少年成長

跳至

首頁
1

尾頁
   0


子爵府

積分: 10859


發表於 19-11-10 11:53 |顯示全部帖子
早幾晚終於好認真咁要佢哋執書包,執乾淨書包入面嘅垃圾,邊啲嘢要帶邊啲嘢唔使帶要執得整整齊齊。自從呢個學期開始,每朝車佢哋返學都覺得佢哋個書包好重,不過可能佢哋唔覺得因為每一日都係姨姨幫佢哋拎書包落去車度,佢哋只係孭住自己個功課袋,家姐就仲過份只係拎住自己個食物袋。 上到學校個路口,姨姨就會幫佢哋孭個書包佢哋繼續自己拎返自己個袋行入學校,直至到入到學校佢哋先至自己孭住返自己個書包。其實落車之後細佬好多時都會自己堅持自己孭返自己嘅書包,但係姨姨實在太錫佢哋,覺得佢哋嘅書包重所以係都唔畀佢哋孭。接放學仲誇張因為佢哋啲書包實在太重,佢要攞架車仔去幫佢哋裝啲書包返屋企。其實好多次夜晚我返到屋企都同佢哋講叫佢哋執好個書包,邊啲嘢唔使帶嘅就唔好放入去,唔好搞到個書包咁重。但係好多時叫完佢哋話執完之後,我再拎一拎佢哋個書包都仍然係咁重。問佢哋佢哋就話樣樣都要帶,細佬仲話就嚟考試老師要佢哋溫習所以就要帶曬啲書返去。

早幾晚佢哋聲稱執完書包之後,終於忍唔住要佢哋將書包入面嘅嘢攞曬出嚟逐樣同佢哋睇,根本佢哋就將好多嘢擺喺個書包入面,成日話要帶但係問清楚佢哋有啲嘢根本就唔使帶同唔需要用。同埋我同佢哋講唔準姨姨再幫佢哋孭書包。一定要佢哋自己感受返個書包嘅重量佢哋先至會覺得有需要唔好執攪到個書包咁重。其實如果我同我老婆有時間湊佢哋返學或者放學嘅話,我哋好少會幫佢哋孭書包一定要佢哋自己孭。佢哋一定要自己感受到個書包重, 仲要成日孭住佢哋先至會真係認認真真諗清楚啲嘢使唔使帶。我仲同姨姨講放學都唔準幫佢哋拎咩書包,要佢哋自己孭返屋企。由學校行返去屋企嗰段路咁長佢哋先至知道書包重對自己嘅唔好處, 先至會認真咁去執書包。 根本孭書包就係佢哋自己嘅責任,況且都已經三年級同五年級啦!如果覺得重佢哋就要認真咁去執書包,有陣時可能真係好多嘢拎,咁佢可以分開一啲 等姨姨或者家長幫佢哋,但係絕對唔可以唔執書包就將所有嘢畀曬人等人哋去幫佢拎。

首頁
1

尾頁

跳至