誤打誤撞,發現老公...仲有另一半
熱度 1已有 557 次閱讀
17-3-23 10:19
我老公返銀行工,據佢講,成日都要追數,同埋好多文件嘢處理,另外仲有唔同既牌要考,加上仲有好多唔同既會,要準備文件,基本上,晚晚最早最早,都要11點先返,然後有時,星期六日,仲會好早就出去,話去參加車會活動,咁我見佢工作壓力大,咁揸部車出去減吓壓,都好正常...我亦完全信任佢,所以當我有咗之後,嘔到7彩,睇醫生,產前檢查,報產前運動班,全都都係預自己1個人去,我明白工作既嘢,我真係覺得我好明,我都要返工,亦唔敢去要求老公,抽時間陪我.
19週,BB豬要去照結構,再早1日,我返工前部車壞咗粒Sensor噠唔著,拎咗去整,所以照結構嗰日,我同老公借車去診所,點知朝早去到花園道附近,有架的士轉線,擦到老公部車少少,搞咗1大輪,又報警又落口供又Call保險,搞掂先去照結構,所幸BB豬一切正常.
返到屋企,因為保險叫我搵返車Cam條片比佢,咁我就拎埋車Cam張卡返屋企睇,就係咁,我發現:
1. Week Day好多晚好多晚,老公部車Cam,都係6點幾7點就有新既File,即係著咗車,而唔係佢所講,晚晚放成10點幾11點...我初先都會諗,係咪揸車出去食飯呢~~?!
2. 有啲夜晚,真係去食飯既,但通常都有個女仔聲喺車入面,我又再諗緊,係咪車女同事出去食飯,然後再返公司呢?
3. 好多個夜晚,我以為佢向住屋企返緊嚟,講緊既,都只係10點前,同佢返到屋企,都仲有好大一段距離,然後比我發覺,佢會入咗屋企隔幾個街口外既住宅停車場.
4. 雖然部車Cam影唔到開車前後既畫面,但我憑聲,其實唔難聽到,9成個乘客,都係同一個女仔,談話內容,我亦估到係女同事,甚至都估到係邊一個,呢2年Annual Dinner都見到呢個女下屬.
5. 有聽到談及老公交租既嘢,講既係同夜晚停車同一個既住宅.
6. 有聽到過話落車去7-11買套.
7. 星期六日車會活動,有帶埋呢個女仔.
8. 有試過車震.
9. 有聽到過提起我既嘢,100%個女仔知道我既存在,亦知道我有咗BB.
10.佢地唔止19週,外面呢個單位起碼有1年以上.
作為一個女人,我無可能忍到,當咩事都無發生過,忍到既,只係唔想BB豬Feel到媽咪好嬲,驚嚇親BB豬.大肚後,我亦已經用盡我可以用既方法,去滿足老公既需要,點知,結果會係咁,或者咁講,基本上我做乜,佢既需求都遠高於我比到佢既,我永遠唔會夠出面既2x女仔後生,唔緊要啦,總之,以為滿瀉既幸福,一夜間,瀉曬,第20週開始,我決定帶住BB豬,搵返失去既幸福.
