少年成長今日: 4|主題: 15847

收藏本版

發帖

返回列表

跳至頁

查看: 3180 | 回覆: 0

孩子王 [複製鏈接]

csir3290

子爵府

積分: 10927

1^#

發表於 18-8-12 12:45 |只看該作者 |倒序瀏覽 |打印

本帖最後由 csir3290 於 18-8-12 12:45 編輯

每個星期阿仔阿女都會學游水，我同老婆都係都會盡量抽時間去接佢哋陪佢哋換衫，然之後出街食飯。所以佢兩姊弟其中一個想去游水嘅原因就係期待游完水之後可以一齊出街食飯。阿仔每一個星期都希望我可以去接到佢然之後同佢一齊換衫，所以我都會盡量去接佢。好多時去接阿仔換衫嘅時候都會見到好多細路仔唔同嘅態度。見得最多就係佢哋對家傭嘅態度，間唔中都會見到有啲小朋友對啲家傭呼呼喝喝毫無禮貌可言，通常我都會留意吓個家傭嘅面口，好多時佢都會露出一副好厭惡嘅表情，但係因為工作關係所以又要低聲下氣去幫助小朋友。除咗家傭之外，另外一啲經常會接小朋友嘅就係啲老人家，可能係佢哋嘅公公婆婆或者爺爺嫲嫲，都間唔中會見到啲小朋友對啲老人家嘅態度有陣時都係呼呼喝喝或者冇乜禮貌。有陣時明明見到係個小朋友唔啱，好似上星期咁就見到個小朋友明明自己游完水留低咗副泳鏡喺更衣室入面，但係佢就不停喺度話個家傭話佢冇拎清楚啲嘢發哂脾氣，又要個家傭上去幫佢攞返自己就留喺下面等，當然啲態度好差啦！見到咁嘅情況其實我真係想出聲話個細路仔。亦都見過有細路仔喺度話個婆婆麻煩甚至乎係呼呼喝喝。望到呢啲小朋友我會更加提醒自己一定要教好自己對小朋友，除咗唔可以對人冇禮貌外，更加一定要識得尊重人。我成日都同阿仔阿女講冇人天生出嚟係應該服侍佢哋㗎，家傭姐姐只不過係幫我哋手去照顧佢哋，如果唔係爸爸媽媽就唔可以出去返工做嘢，搵唔到錢去供給佢哋而家比較舒適嘅生活，所以家傭姐姐係屋企嘅一份子，如果唔尊重家傭姐姐或者唔聽佢講，我同老婆都一定會罰對仔女。而且只有當家傭姐姐知道父母係會因為仔女唔聽佢講而罰對仔女嘅時間，家傭姐姐先至會放心幫手去教佢哋同埋管佢哋。其實我成日都講細路仔一出世只不過係一張白紙，會變成咁冇禮貌咁唔識得尊重人，其實佢哋都係每一日喺度望住佢哋父母點樣對人而學佢哋父母點樣做。父母可能好愛錫自己嘅仔女，唔鍾意佢哋畀人教唔鍾意佢哋俾人管。但係如果當對仔女望住父母都唔識得尊重人嘅時間，佢哋看在眼裏將來佢哋長大咗又會點對待自己父母呢？我自己就會諗如果有日有人肯幫手教自己對仔女指正佢哋嘅錯處，對我哋嚟講根本就係求之不得多謝都嚟唔切。而家好多家庭都係生一個或者兩個細路仔，呢兩個細路仔就成為屋企人嘅中心，成個屋企所有人就圍住佢哋呢兩個細路仔喺度轉。好多時我哋去茶樓都會見到就係成個家庭包括老人家坐喺度就係招呼一個或者兩個細路仔，嗰兩個細路仔只要有少少唔鍾意就全家一齊去討好佢哋，到頭來又點會教得出一個懂得尊重人而又有禮貌嘅細路仔。其實父母應該要清楚知道今日佢哋點樣教自己對仔女，將來對仔女就會點樣對番自己，今日佢哋喺對仔女面前點樣對佢哋身邊嘅人，仔女就喺度學緊佢哋，將來點樣對對待返佢哋。孩子王唔係天生出嚟，係經過身邊好多嘅人訓練出嚟。望到呢啲細路點樣對人，就大約都知道佢哋嘅父母大約係點樣嘅人。

0 0 0

私人傳訊

跳至頁

返回列表

上一主題 • 下一主題

回覆

發帖

頻道

討論區

熱門搜尋：

少年成長 今日: 4|主題: 15847

少年成長今日: 4|主題: 15847