姐姐是去年十一月尾簽的，幫我照顧BB同做家務的表現都令我好滿意。
佢幫我手之前已經在香港做咗六年幾，所以廣東話講得好好，同我地雙方父母都溝通到，而佢地都好鐘意姐姐。
而姐姐都有同我地講下佢的背景，知道佢有個女在印尼讀緊書，丈夫在韓國工作。
前幾日，姐姐同我講，佢話想去韓國探佢老公，因為佢自2003年至今都無見過佢老公。以前佢有同我講過，佢03年至09年出外打工，無返過印尼，而09年返去時候佢老公又已經去咗韓國。
我好同情佢的遭遇的，所以佢話想九月十月的時候放兩三日假去韓國探佢老公時，我話，咁不如去耐少少啦，國慶節連中秋個假期你本身有三日假，我再放多你四日，咁你就可以去一個禮拜啦。佢好開心。
之後，佢叫我幫佢搞簽證，佢話佢有朋友去韓國都係僱主幫手搞。
咁我就打去專X旅運，諗住可以順便幫佢問下有無平機票。專X旅運話佢地唔幫人搞簽證，叫我去問韓國領事館。
寫咗封信去韓國領事館，過兩日回覆我，外傭只在陪同僱主前往時才能獲發簽證， If she needs to travel for her own purpose, she has to go back Indonesia and apply there.
咁我返去就同佢講番韓國領事館的回覆，並話，你朋友嗰邊當時係點樣申請，不如你問清楚佢。佢話佢會再問下佢朋友，並講咗D佢知道的情況出嚟。佢話佢朋友嗰時係自己去到機場，跟住韓國嗰邊唔畀佢入，因為佢僱主無一齊，再打畀佢僱主，跟住先畀佢入。我都聽到有D蒙查查，再聽落去先開始明白。原來佢朋友先去韓國，佢僱主五日後再去。
我就分析畀姐姐聽，有可能係你朋友個簽證係話同僱主一齊去，所以搞到。但宜家係你自己去，我只可以幫你出信話畀你放假，但唔可以話係陪同你去。或者詳情你再問下你個朋友。佢話好，而且想我直接同對方的僱主交談。我話無問題。
我先生都提議佢自己打去印尼領事館，睇下佢地可唔可以幫到手。
件事過咗幾日，昨晚我再問佢。佢話佢搵唔到個朋友，電話無人聽，佢發咗信息畀佢朋友。另外佢搵咗印尼領事館，印尼領事館話幫佢唔到。
跟住佢問我可唔可以同韓國領事館講係同我一齊去，或者我地搵人陪佢去一轉。
我當時個心都好愕然。
後來同我先生商量過，再回覆姐姐，我地可以幫你再打去印尼領事館問多次，但偽稱陪你去韓國以換取簽證呢樣我地做唔到。另外陪你去韓國，因為BB仲細，呢兩三年內都唔會去住。
真係好煩，一方面同情姐姐一場歡喜一場空，另一方面又擔心佢唔開心，情緒不穩，始終宜家屋企得佢同BB。
發表於 
返回列表
