一歲bb東京遊-分享篇
返黎lu,同大家分享下我呢幾日既旅程.
2006年5月14日(SUNDAY) 天陰
原定行程: 香港--日本成田--新宿--池袋
結果行程: 同上
今朝一早5點幾就要起身喇, 亞仔係睡夢中食左半支奶, 佢D鼻水仲未收, 好彩已經退晒燒, 打點好一切, 出發lu, 7點,上機場巴, 7點半就到喇, 真係幾快, 亞仔真醒, 一落車就醒, 影左陣相, 就check-in lu, 安排左坐窗口位, 一睇, 一張係A位, 一張係C位, 咁B位呢? 唔通見我有小朋友,比多個位我? 過完海關,都係時候到D大人食肚lu,求其去大家樂買左兩個餐黎食,順便比亞仔食D通粉.食飽飽就四圍行下D shop,睇下有無地方有兒童區,搵到兩個兒童區,有小小設置比小朋友玩下, 玩左一陣, 又係時侯入閘lu, 9點正,開始登機, bb車交比空姐寄倉就上機lu, 搵到位坐好, 影左幾張相, 無耐就開機喇, 真好,架機唔係好多人,比較安靜. 上機無耐,就有空姐拎住兩個袋黎,一個係我之前order定比亞b既尿片同一包濕紙巾,另一個袋就裝住之前order比亞b既嬰兒餐,內有一盒牙仔餅同一隻香蕉,可能真係太早喇, 起機無耐,亞仔已係自己個位都訓著左. 等到架機穩定下來時,空姐又拎住一盒食物黎比我睇,今次係亞仔既熱盤(肉醬意粉),仲叫我等亞仔醒左就通知佢地,佢地會幫我熱返個餐.同時又幫我set好個BB籃,等亞仔可以訓得舒服D. 襯亞仔訓著,我地可以安靜地開餐.謝天謝地,亞仔訓足大半程,我幾驚佢會搞破壞,仲有個零頭落機,亞仔訓醒喇, 空姐代為熱返個意粉, 放係卡通餐紙既餐盤上,仲拎左個JAL口水肩比佢添,可惜d餐具同大人個d一樣,都唔靚既. 食完bb餐,開埋隻蕉比佢食,又係時候降落lu, 今次無上機咁順灘,有d扭計,可能嫌坐得太耐,要落地. 落機時,坐係後一排有兩個類似旅行團領隊既男女,男既係隻話亞仔好乖,好少可以咁安靜. 聽到佢咁講,我都好安慰,起碼亞仔唔會影響到其他人. 2點半,到日本喇,超多人過關呀,有彩有條特快隊,比老人,孕婦同有小朋友既旅客, 但呢條隊超慢, 人地過5-6個人,呢度先過一家,搞到要成半個鐘先出到去. 亞仔竟然係呢個時候痾屎,好彩機場廁所都方便換片,出左關,唔想再諗坐咩車去酒店喇,就Limousine Bus啦,京王酒店 3:15有車,車程都要成1小時20分鐘.到左酒店Check-in,問佢19號可唔可以遲dcheck-out,佢竟然話OK,比張VIP FORM我,話比我JOIN MEMBER, 即刻比張TEMP咭我,同時仲幫我將CHECKOUT時間延到3:30pm. Shedule聽日去廸士尼,順便book埋架shuttle bus,7:30am太早喇,要左9:00am, 上到房,間房唔算好大,但都有空間比亞仔走動,仲有bb床,set好晒個架步,亞仔食埋餐奶,我地就出發去池袋lu. 去到池袋,都6點有多lu,行左轉Toyrus,買左2盒旅行袋奶粉,無買尿片(都無細pack裝),係basement個層行左個圈,又係晚餐既時間lu,係sunshine city入面間鳥冬店度食鳥冬,一個冷一個熱,加隻溫泉蛋同小小炸野食, 分左小半既熱烏冬同隻蛋比亞仔,都幾好味,件炸南瓜好甜.食飽飽,出去行下街,影下相,買左盒墨魚丸子食,一盒得一粒,但有成個拳頭咁大,都幾多材料架,夠膽死成隻um春蛋放入去,都幾新奇.返黎見到Gap仲未關門,行左一陣,不過d衫件件都二百幾,唔係好抵,空手而回,今日行程到此為止,同亞仔沖埋涼,食埋個旅行指定既宵夜(杯麵)又係時間休息lu.
http://hk.myblog.yahoo.com/tantaub/
http://www.fotop.net/tantaub
http://www.pugmart.com/portal/?uid/16