farm712 發表於 20-8-6 02:09
可否講下甚麼 due diligence? 可以點做? 感激。
due diligence 即係了解自己移民後嘅會可能出現嘅狀況,評估下自己是否可以接受,要調整心態,包括對未來生活嘅期望,著手準備、步署,盡量將期望同現實落差減少。呢度一直都有好多會員真實個案分享,有好有唔好嘅,每個人嘅際遇唔同,有人嚟到好開心好享受,有人後悔抱怨,喺來源地越順風順水嘅、職位越做得高、人工越好嘅,一般越難適應落差,但都有好多例子唔一樣,睇下自己心理質素有幾強,處變能力有幾高,期望有幾大,可以接受失敗不如意有幾好。
但就算了解過亦做過評估,有好好準備過,移民初期都可以唔習慣,因為除咗自己心態外,環境因素都係一個變數,其他人嘅態度行為亦非自己可以控制,咁就只能自己調節。有D望似微不足道嘅細節都可以觸動一個人嘅神經,我嘅忠告係要抱住既來之則安之嘅心態,怨係要過,唔怨都係要過,唔同人考慮移民嘅原因都唔同,有人係被逼,有人係自己揀,有人係退而求其次,亦有人係人有我人嘅心態,但點都好,嚟得就要有破斧沉舟嘅決心,成日諗住走,終日將移民後同移民前比較係完全冇意思嘅,一個人只可以喺一個地方生活,唔會同時喺兩個地方,東西文化習俗不一樣,比較亦係冇意義嘅。
舉個例:喺香港有好多街頭小食,可以好平,美國呢度未必有得賣,賣都有機會好貴,一係自己學煮,一係俾認為貴嘅價錢食,一係就接受冇得食。掉轉去諗,香港買新鮮生果如士多啤梨、車厘子、藍莓好貴,美國呢度買可以好平,如果可以當呢個係好處/bonus的話,生活就有更多正能量。
花旗太太生活在花旗國,留意時差,你問我未必即時答到。