我岩岩參加左,只係去左一次,試左一堂,就被夾左參加,見周圍對呢間嘢嘅評價都唔多,咁我就可以分享一下,等各位多一個真實參考。
背景:我個人之前係參加過舒適堡同Pure,所以平同貴gym room我都有分別試過。
月費:
間嘢嘅聲稱月費最低係$1188x24個月,每個月包四堂團課,gym room設施任用,平均每堂$297,但係而家佢話做咩有friend喺度俾個優惠,$688x24個月,咁就平均每堂$172。佢就標榜每堂團課,最多只有八個人上堂,話叫做小班教學。(你相信一間gym room係冇逐個月收費嗎?)
地點:
我參加咗嗰間,係喺黃埔,講真其實我就覺得個地點唔係好方便,雖然而家地鐵開通左,佢嗰個地點係喺落咗地鐵之後大約要行5至10分鐘,嗰邊其實周圍都好靜,旁邊有一間酒店,講真Pure都係旺角朗豪坊,去完都覺得仲有好多地方可以去。(一陣就會明點解我不停都會用呢間嘢同Pure做比較,因為我係比緊Pure嘅價錢,但係我用唔到Pure嘅服務同質素。)
設施:
講真間嘢係唔大,廁所得三格,換衫得兩格,沖涼好似都係兩格,因為當日我係無沖涼,唔係好記得。而場內嘅設施,其實真係唔多,跑步機幾部,健身架一部,另外有一邊長係做TRX同Boxing,另外就有一間房係做瑜伽。所以其實我覺得,就算參加佢$688一個月嘅計劃,個收費咪同Pure一樣,但Pure仲要有咁多間分店,間間分店都好就腳,沖涼設備充足,又有乾濕桑拿,重點係Pure仲有衫褲襪子同埋毛巾提供,講真真係方便好多,同埋設施都齊同埋大好多。
團課:
間嘢標榜小班教學,每班團課最多八個人,但係佢間嘢嘅月費係用買團課形式收費,例如依家$688一個月,就只係得四堂團課,講真,Pure收呢個價錢,仲可以無限去上任何團課,所以大家如果真係細心比較下,就會知道其實你可以用呢個價錢去參加Pure,當然除非你係住喺黃埔。
服務:
當日只係試完一堂瑜伽,又有個私人教練同我做分析,之後就局比個sales勁hard sell,當中佢完全係冇sell過自己間嘢有幾專業同有幾好,佢只係sell平,$172一堂課好平,可想而知佢自己都唔知點sell自己間公司。講真,間嘢當日就咁睇,只係得一個sales,個sales仲要係唔係斯文嗰隻,當日我係參加咗$688x24個月,一共有96堂課,講真其實我係唔想參加嘅,因為當日去到其實都覺得間嘢嘅地點同埋服務麻麻,團課嘅到時我唔覺得個導師特別專業,不過係少人一齊上係真,當時我已強烈表示我唔會即時參加,但最後都參加左。事後我再打去比個sales問可唔可以降低個plan?因為我擔心根本去唔到24個月(其實又因為個sales嘅銷售手法,同埋間嘢嘅設施環境比我嘅感覺都答唔到我覺得Pure嘅質素,所以其實我都唔想去24個月),或者公司有冇7日冷靜期?個sales就好鬼串咩都話無,當然財到光棍手又點會退返錢俾我,個sales表示該公司係冇七日冷靜期,亦冇較低嘅月費,亦沒有先參加一個月的月費,講真連最cheap嘅舒適堡都有七日冷靜期,而且都可以俾貴啲錢,但係先參加一個月,但係呢間嘢竟然話冇,係冇第二個選擇,咁大家又會唔會覺得呢間嘢有啲古怪?重點係,個sales態度其實真係好差,俾錢佢賺,我自己都覺得條氣唔順,要服務冇服務,仲話歡迎我去各大媒體告佢。
總結:
其實如果大家再有類似俾人hard sell,其實應該起身走人,唔好好似我咁。
**但如果你只係想參加平嘅團課或者班,係抵。但係你如果講要拉平均值享用所有嘅設施,咁我覺得佢嘅優勢只係得小班教學,每一間gym room有佢自己嘅特色,如果有人想要專業嘅器材操大隻,或者想做完gym有埋桑拿嘅設施,咁呢間就唔岩佢地。**
—啱啱個post被禁止左,所以而家重新發一次,啱啱有人留言表示點解又要參加又要上嚟鬧,其實我相信去完一間餐廳食飯比完錢你都可以點評一下嗰間餐廳好食定唔好食,我都係想比完錢想分享一下,到底呢間嘢嘅性價比高唔高,同埋大家唔好對間嘢有錯誤嘅期望,我相信所有嘅Gym Room都有鍾意佢嘅人同唔鍾意佢嘅人,大家都係想有唔同嘅聲音一齊分享同討論下,又唔使上嚟鬧我嘅⋯