小白屋開餐@Cafe Prince Royal - gingerszeto的日誌 - Baby Kingdom - 親子王國 香港 討論區

小白屋開餐@Cafe Prince Royal

已有 46 次閱讀 18-7-24 11:32 |個人分類:飲飲食食|關鍵詞:Cafe Prince Royal

又係花墟買完花當然行下附近睇下有咩開餐好地方, 原來就係一街之隔都開左好多唔同種類嘅食店, 被呢間"白色小屋"吸引住!

推門入內面積唔大, 裝修精簡而清新, 以木為主題, 坐得都算舒服

餐牌上提供意粉, 全日早餐, 輕食, 沙律, 甜品及飲品

呢度要自行出去落單, 不設加一, 食物會由侍應送上


呢客秋葵鷄胸沙律 ($88), 另加煙三文魚 ($20/份), 可謂健康減肥之選!  賣相吸睛, 材料都唔少架, 包括清脆爽口沙律菜, 紅腰豆, 甜椒, 車厘茄! 當然仲有秋葵及鷄胸, 鷄胸亦係煎香過, 食落肉質又唔算好嚡口, 略嫌秋葵份量少左D; 而片煙三文魚味道咸香, 豐富左呢客沙律嘅原有味道!

 

幾款意粉當中, 對呢款黑松露野菌意粉 ($85)情有獨鍾, 放上枱已聞到黑松露獨有香味, 香滑忌廉汁混合黑松露醬, 包圍住每條意粉, 意粉軟硬度適中; 當中嘅野菌同洋蔥亦增加甜味, 食晒成碟都幾滿足!

呢客墨西哥雞肉菠菜麵 ($98), 有齊三種顏色, 賣相吸引!  話明係墨西哥, 醬汁幼滑中帶點辣, 幾惹味; 鷄肉係煎香左少少, 調味適中, 配埋三色彩椒絲嘅甜味, 菠菜麵嘅少少煙韌口感, 清新得黎又帶點"狂野", 口感及味道都幾平均!

去得Cafe, 點可以唔叫返杯咖啡, 平時飲開泡沬咖啡, 今晚轉下口味飲特濃鮮奶咖啡 Flat White ($34), 係濃厚奶泡上拉上心心拉花,  飲落相當滑口, 咖啡味唔太濃, 過下條咖啡癮就唔怕咁夜飲會訓唔著; 另外呢杯熱朱古力奶 ($40), 口感滑又甜度岩岩好, 飲落好有香濃朱古力味, 正喎!

Cafe Prince Royal : 太子花園街232-242號禮賢大廈地下F舖

contact me : [email protected]


感動流淚

清新流暢

到此一遊


豈有此理

評論 (0 個評論)

facelist

你需要登錄後才可以評論 登錄 | 註冊

  • 搜 尋
  • APP
  • 網 站
© Baby-Kingdom.com Limited. All rights reserved.