||
想係呢區食印度菜，唔一定要去重慶大廈嘅，友人今次又帶我去食好嘢，就係呢間啦，用一樽樽唔同香料試管黎佈置門口位，絶對代表到印度菜嘅特色
店內裝飾有別於傳統印菜餐廳，黃銅餐枱配上藍黃色絲絨/皮椅，中間大投影幕播住Bollywood Hit Songs，我地被安排坐窗口位，望到街景感覺開揚
餐牌上提供由小食/湯/沙律/咖哩/主食/素食/甜品到飲品，印度菜名下都有英文講解下大致上係咩黎，若果有埋相片就可能仲易理解! 睇唔掂都唔怕，佢地嘅侍應好樂意介紹菜式，仲用電話GOOGLE埋個樣比你睇，超有耐性!
首先出場係呢碗Tamatar aur Tulsi ka Shorba ($58)，睇英文解說係用新鮮蕃茄加入羅勒煮成嘅湯，味道因有少許忌廉係面增加香滑感，濃濃蕃茄味又夠熱度，好味呀.................同好想要一個餐包呀!!
呢客係侍應推介嘅Dahi Golgappe ($68)，6粒波波仔一字型排開，造型相當趣緻
香炸外皮，內裏有薯仔，洋蔥及乳酪，入口清涼，一咬酸甜乳酪係口腔內爆破，相當有驚喜，作為開胃菜都幾得!
Samosa即係印度咖哩角，呢度提供Lamb Samosa ($78)，一客三大隻
切開一半，羊肉味已經飄出黎，羊肉碎加入香科作饀料，帶點厚度嘅外皮香脆，食一隻都飽咗少許，加入送上嘅薄荷醬汁一齊食，加一點清新味道
食印度菜又點少得咖哩類，點選咗Goan Curry Fish ($138)
咖哩香味相當出，但又唔係幾辣，魚塊量都好大方，單食都可以
咖喱嘅好拍檔Butter/Garlic Nan ($38)一齊上場，一客三大塊，油潤又略大少少焦香位，入口煙韌，蒜味比較溫和，被咖喱汁搶過了風頭。
個人推介呢客Chicken Biryani ($128)，外觀似我地嘅生炒糯米飯，無諗過係咁大份量，足夠3人享用，飯多之餘仲有幾舊大鷄件
另有乳酪可撈落飯或點鷄肉食
選用Basmati 長米，係印度餐廳必吃嘅靚米，上網查過 Basmati米呈長瘦形，越長越貴，擁有與眾不同的堅果香氣，即使多吃亦不覺得膩。 飯粒炒得幾乾身，超有口感，加入幾種印度香料，微辣得黎又惹味!
呢度嘅飲品選擇比較特別，除咗烈酒啤酒外，亦有鷄尾酒及無酒精鷄尾酒，可以上嚟飲返杯先開餐都得，想搵特式印度飲品例如Mango Lassi， 抱歉...係搵唔到嘅! 叫呢杯Ice Lemon Tea ($28)，鷄尾酒般外型，淡淡茶味，味道帶微酸，中和呢餐嘅重口味道!
疑似經理除咗態度親切，臨尾仲問我地想唔想試下佢哋自家製嘅雪糕? Why NOT?! 就係呢客啦，外觀似係雪硬咗嘅菠蘿，入口帶有淡香奶味，少甜，仲加入咗幾款果仁碎，增加口感，改觀咗對印度甜品係好甜嘅印象!
呢間印度新式餐廳坐得舒服，無論食物及服務都相當唔錯，價錢唔係貴，絶對有回頭!
contact me : [email protected]
