少年成長

收藏本版
發帖
返回列表
跳至頁

首頁
1

尾頁
   0
csir3290


子爵府

積分: 10904


發表於 18-12-2 10:53 |顯示全部帖子
本帖最後由 csir3290 於 18-12-2 10:54 編輯

間中就會聽到啲家長問究竟幾多歲先俾手機細路仔好？ 我覺得呢個唔係幾多歲嘅問題，唔係話十歲畀就遲五歲畀就早。其實我覺得主要係取決於家長幫個細路仔準備好未嘅問題？我覺得家長要幫細路仔第一個要準備嘅就係要啲細路仔知道究竟手機係一部工具定只係一部玩具。而家嘅手機實在太先進，我明白好難淨係當佢係一部工具，因為就算年我哋大人好多時都係會將部手機作為娛樂用途。但係現在嘅智能手機其實係我哋嘅一個好幫手，唔係淨係當佢為一部只係娛樂嘅玩具。如果我哋喺細路仔面前經常都只不過係用部手機嚟玩或者甚至乎係畀佢哋攞嚟玩，咁佢哋自細就只不過會當部手機係玩具攞嚟娛樂，咁不論你幾時畀佢其實佢都只係會主要用嚟娛樂，而且越玩越吸引越玩越想玩。以我自己為例，其實我對仔女好細個應該家姐三四歲嘅時間開始就已經接觸手機，我記得嗰次係因為我哋要去日本旅行，我哋就畀咗部手機家姐同家姐講呢一部係一部相機，叫家姐喺旅行嘅時候影低佢自己鍾意嘅嘢，咁喺嗰次旅行入面家姐就真係淨係當嗰部係一部相機係咁不停影影咗好多相，佢仲好有興趣同我哋分享佢影嘅相。都第二次去旅行嘅時候嗰陣時細佬應該都係三到四歲到。細佬見到家姐影得咁開心，我哋就畀佢嘗試攞部手機當相機用，喺嗰次入面佢哋只係覺得手機係一部相機係幫佢哋記低佢哋旅行時候見到嘅嘢。我哋從來唔會畀佢哋手機餸飯亦都唔會畀佢哋喺手機入面睇卡通片，所以喺當時嚟講手機對佢嚟講只係一部相機。
另外我覺得要會幫佢哋去搵唔同嘅興趣會，經常同佢哋一齊玩。家姐鍾意睇書細佬鍾意畫畫，喺得閒嘅時間佢哋就會睇書同畫公仔或者玩其他嘢，所以根本佢哋就唔會攞手機嚟玩只係當手機係一部相機。到家姐大啲開始學琴手機就變成佢部拍子機。當我哋幫佢哋兩姊弟溫默書嘅時候，手機就變成一部錄音機，幫佢哋自己溫習默書。佢哋開始睇英文書嘅時候手機就變成一部字典。到而家家姐四年班手機就變成佢嘅一部日程表，因為佢見到我都係將好多重要嘅嘢寫咗喺部手機入面提醒自己唔同嘅日子做乜嘢，所以佢而家都學咗我將幾時要交嘢，幾時要練習呢啲重要嘅日子記咗一部手機入面。

到而家佢兩個都仲係當部手機係一部工具用完就會放番低，從來唔會攞嚟玩遊戲或者做其他嘢。而家屋企嘅手機同埋平板都係隨便放喺書房從來唔洗特別收埋，因為亦都係訓練佢哋自律，用完就放番低。其實對佢兩個，用手機我哋兩公婆都應該幾有信心。而且佢兩個嗰部手機亦都因為只能夠用到wi-fi上網所以平時佢哋根本就唔會帶出街亦都更加唔好話帶返學。反而每當我哋去博物館，去旅行或者去啲佢哋有興趣去嘅地方嘅時候，佢哋就會提出可唔可以帶部手機去影相。其實咁發展落去我相信到家姐上中學嘅時候可能佢就需要開始帶手機返學校，但係我相信我哋一路咁樣訓練佢，幫佢養成手機係一部工具嘅呢一個習慣我相信到時佢亦都唔會太過沉迷玩手機。

所以我覺得究竟幾時應該比手機小朋友，唔係同佢嘅年紀有最大關係，反而同家長幫佢哋做好相應嘅配套未有關，家長有冇幫佢哋發現展唔同嘅興趣，如果喺佢哋嘅生活入面根本冇其他嘅興趣係重要嗰部手機嘅話，其實你幾多歲畀部手機佢都係會好容易出事，所以家長應該問自己其實你幫小朋友做好準備未？呢個準備係細路仔自己唔會做到，係必需要家長用自己嘅言行身教佢幫佢哋預備。最怕係連家長自己都未識得分部手機究竟係工具定玩具，咁你點要求小朋友自己懂得自律呢！
私人傳訊


首頁
1

尾頁

跳至頁
返回列表
回覆
發帖

© 2024 Baby-Kingdom.com Limited.

網站： 聯絡管理員 廣告查詢 私隱政策 使用條款 免責聲明 使用意見