懷孕前後 今日: 27 | 主題: 329677

積分: 183

2^#

發表於 20-6-20 04:13 |只看該作者

SharleneMama 發表於 20-6-20 04:08
我預產期係黎緊嘅9月頭，但其實我發現有bb係5月尾嘅事，當時已經同男朋友分開左。不過實在發現得太遲，過左 ...

係呢段時間我同bb都建立左感情，始終每一日都感受住bb嘅一舉一動、佢嘅成長、同佢傾計講故事。所以我都好唔捨得佢，甚至開始買bb嘅衫、搵尿片等等
但我其實都冇能力養佢，我連自己都未養得起

但我實在唔想將bb送比人，始終係自己心肝寶貝。雖然口中就話明白將Bb比人領養係對大家最好，但心入面我都係唔想幫佢搵領養家庭

最近去健康院檢查，有精神科護士見我同我傾計。佢地話我可以申請綜援，但我就覺得有手有腳唔想要納稅人養我...但同時間我又好想留住Bb

你地覺得我應該將佢比人領養，定係考慮申請綜援？或者有冇更好方案建議下？謝謝
（當然我都會盡快搵工，之前比人無理解僱）

私人傳訊

ASP2019

男爵府

積分: 6858

3^#

發表於 20-6-20 05:19 |只看該作者

回覆樓主:

樓主早晨啊，如果我係你，我會申請綜援，因為如果把bb送走，就係一世。現今世代，未婚產子，非常普遍;結婚後離婚的單親家庭也愈來愈多。重要的是，你作為媽媽，自己點睇和如何處理。
講真，工作隨時都可以搵到(要求唔高和冇咩要求既話)。但bb送比人，親子關係就一生一世冇咗。你要認真思考下自己日後諗起，會唔會後悔和怨恨。
認識既人當中，有人選擇十月懷胎後送比收養者(據聞這產婦生產後，一眼都冇望到個bb);也有人選擇獨力撫養(娘家有幫手湊和繼續住娘家)。
樓主，你最清楚自己，趁仲有時間，傾聽下自己心聲和作出日後不會令自己後悔的決定吧！

私人傳訊

Nagomi

積分: 3065

4^#

發表於 20-6-20 05:28 |只看該作者

回覆樓主:

同意樓上jm講，如果暫無能力的話先申請綜援，等將來bb大左先再出來揾野做，而家單親其實好普遍，BB既根就係你同你的家人，千祈唔好放棄唔要BB啊，BB好慘同你會一世後悔的，要慎重

私人傳訊

兩只小天

積分: 2837

5^#

發表於 20-6-20 07:14 |只看該作者

唔捨得就唔好送走佢，出左世睇下邊位可以幫手湊，上fb 都會有好多free 野。最緊要係搵到人湊之後自己返工

私人傳訊

busylilian

別墅

積分: 725

6^#

發表於 20-6-20 07:48 |只看該作者

我講另一種觀點你再自己詳細考慮吓啦
以前我都曾經覺得有咗一定生落嚟好
就算係俾人領養都好吖
但人大咗呢個想法轉變咗或者出嚟社會耐咗人都現實啲

出到嚟社會做嘢真係講競爭力
有人真係出生草根一步步爬上嚟高位
但實際更多情況係父母祖輩由小朋友一出世就已經幫佢哋set好哂跑道
資源關係全部都有
一般人唔係無可能向上流但辛苦同埋真係少數
有人話可以平有平養父母嚟講的確係
但小朋友你唔會知佢點諗
佢想要嘅嘢或者係你想佢都擁有嘅嘢你俾唔俾到佢？真係好難講

私人傳訊

busylilian

別墅

積分: 725

7^#

發表於 20-6-20 07:49 |只看該作者

busylilian 發表於 20-6-20 07:48
我講另一種觀點你再自己詳細考慮吓啦
以前我都曾經覺得有咗一定生落嚟好
就算係俾人領養都好吖

另外都要為你自己未來設想一吓
因為你選擇要bb bb就跟你一世
你所有時間精力都俾哂佢
除咗返工外你無時間進修讀書升職搏殺好難了無哂私人時間
再者你仲好年輕可以搵個伴
無小朋友嘅識男仔總易過有小朋友㗎

講白啲就係選擇bb俾人領養
你人生有機會可以重來
如果領養家庭有份量又錫bb bb可以喺個資源充足嘅起跑線上開始
win-win situation
但代價係bb從此與你各不相干各行各路

真係要好好諗清楚

私人傳訊

SmileCheung

積分: 2005

8^#

發表於 20-6-20 08:12 |只看該作者

SharleneMama 發表於 20-6-20 04:13
係呢段時間我同bb都建立左感情，始終每一日都感受住bb嘅一舉一動、佢嘅成長、同佢傾計講故事。所以我都好 ...

或許母親的抉擇幫到你，聽多d專業人士講出路。
我自己全職凑B，雖然有屋企人，但我連自己吃飯嘅時間都沒，初生至6個月，新手媽媽沒人支援會精神崩潰，改變實在太大。以前通宵好happy，凑B熬夜就勁痛苦，唔知個B想點，大人細露一齊喊。

私人傳訊

積分: 183

9^#

發表於 20-6-20 08:15 |只看該作者

busylilian 發表於 20-6-20 07:49
另外都要為你自己未來設想一吓
因為你選擇要bb bb就跟你一世
你所有時間精力都俾哂佢

首先好多謝大家嘅建議！每一個建議都有令我有更深嘅反思

呢點其實我講漏左！多謝你嘅補充！
我同家人朋友都傾過關於呢一點
佢地都係想我重新開始，當冇生過、同Bb一刀兩斷
我都問過健康院姑娘，的確比人領養的話，係冇可能見到Bb一眼

所以就係呢個位置我掙扎左好耐...而且我屋企同埋Bb生父嘅屋企都冇人有時間湊，只有我一個人湊到

我唔係想將Bb比人領養，但我又唔想比佢綁住一世...就係矛盾嘅位置

私人傳訊

Nbs

水晶宮

積分: 55734

10^#

發表於 20-6-20 08:20 |只看該作者

回覆樓主:

係咪仲有一個選擇係寄養，你將bb寄養喺某個地方，到你有能力嘅時候先接返佢。不過好老實呢個方法都唔太理想，人哋幫你睇b 多數都係為錢，未必會對佢好好或者教佢。
如果係我揀，我會揀攞綜援，到小朋友大D（可能講緊小學）先做返嘢。不過你預你同小朋友的路都會好難行，但我相信有心的話一定行到嘅。

私人傳訊

CCHINGC

子爵府

積分: 10421

11^#

發表於 20-6-20 09:40 |只看該作者

問自己最想要咩，有咩唔可以放棄，於樓主來講，每個選擇需要付出代價都好高，唔夠決心去做，就會後悔，見到有年輕媽媽打埋小朋友去返工，話見到小朋友笑容就忘記左一齊辛苦，亦見過年輕媽媽崩潰痛苦，分別在於佢地有無足夠心理準備，有無為自己搵定支援，你可以選擇暫時領綜援，搵定育嬰園，方便將來一邊工作一邊照顧小朋友，路總係有嘅，只係你呢個年紀呢個moment可以承擔到幾多，個彈性有幾大？

不過呢個痛苦選擇亦可以令你明白到，每件事情開始時都需要慎重，尤其女性，每個決定都會令你改變一生，愛惜自己先能夠有更多選擇。

私人傳訊

Nagomi

積分: 3065

12^#

發表於 20-6-20 12:24 |只看該作者

SharleneMama 發表於 20-6-20 08:15
首先好多謝大家嘅建議！每一個建議都有令我有更深嘅反思

呢點其實我講漏左！多謝你嘅補充！

重新開始，當無生過，同bb一刀兩斷....你真係有信心可以做到咁？係發生左就發生左，懷胎10月不是短時間，根本無可能當無生過，我自己今年3月生完BB, 見到BB對住自己笑，果種滿足真係非筆墨可以形容.....可能BB去到領養家庭生活好好，有養父母愛錫，但呢個只係猜測，你永遠無辦法去証實真相，你話唔想比BB綁住一世，我想講就算你決定放棄BB, 一世都依然會對佢有所牽掛的，同埋我覺得你屋企人都係愛錫你，話唔定將來佢地係必要時都可以伸出援手，但當然唔可以强求啦

私人傳訊

stitchbaby19

積分: 2051

13^#

發表於 20-6-20 13:53 |只看該作者

不如我講下領養家庭既角度，因為我身邊有朋友因為不育而領養BB，係外國領養，同香港都有：

我只可以講，小朋友既命運完全改變晒，去到中產以上家庭，有良好教育機會，有工人照顧，而且領養父母真係好愛錫佢地，好似中左一個6合彩頭獎咁。
我身為一個旁觀者，我認為對小朋友係最好的結果。

我唔想標簽化未婚/單親家庭，不過，命運好殘酷的，要冷靜分析下，你既愛係佔有/成全。

私人傳訊

秋天與楓葉

珍珠宮

積分: 32599

14^#

發表於 20-6-20 15:08 |只看該作者

本帖最後由秋天與楓葉於 20-6-20 15:29 編輯

SharleneMama 發表於 20-6-20 08:15
首先好多謝大家嘅建議！每一個建議都有令我有更深嘅反思

呢點其實我講漏左！多謝你嘅補充！

你覺得被bb綁住一世，但你有無諗過係你將bb帶嚟呢個世界？佢根本無得選擇，無論你要佢或放棄佢，佢都只能接受
你要認清領養係點，事實係有bb等唔到領養家庭，佢只能住兒童之家。兒童之家嘅兒童大多數嚟自問題家庭，佢哋多數有行為同情緒問題，有兒童被院童打，新聞亦有兒童之家嘅性侵新聞
被領養後係咪一定幸福快樂？小朋友做養子成長享受較多物質、較多學術教育資源，就一定比單親家庭幸福快樂？幸福快樂根本唔係用物質同錢去衡量，只係唔少人往往用錢去衡量一個人
真人真事：
有養子因養父約親生仔女食飯，而無約養子，已經令當事人非常難過。因為養子明白親疏有別，自己同家人無血緣關係係一世嘅悲痛
放棄bb會容易啲識到另一半？但你經歷過，相信你明男女感情係會變，無人可以確保呢段感情係一生一世，只有親子關係一生一世唔會變
但你有無能力獨力照顧bb，係咪心甘情願去承受一切，係未知之數
見過唔少未婚媽媽，好心急搵另一半，好快又未婚懷孕再次陷入困境
無論如何記得好好保護自己同避孕

當然我唔會勸你做邊一個決定，只想指出無論邊條路都係難行，要有強大嘅心理質素去支撐住
將來嘅事永遠無法預知，揀一條自己唔會後悔嘅路，你嘅決定主宰bb嘅一生

私人傳訊

hky202102

積分: 295

15^#

發表於 20-6-20 16:03 |只看該作者

回覆秋天與楓葉的帖子

我建議你搵d 幫助年輕媽媽的社區服務，個度有社工可以幫你同俾專業意見，我感覺你想要bb,但在經濟上同照顧上有很多的疑惑～

私人傳訊

麻辣媽咪

積分: 4555

16^#

發表於 20-6-20 17:20 |只看該作者

SharleneMama 發表於 20-6-20 04:13
係呢段時間我同bb都建立左感情，始終每一日都感受住bb嘅一舉一動、佢嘅成長、同佢傾計講故事。所以我都好 ...

樓主，我好同情你，無論揀邊條路都好難行，每個選擇都要放棄好多，每一步都有可能日後後悔。

我曾經喺兒童院、母親的抉擇做過長期義工，好多小朋友等緊領養，但領養家庭係好少。個個bb都想有人抱抱佢，但我哋冇辦法遂一安撫，亦冇可能專注於一個bb身上。見到係好心痛，bb應該擁有媽媽專屬嘅愛護，但佢地只可以分享不同義工或者職員嘅少少時間，有時連換屎片都要等。

領養家庭嘅美好景印象，中產、有機會去外國等等，可能大家睇得多呢類報導，的確領養家庭要通過審批，所以財力人力都符合資格，但事實係有好多小朋友等到成年都等唔到領養，一直好似人球被咁拋嚟拋去。

放棄bb會好難受，我聽過義工同事分享，佢見過有媽媽後悔唔要bb，三不五時就去大樓門口喊住要見bb，但當然唔得，當佢簽咗文件話唔要bb，就唔可以再同bb有任何接觸，冇彎轉。

樓主，俾唔到好有用嘅意見你，只可以同你分享我所知嘅嘢。祝福你！

私人傳訊

積分: 183

17^#

發表於 20-6-20 17:26 |只看該作者

麻辣媽咪發表於 20-6-20 17:20
樓主，我好同情你，無論揀邊條路都好難行，每個選擇都要放棄好多，每一步都有可能日後後悔。

我曾經喺兒 ...

我都聽過唔少有關簽左名就冇得見番Bb、好多小朋友待領但又冇咁多領養家庭嘅事。
始終都係媽媽最親。我都同個Bb傾過計，當我講起將佢送去領養呢件事，bb會郁得好勁，比我嘅感覺係掙扎係唔情願。當我講番話其實都有得考慮自己養番，不過佢嘅生活會比較艱苦，佢就平靜番

當然我都好想可以見證佢成長，同佢埋身餵奶、教佢講野、同佢經歷人生所有大小事。呢啲經歷錯過左就唔會再有

私人傳訊

積分: 183

18^#

發表於 20-6-20 17:33 |只看該作者

hky202102 發表於 20-6-20 16:03
回覆秋天與楓葉的帖子

我建議你搵d 幫助年輕媽媽的社區服務，個度有社工可以幫你同俾專業意見，我感覺你 ...

冇錯啊，內心深處我係非常想要呢個Bb。但呢個世界都係講現實，冇錢的確係會好艱難。但係比唔到佢需要甚至想要嘅野佢，佢都一定唔好受。

番學年紀就開始有比較，見到同學啲野靚啲佢又羨慕、想要，人人都有但媽媽買唔起。我小學個時就有個同學係咁樣。佢屋企就係一個單親而且有經濟困難嘅家庭，佢媽媽非常愛錫佢。但我地全班個個人淨係識得笑佢窮，冇一個人睇到佢受盡媽媽嘅寵愛，佢媽媽亦都係盡力比左最好嘅野佢。佢想要一個多啦a夢筆袋，佢媽媽為佢親手縫上。雖然手工係粗左啲，但佢媽媽都盡曬力

我唔希望因為經濟而令佢覺得自己同其他人有分別、被比下去

私人傳訊

viann_655665

積分: 1511

19^#

發表於 20-6-20 19:24 |只看該作者

回覆 SharleneMama 的帖子

其實我係你，我唔會送走走bb,因為始終係自己十月懷胎生既，係自己兒女，申請綜援有咩問題？無問題傢，依家無能力養到BB唔緊要，申請綜援係一件正確嘅事情，好過你將BB送走，日後唔代表你冇能力養到BB，日後你更加可能遇到一個唔介意你過去，一樣愛錫你同BB嘅人，加油啦，做單親媽媽雖然唔係話一件容易嘅事，能力養到BB唔緊要，申請宗門係一件正確嘅事情，好過你將BB送走，日後唔代表你冇能力養到BB，日後你更加可能遇到一個唔介意你過去，一樣愛錫你同BB嘅人，加油啦，做單親媽媽雖然唔係話一件容易嘅事，但係女人可以好堅強好強大，呢個世界上冇男人就會死傢，自己做嘅事要對自己負責任，男方個邊唔好再理佢地，始終佢地唔想負責任同唔理你感受，要唔要都擺啦⋯最緊要個個bb決定權係你度⋯日後你可以出嚟做嘢，一路搵錢一路請人照顧BB完全係冇問題，因為我都係單親媽媽湊大兩個小朋友⋯我自己出嚟做嘢，請個工人姐姐去湊兩個小朋友，現在我遇上我現在的丈夫，他非常愛錫我兩個小朋友和我一起組織一個新家庭，我哋生活得非常快樂，你都加油啦，而家我同你一樣九月頭預産，生第三個BB啦！世上無難事只怕有心人。

私人傳訊