感恩母親節 謝謝我的2位媽媽 引用孖寶勞作上的一句去表達: Love you in Pieces ... - 荔枝媽媽的日誌 - Baby Kingdom - 親子王國 香港 討論區

感恩母親節 謝謝我的2位媽媽 引用孖寶勞作上的一句去表達: Love you in Pieces ...

已有 35 次閱讀 18-5-9 19:16 |個人分類:生活點滴|關鍵詞:感恩母親節


謝謝菲仕蘭香港有限公司送來的母親節禮物,美美嘅鮮花,母親節是一個為感謝母親而慶祝的節日,這亦再提醒我其實每一天都是我們子女回饋父母養育、教導嘅好日子。


家庭二字,對我黎講唔係一家四口咁簡單。係與我們夫婦原生家庭三個家一起嘅聯繫,再加上我們各自兄弟姊妹每一個家庭嘅聯繫,我成日都會同孖寶講 Family is our rock, without family we are nothing. 家庭於我係溫馨、甜蜜又可愛嘅。


母親節當然會提到媽咪啦,講返我嘅媽媽,她一直默默陪係我身邊支持我每一個任性嘅決定,等我可以過好『我』選擇嘅人生;我嘅媽媽沒有傾國傾城嘅外表,但美由心善,所以在我眼中她是美美的,我自然亦遺傳了眼細,沒有美美嘅外表,而且好細個時已遺傳了生好多白頭髮呢個毛病;係懷孖寶開始到現在亦只有更多更多嘅白頭髮。但她加上爸爸的基因給了我高挑嘅身形。媽媽會以身作則,教導我忍耐同包容。 



我嘅媽媽好著地同好草根,教育程度亦唔係特別高,唔識國語亦唔識英文。所以唔洗提對我地有咩特別嘅栽培,姐姐同我嘅學業成績都係靠自己,咁當然啦沒有特別栽培咁其他嘅琴棋書畫我自然樣樣都唔精通啦。但媽咪教導我如何去愛人。媽咪由細到大都無迫過我要拎第一,我好幸運有一個會比好大自由度我嘅媽咪,相信我知道自己應該如何自持,同時亦會教導我要識好好保護自己,亦師亦友的關係。我好希望將來我同孖寶亦可以成為好朋友,跟我同自己媽咪一樣咩都會傾,我可以成為孖寶的傾訴對象,亦可以輔助他們做個有善心的好人。


好記得我第一次幫一本雜誌寫稿,她上來我家我隨意拎比她看,她立即用手機影下來,仲將雜誌傳給爸爸睇。媽媽總會用行動支持我,跟我家先生一樣,你地2個都令我明白真摯嘅愛唔一定要下下講出口口,『愛』就係帶給你最簡單,最直接嘅行動。媽媽係一個好平凡嘅人,但她絕對係我生命中最全心全意,無條件愛我嘅一個人。天底下,就只有呢一個佢。我這獨一無二嘅媽媽。


過去年月嘅人生都有出現過一些值得我驕傲嘅事情。期待未來嘅年月裡,我嘅人生出現更多值得我父母為我驕傲嘅事情!



除咗賦予我生命嘅媽咪,奶奶於我亦係另外一位媽媽。係我心中佢有著我對媽媽一樣嘅敬愛,所以一直以來我都係跟我家先生一樣叫佢媽,反而唔係叫,因為我真的把她當做媽媽。


以下我想講嘅可能未必大家會有許多共鳴,但這都是最真實嘅。我奶奶就係個種傳統為家庭奉獻哂所有嘅女性,她事事忍讓,顧全大局。因為深愛兒子所以亦愛錫著新抱。奶奶幫我們照顧孖寶,打點家中一切。這份恩我相信我十世都還唔清,照顧小人嘅困身令她無哂私人時間,她明明責任已完,但為了我們還是硬撐下去。盡心盡力去照顧我們,我成日都諗唔知可以做咩先回報到她嘅愛。



同奶奶相處得多,更明白她的想法,她愛每一位孩子,想每一位都過得好,過得健康,時常都會想住他們,如果知道會見到他們,一定會預先煲好有益嘅涼茶,飲品比大家,唔怕煩,唔怕重拎出來。我並沒有把這當成習以為常,每一次都是由心欣賞。由奶奶幼照顧孖寶我很開心,因為她教出來的4個孩子都是正直嘅好人。『愛』係可以用心去感受得到的。


每個人都有母親,能和父母一起過這節日是我們當孩子無上的感恩和福氣!


也讓我們更加珍惜每一天每一刻,請大家都多用點心和媽媽一起面對年齡增長帶來的衝擊和轉變。陪媽媽一起變老,一直關懷她。


希望全天下偉大的母親都快樂!


我和孖寶的Facebook Page: 荔枝與孖寶 


感動流淚

清新流暢

到此一遊


豈有此理

評論 (0 個評論)

facelist

你需要登錄後才可以評論 登錄 | 註冊

© Baby-Kingdom.com Limited. All rights reserved.