少年成長今日: 4|主題: 15845

收藏本版

發帖

返回列表

跳至頁

查看: 3546 | 回覆: 5

迷上剪片

csir3290

子爵府

積分: 10910

發表於 20-4-19 11:19 |顯示全部帖子

上個星期講阿仔鍾意睇機動戰士高達上咗癮，除此之外，呀阿女呢輪都有另外一樣嘢上咗癮，就係佢呢輪鍾意咗學剪片。

事源係阿女早輪成日同細佬攞曬啲毛公仔出嚟玩，大大話話有成四五十隻，因為時間多佢哋玩玩吓玩到好似拍戲咁，攞啲毛公仔嚟做演員，重編曬故事有曬對白真係十足十拍戲咁，跟住佢哋仲攞埋自己部手機出嚟真係拍片添。有一晚佢哋玩完拍完就攞出嚟畀我哋欣賞佢哋拍出嚟嘅成果。其實真係拍得幾得意，因為我老婆都有啲剪片嘅經驗，間唔使都要剪下片，所以就教阿女其實可以點樣拍，可以唔使咁長可以分開啲然之後用啲剪片嘅軟件剪埋佢一齊。阿女聽聽吓好似越聽越有興趣咁。第二日我就嘗試幫佢喺網上面下載咗一啲免費嘅剪片軟件，跟住等佢哋做完曬啲嘢我就坐喺佢隔離教咗佢一陣間點樣剪片。可能佢見到我同老婆都好落力咁教佢，而佢又覺得好有興趣，所以好快咁剪咗一條好簡單嘅片，又覺得自己好成功好有趣仲同細佬一齊睇。跟住嗰晚佢就真係同細佬兩個攞曬啲公仔出嚟真係好似人哋拍戲咁有曬分場點樣拍。然之後第二日佢又埋頭埋囉咁剪。當然係好初階啦，但係我同老婆就要繼續扮演觀眾，除咗畀啲改進嘅意見之外仲要欣賞佢剪嘅嘢。最近我哋去行山，佢今次行山真係揸住部手機喺唔同地方拍咗啲片段，返到屋企真係將啲片段剪埋曬一齊今次仲加埋效果同埋配樂，又真係剪得似模似樣。連我老婆最近興起學人整芝士蛋糕，呀女就好似拍烹飪節目咁拍完仲剪埋添。

其實學嘢同埋興趣都係一樣，只要有啲成功感，覺得人哋欣賞，佢哋就會肯擺心機去試，肯去繼續學習。而家啲剪片軟件都已經唔使我坐佢隔離一路教佢，佢自己對住部電腦慢慢嘗試下，又真係畀佢學到好多新技巧，雖然未必條條片都好專業好好睇，不過作為父母梗係要從旁鼓勵同埋欣賞，令到佢維持住佢呢一鋪癮同呢團火啦。不過除咗我哋有功勞之外，原來最欣賞呀女剪片嘅就係細佬，細佬每一次喺家姐剪完之後都會第一時間睇完又睇，好似一個小fans咁。家姐有細路呢個小影迷自然會繼續去學剪片。又係嗰句要細路仔嘗試新嘢其實都嚟唔開欣賞成功感同埋鼓勵呢幾樣嘢啦。

私人傳訊