興趣嗜好

跳至

首頁

尾頁
   6


大宅

積分: 2187


發表於 20-9-11 22:25 |顯示全部帖子
之前睇一個煮嘢食頻道,短短幾分鐘,冇人講嘢,只有一雙巧手炮製美食,背景配上一首悅耳動聽嘅歌曲。

乍一聽,覺得好清新,聽多幾次之後,不知不覺愛上咗,奈何唔知道歌名。

此後再睇同一頻道示範烹飪,偷師係其次,聽歌至係主因。

幾經我鍥而不捨明查暗訪,終於知道乃出自電影"Flipped"嘅主題曲,由Amy Diamond所唱嘅"Heartbeats". 電影譯名係:怦然心動,歌名就叫"心跳",十分貼切。
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2187


發表於 20-9-16 21:13 |顯示全部帖子
我算係一個幾心急嘅人, 一係冇諗過, 一旦撩起條筋, 就好想即刻搞掂. 就好似裝修件事, 之前一直諗住等疫情過, 就算心急都只能聽天意, 幾時遏止幾時才行動.

點知一係唔搵, 一搵就回唔到頭, 既然都搵咗師父格咗價, 順理成章就一路向前, 反正遲早都要維修, 都係早早了卻件事, 唔駛樓下住戶見到日趨嚴重嘅水漬愈加煩惱.

好嘞, 第一件事就係揀邊家師父, 除咗報價, 工程點做, 報價項目, 交談時咩態度都好重要……

先講第一位師父, 由於佢係朋友介紹, 第一印象幾好, 但係傾傾吓, 我就覺得唔對路.

由於我想喺浴室裝假天花, 可是有條柱樑喺度, 我問師父諗住點裝, 佢話會與柱樑拍齊.
吓!? 降到咁低, 唔只有壓逼感, 仲會顯得好暗喎? 冇辦法, 要靚就係咁. 可唔可以照現狀鋪一層? (即係假如天花係N形, 裝完後依然會見到稍為低咗少許嘅N形, 而唔係變成一形.) 佢肯定地話唔得, 冇人會咁做, 除非唔裝假天花, 仲提議我如果嫌會令樓底矮咗, 不如髹油就算. (由於我唔識, 佢咁講我自然信, 所以開始心大心細係咪唔好裝假天花.)

其餘都係一般問與答, 不過就講明好多料都唔包, 因為唔知我哋咩心水, 所以極其量只會陪同我哋出去揀選.

至於維修水喉其中一部份需要喺外牆搭棚, 價錢仲未包, 如果需要佢搵人做, 要另加幾千. (假如真係做梗係畀埋佢做啦, 我哋鬼識去邊度搵搭棚佬咩.)

睇完佢嘅報價單, 我更加覺得唔妥. 分三期畀錢, 訂金六成, 做完廁所再收兩成, 最後做完廚房就收埋尾數.

嗱, 當我小人之心, 廚房之所以留最後, 因為好多材料購自內地, 雖然內地疫情已經緩和, 但係咪可以如期交貨冇人可以保證, 萬一遲遲未到貨, 而師父又因為只收剩兩成尾數, 怕且唔會急於催來貨(就算催都未必受理), 一句話內地未交貨就事不關己. 可憐嘅只會係我哋, 廚房舊物已被清拆一空, 新物未有歸期, 致使連基本設備都未可歸位, 幾時煮得飯遙遙無期, 到時洗濕咗個頭, 欲哭無淚.

唔知係咪對方知道報價條件幾辣呢, 見我哋冇反應, 幾次主動打嚟問有冇問題, 又話價錢可以商量…….. 所謂商量, 即係議價, 我怕佢將貨就價, 壓幾多錢, 就會偷工減料幾多分, 所以冇諗過要商量, 只係覆佢仲未決定動工日期.

而朋友亦強調, 唔駛因為係佢介紹而一定要幫襯, 最緊要我哋覺得適合先至好. (呢層唔駛佢講啦, 我從來唔會因為畀面派對而難為自己, 何況涉及六位數金額, 更加草率不得.)
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 1247


發表於 20-9-17 09:42 |顯示全部帖子
討厭咁濕又要開冷氣


大宅

積分: 2187


發表於 20-9-23 10:13 |顯示全部帖子
第二位裝修師父報嘅價與第一位相若, 本來佢做過同類單位, 畀佢做應該較為放心, 但係我發覺呢, 喺同佢交談間, 佢好似冇乜主見, 無論我問佢呢度想咁咁咁嗰度想點點做, 問佢得唔得, 佢總係答 : 得! 你想咁做咪咁做囉…… 雖然佢一副顧客總是對的嘅口吻, 但我反而唔多受. (逆我意又覺得人哋唔聽我支笛, 順我意又話人哋冇主見, 真係難服侍.) 點解呢? 因為我想要嘅係佢嘅專業意見, 唔係我想點就點, 因為我係外行人, 唔熟悉與理解工程事宜, 所謂要求, 完全係天馬行空一廂情願, 其實可能不切實際. 可是佢一味得得得, 冇任何建議, 我並唔認為係自己叻到令師父聽晒我講, 反而覺得係對方敷衍了事囉. 試問態度咁求其, 我點放心將工程交畀佢呢.

至於第四位報得最平嘅師父, 雖然佢上嚟嘅時候我唔在場, 但聽當家覆述完, 我就決定畀佢做. 除咗因為價錢連搭棚都包埋咁吸引, 亦因為佢會主動提出呢度點做, 嗰度用乜嘢料, 清清楚楚透明度高, 訂金收一半, 完工再收埋尾數, 均均真真, 又肯花心思幫我設計埋, 唔似得之前幾個, 怪裡怪氣, 一副準備劏我一頸血咁款. (不過當家就唔太放心, 總認住佢計錯數報錯價, 最後會縮沙, 因為冇可能平過另外兩家咁多. 我話有啲人報價較老實, 有啲人刻意報大預講價, 既然師父親身視察過, 應該唔會有錯, 如果佢做得好, 到時咪醒多少少當請佢飲茶囉.)

一切就緒, 只欠動工日子, 我喺度諗, 既然咁急叫人嚟報價, 冇理由不了了之, 唔通到真正做嘅時候再報過咩. 況且疫情都唔知幾時先至斷尾, 萬一仲要拖多一年半載, 樓下住戶一定唔會放過我哋, 不如趁確診數字稍為回一回, 嗱嗱臨搞掂佢, 起碼對樓下同埋對師父都叫做有個交代.

其實如果唔係漏水嘅話, 我哋原本計劃係過多幾年才全屋大翻新, 因為到時好多傢俱用品已變得更加殘舊, 就算扔掉亦唔覺浪費, 咁就唔駛處理太多隨身物, 稍為執拾一下細軟, 交低條吉屋鎖匙畀師父, 我哋拍吓籮柚就走人.

而家因為事出突然, 加上冇心理準備要大執, 只想快快完成緊急部份, 所以唯有頭痛醫頭止咗咳先, 其餘地方日後再從長計議.

決定咗日期之後, 首先要將現有傢俬點樣移到既唔防礙工程進行, 亦可遮擋其他物品, 藉以作為保護作用. 其次就係要闢出空間嚟安置來自廚房與浴室嘅雜物. (呢個時候, 就會羨慕嗰啲以簡約為主雜物唔多嘅廚房, 因為呢一刻見到自己買埋儲埋咁多扔又唔係留又冇位嘅物品, 真係頭都大. 所以話全屋裝修嘅好處就係可以大開中門, 由得師父點舞都得, 有財物喺度嘅話, 屋主驚有損失, 工人又要格外留神, 以防稍一不慎要賠償, 真係屋主煩時工人們都煩.

所以喺工程期間, 預咗工人一定會不斷進出, 實唔會隨手關門, 所以當家就裝咗監視器, 鏡頭對住門口, 時刻留意住有冇不相干嘅人入咗屋, 順便都想知道工作進度.

春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2187


發表於 20-9-27 16:59 |顯示全部帖子
乍聞竹內結子死訊,第一反應係:吓!?!?!?。。。。。。實在太驚訝!

以為佢中咗肺炎,或係因病身故,咁後生就離世,非常惋惜。 誰知報導話有可能係自殺,惋惜感隨即減少,畢竟係自我了結生命,屬於不負責任行為。

但又咁講,如果係患上產後抑鬱而輕生則另當別論,始終都算係疾病嘅一種,令患者情緒陷於低潮,若然救助不得法,根本難以自控。

雖然未知真正尋死原因,但我偏向相信係抑鬱所致,因為年頭才生下麟兒,還在哺育期,點忍心放下小人兒不顧咁自私呢,加上又正在牙牙學語趣緻可愛階段,試問如何捨得撒手塵寰呢?

開始認識佢係"午餐女王",見到佢每吃完一道美味佳餚而露出一副滿足表情,引到我流晒口水。 此後每次自家製日式咖喱飯,每吃一口,都會諗起佢喺劇中嘅表情,因為係佢食得最多次數嘅美食。

其次係"冰之驕子",只係睇過一次,劇情已唔太記得,唯獨是臨近尾聲,佢攞對溜冰鞋出嚟,偷偷去學溜冰,投木村所好呢段最有印象。

第三套係"藉着雨點說愛你",好感人,睇到我眼濕濕。

可惜,甜美笑容加一對可愛大板牙在世只短短40載,此後只能透過重溫來懷緬音容。

春有百花秋有月, 夏有涼風冬有雪, 若無煩事掛心頭, 便是人間好時節.


複式洋房

積分: 436


發表於 20-9-29 00:52 |顯示全部帖子
cforchat 發表於 17-3-5 15:16
天氣預告話未來幾日將會潮濕, 所以呢兩日搏晒命將污衣床單被單枕頭套全部交畀洗衣達人(即係洗衣機), 希望佢 ...



大宅

積分: 2187


發表於 20-10-1 18:12 |顯示全部帖子
往年中秋,都會收到好幾張來自各方嘅月餅券,由於我自己唔食,所以多數都轉贈畀人,當中尤以娘家最多。

今年唔知係咪市道唔好呢,竟然只收得一張,而且仲要係雪糕款,冇傳統嘅蛋黃白蓮蓉,即係冇得孝敬娘家。

講起雪糕月餅,大大個盒只得四小個,食完都唔夠我撩牙。 售價幾百蚊,食物成本只佔好少,精美包裝比食材起碼貴幾倍。

自從開始收到餅券後,已經唔會自掏腰包買月餅。 鬼咩,一盒四件要幾嚿水,完全唔值,我寧願折現好過。

就係好多人抱住一年一度嘅心態,多多錢都冇所謂,致使商家花心思創出多種口味迎合顧客,務求佳節能分一杯𡙡,深得消費者歡迎而獲取利潤。

諗諗吓,一年到尾幾個唔同節日,真係好似冇乜係我特別鍾意食,因為好多平時都可以食到,唔駛等到正日至嚟被劏。

有朋友嫌我生活太平淡, 好似對樣樣都唔太起勁。 其實都唔係嘅,只係未遇到令我有興趣嘅事啫,一旦撩起條筋,怕且所有衝勁全部出晒嚟。

不過,好彩仲有好多人依然重視節日,經濟才能得以振興,否則市面實一片死寂蕭條。
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2187


發表於 20-10-10 21:28 |顯示全部帖子
關於裝修安裝監視器, 其實最初構想, 並冇諗過裝, 根據當家嘅如意算盤是咁的 : 有你(即係我)得喺度, 工人就唔敢吞卜, 閒雜人亦唔會走入嚟八卦, 應該好安全. (吓!? 成班男人喎, 我一個女人喺度?) 怕咩啫, 你縮埋一二角煲劇, 邊有人理你. (如果要去廁所呢?) 咪落街囉, 行開一陣半陣冇問題. (咁點食嘢?) 梗係出去食啦, 水都冇, 你唔係仲想煮係話? (啲水喉拆走晒, 馬桶都冇埋, 夜晚點樣沖涼去廁所?) 如果你覺得唔方便, 或者睇吓可唔可以同吾兒返娘家住幾日, 我一個喺度留守得嘞. (咁你夜晚黑人有三急點算呀?) 唏! 男人老狗容乜易搞掂吖. (小就話用樽搞掂啫, 開大呢?) 到時至算啦, 你諗掂自己先啦, 唔駛理我.

雖然娘家可以容納我同吾兒, 但係我唔想打攪佢哋囉, 將心比己, 間屋唔係大, 忽然多咗兩條友又食又住, 仲唔知要住幾多日喎, 以我與母親都係唔好客嘅性格嚟講, 不免感到非常惆悵, 為咗唔想增添大家麻煩, 我寧願住酒店好過.

其實一開始根本就預咗住酒店, 只因疫情看似緊張, 所以才卻步. 因為問咗幾間酒店都唔可以開窗, 咁嘅時勢要連住幾日, 又多數時間會留喺酒店, 最需要空氣流通, 好驚病毒會透過中央冷氣傳播到每一間房, 加上佢哋有可能提供畀來港人士作為十四日隔離, 萬一當中住着隱形確診者, 到時中咗招真係無辜辜. 所以寧願諗盡種種權宜之策, 都唔敢落實入住酒店,

我甚至連運動場有沖身設施嘅更衣室都有諗過, 每晚食完飯就去運動場沖涼, 跟住至返屋企瞓覺, 睡前盡量唔飲水, 希望可以捱到天光, 真係頂唔到就搵個盆搞掂, 若然不幸開大, 咪好似當家話齋到時至算囉. (平時都唔多會, 斷估到時唔會咁黑啩?) 不過當家與吾兒認為喺公眾場所沖涼, 比酒店更高危, 因此極力反對, 所以只好作罷.

裝修日子漸逼近, 依然苦無良策, 有見確診人數回落, 而當中確診者個案, 好似冇一個係因為住酒店而染上, 才稍為放下戒心, 最後喺冇更好嘅辦法之下, 才下定決心入酒店.

既然住得酒店, 即係人肉監視器計劃告吹, 都有容身之所咯, 仲點會返去沙塵滾滾地方監工吖, 所以先至諗到安裝監視器.

此後當家每日除咗開工收工上去開門閂門之外, 其餘時間亦唔駛到場, 一切就靠遙距監視.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 1018


發表於 20-10-11 19:11 |顯示全部帖子
屋企已經開緊抽濕機


大宅

積分: 2187


發表於 7 天前 |顯示全部帖子
裝修期間住酒店嗰段日子, 對我嚟講非常寫意, 除咗旅行之外, 從未如此他條過.

每朝到餐廳食早餐, 食完後當家返工, 我就返上房, 等吾兒瞓醒, 我一係落街買外賣畀佢, 一係就喺酒店淥杯麵解決, 一餐食埋當兩餐, 然後二人就各有各節目, 佢打機, 我睇戲.

到咗夜晚, 等當家收工, 有時一齊出外食, 有時懶唔想落街, 就點定餐, 老點當家兼職外賣仔, 我哋就大剌剌喺度等食.

日頭有時睇戲睇得悶悶哋, 就會打開當家設定嘅遙距監控器, 睇吓有冇閒雜人等入咗間屋, 順便睇吓工人們開工情況, 冇乜特別就繼續睇戲.

監控鏡頭可以聽埋佢哋講嘢, 有次被工人發現, 聽到佢同師父講有鏡頭監視住. 只見師父頭也不抬 , 繼續埋首工作, 對工人講 : 你理得人哋啫, 做嘢啦.

嗱, 師父咁嘅工作態度就正確嘞, 做好自己嘢, 問心無愧, 話之有幾多鏡頭對住啦.

其實監控器嘅作用, 純粹看門口, 並唔係想監視佢哋有冇偷懶, 所以鏡頭只對住大門, 而且亦唔係廣角鏡, 除咗見到大門周邊一小角範圍外, 其餘方位全死角, 乜都見唔到.

大多數睇監控時間, 都係喺工人出外午膳, 因為大門只虛掩, 萬一有人入屋, 可以即刻打電話畀管理處上去睇睇. 當工人飯後返嚟, 我就唔再睇, 反正睇嚟睇去都係佢哋行出行入, 冇乜好睇.

偶然打開監視器, 見到佢哋好似有啲問題發生, 例如某啲位唔夠入, 某啲尺寸度錯咗, 就會八卦地繼續追看, 睇吓佢哋點解決. 老實講, 每次見到佢哋有問題發生, 我都好擔心, 好驚佢哋會攞我間屋嚟較飛. 果然, 因為唔夠位而夾硬鋸斷門框, 因為計錯數而要拆走原有設施…… 唉, 乜咁失策呀, 唔係已經度好晒尺寸㗎咩, 冇眼睇. (當刻除咗嘆氣之外, 完全冇諗過向師父大興問罪, 因為肉已在砧板上, 嘈嚟都無謂, 解決咗就算, 唯有希望失誤情況唔好太多, 免得我爆血管.)

又, 當工人在清拆地台鑿瓦仔嘅時候, 透過灰朦朦鏡頭, 我都能感受到屋中塵土飛揚煙霧彌漫, 當刻心在抖顫, 慘嘞慘嘞, 返去實抹死我都得嘞. 身旁當家發言 : 一早預咗會沙塵滾滾㗎啦, 唔係駛乜搵嘢鋪晒啲門邊同埋傢具啫, 就係驚入塵吖嘛. (乜話? 原來你一早已知咁大塵, 居然仲叫我留喺度看屋食塵? 親愛的, 你對我真係好㗎啫!) 哼! 要不是當時身在酒店, 驚咆哮聲會引起公眾恐慌, 我何只大發雷霆, 玩吓手釀成血案都有之, 簡直豈有此理.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2187


發表於 3 天前 |顯示全部帖子
大隻侵與廢老登, 日日亮相為選舉造勢, 兩方旗鼓相當, 真正鹿死誰手, 就要等下個月才揭盅.

有人話, 好唔鍾意大隻侵嘅處事作風, 對佢諸多批評和不滿, 但係去到尾都會投佢一票.

咁即係點呀? 唔鍾意還唔鍾意, 相比起競爭對手, 佢仍然勝一籌, 權衡利弊後, 兩害取其輕, 唯有死死氣將選票投畀佢?

我諗起讀中學時, 圍內幾個同學成日彈我把聲唔好聽. 唉, 鬼唔想鶯聲瀝瀝咩, 無奈阿媽生成我咁嘅聲, 唔到我揀㗎喎.

好嘞, 有一日大伙兒得閒無嘢做, 忽然興之所致投選班上邊個女同學聲音悅耳動聽, 揀呀揀選呀選, 三甲出爐, 我竟然榜上有名喎, 估佢哋唔到. (嗱, 係正式冠亞季軍, 唔係倒數三甲呀吓. )至於咩名次就唔記得咗, 反正有我份啦.

聽到賽果我打咗個突, 又嫌我把聲唔好聽嘅, 點解又畀個銜頭我呀? 到底係佢哋平時對我太苛刻, 定係其餘嗰啲女同學把聲比我仲難聽? 抑或係已聽慣聽熟, 不知不覺變得順耳?

無論咩原因都好, 我一於照單全收, 人生無乜幾可獲獎喎, 幾大都受咗先.

題外話 : 最近睇咗一齣西片"貼身情人", 赫然見到大隻侵, 仲有幾句對白講㖭. 本來冇乜留意, 係聽到男主角叫佢現實嘅名, 跟住一把熟悉聲音響起, 我即刻望實畫面, 冇諗過佢會出現, 令我一時茫然以為睇緊新聞片段, 直至男主角與佢對話, 先至如夢初醒正在睇戲.
春有百花秋有月, 夏有涼風冬有雪, 若無煩事掛心頭, 便是人間好時節.

首頁

尾頁

跳至
熱門主題
你需要登錄後才可以回帖 登入 | 註冊