美容扮靚

跳至

首頁
12345...6

尾頁
   14


複式洋房

積分: 216


發表於 20-6-3 12:16 |顯示全部帖子
本帖最後由 misslea 於 20-6-3 12:18 編輯

隆胸到拆除一年多時間紀錄。想起度同大家分享呢一年半隆胸嘅心路歷程,比考慮中,決定做,或者好奇呢個手術嘅咁多位一個借鑑

2018年年尾,我做左呢一個大決定
我本人:身高172m, 115lbs,B Cup

自問唔係好靚,但身材勻稱,只係想再完美少少,於是我的起心肝去整型大國做咨詢。
當時我家人,男朋友都好反對。我平時做facial個位美容師都極力勸阻我,因為佢都係做完又拆,好後悔。我好感激佢提醒,一個陌生人其實唔需要理你咁多,可惜我當時好硬頸當耳邊風。你知道,當一個女人下定決心做一樣野時,冇任何野可以阻止到,我係排除萬難死都要整個隻。個時我有朋友起韓國個邊做翻譯,有個照應,而且唔洗擔心係影子醫生。我選左一間幾出名嘅醫院,院長上過節目,做過好多次隆胸手術。

題外話:
我發現韓國人都好興將D大手術包裝到好簡單,甚至係正顎,削骨個種明明係4級大手術,分分鐘冇命,佢地都會話你聽,好簡單架,幾個鐘就整好啦,之後好快會好靚架......
其實簡單黎講,隆胸就係起你兩邊腋下開刀,隊把刀入去你胸大肌下邊剝開個空間,再塞個假體入去。(有另一個做法係筋膜下,請自行Google)雖然話用內窺鏡唔會出太多血,但你諗下,係硬生生用刀剝開你2層肌肉,所以肌肉都會好傷

我選用當時最新嘅物料Motiva,兩邊275cc。Motiva係號稱唔洗按摩,企起度會自然下垂,訓低又會攤開個隻
做完手術一覺醒返,痛感6/10。係比人打完一身個種酸痛

然後就係漫長嘅恢復期。以下係我做完一年幾嘅感受同拆除原因:
1. 又痛又硬,訓低係兩個大碗。可能我個人對痛感比較敏感,每日個胸赤痛酸痛個種,好難受。
個size係大左,但手感真係好假,比足半年都仲係又硬又痛。我自己預左假體實係假,但見廣告話咩可以同真胸比,根本諗多左。呢隻Motiva話就話唔洗按摩,但我整左年幾,一唔按就會硬,按返就好少少。後來我去問過乳房外科醫生,佢話我知,當你身體有異物嘅時候,係一定會產生莢膜變硬。按摩就係要按返大個空間。你唔按都得,未必會莢膜孿縮,不過你預左會好似石頭。訓覺個陣側訓真係好辛苦,好似比舊野扯住扯住咁。

2.做得假體隆胸預左10年8年後要攞返出黎。一定唔會係一勞永逸,冇永久隆胸呢回事。你要接受到你10年後又再全麻開刀拎返出黎再擺多個新嘅入去。如果唔重新擺嘅話,由於你個乳房皮膚比假體一直撐大,拎返出黎個時,乳房一定會下垂同皺皮。我只係做左一年幾,拎返出黎,D皮都已經鬆哂。我以前B級,依家拎返出黎後皮膚又鬆又下垂,睇落得返A。

3.我係腋下開刀,唔知係咪開刀時唔小心切到我D神經,導致我一醒返開始就出現手麻同痛感。當時院長梗係打死唔認,話係我自己本身問題。呢D後遺症多多少少會有,畢竟你腋下好多神經。整型醫生同中介一定唔會同你講有後遺症,講左點賺你錢呢?唔好講咩「搵間正規醫院正規醫生實冇事」。我今次搵呢間係韓國正規醫院,個院長做左十幾廿年隆胸手術,咪一樣係咁。即使失敗率只有0.000001%,當發生起你身上,就係100%。唔係整形有風險,而係任何手術都有風險,自己衝量博唔博得過啦。


終於,經過一年多嘅折磨,我的起心肝拎返個假體出黎。好慶幸,呢個係一個可以逆轉嘅手術。除左係有後遺症同痛感仲需要去適應,而且有衫遮住冇人睇到疤痕。本來之前有諗過去整骨(諗返起我真係好傻),但萬萬萬幸冇去整到。由於醫生話腋下原切口拎返個假體出要全身麻醉,而我真係唔想再做全麻,所以我寧願起乳下緣做局部麻醉拎返出去。花大錢買來身體上4條大疤。

以前嘅我,得閒會打下針做微整型,外表係一切,成日覺得自己呢度唔順眼,個度唔好睇。依家唔好搞我,真係免費我都唔會再做。錢冇左,我努力再賺。健康冇左,邊個賠比我。我寧願將呢筆錢,花去做gym,食野,陪下家人。為左胸前二兩肉,花千金又傷又痛,值唔值得?

我知呢個版好多整形打手朋友。我唔係阻你做生意,但請自重少少,唔好意見不合就鬧人。
呢篇分享係我一個字一個字打出黎,因為我想比有隆胸想法嘅姊妹了解呢個手術係點嘅一回事,可以深思熟慮,而唔係好似我咁傻,突然衝動就跌左入整容坑。我自己呢個錯誤嘅決定,用左好多金錢,時間,健康去彌補。有時候後悔同痛苦係為左讓自己成長,去明白一個價值觀。我真係唔希望會有其他姊妹好似我一樣重蹈覆轍。
如果你做得好完美好有自信,我真心恭喜你,亦為你開心。但記住,整容如賭博,有輸有贏。再好嘅醫生都可能出錯。
如果你問我,依家嘅我一定係會叫你唔好隆胸。如果你一定一定要做,請預備一筆touchwood整型失敗嘅錢,for重修又好,拆除又好。

有咩問題,分享大家可以留言再討論下。


男爵府

積分: 8203

2021勳章


發表於 20-6-3 12:29 |顯示全部帖子
八卦一問, 你當時由B 做到幾多cup?


複式洋房

積分: 216


發表於 20-6-3 12:38 |顯示全部帖子
Fiona_yy 發表於 20-6-3 12:29
八卦一問, 你當時由B 做到幾多cup?

我每邊放275cc, 做到大C/小D咁上下


子爵府

積分: 14491


發表於 20-6-3 13:17 |顯示全部帖子
拎返出嚟後,你而家仲有冇痛呀?


複式洋房

積分: 216


發表於 20-6-3 13:27 |顯示全部帖子
wingyan008 發表於 20-6-3 13:17
拎返出嚟後,你而家仲有冇痛呀?

我依家拎返出黎冇耐,胸部肌肉點都會有酸痛
但最大嘅後遺症係腋下開刀個時應該整親神經
一年半都未好返,會成日痛,同埋出現手麻痺

點評

fongff_11    發表於 20-8-8 18:13


珍珠宮

積分: 37985

2021勳章 精叻鼠年勳章


發表於 20-6-3 14:24 |顯示全部帖子
想知你成個過程, 包括安裝同拆除,
當中2轉來回機票/翻譯/酒店/安裝同拆除手術費/住院等等... 加埋用左幾多錢?


複式洋房

積分: 216


發表於 20-6-3 14:47 |顯示全部帖子
littlefunpig 發表於 20-6-3 14:24
想知你成個過程, 包括安裝同拆除,
當中2轉來回機票/翻譯/酒店/安裝同拆除手術費/住院等等... 加埋用左幾多 ...

去整個陣:
因為我朋友係韓國做翻譯,唔需要請
機票,手術費,藥物,酒店
一共用左8萬幾接近9萬港紙


拆除:
疫情關係加上對出國做醫美冇哂信心
我係香港搵專業乳房外科醫生拆
5萬港紙


自作孽之旅,用左$13萬,換來後遺症& 4大條疤痕
你話我係咪好on居
希望我呢個經歷可以提醒到其他姊妹


珍珠宮

積分: 37985

2021勳章 精叻鼠年勳章


發表於 20-6-3 15:01 |顯示全部帖子
misslea 發表於 20-6-3 14:47
去整個陣:
因為我朋友係韓國做翻譯,唔需要請
機票,手術費,藥物,酒店

咁過左去就算啦~
人一世物一世
起碼你試過, 知道唔好,
以後唔會再試, 總好過整上引果D人...





大宅

積分: 4702

2021勳章


發表於 20-6-3 16:30 |顯示全部帖子
樓主分享呢個經驗可以幫到好多人,整容隆胸有一定風險,而且效果又唔一定好,希望大家三思,人無完美,人都會老,但整左容隆左胸到年紀大時,可能因為皮膚鬆弛等種種原因,更加難睇,自然地老去,做多D運動,可能更好


珍珠宮

積分: 40421

2021勳章


發表於 20-6-3 16:39 |顯示全部帖子
其實樓主你身材都好標準,我以前曾經都考慮過隆胸,因為我只有A cup ,不過我知道係一個大手術,始終都係冇咁嘅勇氣,多謝你嘅分享。


珊瑚宮

積分: 112520

2021勳章 2018父親節勳章 2018母親節勳章 2018復活節勳章 畀面勳章 環保接龍勳章


發表於 20-6-3 17:06 |顯示全部帖子
多謝樓主分享


男爵府

積分: 8238

2021勳章


發表於 20-6-3 18:05 |顯示全部帖子
misslea 發表於 20-6-3 12:16
隆胸到拆除一年多時間紀錄。想起度同大家分享呢一年半隆胸嘅心路歷程,比考慮中,決定做,或者好奇呢個手術 ...

你呢個分享真係好好,我以前好瘦好平,都諗過整大,不過真係好驚,所以無做,而家肥咗個胸都一齊大咗英國有個電視節目,請啲想整形既人上去,5-6個,大家講下想整咩,例如有個想整鼻,就會播整鼻既手術比佢地睇,一路播一路講解,超嚇人就係睇下嗰幾個人睇完之後仲整唔整


公爵府

積分: 26111


發表於 20-6-3 18:23 |顯示全部帖子
多謝樓主分享


禁止訪問

積分: 3636


發表於 20-6-3 18:53 |顯示全部帖子
提示: 作者被禁止或刪除 內容自動屏蔽


子爵府

積分: 11974

2021勳章


發表於 20-6-3 19:05 |顯示全部帖子
misslea 發表於 20-6-3 12:16
隆胸到拆除一年多時間紀錄。想起度同大家分享呢一年半隆胸嘅心路歷程,比考慮中,決定做,或者好奇呢個手術 ...

好恐怖


複式洋房

積分: 216


發表於 20-6-3 21:57 |顯示全部帖子
Diosmio 發表於 20-6-3 18:53
我有銷骨去台灣搞 抽脂就後悔 不平 提眼機都後悔 不平行 所以要預錢修復
motivas 已經係最好的物料喔

係呀,凡是整形都有風險,要三思
我自問做足功課,搵大醫院,知名醫生,最好的物料
一樣出事


男爵府

積分: 6203

2021勳章


發表於 20-6-3 22:00 |顯示全部帖子
同情樓主。
都好貴喎,
點解唔係香港做?
醫院方面有冇得賠償呀?
做完一直都痛?
見d 廣告片講到motiva 好像真但竟然係咁。。。


男爵府

積分: 5261

2021勳章


發表於 20-6-3 22:02 |顯示全部帖子
回覆 misslea 的帖子

jm.你好勇敢。保重我估你本身都係靚女,所以不整臉

打botox..微调有冇後遗症


複式洋房

積分: 216


發表於 20-6-3 22:30 |顯示全部帖子
本帖最後由 misslea 於 20-6-3 22:30 編輯
solim 發表於 20-6-3 22:00
同情樓主。
都好貴喎,
點解唔係香港做?


當初我做左好耐功課比較,最後決定韓國,係因為韓國醫生工多藝熟,幾乎日日都幫人做呢類手術。

我自問對醫生同假體選擇都好有要求。花左時間逐間逐間去見,選個間亦係大醫院嘅院長

結果一樣出事

做完左手一直由腋下(傷口位)痛到手臂,係神經痛個種。

醫院方面梗係打死唔認,因為冇表面傷證實唔到係佢地問題。


至於假體,其實無論假體幾像真都好,同真野一定冇得比。而且你身體係有一種自然保護機制,會產生莢膜去包住個假體,所以唔按一定硬過石頭。



複式洋房

積分: 216


發表於 20-6-3 22:35 |顯示全部帖子
siucl 發表於 20-6-3 22:02
回覆 misslea 的帖子

jm.你好勇敢。保重我估你本身都係靚女,所以不整臉

N年前做過吊線雙眼皮,但2年就跌返哂
後尾見到朋友割雙眼皮失敗,眼上2條大肉蟲
就完全打消左整臉念頭。
我覺得整形真係一場賭博

首頁
12345...6

尾頁

跳至
你需要登錄後才可以回帖 登入 | 註冊