【孕記重溫】自己坐月做足準備:炒米茶篇 - Aminn的日誌 - Baby Kingdom - 親子王國 香港 討論區

【孕記重溫】自己坐月做足準備:炒米茶篇

已有 64 次閱讀 18-5-3 01:38 |個人分類:孕媽媽手記|關鍵詞:孕記重溫, 正氣, 白米, 坐月, 杞子, 炒米茶, 南棗, 桂圓, 產後, 陳皮, 脾胃虛, 黑豆, 暖胃, 養脾胃, 薑,

產後坐月要繼續戒口係人都知,不過原來飲水都要注意!

喺中醫角度由於生產之後脾胃虛,身體吸收會比較差,所以坐月期間直接飲白開水嘅話,身體就會容易出現胃脹、尿頻、便秘、腳腫嘅情況。而炒米茶就可以喺呢段期間加強新陳代謝,舒援產後身體嘅不適。

而且米屬正氣可以養脾胃,仲有暖胃效果,幫助坐月期間補充體力同時又有營養,所以一般都會飲炒米茶到滿月。


由於一個月份量炒米茶真係幾多下,我分開咗兩次處理,一次係預產期前一個月,另一次係放產假後(生Aster前一星期)。

一次

二次

炒米茶包嘅材料簡單,不過需要啲時間處理同執料包裝,如果大家想一次過做一個月份量,建議大家預留一個下晝去做。


唔同體質需要嘅材料會有些少唔同,炒米可以用白米、紅米、糙米或者黑糯米,撈埋炒又得,揀其中一樣炒亦得,得咗!我自己就唔需要太補,所以只係做咗最基本嘅白米炒米茶包。


材料:

白米、陳皮、桂圓、杞子、黑豆、薑(順產適用,飲嗰時先切片落去)、南棗(順產適用)


做法:

首先開大火,將適量乾米落白鑊不停炒,開始感覺到米堆有熱力就轉中火繼續炒,炒到米變咗微金黃色就可以,如果已經炒到啡色就太燶啦(熱氣㗎!),炒完就倒起放涼。

唔知點樣睇金黃咗?拎杯白米對對顏色就得啦!

所有材料都唔需要過水(唔需要過水!唔需要過水!),直接執落茶包,份量隨意。


份量:(每日早晚各一包)

炒米 (兩湯匙)、陳皮一小片、桂圓數粒、杞子隨意、南棗一粒、黑豆 (一湯匙)


第一日:炒米、陳皮、薑

第二至三日:炒米、陳皮、桂圓、杞子、薑

第四日至坐完月:炒米、陳皮、桂圓、杞子、薑、南棗(惡露全清後可以加黑豆)


一次

二次

最先整好頭3日放一袋,入院記得帶埋佢哋(我貼咗memo喺走佬喼提自己)。餘下份量大家睇時間整,因為一個月份量原來都要炒幾多米㗎!整完就用密實袋/密實盒/玻璃樽放喺乾燥嘅地方,坐月嗰時每次拎一包出嚟焗就搞掂!



是次小分享完畢有興趣可按 麵語錄食玩遊記 by Aminn 或 C家重地 其他分享 :)

Aminn | Beauty.Food.Fun.Travel.Trendy| 



麵語錄食玩遊記 by Aminn (Lifestyle)

www.facebook.com/m.for.aminn / www.instagram.com/starzaminn 



C家重地 (Parenting)
www.facebook.com/sy.lam.family

任何合作請接洽[email protected]


感動流淚

清新流暢

到此一遊


豈有此理

評論 (0 個評論)

facelist

你需要登錄後才可以評論 登錄 | 註冊

© Baby-Kingdom.com Limited. All rights reserved.