少年成長 今日: 0|主題: 15847

上次講咗幾個要育成一個孩子王嘅方法同特徵，今次繼續講落去：

4. 臭脾氣。 小朋友自細一唔開心，只要發脾氣身邊嘅人就會自自然然幫佢解決所有嘅問題或者係滿足佢嘅要求。小朋友自細發覺原來只要發脾氣就已經可以解決問題，咁當佢一路長大嘅時候，咪繼續透過發脾氣去處理自己嘅問題囉因為佢根本唔需要亦唔知道可以有其他方法解決。最怕係身邊嘅人又唔會教佢，或者只係輕輕話下佢但係又繼續滿足佢。咁一路長大嘅時候咪養成佢郁啲就發脾氣而且脾氣會變得越嚟越壞。到佢長大越嚟越需要接觸社會嘅時候先至發覺原來發脾氣係解決唔到問題，而且會令人生厭。佢先發覺自細身邊嘅人滿足佢，原來唔係錫佢反而係害咗佢。

5. 唔捱得。唔捱得其實係概括咁講，總之就怕辛苦。怕辛苦呢樣嘢亦都係身邊嘅人造成因為自細唔教佢哋堅持。 細細個開始行得耐又驚佢攰，企得耐又驚佢攰，食遲啲又怕佢餓親，食少啲又怕佢唔夠營養，凍又唔得熱又唔得，總之個細路都未嗌辛苦佢身邊嘅人已經怕佢呢樣怕佢嗰樣。其實小朋友嘅適應力根本就好強，只要大人慢慢引導佢哋 唔好郁啲都驚呢樣驚嗰樣，咁細路仔好多嘢自己都會做得成。

6. 欠缺自理能力。 正所謂飯來張口衣來就張手，乜嘢都係身邊人做曬，咁點會有好嘅自理能力呢？喺泳池嘅更衣室我就真係見過成六七歲都未識得自己換衫抹身。出街食飯亦見過成五六歲細路都仲要父母餵飯，因為佢哋掛住望住手機入面嘅卡通，冇得睇電話佢哋又唔食飯。有工人姐姐嘅就乜都工人姐姐做曬，行到攰就叫工人姐姐抱。好多時我都覺好奇怪，點解一對父母出街湊一個幾歲大嘅小朋友都湊唔掂，又B B車又其他嘢，仲要帶埋工人出街，工人就幫佢哋乜都做曬，咁個小朋友又點識得自己管理自己呢？其實當然仲有好多其他特徵，只要大家喺街上面留心下隨時可以搵到其他唔同嘅特徵。不過講到最尾我都只不過係想講，小朋友只不過係家長嘅一面鏡，佢反映出家長平時對佢哋嘅教導即係家教，家長培養出一個孩子王，究竟係愛佢定係害佢家長真係要諗得清清楚楚。