（唔開post都唔知道原來都有幾多孕媽媽第一胎都生得咁快～）
兜咗一個圈終於又嚟返產房門口，見到老公已經喺度等緊我。姑娘double confirm老公會陪產，就交代話我會入產房set up先，叫老公get ready然後大約10分鐘後按鐘再問姑娘安唔安排到。
終於入到產房，又要過床，當時已經痛到過床都冇力，想等陣痛過咗先典過去，但姐姐係咁催我快d快d，叫我好趁冇咁痛時拿拿臨「拮」高個patpat移動過去。我夠想啦！有力至得㗎！
終於躝咗過去，駁咗部胎心機，老公都入埋嚟了。由屋企穿水起計2.5小時就入咗產房，以為好快就好似電視劇入面咁push push push然後bb就好快出世？我真係太天真了。姑娘(應該係助產士)話我依家有8度，但bb頭仔未夠低，根據佢哋嘅經驗，1個鐘開1度，預計要2個鐘後先生得。
2個鐘！2分鐘我都唔想等呀！但冇計，姑娘講完就又一陣風咁唔見咗。跟住落嚟嘅係我人生中最漫長嘅2小時，其實我都唔係好識形容果種難受嘅感覺係咪稱之為「痛」。比起「痛」，更難忍受嘅係個人不斷覺得好想痾屎，係毫無尊嚴及理智地只想快d有得解放，但難捱之處係你僅餘嘅理智又話俾你知唔應該用力，因為未係時候，亂用力只會影響到bb心跳。
雖然我盡量好克制地唔大叫，但都忍唔住典床典席甚至打側身(唔知點解果一刻覺得打側訓會舒服d)，但旋即驚動咗姑娘(應該係因為我轉身時整鬆咗個胎心監測機)。
姑娘衝入嚟叫我唔好再打側身，又再交帶唔好痾唔好用力，教我如果痛就聞笑氣，然後就拎咗個罩俾我試聞下就又消失咗。
笑氣其實好大陣臭膠味，不過果刻你會覺得如果有效的話咩味你都唔會care，可惜對我嚟講其實聞完係冇咩作用，要形容的話就係個人會好似high大咗咁，會覺得眼訓、反應會遲緩、但降低唔到痛感，即係廢嘅。我仍然都係會捉住老公衫袖咿咿呀呀咁啜泣話好痛好痛好痛。
終於我真係好頂唔順(我相信時間上其實唔係過咗好耐，但我覺得已經過咗一萬年)，於是同我老公講叫佢出去搵姑娘幫我check下生得未。幾位姑娘唔太情願地入嚟，又係同我講返話冇咁快，不過都有幫我檢查。我又係痛到失憶加聞氣聞到好wing，淨係記得一句：「嗱太太，依家俾你試痾。如果今次唔得呢，你就真係要再忍下，真係冇咁快。」
只見幾位助產士極速拉起曬d腳踏扶手，曙光終於出現！我．要．痾．喇！
發表於 
無用任何止痛方法開到8度真係好勁，你無大叫咩? 等更新
返回列表
