二寶降臨了《一篇全紀錄頭三個月的點點滴滴》 - tantan1130的日誌 - Baby Kingdom - 親子王國 香港 討論區

二寶降臨了《一篇全紀錄頭三個月的點點滴滴》

已有 23 次閱讀 19-2-8 19:42

20181226 boxing day 
因為生完軒軒後加上一直餵人奶,所以我一直未黎番m,係早一星期開始,覺得間中有作嘔feel同埋有小小女人嘅直覺,於是聖誕日買定支clear blue 番黎等呢日驗晨尿,一驗.....哈哈哈個+號出得好快等老公起身扮哂野叫佢幫我掉左支垃圾佢,然後佢就發現左啦個傻佬超開心


因為好耐未黎m關係,所以我都計唔到大概幾週,於是乎隔幾日再去買支有顯示週數嘅驗孕棒睇下,結果顯示3+,即起碼一個月啦。

打去之前陀軒軒時做私家產檢間診所,點知個醫生已經無左出黎駐診,於是乎打去朋友做過產檢個間book,book 左1月14日。


20181228 
去屋企附近一間診所驗孕,順便拎張證明去醫院登記,點知佢支驗孕棒太廢了,話條線太淺色,叫我一星期後再黎驗過是次收費$200


20190104
一星期後我再拎晨尿去診所驗,點知佢話都係太淺色(其實我覺得根本係佢用個支野太cheap),不過佢話都可以証明我係有左架啦都可以寫信俾我,不過佢封信係無提供預產期,所以我下午拎去威爾斯登記係唔得嘅
是次診所收取我$100,但佢封信係無用嘅,即是我浪費了三百大元
所以各位準媽媽要記住,如果好似我咁因生完第一胎或因餵人奶太耐無黎m又發現有左,都係快快去book超聲波照!!!


20190107
今日係同老公結婚一週年老公放半日假,將軒軒暫時交俾99睇住,我同老公去過下二人世界,本來諗住去番上年擺酒嘅地方---北京道一號東海薈飲茶,但佢地三點一定要清場,所以唯有落下面間海港薈飲。
佢點心做緊六折

飲到尾聲,我突然心血來潮好想今日去照超聲波(本身book左1月14),打去book左個間問,當然今日再無時間嚕~點知 鄧悦翹醫生 即日下午三點半有位,咁我地就賣單走人去睇啦。
去到診所磅重,雖然我係岩岩食飽,但我已經有39kg ,因為我本身係超瘦類型(我媽都係),上次陀軒軒後期兩三個月都係四十幾kg,都無過過50,但今次咁快呢個磅數,我有啲接受唔到
入到房一照超聲波,老公已經好快見到細b頭仔,原來我已經係9週3啦一直以為未夠兩個月架,好彩無等14野好彩我心血來潮好彩呢間咁岩有位(我怕排唔到政府個唐氏期),而預產期係8月9日,到時軒軒都未夠兩歲呢
鄧醫生收費$900,有相有一隻bb心跳dvd,只收現金
由於我還在哺乳中,醫生都有話可以宮縮可能會多啲,肚痛情況可能會多啲,不過都可以照餵無所謂嘅


20190108
尋日拎到証明後,今日下午就再去威爾斯登記。
三點半去到填好資料,交埋身份證同醫生信,其實仲要交住址証明,但我竟然忘記帶不過可以下次後補。等左大約9個字,終於拎到照唐氏期,覆診期,同埋兩張聽母乳餵哺講座嘅期(呢個我上胎2017年無架)講座個期職員話如無興趣可不去。同埋一張from,係照唐氏個日要填左拎番去。
最後再打埋去健康院預約,上胎可以約到過兩日就去,但今次竟然約到12週啦要


20190128   12wk3
終於等到去健康院第一次檢查,朝早留定早餐前第二篤小便,再帶齊自己身份證、老公身份證副本、住址證明、威爾斯上次俾嘅所有野,準時9點半去到排隊登記。
填完表拎左籌就去度高磅重量血壓驗小便,
再等見姑娘,都係遁例問下個啲問題
出去再等見醫生.....有得入去見時已接近十二點
又係例行問資料,跟住聽聽心肺,檢查乳房,聽bb心跳,再開埋藥單拎materna(開左三個月,就快食完可以再叫佢開,咁就唔洗再自己買)
拎哂成疊文件去窗口影印,
再等入抽血房,姑娘話醫生叫我去威爾斯改約早啲嘅期見個邊嘅醫生,話因為我太耐無黎m
最後抽埋三支產前血,去藥房拎埋藥,大概一點完成。


上胎都未有咁勤力搽肚紋膏,今胎竟然我依家已經開始搽,我搽palmer's個隻,到底係那來的動力令我今次咁快咁勤力
不過好在上胎都無咩點爆紋,希望今胎都係


20190129 12wk4
今日去威爾斯照唐氐,下午兩點,我同老公一點半已經坐低左係度等了。等到三點二先有得入房見姑娘都係問番啲病歷資料等等。
因為健康院叫我番黎改早啲個期見醫生,咁我就交啲文件去一號窗拎埋個籌就等。
唐氐先叫我入去照,係姑娘照,問左啲資料睇埋私家照左嘅超聲波相,我就訓上床開始照啦,小小b都算合作無動黎動去,但姑娘話佢訓到遮住左要照個位睇下心跳(但無得聽),睇到手手腳腳,再睇埋最重要嘅頸皮,都照左有十分鐘。
姑娘俾埋紙抽血,再俾埋個照結構期我(因為我有心臟病,所以上胎都有俾期),咁就出番去睇下見醫生個期改好未,點知仲未得..........
都成四點幾啦,老公就坐係度等,我就去左抽血先,抽一支,無咩人一去到就有得抽。
抽完上番去再等等等接近5點,終於拎到個新期,原來佢俾左我份野醫生睇,由原本4月30先第一次有得見醫生,依家快到2月4日就有得見,個日仲約埋個教授同我見面,姐係見兩個醫生。
走人同老公食埋個下午茶就番屋企嚕~


20190203 13wk2
年廿九無野搞,就出去行下花市上年軒軒5個幾月,我地都無行過,今年佢就可以自己行啦
四點左右去到長沙灣花市,果然細到一個點我地行左好似三個字就完左唯有去食個tea先,再去蘇屋邨附近個公園俾軒軒玩下
夜晚去銅鑼灣行維園花市,我地八點行,還好未算最逼最多人。(令我諗番起未有軒軒前我同老公差不多年年都會約埋班朋友係最逼最多人嘅時候一齊入去逼下),我地都無行哂就走啦,因為都要去食飯,去左希慎 羅麥記,9點幾好多位唔使等

係年宵買左隻豬豬俾佢

番到屋企都接近十二點嚕~


20190204 13wk3
今日去威爾斯產檢見醫生,約左十點,我未夠9點半去到,一號窗登記完再去觀察室磅重量血壓驗小便。
好快就叫左入去見姑娘,都係問問病歷再出番去等。
然後又叫左我去聽個講座。
因為我比較特別,所以要見兩個醫生,十一點左右就見完等一個,問下資料病歷聽下心跳,俾埋過期催生紙。
好快又入去第間房見教授,俾左個期我係上病房做檢查,再俾左個期我覆診,同埋一個抽血期,開始日日要自己量血壓做紀錄怕我太高,如果我血壓得8字頭都正常,然後即時俾左紙我去心腦電檢部照心電圖。
照完拎番報告上去俾醫生,佢再俾埋轉介信我拎去瑪麗醫院,等個邊可以快啲睇我(因為我心臟一直係個邊覆開診),未夠12點半完成走得。




Lee's family 係度祝大家新年快樂,豬年繼續行大運
都祝我地一家四口日日幸福甜蜜,小小b平安出生




產品試用/活動邀請/其他合作
歡迎聯絡:[email protected]
謝謝

感動流淚

清新流暢

到此一遊


豈有此理

評論 (0 個評論)

facelist

你需要登錄後才可以評論 登錄 | 註冊

  • 搜 尋
  • APP
  • 網 站
© Baby-Kingdom.com Limited. All rights reserved.