興趣嗜好

跳至

首頁

尾頁
   6


大宅

積分: 2297


發表於 21-1-5 22:44 |顯示全部帖子
一到入冬,天氣乾燥,每次沖涼都要搽潤膚膏,否則會感到全身皮膚抆抆緊。

但係呢,對手唔夠柔軟亦唔夠長,恁地扭盡六壬,依然冇辦法搽到背部中間位置,頂到盡只能觸及後頸以下及腰部以上,其餘部份只得任由佢繼續乾燥。

於是,搽唔到嘅地方,間中就會痕癢,本身已經掂唔到,加上著住厚厚衣服,令動作更加僵硬,好多時要請當家代勞。

每當佢幫我抓癢時,總會出現以下聲音 :

上啲。。。。落啲。。。。左啲。。。。右啲。。。。低啲啲。。。。高多少少。。。。係呢度嘞。。。。 出啲力啦。。。。係嘞係嘞。。。。啊!!!!。。。。 喔!!!!。。。。好舒服呀!!!!。。。。

人哋唔知,仲以為做緊兒童不宜嘅事情。 但其實,我全程係隔住衣服被抓癢,完全冇肌膚之親。

雖然當家樂意效勞,但係搵人幫手,不如親自出手,始終只有自己最清楚痕癢位置。

曾經用過好多物件搔癢,例如長間尺,用硬紙捲成長條狀等等,但係效果總係唔太好,一係被間尺嘅硬角弄損,一係因紙卷唔夠硬而搔幾下就軟而無力,未搔着癢處已經變形,搞到半天吊。

忽然醒起呢個世界有一樣物件叫"不求人",(呢個發明家真係天才!)嗱嗱臨走去買咗兩枝,一枝自用,一枝畀當家,因為見佢有時身痕起上嚟又唔想搵人幫,索性倚喺牆邊或門角磨擦背脊。

佢咁嘅動作,同我拚命伸手企圖去背後搔癢時一樣咁猥瑣,有咗枝"不求人",以後搔癢咪可以優雅啲囉,亦唔駛再發出咿咿哦哦引人遐想,我自己聽到都打冷震嘅聲音。


春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2297


發表於 21-1-15 22:38 |顯示全部帖子
當劉青雲喺台上向太太致謝,台下嘅郭藹明哭成淚人。

當林海峰喺台上向太太致謝,台下嘅彭羚哭成淚人。

當張震喺台上向太太致謝,台下嘅蔡少芬哭成淚人。

當許志安喺台上向太太致謝,台下嘅鄭秀文哭成淚人。

當王浩信喺台上向太太致謝,台下嘅陳自瑤表現冷淡,置若罔聞。

明明兩夫妻,應該榮辱與共,丈夫得獎,理應喜不自勝喜極而泣,好有一種苦盡甘來嘅喜悅,然而佢竟出奇地鎮定,連為他人高興嘅戲都費事交,可想而知二人關係有幾惡劣。

聽到王先生致謝時,何以會冷眼旁觀?我嘗試代入佢嗰刻心情 : 虛偽得你吖!慳啲啦!扮晒嘢!。。。。

多謝嘅原因唔係因為喺背後支持,而只係照顧個女好好,呢啲算係咩多謝呢?不如多謝埋屋企個工人姐姐將家務做得好好吖笨,連老婆/太太兩個字都唔嗌出口,難怪對住你木無表情啦。

二人已去到貎合神離階段,睇嚟婚姻已名存實亡,之所以未離,相信係奉公司之命,以免破壞男方形象。

唉,真係難為二人,一個明明爛滾爛玩卻要扮顧家男,一個就要為大局着想死忍爛忍,希望有關人士畀佢哋快啲脫苦海,還雙方可以呼吸自由嘅空氣啦。

春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2297


發表於 21-1-24 11:13 |顯示全部帖子
疫情持續咗已經一年,期間個案斷斷續續,時而高時而低,最受害就係為口奔馳嘅星斗市民。

政府看似努力實施多項防疫措施,可惜每次總係眼高手低,予人感覺實際上根本束手無策不知所措。 好多時未深思熟慮就推行某啲決定,大張旗鼓宣佈後,往往引來有關人士猛烈抨擊批評抗議,於是又急急剎停計劃,好似玩泥沙般兒戲,讓人無所適從,貫徹一直以來頭痛醫頭腳痛醫腳見一步行一步,朝令夕改雜亂無章本末倒置嘅作風,完全冇一個明確方向點樣解決問題。

被如此表現出色不吃人間煙火嘅班子管治,身為蟻民只有自求多福了。
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2297


發表於 21-1-30 22:49 |顯示全部帖子
係咪男人到咗某一年紀,就會一係坐唔定,坐定定時就大部份時間喺度打瞌睡?

印象中,當家後生時,總係好多搞作,一切關於電子嘢佢都搞一大餐,尤其是一啲壞咗嘅產品,可以由朝到黑不眠不休廢寢忘餐幫之做手術。 佢話老竇教落,乜都要拆開嚟研究,睇吓可唔可以救得返,一來當學嘢二來有可能修得好就可以慳錢唔駛買新。

無疑,佢好學嘅精神係值得表揚,不過有時就破壞我送舊迎新嘅計劃,原以為可以換過個,點知被佢一個唔覺意就修好,迎新無望,多謝晒。

家陣佢依然有呢個習慣,不過唔知係品質差咗定係佢技術退步咗,十之七八都整唔返,搞到佢無癮之至,加上而家啲嘢比較便宜,好多時費事嘥時間,索性扔掉換新算數。

少咗細藝多咗時間,未有疫情時,每逢放假,佢總要落街逛,就算落雨都照出。 見佢咁癲,有時會話佢係咪籮柚有蟻咬非出不可,佢先至不情不願稍為收斂一次半次。

而家好啦,邊度都唔駛/冇得去,佢只好死死氣全天候攤喺梳化睇戲。

可是呢,電視有電視開住,佢就有佢喺度釣魚。 恁地已經叫佢睏就去瞓吓,佢死口唔認自己打瞌睡,言猶在耳,轉吓頭又繼續釣魚。

每當我見到,都會偷偷熄咗電視,未幾佢又開著,然後冇耐又見佢閤上眼皮。。。。。畀佢吹脹。

當我多次大發雷霆佢咁做等如浪費緊電費,佢就轉喺電腦平板睇,聲稱只耗少量電。 佢嘅意思,即係就算睇住嚟瞓都唔會點嘥電。

我梗係唔認同佢啦,睇就專注睇,瞓就專心瞓,點解要開住機嚟瞓呢?所以我見到一樣會按熄佢部機,而好多時,熄咗機好耐佢都唔覺,證明根本已入睡,唔明佢次次為何要話自己冇瞓。我窒佢 : 你而家就好似嗰啲飲醉酒嘅人話自己冇醉,其實瞓咪瞓囉,死撐嚟做乜呢?

難道佢覺得睇戲時打瞌睡好冇面?發神經!次次畀人話仲冇面啦係話?有時真係唔知佢點諗。


春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2297


發表於 21-2-11 10:32 |顯示全部帖子
雖然換咗部大雪櫃,但依然唔夠空間擺嘢,總係搞到內裡食材逼逼狹狹,於是就想買多一部。

當家反應激烈 :冇人屋企會放兩部雪櫃㗎,新買呢部已經比舊嗰部大好多,咁都唔夠用?早知係咁,就唔好扔咗部舊㗎啦。

佢嘅意思明顯不過,即係反對我買。

首先,反對歸反對,但佢用一個咁低級嘅藉口,叫我點認同呢? 打死我都唔會信,真係冇一個屋企會有多過一部雪櫃囉。

其次,新嗰部係大咗,但照比例計算,只係大多咗一層啫嘛,一層對我嚟講,根本幫助唔係好大,(唉,人嘅欲望真係無窮無盡,細有細裝,大有大裝,永遠覺得始終差啲啲。)

第三,舊嗰部已經壞咗,只係臨尾迴光反照,遲早一樣打柴,咪又要買過部。 況且,嗰部唔係細,到時間屋就真係容納唔到兩部大雪櫃嘞。

我只係想買一部細細哋,可以多個空間畀我走盞,唔駛每次打開雪櫃,見到逼爆嘅場面覺得頭痛啫。

通常我堅定嘅嘢,除非自己諗過度過後而改變主意,否則好少受人動搖,不過都姑且上網搜尋吓多唔多人嘅屋企有兩部雪櫃。

唔駛問阿貴,結果梗係好多啦,於是我又發揮一貫寸寸貢本色,潤當家一番 : 你話屋企冇人會有兩部雪櫃呀可?唔該你上網查一查,結果一定令你大開眼界。

佢死撐 : 我係話一般家庭冇,有錢人家屋企大梗係唔出奇啦。

我繼續進逼 : 我唔信所有有兩部雪櫃嘅都係住大屋嘅有錢人家囉,普通屋企大把人有,視乎有冇需要啫,你唔好再兜嘞,兜極都難以自圓其說。

所以呢,我反對佢嘅反對,一於買多一部。
春有百花秋有月, 夏有涼風冬有雪, 若無煩事掛心頭, 便是人間好時節.


珍珠宮

積分: 34461

2021勳章 好媽媽勳章 醒目開學勳章 畀面勳章


發表於 21-2-13 21:53 |顯示全部帖子
我都想要部再大D雪櫃.


大宅

積分: 2297


發表於 21-2-18 20:49 |顯示全部帖子
回覆 sukkiu 的帖子

如果空間與經濟都許可,就行動吧!
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2297


發表於 21-2-18 21:54 |顯示全部帖子
由幾時開始,每當有人辭職唔撈,就要請吃散水餅㗎呢?

每年到咗3月最後一日,總喺街上見到好些人提住餅店包裝盒,我第一直覺就諗係散水餅。因為好多公司以3月為一個年度終結,打工仔出埋雙糧花紅就撤,通常離職轉工大執位都喺呢段時間。

我人生中第一份工,離職嘅時候,都有請食餅。 當年應該未時興散水餅,之所以請同事,係受母親叮囑,佢話一直以嚟同事都對我好好,應該要有啲表示,最佳選擇就係西餅。

另外一份又係聽母親吩咐,喺最尾一日買咗幾盒西餅,可是我覺得佢哋好似唔多受落,並冇我預期般熱情,搞到我有啲冇癮。

後來,雖然陸續做過好幾份工,但離職時,已經冇再買過散水餅。

其實我根本就係一個唔鍾意跟傳統嘅人,好多事都率性而為,從未理會世俗眼光,只要唔係傷天害理,全都隨心而行,懶理他人背後說三道四,反正我又聽唔到。

莫講話自掏腰包請吃散水餅免問,就算人哋客氣地反請我轉頭,我一樣唔畀面,口中千多萬謝,頭手卻搖不停,我最怕呢啲場面。

我遺傳唔到父母親識做人懂大體嘅因子,所以應該得罪咗好多人,亦引來不少話柄,不過冇所謂啦,既然離得職都預咗日後不相見,又何需拘泥於是否留下好印象。

相比起不成文習俗,我更推崇輕輕的走,不帶走一片雲彩。
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2297


發表於 21-2-27 22:39 |顯示全部帖子
有時喺街上見到啲可愛狗狗,我會忍唔住面露憐愛駐足觀看,曾幾何時,我都係有狗人士。

當家好幾次游說我再養一隻,搞到我都有啲心思思,不過諗幾諗,最終都係理性獲勝。

狗狗在生時,我曾經暗地裡擔心,當佢年老有病痛,都唔知點算好。

花錢睇醫生唔係問題,最大隱憂係唔知點餵佢食藥,尤其是如果藥味濃烈,就算混入佢鍾意嘅食物內,以為佢一定狼吞虎嚥唔覺意食埋落肚,點知你精佢都唔笨,總係有本事食晒其他,剩低粒藥孤伶伶留喺飯兜內,真係唔知佢點做到。

若然有傷口要處理就更閉翳,佢一定唔會畀你埋到身,想檢查傷口根本無從入手。

試問佢咁鬼"啷禮",萬一有病點醫呢?我又應該點照顧佢呢?。。。。

慶幸最後冇萬一,傷心同時亦鬆一口氣,雙方都得到解脫,佢係肉體,我係精神。

假如,有一種狗狗自出娘胎後,每日只係吃喝玩樂,唔會老病死,我非常樂意再成為狗奴才。
春有百花秋有月, 夏有涼風冬有雪, 若無煩事掛心頭, 便是人間好時節.


珍珠宮

積分: 34461

2021勳章 好媽媽勳章 醒目開學勳章 畀面勳章


發表於 21-3-2 13:37 |顯示全部帖子
我家養一隻貓,是我女要養.快5個月大,但我已擔心佢老病,點算?


大宅

積分: 1060

2021勳章


發表於 21-3-2 17:57 |顯示全部帖子
sukkiu 發表於 21-2-13 21:53
我都想要部再大D雪櫃.
我最近換左部Electrolux蒸氣洗衣機,想用佢個蒸氣功能,99好反對,佢話舊洗衣機用到點解要換機
但我都係照換,有蒸氣功能洗被洗公仔方便好多,最重要係覺得有需要就換,從來唔會咁多藉口去唔換


大宅

積分: 2297


發表於 21-3-2 22:00 |顯示全部帖子
回覆 sukkiu 的帖子

而家至5個月大,你又過早擔心嘅,起碼仲有十幾年對住佢。
不過又咁講,十幾年眨吓眼就過,所以你都要好好珍惜同佢相處嘅每一日。
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2297


發表於 21-3-2 22:07 |顯示全部帖子
回覆 eeswong 的帖子

老人家一向有唔浪費嘅諗法,事實上,未壞就換又的確有啲嘥嘅。。。。。(咳~咳~原來我都係老人家)
但係,而家你至係用家嘛,只有你自己最清楚對洗衣機嘅要求,所以我撐你!
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2297


發表於 21-3-6 16:05 |顯示全部帖子
自從冇返工之後, 呢幾年都冇買過衫, 慳好多.

不過我買嘅衫普遍唔係太貴, 平均都係幾十蚊, 後期發現喺一啲出口店買仲平, 圍起上嚟幾蚊一件, 視乎有冇心機慢慢摷, 有時一次過搵到好幾件, 埋單都係三五十蚊, 返到屋企畀當家睇, 再講埋價錢, 佢都話癡線.

雖然價錢便宜, 但每次買買埋埋, 其實幾佔地方. 直到呢一刻, 仲有一大堆著都未著過.鬼咩, 平時落街多數去街市, 隨手求其穿起件衫就出門, 唔似得返工時會刻意襯. 話晒要見人, 點都會較為講究配搭得宜.

但係而家好日唔出去, 出都係幾日一次, 變相著嚟著去都係同一套. 咁樣一年落嚟, 根本冇機會著新衫, 即係而家仲未著過嘅衫, 十年之後應該都見唔到天日.

當家與吾兒買衫係貴精不貴多, 二人衫褲鞋襪加埋寥寥無幾. 我就鍾意數量多, 貪日日唔同衫, 對品質反而冇要求.

衣少免惆悵, 同佢哋對比之下, 我先至體會到兩袖清風嘅好處. 雖然嚟嚟去去嗰幾件有啲沉悶, 但起碼唔駛好似我咁, 每次打開衣櫃, 見到衫裙傾瀉嘅場面就眉頭皺.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 4239


發表於 21-3-7 20:02 |顯示全部帖子
我今天掉左10幾年既中學野,放下了,忘記過去。


大宅

積分: 2297


發表於 21-3-12 10:32 |顯示全部帖子
回覆 wing0 的帖子

掉咗嘅係物件,當中嘅記憶,若然值得回味就放喺心上,並唔需要忘記。
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2297


發表於 21-3-12 11:35 |顯示全部帖子
因接種疫苗而死亡事件連日裡偶而發生,搞到原本興緻勃勃預約前往打針嘅人群陸續縮沙,浪費晒資源配額。

我覺得事件純屬個別例子,畢竟接種嘅人多,發生嘅只係小數,好可能死者本身對疫苗敏感,但係自己又唔知,幾樣加埋就出現不幸事故。

如果係自身內在問題而對疫苗排斥,甚至導致死亡,只可以話係不幸。可惜有啲人因而對疫苗嘅成效抱懷疑態度,尤其是第一時間衝喺前面,跟住縮到唔見影嗰班,佢哋咁樣對疫苗,實在太唔公平嘞。

我唔知接種前,負責嘅人員會唔會向接種者查問一啲健康狀況,例如有冇對藥物敏感,有冇咩病史等等,始終疫苗係初研發,未算得上穩定成熟,當局更加應該小心謹慎,事先編定一套接種指引,等大家有多啲資訊,若然唔肯定對接種者有冇影響,寧願暫時擱置好過來者不拒。

要知道,醫者有專業知識,佢哋先至最清楚風險指數有幾高,話晒涉及人命,草率而急就章推行,市民大眾根本唔知自己體質受唔受得,一聽到疫苗到,政府話打得就唔理三七廿一紛紛響應。

唔知高層們喺夜闌人靜時,有否一丁點感到愧於市民對佢哋嘅信任呢?
春有百花秋有月, 夏有涼風冬有雪, 若無煩事掛心頭, 便是人間好時節.


珍珠宮

積分: 34461

2021勳章 好媽媽勳章 醒目開學勳章 畀面勳章


發表於 21-3-12 17:51 |顯示全部帖子
本帖最後由 sukkiu 於 21-3-12 17:52 編輯

其實覺得最好用醫健通,睇下接種者的病歷,有咩病,再評估過是否合適接種.根本有好多長者以為打左疫苗可以返大陸.先去打.

大陸起初都不讓60歲以上接種,當然大陸打的國藥,而澳門也跟大陸做法,到接種一段時間,可以講有些數據參考,才開放給60以上去接種.

而香港雖然在中國城市計係重災區,但比外國數字都算幾好,實在不用心急幫長者打.



大宅

積分: 2297


發表於 21-3-18 14:30 |顯示全部帖子
回覆 sukkiu 的帖子

英䧳所見略同
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2297


發表於 21-3-18 15:08 |顯示全部帖子
親戚兩公婆以前中港兩邊住,所以疫苗一出,就急不及待雙雙去接種,以為打咗就可以返大陸,可惜暫時仲未能成事。

另有親戚雖然喺大陸都有住家,而家退休,本應諗住大半時間會喺內地,點知人算不如天算,疫情持續令佢動彈不得,不過就算開放,佢亦未必可成行,因為直到目前,佢依然唔敢接種。

問一啲住喺國內嘅朋友,接種咗疫苗未,佢哋話根本冇聽過有疫苗呢樣嘢,令我始料不及。 原以為國家成功研發,第一時間一定益自己國民,全國上下應該接種得七七八八,然後先至輪到我哋,估唔到居然係我哋優先。

而優先之中嘅優先,係上咗年紀嘅老人家,其實計我話,佢哋反而唔駛優先,尤其是長期住喺安老院舍嘅一群,平日好少甚至唔會出外,感染機會唔大,可以話喺溫室中生活。相反,工作人員與探望長者嘅人士就應該列入優先,因為佢哋行出行入,傳播風險大好多。所以我有理由相信,喺安老院中招嘅長者,大部份都係經外來者傳入,實在無妄之災。

政府不斷將接種組別範圍擴大,希望市民踴躍參予,即管睇吓佢哋幾時才能完成任務。





春有百花秋有月, 夏有涼風冬有雪, 若無煩事掛心頭, 便是人間好時節.

首頁

尾頁

跳至
熱門主題
你需要登錄後才可以回帖 登入 | 註冊