少年成長今日: 0|主題: 15847

收藏本版

發帖

返回列表

跳至頁

查看: 3881 | 回覆: 7

困難的決定 [複製鏈接]

csir3290

子爵府

積分: 10923

1^#

發表於 20-8-16 11:00 |只看該作者 |倒序瀏覽 |打印

早輪聽收音機聽到，有個家長打電話上電台竟然係問啲主持人應唔應該買一套價值六萬蚊嘅英文學習套裝畀個小朋友，從佢同主持嘅對話中當中都感受到佢嗰種矛盾，第一當然好貴驚效果唔好唔值啦，第二就係又驚唔買會蝕底咗，自己仔女學得唔夠人哋多同快。個家長話打算買咗之後每日自己返咗工就叫個工人或者老人家日日播入面啲片畀個細路仔自己睇等佢學英文。

第二日去行書局，咁啱又見到有兩公婆喺度幫個仔買補充練習，個媽媽就一路同老公講話唔使買咁多，話驚個仔冇時間做唔晒，個爸爸就一路講話叫呀仔每日做完功課都要自己做，每個禮拜做啲如果唔係學得唔夠快唔夠多，個阿媽話以為佢每樣買一本點知佢每樣買咗幾本咁多，個爸爸就一路話一定做得曬。

其實做家長好多時都會遇到呢啲情況，就係驚自己嘅仔女學得唔夠快唔夠多，同人哋去比較，我自己都間唔中會買啲補充練習畀阿仔阿女做，但係我個諗法就係做補充練習其實係要畀家長知道阿仔阿女喺學習上面有邊啲概念做得唔係咁好，而喺嗰方面幫佢哋手同佢哋練習。要佢做練習絕對唔可以就咁放低畀佢哋做叫佢哋自己對答案就算。我自己同老婆一定會每晚同佢哋對番曬啲練習，然之後從中知道佢哋有邊啲部分做得唔好要慢慢教返佢哋，做練習唔係只係用嚟操練同充塞佢哋嘅時間，而係要嚟鞏固佢哋嘅學習。

細個嘅細路仔其實好多時學習都需要陪伴，你買一套六萬幾蚊嘅英文教材番嚟，自然你就要覺得呢套教才能夠好幫到個細路仔，但學語言最緊要係應用，就算佢識聽但係平時唔用都係冇用。與其就咁日日放片畀佢睇好似洗腦式咁畀佢睇，我寧願每日搵啲時間同佢哋一齊睇下英文書同佢哋講下英文好過，可能個效果仲會大過買嗰套教材，況且圖書館有無限咁多書仲免費添。如果真係驚小朋友學得唔夠多同快，不如用多啲時間陪個細路仔去學習，雖然錢可以解決好多問題，但係學習唔係只係用錢就可以解決。如果畀我揀用六萬蚊。我就會揀同阿仔阿女去一個長啲嘅旅行，透過遊歷令佢哋開下眼界話唔定學嘅英文仲多啲。