所以基於剎那嘅本能, 同伴已收油慢駛, 諗住停喺女人處問佢發生咩事.

突然朋友大為緊張叫佢加油唔好停, 同伴雖感到疑惑, 但都聽話地踩油絕塵而去.

朋友當即如釋重負地吁一口氣, 同伴問佢咩事, 朋友話當同伴準備停車時, 佢才留意到個女人冇腳, 下身懸浮, 距離地面起碼有三四寸.

當家聽完後頻呼好彩冇跟埋去, 我話就算佢喺車上, 都未必會見到啦, 因為以佢一貫習慣, 一上車必定呼呼大睡, 對於途中曾經發生咩事, 根本唔會知.

踏入農曆七月, 本來就唔應該去夜街, 何況仲要去啲咁偏僻嘅地方, 唔撞嘢就有鬼咯.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2644


597#
發表於 19-8-15 16:48 |只看該作者
朋友傳來一個文件檔, 話畀我睇吓佢公司要所有員工填嘅自我評估問卷喎, 仲話之前都未試過, 唔知今年黐咗邊條筋, 忽然搞啲咁嘅嘢.

我問係唔係受咗逃犯條例嘅影響, 公司想知道每個員工嘅政治立場, 一有偏左或傾右嘅意向就即刻不獲續約? 佢話唔關事, 因為評估內容完全冇任何與政治有關嘅字句.

我開左檔案嚟睇........

係喎, 只係好普通嘅個人自我評價, 一啲近來較為敏感嘅話題並冇提及過.

傳來嘅文件朋友已經填完, 之所以畀我睇, 係想問我嘅意見, 覺得佢填成點.

其實關我乜事呢? 做嘢嗰個係佢又唔係我, 我點知咁多啫.

不過既然佢誠意拳拳又拍照又傳檔做咁多嘢, 我就姑且參詳參詳啦.

內容基本都係問一啲員工對公司嘅觀感, 例如 : 覺得公司邊方面好, 邊方面要改善, 有冇不滿要宣洩, 有冇乜嘢期望....... 至於個人價值觀, 例如自信, 表現, 專業知識, 守時, 服從命令等等又如何?

大多數都係選擇題, 最低係0分, 最高係6分, 朋友多數都係揀2分, 最多都係3分.

我問佢點解畀自己咁低分, 佢話做人都係謙虛啲好, 就算自認為有5分, 都唔可以寫5分, 咁先至有進步空間. 而且自己值幾分唔係自己說了算, 係要公司覺得你值幾多分先至最緊要, 即係話自己評自己6分, 假如公司認為你只值2分, 你咪係2分囉. 相反, 如果你自評2分, 而公司認為你可以有4分, 咁咪唔會畀人覺得你囂囉.

佢講得又好似幾有道理喎.

當我睇到佢喺最後填上所期望嘅人工係15-20%時, 我問佢 : 老友! 你上面自我評價咁低, 下邊期望嘅人工就填咁高, 其實你係漏咗一劃, 想寫-15-20%, 覺得需要減人工咋嘛?

佢 : 哈, 咁係人都會期望高㗎啦, 佢咁問, 我咪咁填囉, 況且我有我填, 畀唔畀係佢哋嘅事, 可能到最後只加得3%都唔定. 雖然捫心自問, 以我而家嘅工作, 我覺得人工已經算高, 不過冇人會嫌錢多㗎嘛, 所以寫高啲都冇壞.

我 : 反正你對公司有冇不滿要宣洩嗰欄仲未填, 不如就寫 : 略嫌人工太高, 與工作量不相稱.

佢 : 哈, 唔駛咁寸嘅, 最多咪將期望人工降低至8-12%囉, 但係負數就打死都唔制.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2644


598#
發表於 19-8-19 13:01 |只看該作者
呢排無論行喺街上, 喺街市, 幾乎個個談論嘅內容都係有關反送中嘅議題, 人人彷如時事評論員上身, 講得頭頭是道.

喺酒樓嘆緊一盅兩件時, 隔壁兩位師奶亦都高談闊論, 爭相發表意見.

A : 你有冇去遊行呀?
B : 我就冇, 不過我個仔有去, 佢話點都要支持吓, 不過唔會行喺前頭.
A : 我有去, 見到政府咁樣, 一定要出去支持吓班後生.
B : 所以我冇阻止個仔去出一分力, 只係叮囑佢要小心為上, 佢話佢嘅朋友就係企喺最前線, 所以當日衝擊立法會時, 明明冇諗過入, 結果都被人群逼咗入去.
A : 係呀, 的確好牙煙, 所以行喺後面聲援吓就算.
B : 咪係囉, 加上而家搞破壞嗰啲都唔知是人是鬼, 費事一個唔覺意殃及池魚就喊都無謂.

聽到佢哋講到義憤填膺時, 總會爆出一兩個助語詞, 我同當家就會相視微笑.

雖然我對政治嘅敏感度不高, 不過好慶幸, 香港能有一群肯發聲肯企出嚟肯犧牲嘅人存在, 若然人人好似我咁, 今日嘅香港, 應該仍然只係一個漁港.

儘管我沒多大接觸政治, 但對於連日來社會發生嘅事卻極度關注, 比起佔中, 送中所流嘅血更多, 我見到好心痛.

721白衣人見人就打, 幾多無辜市民不幸受襲......

地鐵扶手電梯處, 近距離開槍不特只, 甚至不惜追打人群, 明明人已跌喺電梯處, 仍然狂追不捨......

喺電視畫面上見到呢啲片段, 我不僅眉頭深鎖, 亦不自覺地眼眶濕潤.

難以理解, 呢班手持武器嘅人, 對手無寸鐵嘅被打者, 何以打得落手呢, 就算係受人指使, 難道全沒良心去分辨有所為與有所不為嗎? 尤其是見到警方近距離開槍嗰段, 我腦中唯一嘅諗法就係, 佢哋好似喺度玩緊遊戲機, 完全冇理面對嘅係血肉之軀, 所以唔理有冇實際需要就開槍, 對佢哋嚟講, 呢啲合法開槍嘅機會冇幾何.

其實見到咁嘅場面, 正常人都會覺得心傷, 我唔明點解身為最高首長, 竟然一句慰問嘅說話都冇, 只係一面倒地講到自己一方所做嘅完全合法合理, 當被追問警權過大, 又話佢冇權過問警方事宜, 咁即係乜都佢講晒啦.

如果識做人, 無論誰對誰錯, 佢都應該講 : 見到警方與市民各有受傷, 我覺得好心痛, 大家都係我嘅子民, 手板係肉手背都係肉, 邊方流血我都唔想見到, 不如搵一日大家坐低慢慢傾啦好嘛...... 我諗佢咁講完之後, 佢口中嘅暴亂應該即時會停止.

可惜佢講嚟講去都係以家長嘅口吻在怪責呢啲行為影響社會秩序破壞繁榮安定......

唉, 喺年輕人角度, 人工低, 樓價高, 永世上唔到樓, 繁榮安定都冇我份, 我話之你啦.

結果, 兩方都唔肯妥恊, 運動依然進行中.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2644


599#
發表於 19-8-21 13:03 |只看該作者
反送中呢件事發生咗之後, 令原本對政事不聞不問嘅我, 亦變得非常關注, 每日都密切地留意事態發展.

回看早幾年前嘅佔中, 只係間中睇吓電視, 知道香港首次發射咗催淚彈, 跟住某啲道路被堵塞, 然後擾攘一番之後, 冇幾耐就被勒令清場....... 從此社會又回復正常.

而今次反送中運動初期, 見到市民反應咁大, 我好唔理解, 以為條例只係針對犯事嘅人, 只要行得正企得正, 根本就唔會被送中.

後來從多方嘅言談才得知, 條例未實行前尚且發生多宗被滅聲被消失嘅事件, 雖然受到外界壓力, 但對事主並未能提供多大幫助. 一旦條例實施後, 當局就更加可喺毫無壓力之下, 大條道理根據乜法物法賦予嘅權力, 縱使係莫須有罪名, 人們卻無從辯駁. 因為呢個原因, 致使市民上街表達訴求, 希望政府三思.

本來, 我以為今次又好似佔中咁, 最後會不了了之, 點知事情竟然急轉直下, 情況唔只冇受控, 反而愈演愈烈. 歸根究底, 如果政府一早睇到事態有嚴重趨勢, 應該早啲出嚟解畫, 讓事件降溫.

無疑, 如果政府用懷柔政策, 一邊安撫, 一邊忍耐, 若干日子之後, 好可能又步佔中後塵, 示威者最後無功而退.

無奈政府太過急進, 連展開對話嘅機會都冇, 一開始就用強硬手法, 以為棒下出孝兒, 唔打唔知驚.

其實一班決策行動者, 人人都經過青少年時期, 知道呢個時期最反叛, 明知大多數都係年青人為主, 以為以暴制暴會嚇怕對方, 誰知弄巧反拙, 唔只未能煞停, 反而讓行動升級, 正所謂壓逼愈大反抗亦愈大. 就好似專橫嘅父母命令子女唔好做呢樣唔好做嗰樣, 結果子女就偏偏要對着幹一樣.

特首多番強調, 只要動亂平息, 就會出嚟與群眾對話. 見到818和理非, 佢就出嚟公佈可以設立溝通平台同大家傾, 真係唔該晒咯.

第一次百萬人上街後, 佢話聽見大家嘅訴求, 不過依然會如常進行反送中議程..... 咁即係點呀? 投訴接受態度照舊呀? 當初佔中時, 佢都表現得好真誠同幾個學生代表傾啦, 最後又點呢? 改善到啲乜呢?

我覺得如果係有心解決問題, 應該早喺爆發第一場衝突, 警民各有受傷時就出嚟調停, 雖然未必能令事件立即平息, 至少可令雙方稍為緩和一下情緒.

唔係因為佢大安旨意可用武力擺平而毋須再出面, 就唔會演變成今日呢個局面啦, 所以而家講乜都為時已晚了.

老實講吖, 兩個多月來, 市民嘅聲音已經清楚講明五大訴求, 咁你就住呢五大訴求公開回應咪得囉, 等全港市民一齊得知吖嘛, 根本唔需要見乜嘢有心人.

而且, 就算坐低傾, 我諗只要涉及五大訴求, 佢一係就帶去遊花園, 一係就講不能成立嘅種種原因, 一係就答非所問, 一係就蒙混過去.......即係嘥時間嘥氣.

818之所以咁融洽, 係要畀大眾知道, 香港市民本來係善良平和, 邊個唔想喺太平盛世下過日子? 就係因為之前保證嘅自由已被慢慢蠶食, 所以才走出嚟表達啫嘛, 你估日曬雨淋嘅滋味好好受咩? 所以如果一日未有結果, 就算寒冷大風雪落下, 都會繼續出嚟.

聽講海嘯前嘅先兆係潮水快速退去, 而當局認為818係意味住退潮, 咁.......即係意味住乜嘢???
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2644


600#
發表於 19-8-23 15:58 |只看該作者
印象中, 好似係佔中之後, 先至有黃絲與藍絲之分.

據我認知, 黃絲者係撐民眾, 而藍絲則撐政府.

經此一分後, 從此黃絲與藍絲壁壘分明, 各自為所撐一方發聲護航.

其實無論黃或藍都冇問題, 畢竟各人有各人嘅意見與想法, 但若然係有理冇理盲撐一通嘅話, 就未免過於"愚忠"了.

當民眾有錯處時, 黃絲需要加以指正. 反之政府有錯時, 藍絲都唔可以一味死撐.

就以今次反送中事件為例, 見盡黃藍雙方展開嘅罵戰, 實在令人不忍卒睹, 而其中尤以藍絲嘅言論更為刻薄.

首先, 佢哋將穿上黑衣示威者形容為曱甴, 責備佢哋破壞社會製造混亂, 又話佢哋有書唔讀出嚟搞搞震....... 盡是苛刻涼薄嘅說話.

我想話, 佢哋放棄玩樂嬉戲嘅日子, 選擇冒住吸催淚彈被打被捕嘅危險, 都要出嚟向政府表達訴求, 為嘅係乜嘢? 係為咗讓住喺香港嘅每一個人, 能生活喺一個民主社會, 唔駛逐步邁向獨裁統治嘅年代. 如果香港與內地無差別, 咁不如回去內地生活仲好啦, 可以住大屋, 物價又唔太高, 何必蝸居喺彈丸之地嘅香港呢?

香港矜貴之處, 除咗佔地利之優, 言論自由都係一個吸引處, 假如呢啲優點將會日漸消失殆盡, 試問香港仲有乜嘢優勢可言?

呢啲為後代設想嘅行動, 本應係由我哋呢代或上代去爭取, 就係我哋相信五十年不變, 可以馬照跑舞照跳, 又貪圖安逸生活, 致使廿多年來, 應有嘅自由正一點一滴被剝削了而不自覺或唔多理會, 因而令當局咄咄進逼.

你大可以講進逼得嚟都唔知咩世紀, 自己都未必見到, 但係我哋嘅後代呢? 佢哋將要比我哋活得苦, 承受嘅壓力比我哋更加沉重, 甚至講得嚴重啲, 有可能倒退回到文革, 難道你忍心佢哋要遭受上上代曾經受過嘅苦咩?

無論訴求最後能否成功, 期間年青人已先要面對被清算被控告被殘害被毒打嘅後果....... 佢哋唔係拍吓籮柚就走, 而係有可能要付出沉重代價, 點解佢哋有自唔在要攞苦嚟辛呢? 佢哋大可以做人們口中嘅廢青, 必要時攞綜援, 政府冇得唔理㗎喎. 但係佢哋都選擇出嚟做喉舌, 爭取訴求.

如果話佢哋係恩人, 未免過於言重, 但念在佢哋不辭勞苦不畏強權都要企出嚟嘅呢份勇氣, 請嗰啲開口閉口話佢哋係曱甴嘅人, 放下成見體諒吓佢哋嘅本意而口/筆/鍵盤下留情. 假如佢哋當中有行為失當或言行過火者, 應該由法律給予制裁, 唔好不知就裡就將之扣上暴徒之罪名. 況且身為局外人嘅平民百姓, 對於內裡存在住幾多真幾多假嘅角色扮演, 根本唔清楚底蘊, 又何來能公道批判?

當然, 咁大班人, 一定有害群之馬, 再加上有人刻意煽風點火, 令到件事本來和平示威, 變成喋血街頭, 我諗好多人都始料不及.

或者係我主觀啦, 總係認為每每有人遇襲嘅案件, 唔多唔少都係因為曱甴之喻植入腦筋, 致令反對派自我催眠, 以為只係打曱甴而已, 並無不妥, 結果就釀成多宗血案, 造成遺憾.

其次, 對於嗰啲唔理三七廿一嘅民眾, 對住警察大呼黑警, 我又係覺得唔公平.

須知道一人做事一人當, 若然親自見到某位警察無理使用暴力, 當然可以直接鬧佢啦, 但係以一竹篙打一船人嘅做法, 我覺得有欠公允. 好似上次紅土遊行, 見到四位警員行喺人群中被人鬧到狗血淋頭, 真係戥佢哋覺得委屈, 明明佢哋都冇做過啲乜嘢, 點解要咁樣對佢哋呢.

呢段期間發生咁多衝擊, 民眾因為情緒激動而仇警無可厚非, 但係如果將"外援"嘅暴行入埋畀香港警察, 就令佢哋變得無辜了.

同樣, 咁大團隊, 必然有枯枝, 為咗個別人格有問題嘅份子而怪罪所有, 未免以偏概全. 畢竟大多數香港警察都盡忠職守, 維護社會治安與除暴安良都做得非常出色, 唔可以抹殺佢哋嘅功勞.

逆轉思考, 如果站喺佢哋立場, 都覺得好無奈, 始終上頭有令, 就要執行命令, 一日吃呢口飯, 一日都係身不由己, 再加上家人受歧視威嚇, 難怪佢哋嘅士氣每況愈下.

可能部份藍絲心痛警察被辱而不分青紅皂白有理冇理力挺之, 咁又唔駛偏幫到咁出面, 始終有部份嘅處事手法確係令人髮指嘛. 雖然警察都係人, 都有情緒都需要發洩不滿, 但係一旦穿起制服, 無論環境幾惡劣, 只要唔危及自身安全, 全都要克制容忍. 就好似向一位被綑綁手腳嘅老者施以虐打, 對方破口大罵係唔啱, 因為咁而打佢嚟發洩, 成件事咪錯晒囉.

導致黃藍分歧, 始作俑者源於政府. 因為政府苛政不公高壓手段才有黃絲, 因為政府偏袒隱惡歪理連篇才有藍絲....... 特首口中嘅社會撕裂, 其實即係自打嘴巴.

大家有緣生活喺香港呢一片天空下, 應該團結齊心唔好分化. 黑衣人, 香港警察都係我哋嘅家人 (有心搞事者除外), 黃絲好, 藍絲好, 最緊要憑良心理性分析明辨是非黑白, 切勿盲目附從某一方或聽信片面之詞. 一隻手係拍唔響, 每件事嘅始末都係相對的, 所以就算唔認同對方, 都唔好惡意中傷, 以免中了有心人之離間計而自相殘殺.

香港人! 加油!!
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用


首頁
2829303132...42

尾頁

跳至頁
返回列表
回覆
發帖
高級模式 | 發表帖子
B Color Image Link Quote Code Smilies
你需要登錄後才可以回帖 登入 | 註冊

© 2024 Baby-Kingdom.com Limited.

網站： 聯絡管理員 廣告查詢 私隱政策 使用條款 免責聲明 使用意見