少年成長

收藏本版
發帖
返回列表
跳至頁

首頁
1

尾頁
   1
csir3290


子爵府

積分: 10923


1#
發表於 18-11-18 13:09 |只看該作者
本帖最後由 csir3290 於 18-11-18 13:09 編輯

唔知家長有冇覺得我哋同啲仔女好似用唔同嘅時鐘計時咁，我哋用嘅時鐘好似行得快過小朋友用嘅幾倍。我成日見到阿仔阿女做嘢就覺得佢哋做得好慢，偏偏阿仔阿女自己就唔覺得，所以我成日都有句口頭禪就係快啲啦快啲啦。呢個禮拜就係因為想佢哋快啲做完啲功課，同埋完成曬啲嘢搞到氣氛好唔愉快。講真阿仔阿女都算乖，功課從來都一放學自己做唔使我哋擔心，但係每一晚返到屋企如果見到佢呢哋將啲功課亂咁堆晒喺枱面又或者仲未做完硬係即刻會忟憎起嚟，會係咁催佢哋快啲快啲，但係佢哋就一副你緊佢唔緊嘅樣繼續慢慢嚟。

其實有好多嘢佢哋唔係唔做佢哋肯自己做功課自己執書包自己練琴其實好多嘢佢都肯自己做 但係我哋除咗想佢哋自己做之外我哋仲想佢做得快 有兩晚阿女明明七點幾已經做完啲功課 我哋返到嚟 就開始叫佢 執嘢 溫默書 同埋做其他嘢， 終於阿女搞掂曬啲嘢 但係都已經成十點鐘跟住又要上床瞓覺。 期間就係咁叫佢快啲快啲快啲越大就越忟憎終於就搞到大家都好唔開心。 去到第二日阿女又係咁 雖然早咗少少 但係都係要成九點幾先先至搞掂曬啲嘢。

嗰晚終於忍唔住我趁阿女入書房搵我嘅時候我就問佢覺唔覺得爸爸媽媽呢兩晚好忟憎，我同佢講因為我哋想去快啲同專心啲做完啲嘢，我哋唔想佢成日嘅生活就只係學習同埋做功課，我哋想去有啲時間玩，明明佢可以有效率啲，但係就因為唔可以專心做完一樣先一樣，樣樣嘢都分開幾次做。好似執書包咁，明明可以一次執完，點知執下又做下其他嘢，搞到執個書包都要用成半個鐘頭。叫佢自己入房做功課，佢就係都要留喺個廳度同埋細佬一齊做，但係又唔專心成日做下做下就同細佬傾計。我話畀佢聽其實我哋想佢快啲嘅原因係想佢有多啲時間玩吓同埋休息吓，可以有時間同細佬一齊玩。之前佢成日投訴冇時間玩，睇書同埋睇電視。我就話畀佢聽其實你只要專心啲就可以快啲完成曬你嗰日要做嘅嘢，你就根本可以有時間去玩或者睇書。佢可能以為我鬧佢喇所以跟住走咗入房喊，但係其實我真係唔係鬧佢我只不過係解釋畀佢聽。

到咗第二晚唔知係咪真係因為解釋過畀佢聽，定係學校功課少咗，佢哋又真係專心咗。佢哋兩個又真係好快做完功課，搞掂曬啲嘢仲有時間一齊玩。我哋當然立即讚佢哋啦，希望加強佢哋個感受，知道做嘢有效率啲其實最後得益嘅都係自己。我亦都特登喺嗰兩晚佢哋早做完功課嘅時候，畀佢哋睇咗套卡通電影，呢啲本來平時放假先至會做嘅嘢，喺嗰兩晚我都畀佢哋睇，希望可以加強佢哋感受到做嘢有效率嘅好處，當然之後都有再同佢哋傾番啦。


其實我自己都有反省喺嗰兩晚其實我同我老婆都係真係比較忟憎，我問自己係咪只要細路仔自己明白自己做嘢做得慢到頭來影響嘅都係自己，其實佢哋係咪會感受到做野慢嘅唔好處呢？ 佢哋呢個年紀其實應該知道乜嘢對自己好，如果仲係我急佢唔急，咁佢哋根本就唔知乜嘢係自己嘅責任。其實好多時 我發覺都係我哋自己做家長覺得啲嘢要快啲快啲但細路仔自己唔覺得需要。我哋成日強調要快啲快啲，搞到大家都唔開心，不如放鬆一啲等佢哋自己承擔番做得慢嘅唔好處，而當佢哋去改善嘅時候我哋強調有效率嘅好處，正面加強讚賞佢哋做得快達致嘅效果。咁係咪可以減少大家之間嘅矛盾呢！我都會問自己係咪應該將自己心入面嘅時鐘校番慢少少，然之後慢慢提升返佢哋嘅心入面時鐘，令到我哋大家嘅步伐一致啲減少大家嘅矛盾。
私人傳訊


首頁
1

尾頁

跳至頁
返回列表
回覆
發帖

© 2024 Baby-Kingdom.com Limited.

網站： 聯絡管理員 廣告查詢 私隱政策 使用條款 免責聲明 使用意見