我想分享一下之前帶仔仔去睇牙醫的經驗,等日後有需要的JM作參考。但好長…
話說仔仔12月說牙痛,佢又未睇過牙醫,說帶佢去C6睇開的牙醫檢查一下先,牙醫話佢有蛀牙需要杜牙根,而且有隻蛀牙有缺齒問題 (即這個位沒有恆齒),建議我們睇兒童齒科。
我聽到要杜牙根個心即時離一離,想搵多個牙醫睇睇,加上由於仔仔第一次睇牙醫,個人已經有些不安,所以我同C6都想留在大埔睇(我們住大埔的)多次,免得仔仔在車程途中已扭計。當然,由於仔仔只有5歲,打去幾間口碑好的牙科就只有一間肯睇,又聲明小朋友要合作先處理啦。
仔仔最後在第二間大埔牙醫睇,結論是都有蛀牙蛀得好深,呢個大埔牙醫如果唔想杜牙根都肯嘗試同仔仔補,補的過程首先落麻醉膏再打局部麻醉針再補牙,基本上仔仔都好合作 (起碼醫生肯做),前後去左兩次牙醫話佢都有信心補完應該唔痛。點知到了近聖誕,仔仔的牙又痛起來又發低燒,我們即時又去返牙醫度佢就幫佢照一次全棚牙的X-RAY及檢查多次,話沒有蛀牙,可能仔仔本身有病就開了消炎藥,並都懷疑仔仔有缺齒問題,REFER了我們去中環的姓戚的兒童齒科。
我當然同時不停在BK爬文,知道兒童齒科中大家都對張虹莉的評價比較好,要平的話可以嘗試菲臘牙科,或旺角的羅國棟都比較相宜,至於這個姓戚的就好少聽人講。當由於近聖誕,張牙醫那裡已休息,留言留WHATSAPP都沒有人回覆,而菲臘牙科最後都要排到27/12…果幾日聖誕假就天天陪仔仔食白粥了……去到菲臘牙科佢最後都唔肯收仔仔,就REFER我們去另一個部門(那兒是牙醫碩士生),BOOK期都要去到1月尾,等唔到,我本身都知道兒童齒科杜牙根好貴,都預要幾萬埋單,心中的底線就是盡量唔想佢要全身麻醉,因仔仔已經睇左幾次牙醫之後好合作,基本上牙醫叫佢做什麼都好聽話,知道牙醫先可以幫佢解決到牙痛問題,所以杜牙根錢都是其次,我同C6都唔想佢要全身麻醉,應該沒有這個需要。
我本來都想搵旺角的羅國棟(私心想平D),但C6話人家REFER了戚牙醫度就去啦,費事有起事來要搵返大埔個牙醫佢問起,我們又沒有去佢REFER的兒童齒科度就俾人話。甘我就照帶佢去。第一次1月初去戚牙醫度要檢查及報價先,佢話仔仔有6隻蛀牙要補,1隻要(就是痛那隻牙)杜牙根,至於缺齒問題就要再大D先可以確定,因男仔的恆齒形成的比較慢,要等多一兩年先知,仲俾左張同齡的女仔X-RAY片比較,所以個心都定D,又即時要同我個仔洗牙,睇下佢定唔定,這次檢查及洗牙就2千幾(我只記得洗牙要$1700)。之後有姑娘解釋俾我聽小朋友杜牙根的過程,同我在網上SEARCH的都差不多,報價就補牙要3000一隻(即6隻補牙要18000),杜牙根連牙套要9000幾,如果要麻醉就另計(加多萬幾至2萬不等),我同C6商量過之後,其實杜牙根都唔算貴 (C6是那些經常要睇牙醫的人),要想速戰速決,都打算在戚牙醫度做,但戚牙醫就INSIST要補左牙一次(補兩隻)先,循序漸進,看小朋友的反應,我即時問可以補完一次牙,之後就杜牙根,之後再來兩次補埋果4隻牙,姑娘話順利的都可以。
我們就聽佢意見,就俾佢補左牙再做杜牙根(即先處理唔痛的牙先,再處理痛的隻牙),錢都係預左俾人賺,佢肯下個APPOINTMENT盡快處理好仔仔痛果隻牙就算啦,雖然心裡都覺得點解唔幫我處理左痛果個先!!
之後1月14日C6帶仔仔去戚牙醫度補牙,之後C6簡直一肚氣,話醫生同仔仔補兩隻牙什麼麻醉膏/藥都沒有落,仔仔都盡量沒有郁,只咿咿呀呀了幾聲,就話仔仔唔合作,話仔仔不如全身麻醉就杜牙根+補埋余下的牙,不然就繼續補牙再決定如何杜牙根,仲話仔仔可能有牙齦膿腫的問題。
當時我同C6都深深覺得這個戚牙醫根本就想全身麻醉一次個做晒,普通牙科幫小朋友都會落下麻醉膏,你什麼都唔落我個仔只是咿咿呀呀了幾聲咪好囉,唔伸你兩腳算偷笑,邊個唔知全身麻醉個小朋友唔識郁你做起來就最EASY! 這次甘就俾左6000。
心想就算俾佢試補牙補多次(用多6000補兩隻佢話蛀但我個仔沒有話痛的牙),難保佢都是說要全身麻醉先肯處理隻會痛的牙!我同C6都要返工要特登請假陪個仔睇牙醫,俾你DUM症DUM多幾次我們連AL都蝕埋!加上又近新年,我唔想新年又同個仔食白粥,所以我就建議轉去睇羅國棟,今次C6都同意了!
我又即時BOOK到1月17日去羅牙醫處檢查,佢畫了圖說邊隻牙之前蛀左有補過,邊隻要再處理,痛果隻要杜牙根,其他有蛀的已補過,唔痛的話可以唔處理,缺齒問題就同戚醫生解釋一樣,男仔的恆齒形成的比較慢,要等多一兩年先確定到。
我問:仔仔有沒有牙齦膿腫的問題
羅:未見有。
(我即刻個心定一定。)
我問:杜牙根可以唔全身麻醉嗎?
羅:客人可決定,唔想全身的話可以先試局部麻醉
我問:可以下次局部麻醉及先做杜牙根整左痛果隻牙嗎?
羅:可以,客人可決定
之後就同我仔仔說下次處理牙齒有5個步驟(其實主要是落麻醉藥,在要處理的牙齒上套上藍色布以慎防補牙或杜牙根時會整親其他牙齒,最後就補牙或杜牙根了) 之後又提我其實補牙或杜牙根都有這5個步驟 (我之後問C6戚牙醫補牙時有沒有做過這些,C6堅決地說:沒有,什麼都沒有!),要日日同仔仔洗腦,等佢無甘驚,這次檢查大概500定600,並報了價,補牙一隻1000, 杜牙根3000,牙套就2500,我就即時BOOK了24/1的期。
24/1又是我帶了仔仔去,大概1個小時左右,醫生有播卡通,又每做一個步驟解釋俾仔仔聽「拿,呢個係第幾個步驟了」最後佢幫仔仔補了兩隻牙及杜了牙根,我問:是否現在要做埋牙套?
羅:不, 現在已做了好耐,差不多一個鐘,仔仔要休息,可以下次做。不過我依家在杜牙根上的牙齒是用了補牙料,都可以用一段日子,牙套你可以決定做定唔做,而且做都是做金屬牙套,仔仔要時間適應
言下之意就是唔做都得,我就同C6商量(佢有杜牙根經驗我沒有),佢都話其實多了個牙套真的無甘自然,而且仔仔都是乳齒,只是用多幾年,佢都覺得可以唔做!
最後羅醫生這裡就用了5000, 完成。現在4月,起碼仔仔沒有再叫痛。
講真,羅醫生應該唔係果D好溫柔好會氹小孩的兒童齒科(我爬文時見到有JM盛讚某某牙醫好溫柔好識同小朋友溝通),佢個診所都是一般旺角比較細的診所 (戚牙醫的中環甲級寫字樓就寬闊多了),不過佢都算係個有醫德的醫生,起碼沒有需要的就不會堅決要你整,又知道要整痛的牙先,能夠在新年前完成,同仔仔開開心心過新年,我已經好感恩!當然,由現在開始更要多督促仔仔好好刷牙!
多謝大家讀畢甘長的分享!