興趣嗜好

跳至

首頁
45678...31

尾頁
   6


大宅

積分: 1921


發表於 17-4-18 10:44 |顯示全部帖子
樓市愈升愈有, 恁地政府如何出辣招, 都只係初期微微一跌, 當市場消化咗, 又再創高峰.

之前有個所謂高人, 預言樓市股市會跌到好甘, 等我一心諗住儲定錢入市, 點知等到頸長跌都唔跌吓, 微跌就唔算甘啦. 唉, 未夠班就唔好預言啦, 估神!

好多年前周圍去睇樓, 當時樓價仲係好便宜, 我睇中新界一個樓盤, 心思思想扑槌, 但係當家心頭高, 認為一定要大過現住嘅單位, 否則不如唔好買.

由於我唔係抱住非買不可嘅心態, 既然當家話唔買, 咁就不了了之.

點知過咗唔夠一年, 樓市就一路狂飆有升冇跌, 極度飲恨中.

恨當家短視, 恨自己點解要聽佢講, 恨個市為何唔等人, 恨自己唔係先知.....

可惜不論多少恨, 全都恨錯難返了.

嗚~~ 嗚~~
春有百花秋有月, 夏有涼風冬有雪, 若無煩事掛心頭, 便是人間好時節.


別墅

積分: 502


發表於 17-4-18 23:44 |顯示全部帖子
cforchat 發表於 17-3-5 15:16
天氣預告話未來幾日將會潮濕, 所以呢兩日搏晒命將污衣床單被單枕頭套全部交畀洗衣達人(即係洗衣機), 希望佢 ...

係又濕又焗


大宅

積分: 1921


發表於 17-4-19 17:35 |顯示全部帖子
v記有個節目, 講幾個全職媽媽放大假, 留低啲仔女畀替工保姆照顧, 幾個保姆都係藝人.

喺陌生人面前, 小朋友總會找爸爸媽媽, 當發現父母唔喺身邊就會扭計嚎哭, 保姆總被弄到手足無措, 除咗好言安慰, 都唔知可以點做.

其實都戥佢哋感到肉緊, 所湊嘅細路又唔係自己所出, 幾唔聽話都唔可以鬧甚至打, 所以成日見佢哋一臉無辜兼夾無奈表情.

雖然只係幾日貨仔, 但一個二個日日忙到甩轆, 由擘大眼開始就如臨大敵, 時間又要掌握得準確, 稍有與父母訂下嘅時間表有偏差, 好可能會被責怪, 所以佢哋嘅壓力都唔細.

只有蘇麗珊較好彩, 因為佢負責嘅小朋友返全日班, 除咗上學前放學後, 其餘時間都好清閒. 唔似得其他幾個時刻在衝鋒陷陣, 有時以為可以偷空唞唞, 點知就失去預算遲大到.

幾個家庭嘅細路, 我最鍾意倪晨曦所照顧嘅一對仔女, 尤其是哥哥, 又乖又文靜又聽話又唔扭計, 好惹人憐愛, 妹妹就好得意.

至於四兄妹, 唉, 真係難為兩位保姆, 唔計手抱嘅老四, 淨係大哥一個已經搞到一頭煙, 都未計另外兩個. 課外活動又多, 九點幾又話要上床瞓覺, 難怪親生阿媽話由朝忙到黑, 中間完全冇任何空檔啦. 鬼咩, 日日排到密麻麻, 有得唞至出奇.
春有百花秋有月, 夏有涼風冬有雪, 若無煩事掛心頭, 便是人間好時節.


男爵府

積分: 5197

2019勳章


發表於 17-4-20 00:25 |顯示全部帖子
好憎呢啲天氣


大宅

積分: 1921


發表於 17-4-20 10:05 |顯示全部帖子
忽發奇想, 假如時光可以倒流就好咯, 我想回到踏出校園步入職場嘅歲月.

揀嗰個時候, 因為唔駛再應付默書測驗考試, 又因為初出茅廬未懂人情世故, 工作上就算有乜甩漏都會被包容, 感覺良好.

當然, 我必須帶埋而家嘅心智與閱歷一齊前往啦, 如果又回到當時白紙一張拾吓拾吓嘅思想, 就算返十次八次都冇意思.

返到去, 首先要做嘅係加倍孝順父母, 雖然一向都孝順, 不過仲可以擴大孝順空間. 其次就係增進手足之間嘅感情, 自問對佢哋都好好, 但自從成長後大家就愈行愈遠, 好想藉此機會拉近彼此間嘅距離.

跟住輪到職場, 以前自恃年輕, 做錯事或講錯話都會被原諒, 所以好多時都得過且過唔專注, 每每要到將近離職, 先至識得醒悟. 經過咁多年磨練, 相信返到去一定處事認真得心應手, 唔會辜負愛錫我嘅上司與同事.

最後, 輪到一班朋友仔. 先講純屬友誼嘅朋友, 至今依然保持聯絡嘅寥寥無幾, 一向冇乜朋友緣, 所以返到去, 與佢哋之間亦只會淡如水, 唔會刻意改變. 不過唔排除我以幾十歲嘅思想與一班十幾歲嘅朋友仔相處, 佢哋會抱住崇拜嘅心態對我, 從此改善我嘅朋友緣都唔定.

異性朋友方面, 曇花一現嘅過客就無謂招惹嘞, 費事嘥時間. 至於刻骨銘心嗰啲...... 唉, 我都好矛盾, 理性諗與其唔能夠相戀, 不如唔好相識, 既然要相思, 不如唔相知. 但感性又諗, 就算明知未能開花結果, 依然想享受箇中過程. ummm........ 我諗, 最終感性應該會戰勝.

好多人話如果回到從前, 第一時間要買樓買股, 到時肯定打跛腳唔駛憂. 我夠想啦, 但除非本身家底豐厚, 返到去至有錢買㗎嘛, 如果家境一般甚至貧窮如我家, 霎時間邊有錢吖, 一係慢慢儲囉, 但係你唔知可以喺嗰個空間停留幾耐喎, 萬一未儲夠就返嚟, 咪又係得個桔.

莫講話樓啦, 連股票我都唔駛旨意買, 因為幾乎將大部份收入上繳阿媽, 對一個思想保守投資零知識嘅人嚟講, 最穩陣嘅做法就係將錢存入銀行, 其他乜都假.

其實以上都係其次, 最主要返去嘅目的, 係唔想再錯過修補種種過錯嘅機會.

春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 1921


發表於 17-4-21 12:33 |顯示全部帖子
而家好多住宅大廈嘅外形設計新穎特別, 唔似得上世紀咁正規, 棟棟都直一直, 好少可會見到三尖八角.

我見過一棟呈長形"回"字嘅住宅, 中間位置通窿, 窿嘅上下都有單位. 我第一時間就諗, 假設有能力住喺度, 我實唔會揀窿上對上嗰層, 因為感覺凌空, 一啲都唔踏實, 住喺單位內, 我一定認住隨時會塌下.

雖然塌起樓上嚟, 住邊層都難逃劫數, 但嗰層係直落到底, 中間冇得卸力, 心理上好唔安全.

唔係嘞, 諗諗吓, 就算有能力都唔會買呢棟, 硬係覺得住喺度好牙煙, 尤其是遇上颱風, 好驚佢承受唔到八級強風, 因為外形實在予人不堪一吹嘅感覺.

我知道呢啲設計喺安全結構上冇問題, 否則當局都唔會批啦, 不過與其咁樣浪費空間, 不如填埋個窿造多幾個單位, 令平均尺價平啲, 好過喺外形上玩譁眾取寵啦.

春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 1921


發表於 17-4-22 16:37 |顯示全部帖子
係唔係紋眉已經普及化呢, 近年喺街上見到好多女士都紋眉.

本來都冇乜留意人哋嘅容貎, 但係有時面對面, 難免會望到對方嘅面龐, 第一時間映入眼簾就係眉毛, 而當中好多都係紋眉.

有啲紋得好幼, 有啲紋得較粗, 紋得幼嘅好唔自然, 畢竟人本身嘅眉未至於幼到一條線. 至於紋得粗嗰啲如再加上深色, 令人有一種好兇嘅感覺, 怪怪的.

街市附近有一檔小食店, 間中都會光顧, 自從發現老闆娘紋咗眉之後, 我就好少再幫襯, 因為每次見親佢一對深啡色嘅濃眉, 唔知點解就冇晒胃口, 唔望又唔得, 因為要話畀佢聽買乜嘅時候, 一定會與之四目交投, 自然地就望到佢對眉.

個人認為, 除非容顏有缺憾非改造不可, 否則無論美醜, 始終都係自然最美.

好似我有個朋友仔, 十幾歲就去紋眉紋眼線, 佢話每日要畫眉畫眼線嘥時間, 紋咗就可一勞永逸. 其實後生細女淡掃娥眉已容光煥發, 根本不必要固定妝容, 何況青春本就無敵, 唔化妝仲顯得清純.

如果有得紋胭脂, 唔知佢會唔會又走去紋呢, 聽講紅唇都有得紋喎. 想像有一日佢唔舒服病咗, 本來應該面青唇白, 佢依然紅粉緋緋, 諗吓都覺得突兀.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 1921


發表於 17-4-23 11:19 |顯示全部帖子
試過好多次以下嘅情況 :

感到便急, 於是周圍搵洗手間, 有時搵極都搵唔到, 有時搵到卻發現馬桶冇窿, 到終於可正常如廁嘞, 但點都無法排出小便, 感覺非常唔暢順..... 實在忍無可忍之下, 先至醒過來, 才知道原來真係內急.

難怪亦好彩喺夢中無法解決, 因為一旦排得出感到舒服晒嘅話, 即係代表現實中失禁.

春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 1921


發表於 17-4-24 13:04 |顯示全部帖子
而家嘅後生女真係好進取, 死心塌地暗戀有婦之夫, 人哋兩口子因事鬧別扭分開吓, 佢就一刻都唔等得立即出擊, 擅自上男方屋企討好兩老, 又喺人前人後揚言非君不嫁, 更加主動示愛.....

雖然話女追男隔重紗, 但都要視乎男方受唔受, 人哋講到明只愛妻子一人, 並已多次婉拒女方嘅錯愛, 可是女仔依然勇往直前, 表示無論點都唔死心, 會一直等候, 直至男方肯接受為止.

見到個女仔完全放下自尊敢愛敢做, 我唔知應該話佢勇定話佢傻, 不過人哋嘅感受, 只有佢自己最清楚, 作為外人, 我冇權去批判人哋對或錯.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 1921


發表於 17-4-25 11:28 |顯示全部帖子
第一套睇嘅韓劇係"藍色生死戀", 因為算係打入香港市場嘅頭炮, 加上又係靚仔靚女主演, 所以貪新鮮.

第二套係"冬日戀歌", 宣傳話係藍色生死戀嘅續集, 基於對藍劇餘情未了, 於是繼續睇.

第三套係"浪漫滿屋", 因為對宋慧喬念念不忘, 所以又睇.

第四套係"大長今", 話晒曾掀起一股熱潮, 風頭一時無兩, 當然要欣賞, 不過睇嘅時候, 已經係過咗好多年之後.

第五第六套係"49天"和"屋塔房王世子", 被題材吸引.

第七第八套係"來自星星的你"和"藍海傳說", 追看理由只因全智賢.

第九套係冇耐前嘅"鬼怪", 亦係因為題材, 而且迴響都幾大, 所以就睇睇.

其實而家韓劇幾乎已佔市場一半以上, 何以我只睇得呢幾套, 因為我覺得大多數劇情來去唔係有瘤就係有車(瘤係腫瘤嘅瘤車係車禍嘅車), 再加上有啲拖長嚟做, 有時難免呵欠連連.

好似以上幾套, 除咗第三套係走輕鬆路線, 第四套係因古代冇汽車, 亦因為冇X光機所以照唔到有瘤, 其餘都離唔開一貫定律, 分別只在死唔死得而已. 而女主角嘅表情唔係擘大口呵氣就係睜大眼鬥氣(全智賢除外), 睇到極煩厭, 故吾不欲觀之矣.

所以恁地老爹老媽每次煲完韓劇後, 都會極力向我推介邊套邊套幾好睇, 我都不為所動.
春有百花秋有月, 夏有涼風冬有雪, 若無煩事掛心頭, 便是人間好時節.


水晶宮

積分: 59892

2019新春慶豚圓 2019勳章


發表於 17-4-25 11:38 |顯示全部帖子
cforchat 發表於 17-4-25 11:28
第一套睇嘅韓劇係"藍色生死戀", 因為算係打入香港市場嘅頭炮, 加上又係靚仔靚女主演, 所以貪新鮮.

第二套 ...

我睇韓劇年代同你差唔多、你寫得都幾好睇


大宅

積分: 1921


發表於 17-4-26 14:08 |顯示全部帖子
回覆 luckybaby2011 的帖子

嘻嘻! 因為我睇劇都幾奄尖, 唔合心水嗰啲多數都唔會睇, 睇得嘅應該唔差得去邊.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 1921


發表於 17-4-26 14:35 |顯示全部帖子
前幾年, 公司與另一間公司合併, 合併前, 嗰間公司係我哋嘅客戶, 合併後, 由於佢哋佔嘅股份大, 順理成章我哋就要聽佢哋點.

當佢哋嘅身份仲係客戶時, 與我哋嘅關係好好, 間中見面或電話交談都有講有笑, 誰知合併後就即刻變晚娘臉, 樣樣事都話要揸正嚟做, 以前言笑晏晏嘅場面統統消失得無影無蹤, 換來嘅係一臉嚴肅, 同你講多句都好似有失身份.

唉, 我最怕就係面對呢啲人, 自以為高高在上, 將其他人踩在腳下, 肯臣服於佢就繼續同你圍威為, 稍為逆佢意就以後唔駛有好日子過.

好多時老闆反而冇架子, 通常都係佢身邊嘅太監揸住雞毛當令箭, 冇計啦, 人哋係老闆跟前嘅紅人, 佢要吔文吔武, 我哋做細嘅可以點吖, 唯有望生意一落千丈, 等老闆早早摺埋, 以後就唔駛面對一班得志小人.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 1921


發表於 17-4-27 10:35 |顯示全部帖子
自從大國之首普普先生上台之後, 幾乎日日喺電視新聞見到佢.

唔係留意佢有乜政績, 只係每次見佢時而梳得貼服時而顯得蓬鬆嘅一頭似真又似假嘅金髮, 不期然諗起曾經教過英文嘅男老師.

男老師擺到明係一頭假髮, 因為只要稍為留心, 就會發現髮型嘅方向每日都有偏差. 上堂時, 偶然唔小心手指觸碰到頭髮, 明眼人會見到整個頭髮移一移, 所以同學們總在背後偷偷取笑.

其實佢頭髮真與假, 同我哋完全冇關係, 最難頂係佢用粉筆寫完黑板後, 會將手指放到舌頭黏一黏然後揭書, 睇到大家暗地裡皺眉發出咦咦聲. 咁都算嘞, 佢揭自己書啫, 又唔係揭我哋嘅書. 問題係遇着要派卷或派回作業時, 佢都係習慣先黏口水再將之放喺每行第一位嘅同學處, 然後傳畀後面.

每次我哋收到時, 第一時間唔係睇內容, 而係搵吓有冇類似口水漬嘅物體, 如有的話, 即刻搵紙巾搏命刷乾淨. 假如派發嘅係試卷通告之類, 咁坐最後嘅同學就唔好彩, 因為前面嘅人一定過濾過冇口水先至留, 其餘統統向後送. 假如所派嘅係有名有姓, 咁就睇吓邊個遭殃嘞.

雖然男老師嘅行為令我哋忍唆不禁, 不過無可否認, 佢好用心教學, 彷彿想將所學嘅知識全部塞入我哋腦袋. 不過亦因為咁戮力, 次次講到肉緊處, 口水飛濺嘅場面亦屢見不鮮, 所以每當佢行經之位, 同學都要側側身, 以防被濺中.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 1921


發表於 17-4-28 09:50 |顯示全部帖子
我家狗狗除咗比一般狗較為驚青細膽之外, 喺我哋心目中, 佢真係好醒目.

先講食, 每次我哋開餐, 我一日未埋位, 佢都唔會郁, 見我一埋位, 佢就識得行嚟我身邊等食, 因為佢知道我一定會與佢分享, 其他二人就未必. 食完之後, 同佢講冇嘞, 佢就即時離開, 好似識聽咁.

佢對聲音好敏感, 一聽到食盆發出響聲, 即表示我正在預備佢嘅食物, 佢就會乖乖坐定定, 眼都唔眨望住佢嘅食糧.

每當佢想向我討零食, 就會走嚟我腳邊磨蹭, 我多數都會如佢所願. 有時呢頭至畀咗嗰頭又嚟, 我就同佢講啱啱先畀咗你咋喎, 陣間先啦, 佢就會靜靜地行開, 過多一陣再嚟. 有時遇啱我唔得手, 就同佢講而家唔得閒, 等得閒至畀你, 佢又乖乖行開, 直至見你忙完, 佢又會出現喺面前, 提醒你欠佢嘅嘢.

同佢散完步入屋, 習慣抹手腳, 有時佢企到離行離列, 令我抹時有難度, 我就同佢講前啲, 佢就行前啲, 又或者講後啲, 佢又識得行後. 準備抹時, 佢自動自覺會將腳仔提起, 抹完一隻再提起另一隻.

有時喺一啲偏僻路放佢自由行, 每到紅綠燈位前, 佢都會回頭望你, 睇你有乜指示, 叫佢行就行, 叫佢停就停.

佢好識睇眉頭眼額, 一見我發脾氣鬧緊人, 無論佢當時做緊乜, 都會停下一切動作, 急急腳縮去衣櫃一角, 以免殃及池魚.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 1921


發表於 17-4-29 08:55 |顯示全部帖子
帶狗狗去散步, 行經一間學校門口, 見到一位嬸嬸喺門外派發補習傳單, 每逢見到有家長拖住小孩, 就一個箭步上前遞上單張, 如經過嘅係獨自一人, 無論男女都唔會派.

我拖住狗狗喺佢面前行過, 佢望望我哋, 跟住遞上傳單畀我.....

吓!?!? 唔通佢認為狗狗都需要補習?
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 1921


發表於 17-4-30 17:17 |顯示全部帖子
數字屋大減價, 即時引來群眾爭相購貨, 放眼望去, 收銀處嘅人龍一圈又一圈, 聽講最少都要排一個小時或以上, 貨架上好多貨品都已被掃清, 儘管職員不斷上貨, 但好快又被清空.

睇嚟今次確係明益街坊, 否則精明嘅消費者, 又點會肯花咁長時間排隊都在所不惜.

不過隨住減價期將近結束, 有啲店舖嘅貨架已空空如也, 可見去貨快過入貨好多,搞到供不應求.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 1921


發表於 17-5-1 16:41 |顯示全部帖子
每逢一到黃昏時段, 街市好多檔口嘅貨品都會減價, 以前放工總會去執平貨.

自從唔駛返工, 多數日頭就去買餸, 好少可會專登下午至去街市, 所以冇得再買到一啲較為平嘅餸菜.

好多家庭主婦, 都係日頭就買餸, 話早啲買新鮮啲喎, 我就唔係因為新唔新鮮, 而係早啲買, 可以早啲他他條條預備飯餐, 唔駛好似之前放工又去街市又去超市又趕回家煮飯, 簡直未停過, 攰到冇胃口食飯.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 1921


發表於 17-5-2 12:24 |顯示全部帖子
v記套媽媽放大假終於曲終人散, 假如我係保姆, 如照顧嘅小朋友係乖巧討人愛的話, 一旦要離開, 我一定會好失落.

作為一個盡責嘅保姆, 雖然短短幾日, 但與小朋友之間或多或少都會建立感情, 平時噓寒問暖對之照顧周到嘅小人兒, 以後冇得再湊, 除咗為完成任務舒一口氣, 更多嘅係一份不捨.

而喺小朋友角度, 對住一位陌生人, 如佢對自己好, 將會由最初嘅不適應到逐漸接受並依賴, 當要面對分離, 小心靈肯定又要重頭再適應沒有保姆的日子, 不過好在媽媽已回來, 可以好快又投入媽媽嘅世界.

假如我有咁嘅機會免費遊埠, 我諗都唔會參加, 雖然日湊夜湊好辛苦, 但都唔捨得扔下小朋友獨自出門玩幾日, 就算只係一日都放心唔落, 與其玩得唔盡興, 不如繼續在家玩親子.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 1921


發表於 17-5-3 13:55 |顯示全部帖子
每隔一段時間, 就會執啲舊衣物送去慈善團體.

每次收拾, 都會喺櫃底摷到一啲未曾穿過嘅衫, 連幾時買過都唔記得, 假如仲啱身而款式又唔過時, 多數都會留低等下次著.

不過次次話會著, 結果到下次再執拾時, 發覺都係未著過, 如是者日復日年復年, 衣櫃依然爆滿, 但著嚟著去都係面頭嗰幾件, 而話咗好多次下次會著嗰啲呢, 一樣放喺一二角掂都未掂過, 睇怕下次再下次再下次都應該唔會著, 算嘞, 無謂眼冤, 入袋啦. 話就話係舊衣, 其實好多都新簇簇連牌都未剪.

趁而家冇做嘢唔再入貨, 衣櫃終於有出冇入, 鬆動咗好多. 除咗新衫, 著過幾次唔捨得扔掉但又唔多想再著嗰啲, 都狠狠執埋出嚟捐出去.

唉, 買嘅時候大口氣, 扔嘅時候唞大氣, 好在多數都係平價貨, 否則一定肉赤死.
春有百花秋有月, 夏有涼風冬有雪, 若無煩事掛心頭, 便是人間好時節.

首頁
45678...31

尾頁

跳至
熱門主題
醒 世 文 ... 2 3 4 5 6 .. 40
你需要登錄後才可以回帖 登入 | 註冊