好好笑嘅股市故事 - 股壇老鼠
轉貼自:頭條, 陸sir
網友Wooly形容對沖基金為大鱷，操控市場。傳統基金如大象，大而不吃肉，有時更阻往大鱷進食。政府和中央銀行，就如獅子，它是森林之王，定出森林法則，如果大鱷過界，獅子會打大鱷。過去動物之間知道對方的底線，並不越界，森林保持和平，如今變異日多，大象又開始吃肉，甚至獅子也會生出大象，甚至鱷魚，森林並不平靜。
讓我來狗尾續貂，散戶理論上分兩種，一種是綿羊，又乖又聽話，咩咩聲就一齊行，只吃草，不吃肉。另一種是老鼠，是雜食動物，草又食肉又食，好多時見到大鱷食肉咁高興，咁好味，就在大鱷旁邊搵食，一個不幸就成為大鱷的點心。
千祈唔好似為綿羊好易死，只要它懂得避開大鱷出沒的沼澤，到高原上吃草，其實相當安全，這就是「投資的我」了。不過老鼠認為綿羊好笨，食的嘢又無味道又唔飽，所以老鼠要走沼澤搵食，和大鱷同枱食飯，這就是「投機的我」。老鼠一食過肉，就好難叫佢番去食草，當然這也有生物上的原因，食肉好味好多，而且肉類含豐富蛋白質，相當飽肚，吃幾個鐘頭草，不如吃幾分鐘的肉，老鼠揀飲擇食，有時甚至明知冒險，也去吃肉，向高難度挑戰。大部份炒炒吓的散戶就是老鼠，買過隻股一日升一成，你叫他們改行投資，一年賺８％，佢會問你貴姓，點解要聽你講。最慘的是一種動物是羊和鼠的混種動物，以為自己去食草，點知行咗去沼澤旁搵食，草和肉也分不清，他們就是「新仔」，一入場就買莊家股，還以為自己在投資，天天在講基本因素。
這個森林由於鱷魚大量繁殖，已經變哂質，鱷魚太多，食物太少，有時鱷魚難免自相殘殺，不過他們都係食其他動物為主，好多鱷魚其實只係蠢蠢地，有勇無謀，但真正又大力又有腦的鱷魚，慢慢就發展成超級巨鱷，動物世界都係咁，食腦o架，單係食力係唔夠o既。
網友Kanas問起，「大鱷好醒，但回報率又唔多醒，呢兩個現象好似好矛盾咁o既?」的而且確，對沖基金的平均回報的確麻麻地，但你記往，這是「平均」回報，做得好那些，回報數字仍然好驚人。現在的世界錢太多，投資機會唔夠，對沖基金因應市場需求，急促增長，一個banker或者基金經理甚至分析員，係間大行打十年八年工，又出來搞間對沖基金，得唔得幾年後先至知，只要有大客願意俾水投資，就有得玩了。部份對沖基金有解散條款，例如蝕夠資產淨值三成就自動解散，但對沖基金掌舵人唔怕博，因為這是OPM（他人的錢），就係我經常講賭白頭片，賭唔啱至多玩完，一賭啱，對沖基金掌舵人分紅兩成，甚至三成，做兩年就上岸，舉一個例，有人俾１０億美金你去賭，輸咗就散水，你唔駛賠，贏咗你抽兩成，你一定博到盡，若果基金一年執三成，賺３億美金，你分兩成，即係６０００萬美元，唔好賺幾年，賭中第一年都夠皮，此所謂一Q到位。所以對沖基金完全不介意去豪賭，輸到爆廠的基金也不少。
另外，這幾年大市走勢是傳統大牛市，不少對沖基金是逆市而炒，這種市況對他不利，所以不少對沖基金會輸錢。
股場的大鱷，除了對沖基金之外，還包括大行自己坐盤炒作，大行掌握環球資訊，知道政府行動，因為政府都靠他們落盤，也知道大集資、大併購的消息。杜琼斯的內幕交易俾人查，但負責做大deal的大行，他們公司在那段時間內買道指做好倉唔會有人查，如果幾個大deal排往隊上，大市自然會向好，你話大行炒作係唔係好著數呢。
大家作為股壇老鼠，千萬唔好以為自己的賣點是聰明，其實你只有一招，就係走得快，你要知道自己係老鼠，明知係偷食，一唔對路當然要閃啦，無事第二日行番入去都無壞喎。
孩子需要鼓勵, 適當的稱讚和鼓勵, 會使他更努力去完成任務, 對自己更有自信. 在小朋友的學習過程中，父母的啟發與鼓勵是十分重要。
發表於 
返回列表
