我的自然分娩記 (勁長慎入) - fishma17的日誌 - Baby Kingdom - 親子王國 香港 討論區

我的自然分娩記 (勁長慎入)

已有 67 次閱讀 18-3-29 11:11 |個人分類:分娩

我覺得以前既人都係唔使麻醉藥、無開刀,一樣照生BB。我想一切都順其自然,所以最後選左自然分娩,仲同醫生溝通好盡量唔要麻醉、唔要無痛分娩、唔要剪會陰(大前提當然係母子安全下啦)。當然懷孕期間不停都會擔心同質疑自己可否成功,因為我本身係勁怕痛的人。

12am 入院

檢查左一輪,姑娘話開左兩指,帶我回大房,叫我瞓下先。沿途我問姑娘,大概要幾耐生吖?姑娘話無咁快架,叫你先生明天九點再嚟啦。你今晚瞓返覺先。

回房間後,陣痛越來越勁。唔知痛左幾耐。對面床有媽媽呼叫姑娘,問姑娘開左幾度。之後我都襟鐘,我告訴姑娘陣痛勁左。於是,姑娘就入嚟檢查。一檢下,姑娘叫我即刻打比老公叫佢過嚟,佢話我要入產房。


清晨4點幾,被送入產房。

姑娘安排了「笑氣」,叫我有痛可以聞下。完全take左野咁~ 


初初有陣痛我就拎起笑氣聞,唔痛就拎開。突然比我整甩左條喉,唯有自己駁返。其實個笑氣罩就好似平時潛水個二級頭咁。


產房有柔和音樂,無陣痛果陣左望右望,陣痛一嚟就即刻要聞氣。索幾啖笑氣就會感受到手開始痺,人好想瞓。唔痛果陣我就即刻拿開,我想保持清醒。唔知道咁樣的清況維持左幾耐,我好似聽到老公把聲,之後姑娘就同我講老公嚟大。我個心即刻定晒。


陣痛又嚟了,老公幫我拎笑氣罩。我就捉住佢隻手。唔痛果陣我就同老公講返頭先發生乜事,傾下偈,希望响自己清醒把成件事記低。


陣痛越來越痛,老公拎住笑氣罩已經唔得了,我搶過嚟禁實唔比佢再拿開。過左陣我聽到有把聲叫我出力,好似係劉醫生,又係似係姑娘。我諗醫生應該到左吧。之後成個腦一片空白,就像關電視機閃過一道線咁樣。音樂停止了,好像耳鳴左一下,我突然再想,我不是生仔時斷片吧?我聽到老公叫醒我的聲音,我眨開眼就見到佢。老公話「你醒啦?」之後又聽到姑娘話痛就聞笑氣啦。噢!原來我未生!


音樂聲依舊柔和......

漸漸地,開始變得激昂。我在想點解播咁激昂的音樂吖,好似加劇陣痛的力度咁。痛與不痛間,我又聽到一把聲音叫我用力,是劉醫生還是姑娘呢?我醫生到未呢?好似係醫生喎!我確信今次是劉醫生了。不停叫我用力推、用力柯...... 我發現所有人的指令,到我做的時候都變了慢左八拍。

醫生叫:「吸氣、用力、柯、忍住」

用力:我仲深呼吸緊

柯:我用緊力喎

忍住:閉啦!我柯緊吖

老公幫手叫:「用力啦!柯!唔好用力」

用力:我知啦!即刻用力

柯:我仲用緊力

唔好用力:我好用力,收唔到吖

醫生最後話:「好!收晒!做得好好」

我心諗,醫生一早知道產婦有動作延誤,所以指令都會調節嗎?佢要我忍住的時候其實就預左我柯,所以過程好順利我生左啦!好開心!


我聽到老公叫醒我的聲音,我眨開眼又見到佢。老公話「你醒啦?」我意識到,原來我還未生。天吖,又聽到那激昂的音樂,又聽到姑娘叫我痛就聞笑氣。


好吧,繼續靠著笑氣止痛。我趁清醒左小小,問老公「點解我又返左嚟?」仲告訴他我發左好多個夢。


陣痛又嚟了,又聽到叫我用力的聲音。今次一定是劉醫生吧⋯⋯我已經忘了多少次回到起點。每次睜開眼睛,就見到老公。佢就問「你醒啦?」最後聽到有把聲音告訴我生左了,我跟自己說「算吧了!又要回到起點,轉頭老公又會問我清醒嗎?姑娘又會叫我痛就聞氣。唉!我想喊」

好像眼角真的有一滴淚流下。


我睜開眼睛,果然見到老公。我對他說:「點解又返嚟呢道?」接下來我好像真的清醒一點。我聽到有聲音叫我用啦柯。

「吸氣!用力柯!唔好噴氣!」

我好痛!下意識就想捲曲身體。

「用力!唔好扭曲身體!唔好浪費力氣!」

「吸氣!用力柯!只差小小!」我唔够氣,好像吸的氣唔够用。「吸多啖氣!即刻柯!唔好噴氣!」我已經好用力柯!點解仲未得架!

「用力吖!你想自己生就要再用力吖!出左一半啦,就得啦!」呢把聲一定係劉醫生!我肯定呢刻不再發夢了。我再用力,可惜還是未柯到。突然我感覺到被人剪左一下。我大叫好痛!

「再陣痛就用力柯!」我知道被剪後,没有等陣痛就試著柯。我完全感受唔到有野跌出嚟,只是聽到醫生同姑娘話幫我同bb影相,才知道自己把bb生下來了。稍後才覺得下體不停有水流出來。

一輪拍照後,醫生幫我縫線。我還清醒地跟醫生閒聊。之後被人推出產房,就見到奶奶,我還跟她打招呼,一切都回復清醒。回到病房,老公告訴我,聞左笑好的我好似升仙咁,生產過程完全不聽指令。經老公轉述原來由開十度至bb出世只花了半小時,全程無有笑氣聞的。只有等待開至十度前,我才有聞笑氣。這個笑氣對我來說的確很神奇,完成斷片似的。雖然剪會陰的那一刻我像鬆了口氣,因為我知道只要剪了就好快結束這個辛苦又不停重複的過程。可是,經老公轉述,原來真正嘗試柯的過程只是短短半小時,而且是助產姑娘催促我醫生剪的。我得知後,很不高興。我好有機會不用剪的!我生產前跟我的醫生溝通過我唔想剪,唔想打止痛針,唔想打麻醉針,我想一切自然。結果醫生有嘗試過,不過姑娘憑什麼催醫生剪我會陰?






感動流淚

清新流暢

到此一遊


豈有此理

評論 (0 個評論)

facelist

你需要登錄後才可以評論 登錄 | 註冊

© Baby-Kingdom.com Limited. All rights reserved.