本帖最後由 rose-mag 於 25-4-18 14:42 編輯
我之前有睇過呢個帖但冇回應到，而家見到又浮番上嚟，開心見到樓主情況有緩和，起碼樓主自己情緒有好咗，同仔相處有改善到。
對住SEN真係好費心力，我都有個SEN，佢係好似以前果類叫高功能自閉，行為徵狀好似阿氏，但又唔係典型，佢屬於自閉症譜系障礙，平時唔識佢嘅人係睇唔出佢係SEN，識就知佢對某D嘢異常執著，每日有個生活流程，必須要每人做齊所有嘢，否則佢會好不安。。。我個仔確診時5歲，而家19歲，高中果四年搞到我地日日頭大，雖然盡量唔大聲鬧佢，只係有時好難，佢真係可以搞到我同老公血壓上升，同時亦令我地好擔心佢究竟可唔可以獨立，我驚我地走咗之後會點。
而家我地有時都會雞飛狗跳，不過大部份時間都係OK嘅，只要唔觸及一D佢執著嘅話題，佢係好抵錫嘅。。。而家我頭痕係仔同老公有時火星撞地球，我老公係一個幾強勢嘅人，亦都好硬淨果種，我仔係完全唔同，兩父子一開拖就想死，我唯有風頭火勢時分開佢地兩個，然後再兩邊分開傾，有時對住兩個男人都幾攰，講道理講唔通就要曉之以情，我仔記性好好，好耐以前發生令佢唔開心嘅事佢由細記到大，佢懷抱住好多負面情緒，爆起上嚟都幾煩。。。
老公對個仔好嚴，要求好高，我只好成日提佢要對個仔有無限耐心，要嘗試了解佢，要令佢對你有信任，我知唔可以睇住個仔一世，佢以後對人對事，我冇可能成日幫佢兜底，但佢成長過程中好需要我嘅支持同包容，除咗愛佢之外，我都要愛自己，只有我身心健康情緒穩定至可以成為個仔更好嘅後盾。
樓主，我唔知俾咩意見你好，不竟大家處境唔一樣，希望我以上所講俾到你少少參考價值。好日子要過，唔好日子都係要過，換個心情，換個觀點，可能會發現其實唔係咁差，雖然我個隊友而家年紀大咗都好煩，但佢的確喺咁多年來都非常可靠，呢方面我感恩自己比好多SEN家長幸運。
花旗太太生活在花旗國，留意時差，你問我未必即時答到。
。 
發表於 
返回列表
