夫婦情感 今日: 6|主題: 42593

入到去,醫生先係叫我o地要有心理準備..聽到醫生咁講,我已經好擔心,心好驚,眼淚又係咁掉落黎.當醫生掛好張X光片俾我o地睇嘅時候…我唔敢睇,原來,照到妹妹豬個心臟附近有一大片黑色嘅嘢,醫生懷疑係肺積水,但唔肯定.因為佢呢間只不過係細診所,所以冇d大型嘅醫療設施,所以如果我o地仲想博一博睇下可唔可救返妹妹豬,佢建議我o地去旺角太平洋道果間動物醫院試下,但係呢間醫院成日都好full,要預約先可以睇到,醫生話可以去試下.如果唔去,唔博,妹妹豬就會呢一兩日離開我o地.”一定要救妹妹~~一定要救妹妹!!”我喊到聲嘶力竭,來來去去靜係講呢兩句.老公同我o念都唔o念,抱起妹妹豬坐上的士,叫個司機揸快d,妹妹就黎唔得啦,佢只眼仔係咁瞇下,我知佢好累,好痛…好想瞓!一路上我就不停咁攬住妹妹,同佢講要加油,好快到醫院架啦,我好衰…又係咁喊,老公同我講唔好嚇親妹妹,叫我要忍住唔好喊…但係,但係我真係忍唔到啊,對唔住!的士司機知道我o地係急住去救命,佢都開得好快…唔使一陣,我o地到咗醫院.一低步,我冇等老公,抱住妹妹豬就沖入去醫院大堂,好多人,好多狗仔等緊睇醫生.我見到登記處,即刻沖過去喊住同d姑娘講:”姑娘,救下妹妹啊,佢就黎唔得啦,我求下你啊!”個姑娘俾我突然咁沖入黎嚇親,仲要問我:”狗仔咩事啊?你有冇預約?””預約?”我o念咗一o念,搖住頭同佢講:”冇啊,冇啊~~不過我妹妹就黎唔得啦,可唔可以搵個醫生睇一睇佢先啊?我求下你?”呢個時候老公都入到黎,聽到我o地對話,老公就話:”唔該你啊,佢好辛苦!”個姑娘check一check個電腦話:”今日真係好full,同埋而家好多醫生都好咗食飯!你o地或者去第二間試下~””下!!!咁即係要白白睇住妹妹豬死?唔得,唔可以!老公同姑娘講:”你見到佢而家咁辛苦,冇醫生可唔可以俾d呼吸機呼吸住先啊?”講完呢句說話…有一個著住藍色制服嘅外國醫生經過,可能佢見到我o地喊晒咁,就即刻跑過黎問我o地發生咩事,我o地同佢講咗妹妹豬就黎唔得,佢即刻就叫姑娘抱起妹妹豬,拎埋x光片抱咗入房,見妹妹被抱走果一刻,我好驚啊,好驚係最後一面,姑娘叫我o地喺出面等.呢位醫生真係好好,原本佢係要出去食飯架,佢知道妹妹呢件事,就即刻接手..我同老公喺出而等,我同老公緊緊拖住雙手,老公不斷咁安慰我,話妹妹豬一定無事嘅!

等咗一陣,姑娘叫我o地:”妹妹嘅主人請到counter.”姑娘俾咗份入院紙我o地簽,要我o地先交咗$8000蚊按金先,而家妹妹呼緊氧氣,醫生食會幫佢再照x光同抽肺積水,叫我o地返屋企先,因為都要好幾個鍾先知結果.$8000蚊???我冇聽錯啊嘛,不過..而家就算係幾多你都要俾架啦,我o地冇錢,唯有碌卡..大家都o念住黎緊老公反返銀行,錢銀可以好d…但係事實又係唔係真係好咁呢???

交低咗按金之後,我同老公冇返屋企,只係喺街上面盲無目的咁行,好心急可以快d收到電話,希望醫院同我o地講妹妹胸口d肺積水可以抽到出黎,可以等妹妹自行呼吸到,可以好快冇事…

終於..3個幾鐘頭醫院打黎啦,叫我o地返去醫院睇報告,我同老公急急腳咁號返去醫院,入到醫生房,唔見妹妹豬,靜係見到o岩岩果個肯救妹妹嘅外國女醫生,原來佢叫Lisa,係腫瘤專科醫生.Lisa見到我o地好緊張個樣,就先同我o地講妹妹而家好好,有氧氣幫手呼吸住,佢而家舒服好多,叫我o地放心.之後,Lisa拎咗一份報告同x光片俾我O地睇,佢叫我O地要有心理準備…喺妹妹豬心胸位抽唔到肺積水,但係x光照到果個係咩黎架呢?Lisa話有幾會係淋巴癌,有機會係肺癌.我同老公聽到兩個都有個癌字,咁即係仲衰過d咩肺積水啦…喊到眼淚都喊乾晒嘅我,呢個時候,眼淚又不停咁流,我唔知點算,攬住老公同老公講:”我唔想再聽,我唔想聽!”我以為,只要聽唔到..就可以當冇事發生過..

Lisa等我喊完一陣,仲俾成盒紙巾我老公,等佢可以幫我抺眼淚,過咗一陣,Lisa再繼續同我o地解釋.佢話而家要做嘅就係要抽一d個瘤嘅組織去化驗,證實佢係咩癌,佢話如果係淋巴癌就好d,因為有得醫,可以做化療殺死個瘤,可以暫時保住佢條命;但如果係肺癌,咁就冇辨法醫治到,叫我o地有心理準備!Lisa仲問我o地..係唔係繼續?我同老公o念都唔o念,答佢..係!

黎緊呢幾日,妹妹豬都要住院,就算我o地有幾唔捨得都好..始終醫院先可以保住佢條命!醫院話探病時間有早,中,晚三次,每次一個鐘,我o地見完Lisa後都已經夜7點幾啦,所以我同老公就決定等多陣,等到8點鐘可以入去探妹妹,佢半日冇見到我同爸爸啦,會以為我o地唔要佢架~

差唔多8點鐘嘅時候,愈來愈多狗仔家長等上去病房探自己嘅仔女,我同我公都唔例外,企喺樓梯口等姑娘一叫可以上去我o地就沖上去!終於可以上去啦..我同老公上到病房,見到好多狗仔,不過~~~不過冇一只係我屋企只妹妹豬,我o地好心急…點可能唔見架~~即刻跑去問當值嘅姑娘,佢幫我o地check咗一下,同我o地講:”哦,妹妹喺ICU度!你o地過去ICU果間房啊~””ICU???”係唔係想嚇死我呢個阿媽咩…唔理啦,我同老公即刻搵咗ICU房,去到門口,有個姑娘喺度,佢叫我O地要帶口罩同手套先可以抱妹妹豬.著好晒所有裝備,我同老公就入咗去..入面得4個籠,兩個空嘅,而妹妹就瞓喺左手面最上個籠度,喺佢下面,有只大型狗…我O地一入去,妹妹一見到我O地,即刻企起身,兩只手仔喺咗”WHERE”道玻璃門,仲要係咁”嗯~~嗯~~嗯~~咁叫!嘩,你可能唔會明白我有幾心痛,妹妹豬只手休插住好多針筒,有一只手仔用布包住,但係都見到則跟D毛染咗好多已經乾咗嘅血跡…

未講嘢我又係喊咗!不過見到妹妹豬好明顯有氧氣吸住,呼吸到,成個都精神咗.我O地問咗姑娘可唔可以抱佢出黎,姑娘話可以,不過最多10分鐘就要俾佢入去休息10分鐘,仲要拎個氧氣筒出黎俾佢吸住.一抱佢出黎,佢就係咁錫我同老公,兩只手仔抱住我手臂抱到實一實唔放,佢一定係度問點解爸爸媽媽唔要佢啦個傻妹!我o地爭取時間,不停咁同妹妹豬講嘢,叫佢要乖,好快就可以返屋企架啦.老公話唔好抱妹妹咁耐,費事佢又辛苦,所以我o地半個幾鐘就走啦~臨走時,抱返妹妹入氧氣籠入面,妹妹唔肯入去,仲不斷要跑返黎,好唔容易咁抱咗佢入去,老公話出去啦,唔好俾佢見到我o地,出到去ICU房出面,聽見妹妹豬不停咁吠,不停咁吠,佢吠得好悽涼,佢搵緊我同老公,傻妹~~爸爸媽媽咪又係一樣咁唔捨得,我o地一直企喺門外面,仲係聽到佢吠!老公拖住我只手,話:”走啦,我o地唔走,佢都會繼續吠架,佢聞到我o地陣味,佢知道我o地仲喺度!” 唉…真係好難受~~聽老公咁講,咁我o地就離開咗醫院,一路行,我問咗老公一個問題:”妹妹會無事架何?”老公拖緊我只手話:”一定無事架,放心!”

返到屋企…平時妹妹一定衡過黎鍚鍚,而家屋企變得好靜,好靜丫~~~我好唔習慣冇咗妹妹喺我o地身體,冇得一起睇電視,冇得鍚鍚,冇得一齊瞓sofa,冇得3個人喺張床度..點解,點解要我o地咁痛苦!一單又一單~~幾時先會好??

你信唔信個天真係會玩人架???我信…我真係好信!

妹妹豬有事….之後就輪到我~~點解要咁樣對我o地一家???

.....(待續)