懷孕前後今日: 25|主題: 329684

收藏本版

發帖

返回列表

跳至頁

查看: 10829 | 回覆: 16

請陪月要小心（長文） [複製鏈接]

KokoroS

別墅

積分: 988

1^#

發表於 19-11-25 18:05 |只看該作者 |倒序瀏覽 |打印

我第一胎咩都唔識，咁奶奶就叫我地請一個24嘅陪月，
第一次見面嘅時候個陪月講到自己咩都識，
又話佢煮嘅嘢食個個都話好食，
係咁比佢煮嘅餸嘅相我哋睇，
啲相睇落去真係唔錯，
點知咁先係惡夢嘅開始

其實第一個星期我就已經崩潰左兩次話要炒佢，
因為佢煮嘅嘢非常難食，
認同我嘅有我老公同我老爺，
因為太難食嘅關係次次都剩返喺度，
結果佢每日都當自己有煮餸咁拎返之前嗰幾日煮嘅餸出嚟放喺枱面，
同一碟餸我見到三日....
之後我同佢講我唔食隔夜餸，
咁我先見唔到同一碟餸不停loop

到蔬菜嘅問題，
佢會煮菜心芥蘭嗰啲
我就同左佢講我唔食菜花
佢就話我你都唔識食菜飯先最甜
咁當然佢煮碟菜一定會有菜花係到
然後我就發現點解成碟菜冇菜框
佢就同我講菜框冇人食架
我真係吓佢....
菜心同芥蘭既框冇人食？
之後同佢講完，
下次碟菜我見返d 框，但係佢批晒啲皮，菜花依然喺度
佢話啲皮好老食唔到㗎，
但我想講我屋企買嘅全部都係菜苗....
一d 都唔老...

到煲湯嘅問題
話說佢好慳家，
奶奶買咗四隻雞過嚟
佢竟然用半隻雞煲湯，仲要拎個大嘅煲嚟煲，
煲湯淡到咩味都冇，好似飲水咁
我奶奶見到就同佢講要飲完隻雞同埋唔使咁多水

之後有一次佢煲魚湯俾我
煲湯飲晒之後佢竟然加水再返煲俾我
我媽媽咁啱上咗嚟見到就，話點解會加水返煲㗎
佢冇講野⋯⋯就自己行開咗

到湊BB嘅問題
咁 BB poo poo 左，
佢抱左BB去洗手盆，
然後開水後直接沖水落BB個pat pat度，
之後開風筒吹乾BB pat pat，
我媽媽見到問佢你係咪傻㗎咁會燙傷BB嘅皮膚，
跟住佢話佢照顧左咁多個BB一直都係咁做....
佢唔覺得有問題，
之後同佢講左話我哋個BB唔可以用風筒吹
而家暫時未見到佢再用風筒吹BB pat pat

之後我發現咗佢重用濕紙巾
佢竟然將啲濕紙巾過水吹番乾再攞嚟洗BB pat pat
我同佢講濕紙巾屋企好多我話點解你要咁做
跟住佢淨係答我＂哦＂就行開咗

一開始我同佢講左BB衫要手洗
頭幾次佢做樣俾我睇係用手洗嘅
之後我就發現佢用機洗，仲要溝埋佢啲床單一齊洗
激到我痴線⋯⋯

啱啱係醫院返嚟頭兩日
BB嘔奶，我叫佢幫BB換衫
佢同我講唔需要換衫
我話佢嘔奶就要換衫，
佢竟然答我未到好污糟冇咁嘅必要，
我完全覺得佢係想洗少件衫，
之後我勁堅持佢先幫阿B換衫

我叫佢同BB沖涼
佢就答我BB唔使日日沖涼
我就問佢點解BB唔使日日沖涼，
佢答我BB自己有層保護膜唔需要沖涼
我話唔得每日都要沖，
跟住我就發現佢只係幫BB過水，
連沖涼液都唔用，
佢就同我講BB唔使用沖涼液....
我就叫佢每日都要用
搞到我每日都好似要監督住佢同阿B沖涼有冇用沖涼液

所以請陪月嗰陣interview真係睇唔到幾多，
請唔請到個好嘅真係好講運氣
只能夠祝大家好運

發洩完畢，多謝大家睇咗咁大篇野