想生BB 今日: 3|主題: 109049

收藏本版

發帖

返回列表

跳至頁

查看: 4331 | 回覆: 3

3次失敗後成功例子❤️

Myfirstbba

民房

積分: 18

發表於 22-5-17 19:33 |顯示全部帖子

本帖最後由 Myfirstbba 於 22-5-17 21:01 編輯

仔仔岩岩7個月，想同大家分享下我嘅懷孕之路…
結婚後一直好想要小朋友，努力左2年，到2017年，驗到中左，點知去到8周左右，醫生話照唔到心跳，等多兩個星期左右，一樣乜都睇唔到，入院做吸宮手術。記得當時醫生話有1/5機會都會唔成功，加上已過35，醫生話好平常…傷心過後，打算繼續努力

10個月後，到2018年中左右，又驗到中左。由於第一次衰左嘅關係，當時就更加小心，除左老公之外任何人都無講（因為怕小氣），頂到10周左右去搵醫生照，點知結果一樣。唉，我好記得係手術枱上，醫生同我講「塞翁失馬，焉知非福」。果刻真係喊左出嚟…由於兩次嘅關係，醫生提議驗胎，睇下會唔會係唔染色體問題（當然我哋婚前無做過咩檢查啦，大家唔好學我）。

手術後應該等左1個月左右啦，同時又捉埋我同老公驗血，最後發現：
胎：有兩仔染色體多左，同時又有一條染色體有微缺失
我：有一條染色體有微缺失
當時聽到個報告真係晴天霹靂，花左唔知幾多錢去睇遺傳學專家，基因專家…最後嘅結果係：不可能自然懷孕！

好啦，聽晒咁多醫生嘅講解後，去左瑪麗做IVF，心諗，比埋最後一次機會比自己，希望成功，IVF之路就唔多講喇，結果係有一粒胚胎去到Day5，醫生驗完之後話同樣有染色體微缺失問題，所以無放胎，First Cycle宣告失敗…由於經濟/自己健康嘅考慮，我哋決定唔會再進下第2個cycle…亦都徹底放棄求子之路

點知，去年頭，自己幢樓被圍封強檢，日日WFH，意外地，我又中左喇。坦白講，我哋真係無晒希望，就連我驗到中嘅當日同老公講，佢仲打算去book定醫院（做手術），就知我哋當時係幾咁絕望…我哋一直唔敢去睇醫生，怕面對再一次失敗，今次仲誇張，頂到12周先去搵醫生，記得醫生仲問我做乜咁遲先嚟，我仲答佢「我怕」，就連瞓係床上我都無勇氣去望住超聲波個mon，就係唔想去面對一次又一次的失敗！點知，醫生話有心跳喎，仲特登開比我聽，果刻真係好難以致信，感覺真係好奇妙架。拿究竟今次點解可以「自然懷孕」，我相信連醫生都無法解釋，所以除左必要嘅檢查外，我哋一概無做。心諗，係我哋嘅，始終都係我哋嘅，一直抱住平常心面對。往後懷孕嘅日子，一直都好順利，直到BB去年10月出世了。

本身唔係好信緣份嘅我，都覺得呢個BB係上天比我哋嘅一份禮物。我係度都想同咁多位姊妹分享下，只要唔放棄，一定可以成功架

共勉之。祝好孕！

私人傳訊