我的生產記 - ariel823的日誌 - Baby Kingdom - 親子王國 香港 討論區

我的生產記

已有 224 次閱讀 14-1-6 14:46

        已經真係做佐人阿媽喇!!好快就知味道!哈……
        趁衣家係醫院算係清閒啲寫低個過程先
        阿仔係2014年1月5日零晨1:45分出世,重3.1KG,順產
        我係4號晚8:50分度feel到好似有啲唔妥,有小小痛,當時我仲炒緊菜,跟住喇喇聲炒完就去廁所下,原來見紅,咁我就同老公講:老公,快啲食飯,我見紅了,跟住两個人都定佐定,有小小慌張喇,但都係慢慢咁食飽飯先,當時已經開始15-20分鐘痛一次,我知道要食飽先有力生,所以我就食佐一碗飯再飲少少湯,抖佐幾個字之後就去沖涼喇!
        跟住同老公商量幾點入院好呢,因為第一胎,我覺得自己無咁快生到,所以係度考慮今晚入定聽朝先入,但聽朝入就驚會唔會半夜生啊,半夜截車又煩,跟住都係當晚入喇,不過就計好個時間要約莫11點零會好啲,因為醫院就會計第二日嘅房費,所以10點零鍾老公就Call的士喇,又遇到個好好人嘅的士司機,叫我唔好扣安全帶,驚整到個肚,所以好順利咁到佐醫院喇。當時大概係11:45左右
到佐醫院就梗係登記佐先喇,填佐好多張from,跟住姑娘就帶佐我入房做檢查,果時就已經開佐三四指了,姑娘話可以入產房。
        入到產房就搏好儀器聽BB心跳,當時係140-155咁上下喇,我都唔知算唔算快,係產房入邊就痛得密佐,應該5-10分一次,有笑氣可以聞,但一開始我忍得到都無聞,但當老公入到黎我就開始痛得勁就一次會索2-3下,姑娘又再帮我檢查,已經開佐八指,姑娘話我真係犀利!我好開心可以咁快開到八度,即係爭少少就可以生得。過佐一陣就真係黎了喇,好痛!!不停索笑氣,應該有七八下,我就wing wing地,好想訓覺!當時開佐八度但未穿水,係後尾姑娘檢查時就整穿佐,咁姑娘話有急屎嘅感覺就試下屙,教我一痛就吸一啖氣唔好抖氣住就要出力屙喇!但我每次只可以連續做三次,跟住就無力喇,唉,當時真係,又痛又無力,唔知點,本身好有規律嘅吸呼吸呼很尾亂到打曬交,姑娘就教我放鬆啊,要抖下再黎,再叫我搏命咁凈係呼氣喇,咁我就搏命咁呼呼呼!!痛到攞命嘅時候我嘅醫生至黎,當老公話醫生黎喇!我好似見到救星咁,跟住就feel到佢應該係喺我下邊打佐支針跟住就叫我屙喇,好快阿B就出黎喇,男仔黎㗎,恭喜曬!見到阿B果下我係流住淚水講出“BB“呢两個字!出世果時係01:45 跟住就姑娘帮我地影全家福喇,用自己帶嘅相機影㗎,影佐幾張之後就帶走阿b喇,我就繼續俾醫生縫針,縫針就唔痛了,應該係打佐止痛針,左脾右脾各一支,縫完針喇,醫生話我子宮收縮唔係咁好,就帮我吊盐水就可以出產房喇
         所以我嘅生產過程係:晚上9點見紅,11:45到醫院,零晨12點入產房,零晨1:45生完,成個過程未够5個鍾
真係覺得阿仔好乖,好錫媽咪,感謝主!!



感動流淚

清新流暢

到此一遊


豈有此理

評論 (0 個評論)

facelist

你需要登錄後才可以評論 登錄 | 註冊

© Baby-Kingdom.com Limited. All rights reserved.