興趣嗜好

跳至

首頁

尾頁
   6


大宅

積分: 1925


發表於 19-8-31 11:18 |顯示全部帖子
聽講而家返大陸會有好多阻滯, 尤其是針對十八至三十五歲又揹住背囊嘅男士, 假如係呢個年齡層, 被扣查審問嘅機會好高.

當家聽到就話 : 吓!? 我返大陸實揹背囊㗎喎, 咁咪好高危?

我話 : 你係十八加三十五, 只係揹背囊啫, 未符合以上全部條件, 所以唔駛驚喎.

跟住佢又喃喃自語 : 唔係嘞, 下次真係返去, 都係帶一部只能打出打入嘅手機, 萬一有公安扣查, 就唔駛驚因內容有敏感嘅訊息而被留難.

我話 : 今時今日, 除非唔識字嘅人, 否則仲邊有人唔用智能電話㗎? 你咁樣咪仲惹人懷疑, 到時對你查多兩錢重㖭呀, 既然咁擔心咪唔好返囉, 做乜要諗咁多呢?

當局一時無間道, 一時古惑仔, 一時用力打, 一時用糖氹, 一時硬, 一時軟, 一時狼, 一時蛇, 一時黑, 一時白, 一時呃, 一時嚇, 一時苦肉計博同情, 一時企硬揸正嚟做....... 無日無之地轉換招數.

之所以製造種種顏色恐怖, 只因為技窮, 根本唔知道邊招才能奏效, 成功令民怨平息.

解鈴還須繫鈴人, 如果當初肯接納民意, 只需一句撤回就天下太平, 可是卻礙於面子問題/急於領功而故步自封冥頑不靈, 搞到而家聞名國際, 都唔知點收科.

究竟係點樣嘅父母, 才會教養出如此子/女, 不惜踩住滿地鮮血來圓自己的夢/滿足自己的私慾, 恁地被唾罵依然面不改容, 依然戀棧位高權重...... 所作所為, 實在令人齒冷.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 1925


發表於 19-9-5 10:16 |顯示全部帖子
網傳831太子地鐵有死亡事件, 死者之一嘅受打過程盡入記者鏡頭, 加上當時警察嘅反應, 又封站又另外運送, 令整件事陷入似非而是嘅局面, 實在讓人非常擔憂.

通常我好少去睇一啲暴力場面, 尤其是警察不問情由揮槍就開揮棍就打, 完全失晒常性嘅行為, 呢啲見者心酸嘅鏡頭, 我盡量都唔睇, 以免心戚戚然.

可是, 呢名傳說中嘅死者, 我卻從新聞片段內睇到, 當時佢唔係被圍毆, 只係被一名警員摔喺地上, 由於摔下嘅力度猛烈, 我見到疑似死者嘅頭部遭受到撞擊, 呢一擊非同少可, 輕者可能引致昏迷休克, 重者甚至會致命.

我只係睇咗一次, 已經唔再想睇, 因為實在感到錐心之痛. 所以後來就算見到網上不斷將呢段畫面研究分析, 藉以證明當時可能疑似死者已回天乏術, 我都唔敢再重睇片段嚟確認佢哋嘅講法.

至今為止, 有關方面堅決否認有死亡事故發生, 可是事件仍然耐人尋味, 好多疑問都未有一個合理解釋. 而網上嘅留言又講到甚囂塵上, 每次言之鑿鑿時, 我腦海不期然就會浮起疑似死者被重摔下地嘅畫面, 一顆心好唔安樂, 久久揮之不去.

我衷心希望當局冇說謊, 亦希望所有傷者早日康復.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 1925


發表於 19-9-7 16:07 |顯示全部帖子
唔講唔講還需講, 特首終於講咗"撤回"兩個字.

想當初, 只需簡簡單單及時講出呢兩個字, 就可化解多少風風雨雨. 如今同樣兩個字, 已變得輕如鴻毛, 不值一提了.

聽講特首之所以屈服, 係想得到一班市民收貨, 企圖將反對聲音減少啲, 但係事與願違, 似乎外間嘅反應未能遂佢心意.

試問如果咁樣就順佢意收貨, 咁咪間接造就佢隻手遮天橫行無忌, 以後萬一又發生類似情況, 等你哋打生打死之後, 佢又施施然出嚟以偉大嘅口吻釋出善意, 簡直最毒婦人心.

莫講話抗爭者唔收貨, 連我呢個一直抱持中立態度嘅人都難以接受. 在我嚟講, 數月來看盡多少市民血肉模糊傷筋斷骨痛徹心扉嘅鏡頭, 而警察卻頤指氣使粗暴無禮腳起棍落嘅行為, 個別地區被催淚氣體弄至烏煙瘴氣鋒烟四起, 政府卻任由呢啲情況持續惡化, 只識得不斷指責市民, 不忘讚揚警察, 除此之外並冇任何實際行動平息....... 當大家日漸心淡, 對政府不再寄予期望, 呢個時候才出嚟釋出善意, 已經毫無意義了. 因為當警察嘅種種惡行公諸於世之後, 市民針對嘅重點已經唔再係逃犯條例, 而係警察濫捕/暴嘅問題.

所以, 成立調查委員會先至係當務之急, 因為只有透過調查, 才能釋放無辜被濫捕嘅人, 才能將雙方有嚴重過錯嘅人制裁, 才能還被抹黑嘅示威者或被冤枉嘅警察一個清白.

特首喺一段被錄音內曾表示, 因為礙於警察對成立調查委員會極之抗拒, 所以喺自己能力範圍之內, 一定會順應佢哋所求, 因而堅決拒絕呢一個訴求, 多次強調佢提議嘅監警會有同樣功能.

哈, 佢嘅所謂提議, 百分之二百全部都係喺佢嘅控制之內, 邊有公信可言吖. 所謂監警會, 照字面解, 只係監視住啲警察, 根本冇實權可以調查啲乜, 內部百分之九十九都係自己友圍威喂, 即係左手查右手, 嘥鬼氣!

而警察對於被調查咁抗拒, 顯而易見唔係身有屎, 又駛乜驚呢? 咁大反應, 更加需要查啦.

儘管口號係五大訴求缺一不可, 不過老實講, 如果撤回+獨立調查委員會, 我粗粗哋都會收貨. 因為只要有調查委員會, 無形中連暴動定性同埋撤銷控罪呢兩個訴求, 可能都可以一齊喺調查過程中得到應有嘅判決, 例如唔太嚴重就無罪釋放, 較為嚴重就重輕發落等等, 而唔係一刀切地全部被控暴動罪.

至於雙普選, 唉, 對於傳統古舊封建思想管治嘅阿爺國又點會肯讓步吖, 容乜易作反㗎, 梗係萬萬不能答應啦, 所以呢點都有啲難度.

不過有難度啫, 唔代表冇可能嘅, 睇吓等唔等到阿爺忽然一日轉死性或良心發現囉.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 1925


發表於 19-9-10 12:11 |顯示全部帖子
朋友住喺油尖旺區, 之前內地客氾濫嘅時候, 佢叫苦連天, 住家附近嘅行人路被一車車絡繹不絕嘅遊客霸佔, 遊客半蹲半坐喺地下抽煙吹水, 搞到成條路煙霧瀰漫. 吃完嘅生果皮核隨處扔, 旅團嘅貼紙周圍貼, 人聲鼎沸高談闊論嘈吵混亂...... 搞到原本寧靜嘅居住環境被滋擾得無日安寧.

自從反送中運動搞一搞之後, 遊客數量逐日減少, 而家終於可以唔駛行喺馬路, 終於可以還我淨土嘞.

由於有呢種連帶關係, 所以朋友極度支持今次運動, 反正就算旅遊業如何發達, 都帶挈唔到市民共享繁榮, 與其只係政府袋袋平安, 不如還市民一個安寧嘅居住環境仲實際.

自從特首宣佈撤回一詞後, 聽到有啲年紀較大人士高呼 : 人哋都撤回啦, 你哋仲搞咁多嘢做乜?

請恕我無禮地回一句 : 戇居!!!!

假如有人喺你屋企放火, 燒傷人, 燒咗好多財物, 然後再出嚟撲火, 你係咪都可以理直氣壯講 : 人哋都撲熄咗火啦, 仲想點呀?

嗱, 如果燒到你嘅時候, 你都能夠視人命如草芥, 視財物如糞土, 睇得咁開幫佢哋說好話, 咁真係要向你致敬. 你之所以咁大言不慚, 只因針未拮到肉而已.

又正如某啲警察, 兜口兜臉向記者射胡椒水, 對方發火時仲要叫人冷靜, 呢啲係咩道理?即係你無故打我, 仲要我冷靜?

阿Sir, 咁點解當啲街坊揶揄你哋嘅時候, 你哋唔只唔冷靜, 仲會大大聲以辦案為名報仇為實亂拉亂打人呀? 當出師無名時, 就大聲呼喝辱罵驅趕圍觀市民呀?

你哋之所以咁囂張跋扈有恃無恐作威作福, 無非都係靠一身強勁嘅裝備啫, 脫下呢啲裝備, 你哋仲會唔會咁"英勇"呢?

春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 1925


發表於 19-9-12 11:06 |顯示全部帖子
最近好多各大小商場都會喺晚上聚集群眾高唱"我願榮光歸香港", 場面虛冚, 振奮人心.

第一次聽嘅時候, 已經有種熱血沸騰情緒澎湃嘅感覺, 配合埋部份抗爭畫面, 忍唔住熱淚盈眶, 實在太激動了. (儘管已聽了無數遍, 情懷也不變)

尤以其中幾段畫面更加感動 :

喺新城市夾道歡呼一幕...... (經過之前嘅擾亂, 市民唔只冇埋怨, 而且拍掌喝采鼓勵, 證明人們心如明鏡, 明辨是非)

催淚彈射在傘上一幕...... (想像如果冇雨傘摭擋卸力, 直射入身體肯定造成極大痛楚)

前線喺催淚煙陣中用唔同方法驅散濃煙一幕...... (本來可以安坐家中吃喝玩樂涼冷氣, 卻為咗一份使命而置身險境中, 辛苦你們了)

四院會師聲援一幕...... (原本只須努力讀書無憂無慮嘅莘莘學子, 卻要為自己堪虞未來出嚟發聲, 難為你們了)

黑旗飄揚一幕....... (因為絕望與不信任, 才由紅變黑, 哀哉也!!)


祈求民主與自由 萬世都不朽

春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 1925


發表於 19-9-15 12:23 |顯示全部帖子
中秋前夕, 正當我喺街市入緊貨, 收到當家留言 : 你係咪喺街市? 我公司放早, 不如過嚟街市幫你攞嘢吖?

我速回 : 你唔好亂嚟呀老友, 收咗工就自己去玩啦, 唔駛你幫手.

以前以為, 有人陪行街係好事, 但係出到嚟至發現, 有啲對方啱睇嘅嘢, 我唔啱睇, 有啲我啱睇嘅嘢, 對方冇興趣, 於是就出現咗一個畫面 : 商店門前, 其中一方會無聊地站喺外出等另一方入內睇自己想睇嘅嘢.....

原本行街嘅目的, 就係想有人陪埋一齊睇嘢一齊畀吓意見, 點知最後卻變成各有各睇, 咁有乜意思呢? 所以獨行俠之路就係咁樣形成的.

當然, 有時買嘢都會心大心細, 甲貨與乙貨各有特色, 唔知揀邊樣, 兩樣都買太嘥錢, 買其中一樣又十五十六. 呢個時候如果有人提供吓意見, 就唔駛咁惆悵, 好快可以扑鎚. 試過為咗買邊件而喺店中苦苦思量一小時以上, 對於爽快之人, 只需十零分鐘就搞掂, 而生怕買錯會後悔嘅我嚟講就猶豫不決, 其時我就會諗如果有人同行, 就唔駛喺度浪費時間單思獨想拿不定主意.

後來再遇到以上情況, 一係就兩件都放下, 一係就決斷地買其中一件, 唔再諗被放棄嘅另一件. 而另一個更折衷嘅辦法, 就係索性過門不入, 就可避免自尋煩惱.

當家都係嗰種只睇自己有興趣物件嘅人, 話就話陪行街, 其實咪又係企喺門口等嘅一份子, 所以佢已經被我列為謝絕同行嘅其中一員.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 1925


發表於 19-9-20 12:10 |顯示全部帖子
呢排兩手嘅其中三指真係多災多難.......

首先係左手大姆指 : 話說煮飯時切一塊雞柳, 之前已用菜刀切咗醃好. 準備落鑊煮嘅時候, 發現切得略為大件, 眼見砧板菜刀已洗好收起, 一時懶起上嚟, 就拎喺手上, 企圖用一把小刀再一分為二. 由於生雞柳軟身難被切開, 於是就用加倍力度切呀切, 點知雞未切到, 小刀卻滑喺姆指上, 即時感到一陣刺痛, 望吓傷口, 見到皮肉之間一道痕, 正心存僥倖只係皮外傷之際, 血已注流而出, 止都止唔住. 諗住以紙巾輕按傷口止血, 點知未幾就將白紙染至一片殷紅, 要換上好幾次先至止到血. (我研究咗好耐, 都唔係好明點解會切到姆指指甲對下嘅位置, 因為我係以姆指食指中指攞住雞柳, 假如滑刀, 傷嘅都係向下嘅食指或中指, 何解會係喺上方嘅姆指呢? 實在耐人尋味)

儘管已經小心奕奕避免弄到傷口, 依然周時喺日常處理家務時弄到, 又次次都不偏不倚地碰觸着痛處, 搞到明明已經埋口, 一而再地又出血.

好嘞, 好不容易姆指傷口癒合結疤, 又出現另一狀況.

話說屋企大門嘅門氣鼓已舊, 若然開嘅幅度超過九十度, 佢就會慢慢自行閂門, 如只係得三十幾四十度, 就會一嘢就閂埋, 所以有時出去倒垃圾時, 一時唔為意只開小小幅度進出, 就會發出嘭一聲巨響.

一次與當家外出, 當家先步出家門按電梯, 我隨後出. 當我出時, 見到鄰居入屋, 由於佢令我注意力分散咗, 令本來要開大幅度嘅門, 只開咗一條縫仔. 如果隻手係握喺門柄上, 根本唔會有事, 衰就衰在當時隻手係喺門邊, 因為道門會大力嘭, 結果我隻食指就夾到應, 雖未致於血如泉湧, 卻甩皮滲血痛到入心, 不斷要大力fing手, 藉以減輕痛楚. (當家事後話見到我當時塊面青晒, 梗係啦, 十指痛歸心喎)

舊傷未癒, 新傷又嚟 : 屋企樓下電梯大堂嘅大門最近正在維修, 平時係自動關門, 喺維修期間, 留咗一條細縫, 方便住客出入. 一次, 當我出外時, 見到有人要進入, 於是就隨手將門稍為定住, 諗住讓對方直入而唔駛再推門. 假如我出去嘅方向係直行, 定住道門應該冇事, 好衰唔衰我係向左行, 又好衰唔衰我定門嘅時候並冇望住道門, 結果隻手唔係接觸道門, 而係食指插咗入門隙內, 而我竟然仲要保持鎮定, 恁地已經痛徹心扉, 仍不慌不忙地慢慢將手指抽出嚟, 然後喺行遠咗之後, 先至大力fing手. (如果唔係我懶老定抽遲咗出嚟, 應該傷嘅程度會輕啲)

呢鑊真係好傷, 雖然冇流血, 但係全隻手指青一撻紫一撻又紅又腫, 就算已日日塗藥水, 依然好多日都未消腫. 而主力被夾嘅手指內側, 就算已經隔咗大半個月, 掂嘅時候仲係好似冇乜感覺, 唔知係咪神經線已被夾斷.

好在當時道門本身留咗一條小縫, 令道門未完全閂埋, 若然係全閂嘅話, 睇怕我嘅手指當堂會被夾斷, 諗起不禁抹一把冷汗.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 1925


發表於 19-9-28 11:35 |顯示全部帖子
平時鍾意食甜點, 但係甜點多數都係飯後或餐間進行, 咁樣實在太肥了.

為咗能夠解饞, 享用而又未致於會肥死, 於是就會間中將甜點作為正餐, 中式西式互相交替. 例如紅綠豆沙做晚餐, 芝士凍餅做早餐......

本來當家唔太嗜甜, 漸漸亦被我同化, 甚至有過之而無不及, 有時會主動提出煲糖水.

可是呢, 甜品對吾兒嚟講, 只限於飯後先至會淺嚐, 要佢當正餐, 佢萬萬不能接受與認同. 所以如果當日有任何一餐係諗住以甜品解決嘅話, 就要另外為佢預備主食, 炒粉麵飯求其一樣都好, 只要唔係全甜就冇問題.

好似今日我與當家嘅早餐係焗蘋果批, 以前會預留一份畀吾兒, 經佢投訴之後 , 此後就唔再預佢, 只好另煮一碗粥加炒蛋.

當家覺得咁樣做會加添我麻煩, 明明一次過可以搞掂, 變相要煮多一餐.

我答 : 呢啲咪叫民主囉, 佢已經多次表達咗訴求, 我梗係要接納佢意見啦, 你估我係林女士咩, 佢就會答 : 我已經聽到你嘅聲音, 不過你依然要吃我炮製嘅食物, 無論你鍾唔鍾意, 我都會繼續煮!

聽完佢嘅對話大會, 觀乎佢嘅表情對答台詞, 無論人哋要求佢做咩嘢, 佢都含糊其詞, 不斷重複依法治理維護核心價值, 不斷重申監警會已足夠, 不斷強調警方執法冇錯, 不斷迴避警暴問題, 不斷譴責示威者...... 呢啲說話, 咪之前已經全部講過晒囉. 雖然後來已經冇興趣再睇佢行出嚟廢噏嘅任何演說, 但居然仲可以猜透佢喺對話時會講嘅內容, 可想而知佢講來講去根本都係得嗰幾句, 睇到我火都嚟埋, 直頭想打爆個電視, 簡直浪費香港人嘅時間.

佢天真地以為只要已經撤回, 再加上出嚟蒲吓頭, 扮吓可憐, 勸吓年輕人, 並叫人幫吓口一齊勸, 就可以平息民憤. (六月中之前, 呢招絕對見效, 可惜事隔數月, 晚矣!!)

恁地佢如何狀若苦口婆心, 人們依然無動於衷, 因為佢根本仲未意識/不承認, 自己才是將呢場熊火燒得熱烘烘難以熄滅嘅火炬手.

之前講過, 除咗撤回條例, 如果都有獨立調查委員會, 我都會收貨. 但而家就算佢肯成立委員會, 我都唔接受. 因為經佢手成立, 到時又唔知搵啲咩人嚟處理, 怕且搞到全部有關人士退晒休都未能調查到真相.

就算最終可以還原事件始末, 假如政策不變, 難保若干日子之後, 仍然會發生類似嘅運動, 仍然會出現另一批可能更暴力嘅警隊, 仍然會有更多無辜市民被捕被打被殺.

所以要避免重蹈覆轍, 應該還原基本步, 重組政府架構, 重組警隊, 制裁一干人等...... 咁先至能夠真真正正讓事件盡快平息.
春有百花秋有月, 夏有涼風冬有雪, 若無煩事掛心頭, 便是人間好時節.


瑪瑙宮

積分: 135109

2019新春慶豚圓 2019勳章 2018父親節勳章 2018母親節勳章 2018復活節勳章 畀面勳章 環保接龍勳章 BK Milk勳章


發表於 19-9-29 10:47 |顯示全部帖子
cforchat 發表於 19-9-20 12:10
呢排兩手嘅其中三指真係多災多難.......

首先係左手大姆指 : 話說煮飯時切一塊雞柳, 之前已用菜刀切咗醃 ...


小心處理傷口
戒口
take care
月光很美麗☺


大宅

積分: 1925


發表於 19-10-6 10:42 |顯示全部帖子
回覆 crystal媽咪 的帖子

多謝你關心呀.....
之前由於被夾位置腫起咗硬塊, 所以冇乜知覺, 隨住硬塊漸漸消散, 已經有返知覺嘞.
春有百花秋有月, 夏有涼風冬有雪, 若無煩事掛心頭, 便是人間好時節.


瑪瑙宮

積分: 135109

2019新春慶豚圓 2019勳章 2018父親節勳章 2018母親節勳章 2018復活節勳章 畀面勳章 環保接龍勳章 BK Milk勳章


發表於 19-10-6 11:52 |顯示全部帖子
cforchat 發表於 19-10-6 10:42
回覆 crystal媽咪 的帖子

多謝你關心呀.....


逐漸好番就好啦!
以後要小心
月光很美麗☺


大宅

積分: 1925


發表於 19-10-6 11:57 |顯示全部帖子
喺上世紀, 中國與香港都發生咗好多歷史大事, 例如辛亥革命, 文化大革命, 四人幫, 三年零八個月, 六四事件, 六七暴動........

以上事件, 對於一係未出世, 一係唔係身處其地嘅我嚟講, 都係透過教科書, 親歷其境嘅長輩, 歷史/政治學家嘅轉述而得知.

當正在慶幸自成長以來一直都生活喺風調雨順國泰民安嘅年代, 算係好幸運嘅一代, 如無意外, 應該可繼續安定繁榮頤養天年至歸老之際, 忽然嚟咗場反送中運動, 而且愈演愈烈, 眼見短期內未必能被遏止, 我才猛然驚覺, 原來每一個年代, 都要經歷過一啲事件, 才能令史書不留白.

既然被選中成為歷史見證人, 要與一群庸俗無能玩弄極權嘅人活喺同一世代, 只好順應天意. 至於結局如何, 又係另一個天意.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 1925


發表於 7 天前 |顯示全部帖子
回覆 crystal媽咪 的帖子

我會小心㗎嘞, 而家推門都會提高警覺, 避免再發生同類慘劇, 再一次多謝你關心.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 1925


發表於 7 天前 |顯示全部帖子
抵制美心呢個行動, 我會支持, 不過要等我將手上嘅餅咭全部用晒之後......

早於十幾廿年前, 美心與超群齊名, 各有捧場客, 而我就時常穿梭喺兩間餅店之間買所愛嘅西餅. 而因為餅咭較為划算, 所以就買入唔少餅咭, 以備隨時用嚟攞餅.

當時超群嘅拿破崙算係最出名, 我間中想吃時就會以餅咭換一打西餅, 主打當然係拿破崙啦, 不過又唔想只換一款咁單調, 所以會加兩三件其他款, 都係我鍾意食嘅.

至於持有美心餅咭, 一來係當年用嚟作為嫁女喜餅而大量入貨, 二來係因為分店比超群多, 幾乎各個地鐵站都有, 方便隨時隨地都可以取餅, 所以而家仲有美心餅咭嘅存貨.

記得當年超群宣佈結業時, 手上仲有幾張餅咭未用, 曾經好徬徨 (平時唔捨得用, 點知被一鑊翹起). 好在後來有食肆發起幫忙超群行動, 可以以餅咭作為現金券結賬, 先至唔覺得嘥. (但其實對我嚟講, 梗係想繼續換拿破崙啦, 因為平時根本唔會光顧嗰啲貴價食肆, 不過為勢所逼, 只好人出豉油我出雞, 好過眼白白睇住餅咭變廢紙)

大大話話, 都光顧咗美心好幾十年, 由當初認識佢嘅大小彩色花花餅盒, 到而家嘅白底深淺綠設計, 期間曾經換過好幾次, 但總係覺得新不如舊.

同樣, 西餅嘅款式亦每況愈下, 尤其係呢四五年間開始, 直頭覺得連普通餅店都不如.

以前每次取餅時, 款式之多, 簡直令我唔知揀邊款好, 因為款款都好精緻, 外相又吸引, 次次都要掙扎好耐先至決定要犧牲呢款而揀另外嗰款, 嗰陣時係有餅咭卻唔捨得用.

唔知由幾時開始, 發現曾經好多款嘅精緻西餅已經被升至特級位置, 即係唔再包含喺一打餅咭嘅價目內. 想換嘅話, 一張餅咭只能換得幾件, 而且仲要補錢, 咁我梗係唔制啦. 只能退而求其次, 換一打咩, 就要揀屬於一打嘅普通貨色, 呢個時候係有餅咭卻無所用.

好啦, 普通西餅實在太過輕飄飄細細件, 一打拎上手, 幾乎個紙盒仲重過西餅, 完全唔抵, 食咗都唔多覺. 於是我索性全部攞晒重量級, 例如紙包合桃蛋糕, 椰撻, 每樣半打. 比起西餅, 呢兩款算係叫做最抵又飽肚.

後來間中經過美心, 都會入內睇吓款式有冇更新, 時時會希冀唔知會唔會突然又有啲新款式, 可惜次次都失望.

就係因為來來去去都係嗰啲款, 所以就算依然有餅咭, 一直都束之高閣, 總係抱住一絲希望, 第時可能會有新款, 而家無謂浪費所剩無幾嘅餅咭.

當坊間發起抵制美心之後, 我就去倉底摷返啲餅咭出嚟, 就算只係攞紙包合桃蛋糕同椰撻都好, 務求快啲用晒去就同佢割蓆.

去到時又發現, 原本屬於一打數量內嘅椰撻已被升級, 頂!! 即係如要佢又要補錢.

哼! 我係唔會補錢㗎囉, 全部要晒紙包合桃蛋糕.

若然喺我未換晒所有餅咭之前, 連牛油蛋糕都升級, 咁我就連麵包都照殺, 總之就砌到啱啱好, 一毫子都唔會畀佢賺.

其實計起條數, 餅咭係永久通用, 愈遲兌對佢哋嚟講愈蝕. 因為以買入價比較, 起碼都升咗一倍有多, 即係假如當初係廿蚊一張, 而家已經值五十蚊, 十年之後, 可能變成七八十蚊.

問題係, 而家咁嘅形勢, 都唔知佢仲捱得幾耐, 為安全計, 都係盡快清倉, 費事變廢紙.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 1925


發表於 6 小時前 |顯示全部帖子
朋友持有BNO, 呢段期間, 佢總係每隔幾日就會同我講 : 唔知幾時英國嗰邊會收留我哋呢, 真係唔想留喺度.....

每次聽完佢咁講, 我就不置可否回應 : 就算肯收留你, 你覺得彼邦會好得過此岸咩?

實不相瞞, 假如我有直屬家人喺外地作為後盾, 而我只需攞一個喼就可移民, 呢個動盪時勢, 我都會走, 將來是否回歸到時再作打算, 至少呢刻我毋須面對不可知嘅困局.

可惜我並無親屬入籍海外, 內地就有唔少(呢個就算把啦), 喺投靠無門下, 我哋只能繼續生於斯長於斯, 與香港共存亡.

之所以覺得一定要係直系親屬才能投靠, 無非都係因為只有家人, 才能無條件付出, 真心實意接收難民子女, 雖然一時三刻未必能藉此入籍, 起碼都可作為暫時避難所.

朋友急於要遠走他方, 無非都係唔想面對當前嘅大是大非, 但係佢冇諗過, 可能會從一個火坑, 跳入另一個火坑.

以火坑嚟形容好似過於嚴重, 但係以佢哋一把年紀, 又冇乜特別技能, 要重頭學習風土人情, 重新適應異國文化入鄉隨俗, 唔係一件容易事.

基於此, 若然移民後嘅生活係可以頤養天年, 無需為口奔馳, 我絕對唔抗拒, 甚至好樂意㖭. 但係, 如果仍然要營營役役打份牛工, 以應付日常開支, 咁幾大都唔制啦. 搞咁多嘢都係做餐死, 搞嚟做乜呢?

而且, 去到人哋嘅地方, 始終都係外人, 就算風景如何明媚, 社會如何安定, 對於老一輩嘅我哋嚟講, 總會格格不入, 與龍牀不及狗竇同一道理.

既然冇先天條件移民, 我就索性諗都唔諗, 唔似得朋友, 會扭盡六壬多方查探以求成事為止, 祝佢理想達到.

講真, 如果要千方百計不惜放棄晒呢度一切走佬, 我應該做唔出, 畢竟建立咗咁多年感情, 一草一木一磚一瓦都熟悉不過, 點可能話走就走. 況且而家正處於水深火熱之中, 就咁走咗去, 未免太冇義氣, 寧願與全港人共渡時難, 也不捨棄之不顧.

所以已抱定決心, 是次抗爭, 如若勝, 則共享民主自由安定繁榮; 如若敗, 則共同攬抄面對衰退.

願天佑香港!!!
春有百花秋有月, 夏有涼風冬有雪, 若無煩事掛心頭, 便是人間好時節.

首頁

尾頁

跳至
你需要登錄後才可以回帖 登入 | 註冊