少年成長

跳至

首頁
1

尾頁
   0


男爵府

積分: 8460

2021勳章


發表於 21-3-7 11:36 |顯示全部帖子
農曆年假期之後,細佬返咗三日學之後又要網課,返嗰三日主要就係對卷,咁嗰日返到屋企細佬又係好靜咁唔係好出聲,開頭我都冇乜留意,換衫嘅時候老婆同我講原來細佬中文得60幾分應該唔係好敢同我講,其實細佬啲中文一向麻麻地我哋都知,所以我哋都會幫佢做啲練習,但係得60幾分似乎對佢嚟講又真係低咗啲。咁我出到去廳好心平氣和當唔知咁問佢今日派卷派成點,咁佢就先講佢英文有80幾分跟住先講中文得60幾分。咁我問佢知唔知點解中文會咁低分,咁佢就一五一十咁講畀我哋聽,相比起以前佢通常都只會同我哋講話唔記得咗錯啲乜嘢同埋唔知道點解,事實今次佢真係能夠搵到低分嘅原因。咁我最後問佢究竟啲錯嘅嘢係佢唔識嘅抑或係唔小心,咁佢都話到畀我聽啲嘢佢識,不過係佢啲字寫得唔好同埋寫錯字多,做得比較唔好嘅就係標點符號嘅部分。都係嗰句因為可能佢見到我同老婆都冇鬧佢而係慢慢同佢分析究竟錯啲乜嘢同點樣改善咁,佢又可以好暢所欲言咁去分析自己錯啲乜嘢。


其實我成日都覺得過咗去嘅嘢已經成咗定焗好難再追得返,反而重點係能唔能夠幫到個細路仔搵到自己錯嘅地方然之後諗方法去改善。由其是讀書方面更加唔應該用蠢懶或者聰明就作為所有嘢嘅原因。蠢同埋聰明係天生嘅細路仔好難改善,反而如果能夠搵到原因而佢哋又知道自己能夠改到嘅話,咁先至可以令佢哋肯嘗試搵方法去改善做得唔好嘅地方。就算做得好亦都唔好只係讚聰明同叻就算,而係需要話畀佢哋聽究竟因為佢做咗啲乜嘢而成功。好似之後細佬同我哋講話佢喺短文寫作嗰部份反而做得好,亦都唔好就咁一個叻字呢概括,反而係話畀佢聽係因為佢每個禮拜都習慣開始寫啲短文,寫得多自然就會容易啲表達,文章自然寫得好。我雖然唔知佢短文寫作做得好究竟係咪真係因為佢平時寫得多呢一個原因,但係咁講就可以加強佢平時呀肯寫多啲,因為佢知道平時嘅練習係佢考試做得好嘅原因,咁佢平時就會更加願意去練習。如果相反我哋只係讚佢叻,咁係咪做得唔好嘅時候就係佢唔叻呢!咁叻同唔叻佢點樣可以改善呢?係咪唔叻就唔使做呢?但係如果我哋能夠幫佢搵出做得唔好嘅原因,咁樣佢就更願意搵方法去改善,因為嗰啲方法佢可以控製得到!就好似今次咁,其實我哋根本就冇鬧佢,佢而家呢個年紀其實我同老婆都係集中會同佢哋搵出原因。到最後我都係同細佬講,其實以佢嘅能力同埋平時做嘅練習,佢係可以再高分啲,我哋期望佢會繼續進步,只要繼續努力同小心啲,下次一定會比呢次進步。

首頁
1

尾頁

跳至
你需要登錄後才可以回帖 登入 | 註冊