沙律媽媽的忙碌日常︰小腳板走天涯の旅行應該帶啲咩?! - fluffy_marsh的日誌 - Baby Kingdom - 親子王國 香港 討論區

沙律媽媽的忙碌日常︰小腳板走天涯の旅行應該帶啲咩?!

熱度 1已有 278 次閱讀 18-3-23 15:57

啱啱湊完沙律B去完台北,第一次出門,四日三夜夠曬數! 
出發前,首先要幫沙律B準備Passport同身份證。 
之前都有教大家回申請,可以睇番舊文 [Link]!
今次分享左沙律B帶咩去旅行先,下一篇再講買機票,book酒店事宜。 

沙律B宜家10-11個月,已加固好幾個月。
 1日5餐,3餐奶 [奶粉],2餐粥仔。 
究竟湊住呢啲B要帶幾多野先足夠? 
各位準備帶Bb去旅行嘅媽咪可以參考以下bring list!

1。飲水樽 [1個]
俾佢平時飲水用,沙律媽媽買左B.Box,係澳洲品牌,聲稱咩角度都飲到水,但用完真係又愛又恨。 
愛,係因為飲管係十字口,對於初學者嚟講,非常好,因為唔會咁易濁親。
恨,因為漏水漏到癲左,尤其是加左暖水,枝水管自動吸曬啲水上嚟,漏到周圍都係,好討厭!
真心想換左佢! 下一次打算換 Richell,因為好多人都話 Richell 唔漏!

2。奶粉格 [1個] 
會倒滿奶粉 [平時份量],以備不時之需。 

3。暖水壺 [1個]
只用嚟裝熱水,開奶用。沙律B早上 7:30 會飲奶
我地會隔夜 prepare 一壺熱水,倒入暖水壺,唔使臨急臨忙朝早再煲。 
沙律媽媽選用 Tiger,熱水由夜晚頂到第二日都仲好熱!

4。旅行旅樽 [1個] +旅袋 [數個]   [Link]
沙律媽媽買左 Playtex,因為係旅行樽始祖。 唔用都唔覺原來咁方便,真心覺得好用! 

旅行樽包一個咀,同一個蓋,樽底穿底的。 要另外再買奶袋,每次開奶前要加入奶袋覺可用。 
沙律媽媽會直接將常溫水加入奶袋,再加熱水。 再倒入奶粉,好似平時一樣,搓勻就俾BB飲。 
飲完直接 dump 左個奶袋,沖洗整個樽。 奶咀再用滾水浸,下一次又可以用番。 
次次清潔完,我都會放一個奶袋入去,因為個樽穿底,驚有塵飄入個奶咀。 
奶樽分 4oz 同 8oz,建議買8oz。 奶咀有分 slow flow,  medium flow 同 fast flow。 
咩 flow 都得,自己再用奶咀打窿機加工就搞掂! 
有左呢個 Playtex,真係可以一樽走天涯!無得輸!


 5。開奶茶數包  [4包,1日1包]
因為沙律B一直都係奶粉B,又加固一段時間。 終於面臨便秘,但我地又搵唔到咩原因令佢便秘!
平時沙律B已食好多菜同生果,又少食肉。 所以我地懷疑奶粉熱氣引起便秘。 
於是買左余仁生開奶茶[無糖] 俾佢試下。 
開奶茶係茶包,用 4oz 滾水浸幾分鐘,再灘至60度左右,就可以開奶,或者直接飲都可以。 
Instruction 話開4oz,我就開夠 5-6oz,一樣 work。 如果有便秘嘅 BB,不防可以試下,但好貴! 

6。奶粉+即棄奶袋 [10包=10餐]
因為唔想帶咁多奶粉,所以出絕招買奶粉袋。 沙律媽媽揀左擊國Mother-K,千色有售,$49/30個!
好用,又勁方便! 出發前入定平時飲開嘅份量,開奶時,摵開下邊個袋口,奶粉直接倒入樽,搞掂! 
除左Mother-K,日本牌子都有 Kaneson,千色同 HKTVmall 都有,$39/20個,貴少少。同埋20個好快用完!
仲有台灣 Simba,每包得12個,都好似要20幾蚊,又貴又少! 
最後,仲有另一款韓國牌子 Dr.Mama,某網店買到,$45/30個,運費自付,變相仲貴! 
所以,考慮左咁多,都係去千色買 Mother-K 化算啲! 
同埋可以一邊用,一邊dump,到時回程會少好多野!

7。平時似奶用嘅奶樽[1個] {影漏左}
主要用嚟儲常溫水,咁樣BB就永遠都有乾淨水飲! 

8。Summer Infant Tiny Diner [1張]
我估BLW媽媽應該好清楚呢個item。 沙律B雖然行傳統方法,但都有一塊! 
因為實在太好用! 次次去食野,將Tiny Diner鋪係律B面前,就可以放曬baby food上去。
Summer Infant Tiny Diner的圖片搜尋結果
**Official image
由得佢自己食,又唔驚污糟。 用完搵濕巾抹,捲埋又可以收入袋! 
**用之前要洗乾淨!

9。Tommee Tippee 矽膠口水肩 [1條]    [Link]
我之前都介紹過,非常好用,又非常慳位! 
沙律媽媽當時係美國網買都要8-9蚊美金。 送到香港真係分分鐘HK$100 [2條]! 
雖然貴,但值得。沙律B都用左半年,日日用,宜家仲係好新淨。 
又易捲起,收藏更加容易,捲左半年,一條裂痕都無! 
我見到某啲網店有得賣,$39/條,好平! 
仔細睇睇,成條口水肩闊好多多,同時簿好多,單條包裝,which我從未見過。
 我都幾肯定佢用唔到半年咁耐,雖然平,但唔值! 

10。奶咀 [Link] +奶咀盒 [Link/Link] + 繩 [Link
上到飛機,比BB啜奶咀,其實可以減低不適。沙律B由起飛果刻開始,已經啜緊,所以無扭計!
沙律B一直都用 Philips Avent 香草奶咀,開頭因爲早產,用左缺口型 NICU Soothie。
呢款膠比較軟熟,但用左一段時間,我已經轉用0-3m,如果Bb出牙鐘意咬野,可以考慮改用3m+。 
由於沙律B一直都唔咬咀,我由佢用0-3m。其實奶咀都係膠,建議半年要換一次! 
因為呢款奶咀無奶咀盒,我自己配左 Nuby 盒,天衣無縫嘅組合。
之前都介紹過,好可惜,回程喺飛機漏左一個  
平時沙律B用咀唔會用繩,但去街,我都會搵繩綁住,原來配繩都有技巧! 
沙律B有好多條繩,平又有,貴又有,牙膠款奶咀繩都有 [超靚,但好重]。
最後我俾左淘寶貨俾沙律B。 每條繩都有個夾仔夾住件衫,個夾仔一定要用膠夾! 
有好多網店都賣 Ulubulu,但呢個牌子係鐵夾,其實我唔太建議,因為殺傷力大過膠夾。

你永遠都唔知BB幾時會拎野玩,幾時會夾親自己。 
作為一個用家,點解我用膠夾,是有原因的! 

11。匙羹 [4個]
今次我拎左4款匙羹過去。 第一款 Tommee Tippee Soft Tip,用嚟食粥/pasta。
因為沙律B鐘意咬羹,唔敢俾硬羹佢,驚咬崩牙,同埋膠唔會轉血! 
第二款 Munchkin 羹,細過 Tommee Tippee 少少,誰要用嚟食果蓉,好方便! 
第三款 Skip Hop 鐵羹,用嚟刮生果食,千奇唔好用嚟食粥仔糊仔,因為轉熱快,辣死個小B。 
沙律媽然習慣每次用工具時都會用滾水過一過。
有一次用滾水洗完 Skip Hop 鐵羹,未灘凍就俾沙律B用,辣到佢即喊,所以我銘記於心。 
第四款係奶粉羹,主要用嚟開奶粉整蒸蛋糕,離開時會dump。方便! 
其實我之前介紹加固工具都介紹過!>>> [Link]

12。暖壺 [1-2個]
主要用嚟裝沙律B啲粥仔同埋pasta。因為第一日我地帶左2餐粥,結果拎左2個暖壺。
去程 hang carry,回程可入喼! 
沙律媽媽用 Thermos 同埋象印,非常keep warm,至少keep warm 8-10hrs! 

13。有蓋碗仔 [2個] 
主要用嚟餵粥仔,或者pasta,但去到外地,唔想用人地啲野 [衛生問題]。
所以的拎左2個過去,真係好實用!除左餵食,
仲可以用嚟浸開奶茶,當奶咀污糟左,又可以用嚟浸奶咀!一舉幾得! 
沙律媽媽用緊 Munchkin,無特別,沙律嫲嫲買的,一套有4個碗2個羹,好處係可以疊起! 

14。煮食煲 [1個] + 飯勺 [1個] {影漏左}
拎左一個超細型煮食煲,主要用嚟煮pasta俾沙律B,要搵個飯勺搞下搞下,否則,超快燶底!
如果有媽媽好似我咁會拎煮食煲去旅行,記得問酒店用咩爐頭!
因為用火同用電磁 [Induction] 係用唔同煮食煲架,除非你個煮食煲可以兩用!


15。Pigeon 蒸蛋糕 [1包, 共2個,連2個蛋糕模仔] >>> [Link]
因為沙律B仲未可以食街外野,所以次次出去都要幫佢準備零食。 
其實由8個月左右,沙律B已經開始食Pigeon蒸蛋糕仔,勁方便! 
只要加15ml奶粉/鮮奶,蒸5-7分鐘左右於食得。 

最種要係連個蛋糕模仔都包埋,去旅行真係唔少得佢。 


除左旅行會帶,平時去街食野,都會蒸定出去,沙律B超鐘意! 


16。唧唧裝果蓉 [3包,1日1包]
沙律B食開 Ella’s Kitchen 唧唧裝果蓉,呢款果蓉加左檸檬汁,少少酸,但沙律B都接受到。 
一包唧唧裝果蓉90-100g,大約3oz左右,好飽肚。 
有時沙律B一之食唔曬,又可以擰番實,玩一陣再食!


 呢個牌子好多地方都搵到,但最平應該去iherb買,或者Watson’s Baby特價果陣買! 


17。貝殼 Pasta [1包]
沙律媽媽今次帶左 Annabelle Kamel 有機貝殼粉,英國牌子,上次BB展買的! 
出發出未煮過俾沙律B食,同埋沙律B少食pasta,所以佢咀嚼能力比較差。
呢款粉又比較硬身,所以餐餐食幾啖就收工!所以要用 Pigeon 蒸蛋糕頂上! 
如果有媽媽都鑒左呢款粉,煮完可以放完暖壺焗,會再林少少,易食好多! 
除左呢個牌子,沙律媽媽都買左一個澳洲牌子,叫 Bellamy,都係有機粉!}
沙律媽媽網購的,$55-$60/包,細細包。好貴! 
原來 Ztore 同 Babies’R’Us 都有,仲平過網購!

18。罐裝果蓉 [2罐] 
沙律媽媽買左HiPP,當時打算溝pasta,但沙律B食慣新鮮野,對果蓉麻麻地! 
但食唔到pasta,我地都有俾佢食果蓉,都可以頂到一餐! 

19。萬用刀 [1把]
因為要煮野食,又要買生果悍沙律B,所以決定用私火工具! 
真係超方便,又唔衛生! 沙律媽媽喺屋企搵到2把萬用刀,都係Victorinox瑞士軍刀!
原來呢個牌子啲野咁好用! 
**一定要寄倉,唔可以hand carry


20。零食盒 [1個]
已裝左零食,由於平時都唔會俾太多零食沙律B,其實拎一個零食盒就可以起行!

21。手指餅 [1包]
因為想訓練沙律B自己食野,所以我地拎手指餅俾佢試。
當然佢食得非常好!因為呢款餅餅實在太好食啦!

22。尿片/褲仔 [20-22條]
計下數BB一日要用幾多條片片或者褲仔,唔好帶太多,夠數多2-3條就足夠。如果
有試用裝,最好拎曬去,方便!同埋建議去街時用褲仔,因為唔使下下都瞓低換,企係度都換到!

23。隔尿墊 [1張]
因為帶左褲仔,所以無用過,下次可以唔帶。

24。濕巾 [數包] + PatPat膏 [1枝試用]  + 消毒噴霧 [1-2枝試用]
帶BB出門,呢啲基本係必需品。濕巾又分抹 PatPat,抹手,抹其他野。又分純水,非純水等等。
總之就五花百門!之前沙律媽媽都係消耗品文章提及過,大家都可以參考下!
至於消毒噴霧,純粹係拎去 apartment 噴沙律B張床仔!
沙律媽媽用 AQ,因為之前收過 tester,所以拎去!


25。咬咬巾 [2對]
出門少不免會用孭帶孭住沙律B周圍走,所以都要帶定2對咬咬巾替換!
沙律媽媽用日本千趣會 [9cm款],用 iangel 孭帶,咬咬巾有少少鬆,但都ok!

26。口水肩 [8條] + 舊口水肩 [3-4條] 
沙律B又出緊第7-8粒牙仔,啲口水賤到傻左!平時一日換5-6條絕對不是夢!
所以沙律媽媽都8條新口水肩,同埋3-4條舊口水肩,用完即dump!
圓形果幾款口水肩非常好用,又可以襯衫,又可以360度轉,呢邊濕左又轉去另一邊!

**[左上角] 傳說中360度都飲到水嘅B.BOX漏水樽要長期戴住個套套 

27。紗巾 [10條]
全部都係舊沙巾,用完會dump。

28。乾棉 [小半包] 
次次去街都會用熟水濕幾片,放入zip bag,主要俾沙律B抹手抹口! 
因為沙律B牙痕都會食下手指,所以要keep住抹手! 
以為會用唔著,點知回程全部用曬! 

29。消毒濕巾 [1筒]
因為有沙律B同行,所以消毒濕巾主要用黎消毒apartment所有野! 
回程時已用左一半! 

30。普通濕巾 [1包]
呢款濕巾喺759買,但我地從來唔會俾沙律B抹手,只會用嚟抹玩具等等。 
同埋去到餐廳用來抹 high chair 同台面! 
因為沙律B次次都會幫餐廳用自己手袖抹台,所以等地會抹定先! 
回程時已經用左8成! 

31。沖涼液 [1小樽]
沙律B用 Mustela,所有 tester 都用曬,所以沙律媽媽就搵左個樽裝幾日份量就算! 
用完可以即dump,超方便!

32。氣坐椅 [1張] >>> [Link]
呢款坐椅沙律媽媽淘番嚟的!主要底部梳窿,可以去水。 所以拎左去俾沙律B沖涼用! 
其實 apartment 都準備左一個BB盆俾沙律B 但見到唔係好乾淨,都係用番私火野好啲! 
平時沙律B喺屋但企用浴盆沖涼,今次用坐椅,少不免都會唔慣。 
例牌喊兩聲,但沖涼時俾啲野佢玩,又收聲! 
注1:沙律媽媽直接用花灑幫沙律B沖,水溫一定要較好,同埋測試水壓正唔正常,時凍時熱好易病!
 注2:要用到2個人幫手沖,一個拎花灑,一個幫手洗,沙律B晚晚沖涼都係8分鐘左右! 


以上安全藥門,真係出門必備,不需要問原因,帶就得啦!

33。探熱槍 [1枝] 
沙律媽媽用百靈,非水貨版! 因為港版正貨有2年保養,水貨版多數30日保養! 
沙律媽媽喺 Aeon 買,當時折完好似 HK$590 左右,當然會貴過水貨好多,但保障少少。 

34。小林退熱貼 [1小包]
Once BB 唔舒服發燒,喺未見醫生前都可以俾BB得到即時舒緩! 
加上沙律B下個月要打1歲針,沙律媽媽一早買定看門口! 藥房價 HK$20/盒 [6片]

35。退燒水 + 針筒 [1set]
次次打針,醫生都會俾一枝退燒水同針筒。 可以帶定以防!


 36。面巾 [1條] 
沖涼用,帶左舊面巾,離開時會dump埋!

37。刷牙用品 [1set]
其實係紗巾1條,用完呢幾日都係dump左! 
同埋一個套手指頭牙刷仔一個,沙律媽媽用Summer Infant,iherb買,$20有找! 
坊間都有好多其他牌子,如Dr.Brown等等!

38。防塵蟎床墊 [1張] + 隔尿墊 [1張] + 床笠 [1張]
因為沙律媽媽叫 apartment 準備左床仔,又驚床子唔乾淨,有塵蟎而搞到沙律B敏感。
所以沙律媽媽連防塵蟎床墊都拎埋去,同埋私火隔尿墊同床墊,以防萬一!
我地用 apartment 準備嘅床仔之前,都用消毒濕巾抹過,又用噴霧噴過,又高溫燙過,應該好乾淨!
將床仔消毒完,燙完,鋪左防塵蟎墊,之後就鋪番隔尿墊同床笠,同屋企做法一模一樣! 
防塵蟎墊喺沙律媽媽嘅朋友去日本買的,都唔記得左咩牌子。
隔尿墊就係用西松屋 [70X120cm],好好用!而床笠就拎左 IKEA。
之前沙律媽媽都有介紹過床品,大家可以參考下舊文 [Link]!

38。羽絨睡袋 [1張] + 六重紗被仔 [1張] 
因為沙律B有著睡袋嘅習慣,所以去旅行都幫佢準備埋。出門前check過天氣,頭2日暖,尾2日會凍。 
再加上一定開冷冷氣,同埋沙律B一定會踢被,所以我地帶左保暖睡袋,再加1張紗被就足夠! 
其實仲有張美素牛牛被,好睇拎埋過去,因為離開台北果日得15度,孭住沙律B要加牛牛被先頂得順! 

39。大浴巾 [1條]
沖涼用,因為唔想用 apartment 提供的。 純粹個人衛生問題。 

40。雨罩 [1張]
出發前check過天氣,台北係會落雨的,所以帶定。 孭帶同車仔都用到,又易於收藏,旅行必備! 
之前都介紹過,宜家唔多講。可以睇番舊文 [Link]!

41。坐椅固定帶 [1條]
宜家無輪去邊,我出親門就會拎埋去街。 
因為唔係每間餐廳都會有high chair。 
之前介紹過,可以睇番舊文,不再多介紹 [Link]!



上圖就係沙律B 4日嘅服飾,因為天氣唔係太凍 [除左last day果日],所以唔使著咁多!
沙律媽媽每日都幫沙律B 著 One-piece 裙人仔 [底衫+面衫+背心連身裙+襪褲仔]!
除左去街衫,都拎多2條瞓覺褲仔,同埋一件羽絨背心仔 [最後果一日著]。

看似拎左好多野,但因為啲野一邊用一邊dump,回程都唔係剩番好多野!
再者,沙律B啲野全部都係細細粒,細細粒,都好易 pack!

今次分享左咁多先,下次再分享其他事宜!




感動流淚

清新流暢

到此一遊


豈有此理

發表評論 評論 (3 個評論)

回覆 okibaby 18-5-26 16:42
想問下你PIGEON蛋糕仔有冇蛋白成份? 你BB試左蛋白未?
回覆 fluffy_marsh 18-5-26 22:50
okibaby: 想問下你PIGEON蛋糕仔有冇蛋白成份? 你BB試左蛋白未?
Pigeon 蛋糕仔無蛋白架,我囡當時未試蛋白,但食左蛋糕仔都無事
回覆 okibaby 18-5-27 00:46
THANKS~我仔仔未夠一歲, 咁等我買黎比佢試下先~

facelist

你需要登錄後才可以評論 登錄 | 註冊

© Baby-Kingdom.com Limited. All rights reserved.