我仔會appeal,剛見到小小有關
資料，希望大家用得着。
appeal 完之後，如果升咗分又夠高分，理論上係有途徑安排你入大學，不過成功機會極微。如果有 JUPAS offer，就幾大都要咗先。
有好幾位同學講起 appeal DSE 成績後，如果成功有升分，同時又達到「正式遴選結果」（Main round offer）公佈後，某一課程收生嘅最低分數，噉無論該課程係咪收夠學生，你都一定係可以入讀嗰個課程。因為覆核咗DSE成績而分數有所提升，公平而言，你嘅取錄資格唔應該受到影響（簡單啲，即係考評局出錯，唔係你錯）。
（閱讀下文前，請先了解：一、覆核成績嘅「成功率」係非常低，只有唔夠1%，大家唔應該搏升到分，應該只當係bonus；二、最後可以入讀更高次序嘅UGC / OU課程，只有127人，係bonus中嘅bonus。）
喺到希望可以澄清一下當中一啲誤解 / 解答問題：
1. （呢點多數人都知）
升咗分之後，你仍要符合課程嘅所有入讀要求。例如JS6406 HKU LLB嘅最低要求係「4533」，所以你升咗分之後，都要達到呢個最低要求（唔係單單3322），先可以申請「重新考慮入學遴選」（Reconsideration）。
2. （呢點好多人誤解咗）
所謂「你嘅分數高過最低嘅嗰個人，就一定可以入到」，**計嘅並非DSE分數（eg Best 5），而係JUPAS分數**，包括：DSE各科分數、面試分數、SLP或OLE、校長推薦計劃等等。以下用JS6963 HKU BENG舉例解釋：
假設BENG嘅JUPAS分數公式係[3]：
英*1.2 + 數*1.5 + [M1/2*1.5] + 物理*2 + 其他*1 + [其他*1] + 面試分 + OLE + 校長推薦
而第443位，亦即獲取錄嘅最後一位申請人嘅JUPAS分數係：
英(3)*1.2 + 數(6)*1.5 + M2(5)*1.5 + 物理(5)*2 + 化學(3) + 面試(1) + OLE(0.5) + 校長(0)= 34.6
如果你覆核成績後，JUPAS分數係高過或等於34.6，噉無論BENG係咪已經收夠人，你都一定有得讀呢科（前提係你符合最低入讀要求）。
注意，JUPAS分係已經計咗weighting（甚至傳聞有「暗weighting」），所以即使你化學科由2升到5**，但物理科只係得3，你個JUPAS分都未必高過34.6，好大機會入唔到BENG。
同埋，面試分、校長推薦（聽聞呢樣好幫到手）之類嘅都會計算在內，所以大家盡量要去面試，可能喺啲邊邊位救你一命。
3. （呢點好多人問）
如果DSE放榜後，你嘅成績未如理想，而且會申請覆核成績，**你都應該先接受8月7號嘅「正式遴選結果」（Main round offer），交留位費**，除非：
一、你唔打算入讀JUPAS任何課程（可能係重考）；
二、你只係想讀某一科（例如 HKU LLB），如果讀唔到你就唔會讀JUPAS其他任何課程（可能出外國讀）；或者
三、你已確定獲其他大專院校取錄（例如達到HKCC嘅conditional offer），而且會入讀呢啲課程。
噉你就可以唔使交留位費。
如果你會申請覆核成績，而你亦希望保住手上任何offer，噉你都應該先喺8月13號17:00前交留位費。8月19號，公佈DSE覆核結果。如果你發現有升分，你可以喺8月20號（唔使錢）申請「重新考慮入學遴選」（Reconsideration），然後等8月27號放榜。
你申請咗「重新考慮入學遴選」之後，會再有一次「五出五入」機會。注意，如果你已經收到「正式遴選結果」，你調完次序之後，**只有排喺「正式遴選結果」以上嘅課程先會有得重新考慮**。假如你已經收到HKU BENG嘅offer，而你本來嘅排法係：
A1 BENG
A2 BSC
A3 BA
…
D12 MBBS
D13 LLB
後來你調成：
A1 MBBS
A2 LLB
A3 BA
B4 BENG
B5 BSC
噉依家就只有A1-B4先會重新考慮，而你至少一定能夠入讀B4。有人會話：「不如將main round offer放E20，噉咪可以考慮晒廿個囉？」理論上可以，但未必係最好嘅決定，因為好似上面噉，（依家先發現自己chem唔多掂）萬一 A1 MBBS 真係收咗你，你就只可以讀 MBBS，唔可以返轉頭揀 BENG。所以調次序時，一定要慎重考慮。
— — — — — — — — — -
常見短問題
1. DSE係點放榜？
答：DSE放榜係7月22號。學校考生要返學校攞「成績通知書」；自修生可以喺朝早7點（好似係）上網睇成績。
2. DSE點樣appeal？
答：放榜當日，學校考生可以搵負責老師申請覆核成績；自修生係自己上網申請。
注意，覆核有分兩樣；亦有分科覆核、卷覆核，價錢各有不同 。大家可以睇荷包厚薄考慮。
3. DSE放榜後，我係咪會有一次調choice？使唔使畀錢？
答：你會有一次「五出五入」嘅機會。你可以調出或者調入最多五個課程，或者喺自己已選嘅課程內，隨意改動次序。唔使畀錢嘅。
改完記得要提交，唔係淨係save draft！
4. 「五出五入」係幾時？
答：每個人唔同，你應該**已經**收到SMS或email，知道自己嘅修改時段。如果唔知，可以登入JUPAS網睇。可參考。
5. JUPAS係點放榜？
答：2020年JUPAS放榜係香港時間8月13號朝早9點，全球同步。你要自己登入JUPAS網站睇。唔使返學校。
6. 點申請「重新考慮入學遴選」？
答：如果覆核後有升分，你應該會收到SMS或email提示。然後你要自己登入JUPAS網申請。你會再有一次「五出五入」機會。
7. 如果我無喺8月13號17:00前交留位費，而「重新考慮入學遴選」又無任何結果，噉我會點？
答：噉你就唔會喺今年JUPAS到派到任何課程。下年請早。
8. Appeal卷係咪「只升不跌」？
答：一般嚟講，係。
但前兩年考評局擬將「只升不跌」改為「可升可跌」，考生手冊就寫「若積分覆核／重閱答卷後的分數比原來低，成績通常不會降級。」但我相信只係一啲極端情況先會降級。大家唔需要太驚。
只要堅持相信神 是愛我,為我捨己
《麥田裏的守望者》為世界貢獻了一個詞語：守望。教育不是管，也不是不管。在管與不管之間，有一個詞語叫“守望“。
發表於 
)
返回列表
