少年成長

跳至

首頁
1

尾頁
   0


男爵府

積分: 7009

2020勳章


發表於 20-2-2 12:25 |顯示全部帖子
過年前有日等接阿仔女學琴,百無了賴咁喺個商場度行咗個幾鐘。行緊嘅時候見到商場又擺咗某個主題樂園品牌學英文套裝嘅攤位。 就係因為百無聊賴所以特登行埋去睇下,一行埋去已經有兩三個sales即刻行埋嚟我身邊介紹,乜嘢價錢都有,標榜容易學容易明,細路仔自己睇都得。佢哋講到好有成效,但係一講價錢由幾千到幾萬蚊都有,最靚嗰套係成個櫃咁買返去,全齊不過當然價錢亦都係最高啦。我心諗買咗返去都仲要搵地方擺呢套嘢先至得。其實我唔係好信呢一啲套裝嘅成效,唔係話佢冇成效,但係我覺得一定唔係佢講到咁高。所以聽咗冇耐就行開啦,啲sales見到我冇乜意思當然亦都冇乜理我。但係因為冇嘢做所以我行埋一邊睇下個攤位係咪好受歡迎。睇吓睇吓我發覺原來呢啲攤位真係幾受歡迎。好多家長自己主動行埋去,我睇咗大約十零分鐘我都見到起碼有三四個家長買咗。我唔知道佢哋買咗邊啲套裝,但係我淨係知道嗰啲套裝最平都幾千蚊,講真其實都幾好賺。又一次証明其實賺細路錢真係幾容易。

我唔係話佢哋冇成效,但係要達到佢哋標榜嘅成效 ,其實真係唔係話買咗返去叫個細路自己睇就得。曾經有個家長朋友都同我講,過萬蚊買咗一套返去,卒之有個細路仔兩三歲擺到差不多十歲,大部分時間都係得個擺字,開頭係威係勢同個仔一齊睇咗幾個星期,後嚟個細路就只係攞啲影碟當卡通片睇,個細路自己都睇到冇興趣,變成一件傢俬擺喺度。最後仲要搵下有冇啲年紀細啲嘅小朋友嘅家長肯接收送咗畀人。我有陣時都有一種心態就係好驚自己啲仔女會蝕底,所以人哋有而如果自己能力承擔得到就希望自己嘅仔女都有起碼唔蝕底先。因為有陣時買呢啲嘢嘅人好識得足家長嘅心理,講到對小朋友點好,成效有幾高幾容易學,佢哋亦都會講好多家長都會買呢啲嘢嚟畀自己嘅仔女,有陣時真係好怕聽到其他好多家長都有呢一句說話。呢個情況尤其是當阿仔阿女讀緊幼兒班嘅時候,嗰啲家長羣組入面最多就係講邊啲產品有效,買咗啲乜嘢俾阿仔阿女,其實講到尾都係怕自己嘅仔女蝕底咗,怕自己個仔女起步唔及人哋,最慘就係聽到有人話如果有能力都唔肯投資多啲落去自己嘅仔女身上,就會害咗自己對仔女。就係因為呢啲說話,好多家長就會聽到邊樣嘢話好就會即刻買,邊樣嘢有效又會即刻買,為咗唔怕蝕底就投資咗好多金錢 喺呢啲項目上面。其實我自己喺阿仔阿女細個嘅時候,同老婆都有少少呢啲諗法,但後來發覺好多嘢買咗返嚟都係得個擺字。我最記得好似阿仔阿女細個嗰時興玩閃卡咁。即係攞啲卡喺阿仔阿女bb咁細個嘅時候喺佢哋面前係咁閃過,話可以幫助小朋友記憶喎,我老婆嗰陣時都買咗兩三套,但係後來發覺有一套根本一路擺喺度都冇用過而且佢哋一路大都唔覺得特別有效。

父母為咗仔女可以完全毫不計較咁投資,有能力嘅父母投資得更加多。佢哋 唔會計較價錢,最緊要聽到係有成效,但係個重點係只係聽到話有成效已經唔計較成本。但係好多時我唔明嘅係父母可以唔計較價錢咁去投資,但係我覺得最重要嘅就係投資時間喺仔女身上,偏偏唔知點解好多父母對投資時間呢樣嘢就好計較。年幼嘅細路仔其實最需要嘅就係父母很投資多啲時間喺佢哋身上陪伴佢哋。其實細路仔要學乜嘢都好,要有成效其實未必係嗰件物件或者教具有幾貴,反而係父母肯投資幾多時間落佢哋身上陪佢哋一齊學。正如嗰套非常之貴嘅英文教材。其實我覺得個成效唔會好得過父母肯用時間個個禮拜同佢哋去圖書館一齊睇下書一齊教佢哋,父母以為畀咗錢個細仔女就會自動自覺做得好,其實根本就自欺欺人,與其投資咁多金錢不如投資多啲時間落去自己仔女身上。其實效果可能嚟得仲化算。

首頁
1

尾頁

跳至
你需要登錄後才可以回帖 登入 | 註冊