婦女醫護

跳至

首頁

尾頁
   29


複式洋房

積分: 185


發表於 19-4-12 10:36 |顯示全部帖子

我想分享吓做HIFU (海扶超聲聚焦刀)嘅子宮肌瘤手術,呢個係一個保守治療,係無創手術,旨在減輕經量,減少貧血及經痛,同比女士們另一個唔想開刀嘅選擇。


首先介紹反呢個手術係香港係未有得做,公立醫院只有中大及瑪麗有呢個技術,但只用於治療癌證。2018年尾,有國內集團計劃係香港搞私家診所做呢個手術(https://www.mpfinance.com/php/in ... 38035351810&issue=20180927),預計5-6月裝機,又要訓練醫生,我個人相信要8-9月先會正式開波。(以上資料係網上搵到,準確性有待證實)。


講反呢個技術,係中國重慶發明嘅王智彪
(http://www.haifuhospital.com/3g/doctor/1.html) (http://www.haifuhospital.com/),而家世界各地都有用呢個技術去治療女士嘅肌瘤問題,例如英國,德國,台灣 (https://www.youtube.com/watch?v=f6SNenk9Wmc)
(https://www.youtube.com/watch?v=oL5rtbCTSdU)
同美國,呢個技術己經超過10幾年歷史,其中美國Mayo UCLA (https://youtu.be/d2ESzrSsxKM) 醫院都廣泛運用呢個方法去治療子宮肌瘤,唔同嘅係美國會再加上MRI導航做手術,想知多d可以去Youtube搵吓,有片睇同講解。其實亦有港人去台灣做,上網做research時搵到大約要30萬台幣,而國內就有唔同收費,RMB12,00040,000不等。


簡單介紹之後,就講講我呢次由初初去睇醫生到決定做呢個手術嘅經過。


1. 2019 威爾斯婦科初體驗


呢一日,因為貧血被轉介去睇威爾斯的婦科,去到醫院就例牌要比錢,登記同等,而等嘅時候發現四周都係講國語嘅女士;期間又要驗尿又要磅重又要問長問短,然後就緊係又等見醫生啦!好喇,終於見到醫生,呢個係男醫生,(帶反個頭盔先-我本人極之唔鍾意男醫生,因為佢地唔明女人M黎嘅煩厭,所以比較唔會為女人諗解決方法,亦都冇咁有耐性)。坐低左就問我係咪有子宮肌瘤?有幾多個?有幾大?你都應該唔會諗住生架啦?不如割左個子宮同輸卵管好唔好?當時我真係好反感,乜檢查都未做,只係靠睇反頭先同護士/阿姐嘅對話紀錄就即刻叫我割,而當我問佢除左割仲有冇其他野可以做時,佢又唔答。跟住,更反感嘅係,我當日姨媽到佢都仲要做檢查,我已經話左我好多,唔做得唔得,佢仲要繼續,不特止,又粗暴又冇講比你知佢做乜,好喇,最後佢終於都做超聲波,唔做就算,求其到呢,是旦掃幾吓就咁話我有一個10cm嘅肌瘤就收工;到坐反埋佢張枱,佢又再講:「點呀?割左個子宮佢啦,割就而家同你排期。」我又再問佢有冇其他選擇,佢又唔答,頂!我就話要考慮吓,跟手問佢要排期排幾耐,佢話起碼2年,佢都痴線架,我都一把年紀,等多1- 2年我都收工啦,仲去做手術,受一刀?唔會囉!激鬼氣,攞左成年止血藥同鐵丸就走左。


2. 上網做 Research


反到屋企唔忿氣就開始上網睇吓有冇其他嘅肌瘤治療方法,發現香港有以下幾種:

a.
微創手術 - 割肌瘤

b.
開腹手術 - 割全子宮 / + 輸卵管 / +卵巢

c.
靜脈栓塞 - 封左子宮肌瘤嘅血管,等肌瘤冇血提供盈養而死

d.
觀察 - 因為size細,可以唔駛處理住


當然我冇就咁就算我上網再用英文搵治療方法如果有興趣搵可以用uterusfibroid呢個詞語搵資料),跟住就搵到HIFU(High-intensity Focus Ultrasound)。再細搵之下就搵到有關手術嘅資料:技術研發,手術方式及過程,同病人嘅分享;跟住再去Youtube搵吓有冇片睇,包括唔同醫生嘅訪問,新聞報導,同醫生講治療過程嘅presentation(上面條link);睇完咁多資料,就緊係睇吓香港有冇得做啦,但搵黎搵去都搵唔到,真係有d失望,香港醫療咁先進,但居然冇呢個手術,跟住再細搵,就搵到原來係有,不過只用黎做Cancertreatment,肌瘤呢d成本效益咁低就冇做囉。


做完一輪功課發現香港冇得做就緊係失望啦,心諗最壞嘅大不了就一路食止血丸食到收工為止囉。由於做research時見到台灣都有得做,都有考慮過去果面做,因為台灣嘅醫療亦都係出名好嘅,而台北大醫院亦提供呢個手術,當然亦都搵到有香港人share佢嘅手術經驗,同搵到整個手術嘅費用,大約就係上面講嘅30萬台幣同加機票酒店錢啦,其實咁計落,都成7-8萬港紙架。因為費用唔少,咁就緊係問吓我嘅保險朋友有冇得claim啦,好彩我分保單都包外地治療,所以可以做完claim,當然claim到幾多就唔知。又因為咁多不確定,我又唔係好死心;又心血來潮諗既然呢個技術係中國發明,咁中國就一定有得做架啦,咁係中國做又係乜嘢一回事呢?於是乎又上網搵資料:

a.
廣東省邊度有呢個技術

b.
間醫院嘅名聲

c.
做手術部機嘅介紹

d.
做手術嘅年資 = 經驗

e.
邊個醫生比較出名


搵吓搵吓就發現廣東省有3個地區有呢個手術,分別係佛山,中山同埋江門,及後亦都搵到原來近我地嘅深圳都有得做,你可能會問點解深圳咁近都唔去深圳做呢?我一陣會再講原因。係呢幾個地方,我就鎖定左佛山嘅佛山婦幼保健院(https://www.fsfy.com/index.html )同陳向東主任醫生,因為咁啱我表姐住佛山,於是就微迅問吓佢;真係好彩,佢認識呢間醫院做護士;再問之下,就請呢位吳姑娘介紹我地認識陳主任。


3. 陳向東主任醫生


回應反之前,點解深圳咁近唔去,要去到佛山呢?因為:

a.
陳醫生係去重慶學海扶刀

b.
佛山自2013年就開始海扶治療

c.
佛山婦幼保健院係3甲級醫院 (3甲級 = 一級醫院,大陸嘅醫院分好多級,3甲級係醫療水平最好嘅)

d.
深圳嘅醫生都係去搵陳醫生學習海扶手術


雖然以上嘅因素重要,但香港人上大陸求醫多數都比人屈,而且對於佢地嘅醫療水平,我一d都唔了解,但抱住去見吓醫生同睇吓醫院環境先,大不了唔做唧嘅心態,就係2月尾上去睇睇。


4. 佛山婦幼保健院


係度講講上到去醫院登記同掛號嘅情序:

a.
手機要有微信

b.
係醫院前台攞張登記form,填好去登記處登記,將資料綁住微信

c.
係微信關注左醫院嘅微信account

d.
要掛號同比掛號費都要透過微信

e.
陳醫生係星期三(全日),星期四上午開診,要掛號有兩個方法

-
於佢開診當日去搵醫生加號,但要醫生OK先得,因為佢要開張加號紙比你去比錢,亦即佢要OT,但原來大陸都好習慣呢樣野

-
第2就係當醫生開診日完結,即晚20:00 後網上就會開放掛下星期的號,病人就可以以微信掛號


因為我咩都未做,所以第一次上去係搵護士姐姐幫我同醫生講請佢加號。上到去淨係搞掛號、加微信都搞左一輪,之後就係等。但我要講係醫院好先進,佢地乜嘢都係電腦化,咩都用微信,掛左號要去自動報到機報到啦,排左號唔去(唔記得幾次)就會黑名單你等等。然後發留意到醫生睇緊症時,病人都會自己出入醫生房,叫號又好似有d亂,於是我表姐就出招,一陣就見左醫生,同醫生講晒d病史,有片就帶埋去,佢一邊聽一邊電腦紀錄完之後,我都問左整個手術嘅大約費用,醫生都一一答覆,之後就開紙我去照超聲波睇吓裡面咩情況先;去照完20分鐘後攞住你張Bar code report紙去個自助B超 (大陸係咁叫超聲波) report機掃一掃就會出report,跟手又攞住個report去比醫生睇,醫生睇完就話可以做,叫我去做海扶家位,於是又走去做定位,其實當時已經差唔多12點,我都擔心要等飯後先有得做,點知上到去現場醫生又好好叫我即上機做,做完醫生又開張紙我去照MRI再確認係唔係可以做,但好唔好彩,當日MRI嘅期都full晒,連佢地OT(比多RMB200)嘅時段都滿晒,咁就唯有再約期了。經過左呢一日嘅醫院經驗,我對呢間醫院嘅印象完全改觀,亦都決定如果照完MRI出黎係可以做的話,我會做呢個海扶刀。


咁又講講咩原因我會改觀:

a.
陳醫生好有耐性,無論咩時候佢個房都人來人往,但佢都好有耐性咁答我嘅問題。

b.
去照超聲波時,幫我照嘅醫生雖然唔係好有禮貌,因為真係好多人照。但佢一開始照就問我個瘤咁大,咁多我冇感覺嘅咩?我又真係冇喎,我問佢其實有幾多個,佢就話好多,我話香港醫生話我有一個好大成10cm,佢話唔止,有2個,不過唔係10cm,係8cm。呢個過程令我覺得,佢地工作好流水作業,但睇得出佢地好專業,起碼比香港威記個醫生好,而且佢地好快睇到你咩問題,而出report亦只需要20分鐘,香港真係做唔到囉。

c.
去做海扶定位時,問當場護士可唔可以做埋,其實當場護士叫我地14:30反黎做,但我地話香港過黎要趕下午車走,當場醫生就叫我即刻上機,其實佢真係可以唔理我地架,但佢都肯幫忙,反觀香港醫院未必會幫你囉,當然,我都覺得自己好好彩,上半日就可以做到咁多嘢。


跟住就3月中再去照MRI同見醫生,搞掂晒仲同醫生約埋3月尾入院做手術,今次講到呢度先,下一篇我會講講入院同做手術嘅過程同經同大家分享吓,希望呢次經驗比到大家一個另外嘅醫療選擇。



洋房

積分: 92


發表於 19-4-13 07:44 |顯示全部帖子
感謝分享, 我也有同樣問題, 肌瘤已有11 cm, 因抗拒做手術及想保留生育功能, 在網上尋找得知有海扶刀這技術, 但香港仍沒有, 這時候剛好看到你的分享 實在是太好了, 期待快點看到你下一篇的分享。


複式洋房

積分: 185


發表於 19-4-16 21:18 |顯示全部帖子
本帖最後由 pigpigsos 於 19-4-17 19:50 編輯

跟住講下入院過程同手術經過:


30/3 08:00入院
攞住醫生寫嘅入院紙搞入院,要預備RMB5,000按金。
搞掂左就上6樓等護士分配房間,佛山婦幼婦科有3種房,2人房,3人房同4人房,好好彩,我問到有2人房,咁跟住果7日都會比較靜,另外入房之前,護士會要求影印回鄉證比佢地做record,同你要比RMB50 deposit 攞房嘅櫃鎖匙。

雖然醫院都有唔同嘅探病時間,但我住左咁多日就發現全日都有人係度,護士係唔會理嘅。

第一日,放好晒d嘢之後,管床醫生會再確認病歷,要本人+家屬簽名確認。

跟住就要做化驗:
1.血
2. 尿
3.poo poo

照片:
X 光 x 2張
超聲波 - 照腎照膀光
心電圖

買:RMB 130產婦包連眼罩
庭裡面有藍紙,床墊 (大,中 size )仲有廁所墊

31/3 全日煲劇


1/4

呢一日全日禁食,只可飲葡萄糖水
醫生講解瘤嘅位置同手術方向
護士講解做手術時要注意事項:
以下位置如果痛同熱都要話比醫生聽:
肚 (即肚臍以下)
同pat pat 以下
有痺,痛,麻都要出聲

醫生亦安排左
種豆
吊鹽水x1
吊葡萄糖水x2
下午3 - 4點開始飲瀉水 2L
剃毛
洗陰道
20:00 - 21:00 灌腸2次,各1L

2/4
呢一日連水都唔可以飲
早上6點被叫醒
灌腸2次,各1L
插尿管
上手術室前,用一啖水食埋粒止痛藥
被推到手術室樓層,再用機吸同撳清腸內氣體

入到手術室,除晒衫褲,自己爬上海扶刀床上,整個手術都要趴係度


上手術床,趴低,大約好似以下咁



醫生話可以帶手機聽歌,所以我帶左手機入去聽歌同寫低手術嘅感覺

11:18 開始
水好冰 - 因爲已經日半冇食過野
綁手臂 - 量血壓
夾手指 -度心跳
打止痛藥 / 鎮靜濟 (總共打左14次)
唔駛一分鐘就暈暈地,但是過左5分鐘就冇乜野,小小迷湖
滂江充水- 有尿急感覺(300ml左右 ),一般4-500ml
因水好凍,就更急,但手術開始冇耐就已經冇乜感覺
水下面個射頭係會上下左右移動
水嘅溫度有時會冰有時暖d
做嘅過程當中,尾龍骨有冤,唔同情度嘅冤
當做唔同部位會有唔同嘅感覺,
有針刺,
有急尿嘅感覺,
有拉扯
冤,
肚位都有冤痛,一路都有小急
肚小小搞肚咁,有時想開大咁,有時好似m黎子宮收縮咁
左右腳有少少熱,有拉扯
盆骨小痛
以上講嘅呢d感覺都係我可以接受嘅,

但一定一定一定要記住(好重要嘅嘢要講3次)如感覺肚皮被火燒,太熱又劇痛,雙腳痛麻、痺、抽筋同扯得好痛,一定要出聲,話比醫生聽,等醫生停,唔可以忍,因為有機會皮膚燒傷,神經受損,呢個手術點解要病人清醒地進行就係醫生需要睇即時反應黎調節海扶刀嘅熱量同位置,同最最最重要嘅係安全,因為一旦神經受損,要恢復都唔係易事!

12:12 中場會休息,其後都休息左2-3次後再做

右pat pat 有冤,有拉扯
可能打得多針,有d時候差d訓著,有時熏熏沈沈
中間肚皮有過熱,同醫生講會加冰袋再做
其間可以同醫生護士傾偈,分散注意力,時間會過得快d
醫生嘗試做上面近尾龍骨位個瘤時,兩腳拉扯,好痛同全生發滾,醫生試過唔同位同熱度,但情況相似,其實就同預計情況差不多,所以放棄做上面個瘤

13:54完,係海扶刀床上休息左大約10分鐘,自己爬過床,再由護士推我落房,再自己爬過床

手術後返房2趴個鐘
期間會膀光灌冰鹽水2樽,原因係幫子宮降溫,
另外亦都會吊2樽葡萄糖水,因為已經差不多40個鐘冇食過野,葡萄糖水係補充糖份
大約2個鐘後,就拆尿喉,跟住可飲水或湯
之後就要試吓去廁所,

之後再趴多2個鐘
手術後會有小量血水洗出,記得帶m巾
爬床時腰椎好冤,盆骨冤
子宮似m黎時抽痛,但可忍受;如果太痛,可以問護士攞止痛藥。
兩個鐘後可以食粥 / 流質食物
跟住2-3日都食流質食物

3/4 照mri, 睇手術後結果,我唔好彩遇著壞機
中午又再照超聲波睇吓膀光容量回復正常未
下午1730再照mri (好彩整返)
打左枝針(for子宮 -會即時覺得陰部痕)
洗陰

4/4 打針(子宮 -會即時覺得陰部痕)
洗陰
醫生睇mri 結果,講比我聽做左幾多同簽紙出院
攞埋藥就出得院

最後,講吓由初初去睇醫生,到做完整個手術嘅費用:差不多RMB15,000.
(以上嘅價錢係冇包括咁多次上上落落嘅交通同酒店費用,如果計埋,大約2萬左右。)

Follow up timeline:
1個月,3個月,同1年返去覆診,照吓子宮肌瘤痿縮左幾多,醫生話每個人嘅縮細程度都唔同,我做呢個手術嘅目的指在減少m同唔想再貧血,當然唔想捱一刀都係主因。

最後,我想講比有子宮肌瘤/肌線瘤又想生小朋友嘅女士們聽,做左呢個手術後3個月後,就可以開始試吓懷孕,而且其實已經有好多成功嘅案例,希望以上嘅分享可以比到你多一個選擇。

如果諗住去做呢個手術,入院時記得帶以下物品:
拖鞋
衫,褲,鞋,襪
外套
牙刷
牙膏
紙巾
毛巾
水樽

沖涼用品
中國電話卡
衛生巾
葡萄糖
濕紙巾
衣架 x 2

如果有其他問題,可以留言,我會盡量答。


洋房

積分: 92


發表於 19-4-17 09:58 |顯示全部帖子
本帖最後由 lupylam 於 19-4-24 09:12 編輯

回覆 pigpigsos 的帖子

你好,謝謝你的詳盡分享,有幾個問題想請教你:

  • 灌腸會辛苦嗎?

  • 必需要照磁力共振嗎(因我有幽閉恐懼,所以很害怕)?

  • 手術中會有急尿感覺,那可否排尿的?還是要忍著?

  • 做上面近尾龍骨位個瘤放棄左,是因為肌瘤太大嗎?

  • 術後跟進,你的症狀有改善嗎?肌瘤有縮少?


感謝你耐心回答。




複式洋房

積分: 185


發表於 19-4-17 16:06 |顯示全部帖子
本帖最後由 pigpigsos 於 19-4-17 19:59 編輯
lupylam 發表於 19-4-17 09:58
回覆 pigpigsos 的帖子

你好,謝謝你的詳盡分享,有幾個問題想請教你:

1. 灌腸唔辛苦,忍吓就得
2. MRI係要照,因為要清楚睇到瘤嘅位置,我諗你可以同醫生講,睇睇有冇其他方法,因為都係20分鐘左右,個position 大約好似以下咁,個人唔駛入晒部機架,唔知咁你得唔得,如果唔得可能要同醫生講下,睇吓點解決!

3. 手術中有尿急感覺,但因為插左尿喉,你係控制唔到排尿架,急只係感覺黎架咋,因為整個過程係膀光灌滿水做,你可以感覺到尿急都係一陣,打左鎮靜濟,好快就冇乜感覺,唔駛擔心
4. 其實我嘅情況比較麻煩,我子宮上下都有1個8cm嘅瘤,上面果個亦都好接近尾龍骨,做手術前醫生都講過佢會試下做,做得到就做,做唔到就要等我子宮縮細左之後再睇下點處理,其實我都有預到做第2次
5. 我啱月頭做完,下個月會上去覆診同照,到時先知情況。




複式洋房

積分: 185


發表於 19-4-17 16:06 |顯示全部帖子
本帖最後由 pigpigsos 於 19-4-17 19:51 編輯

del


洋房

積分: 92


發表於 19-4-24 09:09 |顯示全部帖子
回覆 pigpigsos 的帖子

感謝樓主回覆,非常詳盡,現在放心多了,希望香港快點引進海扶刀。
祝樓主順順利利,5月覆診後可再交流一下情況嗎?謝謝!


洋房

積分: 92


發表於 19-5-2 00:58 |顯示全部帖子
本帖最後由 lupylam 於 19-5-2 00:59 編輯

分享一下,最近看到的較近期新聞,預計7月在香港正式投入服務
https://www.google.com/amp/s/kknews.cc/zh-hk/health/jkvjerp.amp


水晶宮

積分: 55216


發表於 19-5-2 08:30 |顯示全部帖子
lupylam 發表於 19-5-2 00:58
分享一下,最近看到的較近期新聞,預計7月在香港正式投入服務
https://www.google.com/amp/s/kknews.cc/zh- ...

我都正想話,hk 的黃醫生搞緊,唔使返大陸做咁危險。


洋房

積分: 92


發表於 19-5-2 09:42 |顯示全部帖子
回覆 Nbs 的帖子

香港黃醫生?願聞其詳~.~

唔知到時有無得claim保險呢...同埋係邊間醫院做手術定係佢地有間醫療中心呢...我因為子宮肌瘤中西醫都睇左唔少錢...做微創要16萬...開刀要6萬但有機會流血不止就要切埋子宮...我仲未生小朋友..呢D手術真係令人卻步..呢幾年為左呢個問題好心累....


水晶宮

積分: 55216


發表於 19-5-2 10:05 |顯示全部帖子
lupylam 發表於 19-5-2 09:42
回覆 Nbs 的帖子

香港黃醫生?願聞其詳~.~

本帖最後由 Nbs 於 19-5-2 10:07 編輯

你篇報導最尾寫咗hk 代表黃胡信醫生。
我聽聞佢搞緊,搞到咩地步hk有得做未我就唔知。
不過新嘅嘢,因住做白老鼠。
你好多好大肌瘤?正常切瘤好少搞到要切子宮。當然樣樣都有風險。


大宅

積分: 2405


發表於 19-5-2 10:33 |顯示全部帖子
lupylam 發表於 19-5-2 09:42
回覆 Nbs 的帖子

香港黃醫生?願聞其詳~.~
要16萬咁貴?我做微創個醫生已經算收得貴,但都係12萬4,hifu係無創但佢不一定可以令瘤消失哂,有啲只係縮細,如果想生b問下醫生你粒瘤影唔影響著床,我有一粒影響著床所以切左佢最快,手術後抖半年就可以懷孕


洋房

積分: 92


發表於 19-5-3 18:46 |顯示全部帖子
回覆 Anbelle 的帖子

我有三粒較大嘅肌瘤要切除, 其中兩粒喺左右卵巢上面,已經黐埋咗生埋一齊變左11 cm大, 另一粒6cm喺子宮頸,醫生話手術較複雜所以收費較貴, 同埋有機會砸住輸卵管, 但其實我每個月都有M到, 係咪即係代表每個月都有排卵呢?


大宅

積分: 2405


發表於 19-5-3 19:42 |顯示全部帖子
lupylam 發表於 19-5-3 18:46
回覆 Anbelle 的帖子

我有三粒較大嘅肌瘤要切除, 其中兩粒喺左右卵巢上面,已經黐埋咗生埋一齊變左11 cm ...
有m都可以無排卵,有一種叫無排卵性月經,
不過你粒瘤最大都已經11cm, 其實都有需要做了


複式洋房

積分: 185


發表於 19-5-10 16:05 |顯示全部帖子
本帖最後由 pigpigsos 於 19-5-10 16:15 編輯



lupylam 發表於 19-4-24 09:09

回覆 pigpigsos 的帖子
感謝樓主回覆,非常詳盡,現在放心多了,希望香港快點引進海扶刀。



進度:

早兩日返左佛山覆診,結果對比反第一次照超聲波,肌瘤size縮細左
1. 被燒死的,縮細左大約8mm
2. 冇燒到(即近尾龍骨果個), 近子宮位置縮細左15mm, (因為吸收左附近被燒死的細肌瘤的能量)

醫生叫做多D運動,另外想講反,手術後第一次經期,血量係之前的一半,而即將第2次經期,今次係咁耐以黎第一次有肚脹的感覺,以前1d 感覺都冇,

我好明白大家都concern大陸醫院的安全性,因為我當初都好擔心,加上,如果香港有得做,估計都要10萬8萬,而且如果香港而家先train人,去做嘅都真係會做白老鼠,我都唔想又要比錢又比人做練習,感覺唔好囉! 其實,我之前都聽陳醫生講,都有人搵過佢落香港教人,不過佢就話醫院未必肯放人,因為係醫院佢係做海扶的主刀,當然佢都要 train 新醫生做,所以醫院未必肯放佢。

另外見到上面條Link嘅內容,裡面提到"新加坡FarrerParkHospital的李建威教授", 想講,我睇開的陳醫生也被醫院派去新加波同李醫生交流幾次,同一齊做HIFU手術,可想而知陳醫生技術係可信賴的。



lupylam,
希望我嘅經驗幫到你,見到你有咁多瘤,,希望你快D好返,錢係一個問題,但身體健康先最重要,祝你快快生個健康BB。


洋房

積分: 92


發表於 19-5-11 15:59 |顯示全部帖子
本帖最後由 lupylam 於 19-5-11 16:00 編輯

回覆 pigpigsos 的帖子

好高興聽到你有良好進展嘅消息, 令我信心大增 ,其實我都有擔心好似你所提及嘅香港而家先train人會做咗白老鼠, 如果返國內做,我普通話唔好會唔會出現溝通問題呢, 而且好多程序我都唔識處理, 所以先會考慮等香港引進, 我都想盡早解決呢個問題,你之後仲係要每個月返去覆診嗎? 係咪真係會有啲血塊或者壞死組織直接排出的?


複式洋房

積分: 185


發表於 19-5-11 23:48 |顯示全部帖子
lupylam 發表於 19-5-11 15:59
回覆 pigpigsos 的帖子

好高興聽到你有良好進展嘅消息, 令我信心大增 ,其實我都有擔心好似你所提及嘅香 ...

其實我個醫生係講廣東話架,上面都有護士係講廣東話架,所以溝通係冇問題架!

我知有d人係宮內有瘤的話係會經陰道排出的,其他在宮肌中間式宮外的就會被子宮自己吸收反,因此肌瘤可以縮細幾多都好睇個人嘅新陳代謝。血塊係會有架,但唔多,我之前睇過一個30歲頭嘅女仔做呢個手術,佢嘅肌瘤就縮左超過90%,你唔駛咁擔心。

兩個月之後會再返去覆診呀。


伯爵府

積分: 16139


發表於 19-5-14 12:42 |顯示全部帖子
深圳有冇得做?
過好,每一天!


複式洋房

積分: 185


發表於 19-5-18 00:58 |顯示全部帖子
fishwawa 發表於 19-5-14 12:42
深圳有冇得做?

我睇過陳醫生的微博有介紹深圳醫院去擺佛山搵佢學習HIFU,但唔知係邊間。


洋房

積分: 92


發表於 19-6-27 09:21 |顯示全部帖子
facebook有資料了

https://www.facebook.com/安和醫療-Cornwall-Medical-671522003207133/?epa=SEARCH_BOX

首頁

尾頁

跳至