唔想咁涼薄 - cathychuyy的日誌 - Baby Kingdom - 親子王國 香港 討論區

唔想咁涼薄

熱度 2已有 189 次閱讀 18-4-2 06:46

前晚10點先放工,返到屋企,啱啱幫佢搞續約嗰個工人姐姐,本來尋日開始放假一早會返菲律賓,原本可以返家鄉探吓2年冇見嘅小朋友,理應好開心,點知坐咗喺廳喺度喊,細問下,原來佢行李超重咗十幾Kg,咁我問佢,你之前成日寄嘢返去,搞乜而家又咁多嘢,原來佢之前托呢個又托嗰個帶嘢比佢屋企人,咁而家就要還人情債,仲要前日佢幾個朋友先拎嘢比佢,咁人哋之前又幫你帶嘢過去,呢次又唔推得,結果都係咁重.


好啦,呢個時候,我班屋企人,呢個一句:「未見過人咁蠢啊,係都早啲知啲朋友有幾多貨要幫手帶」,嗰個一句:「七十幾蚊一Kg之嘛!都係加1千蚊,比囉!!(但因為由馬尼拉再要轉機返佢鄉下,即係變相要2千)」然後我嗰個全宇宙最聰明嘅家姐,仲要Whatsapp單打埋我:「我呢啲聰明嘅僱主就會一早幫佢磅好曬幾重,同埋會叫佢同班同鄉一齊去機場,超重嘅就即刻幫手拎返啲冇咁重要嘅行李走先,你就唔夠經驗囉,應該早啲幫佢搞.」我真係訓喺度都中彈.


嗰一吓,我真心覺得我屋企人真係好涼薄,姐姐第1次出門打工,都叫幫咗我哋2年,我覺得佢都幾正常,幫到手,又有禮貌,點解成班人只係喺度取笑佢,冇人幫佢手,唉!


咁又因為全家都覺得我呢個最細嘅女,又未結婚未有小朋友,事業又冇成,最得閒一定係我,所以而家屋企大小事務都係我搞,好似姐姐續約同買機票都係我,好在,咁就我可以網上就咁幫佢買多啲行李嘅磅數,咁即刻幫佢Online買,15Kg兩程機都係$660,姐姐開心曬啦,佢問我可唔可以放完假,分三個月還返比我,咁我見又唔係大數目,就話當送佢啦.然後,比全家圍攻,話我寵壞佢,話個姐姐一定會得寸進尺.


我年年都R我老細加我多啲人工,加吓年假福利比我,過年貪得意爹吓啲膠層,比多封大利是,唔通又叫寵壞我???唔同公司HR年年搞咁多活動,又出花紅,係為咗寵壞成班日日返公司扮工嘅人咩,唔多唔少都係為咗想你班大帝,比心機繼續留喺度,屈服於公司腦細同膠層嘅淫威之下姐,唉,成班屋企人講完,就轉到Whatsapp屋企Group講,幾個嫁咗出去嘅家姐繼續Whatsapp成晚不斷直線抽擊,樂此不疲!!!


然後任性嘅么女,越比人話就越要對姐姐好,結果尋日神咁早5點鐘已經車到佢去到機場,我就人生第1次過T2嗰邊,陪到佢6點Check完In送佢入閘,之後7點未到已經返到公司食緊早餐,5點收工去教琴,呢輪大部份學生都去咗旅行,我呢2日又要OT,所以呢2日改夜晚教都夠時間,尋晚10點半先喺學生屋企走.


今朝6點又返到公司食早餐,打埋呢篇日記先開工,人生好充實,終於已經唔記得自己失戀咗第幾日了.



感動流淚
1

清新流暢

到此一遊


豈有此理

剛表態過的朋友 (1 人)

發表評論 評論 (2 個評論)

回覆 lili4466 18-4-3 14:39
    
回覆 Kiz;Y! 18-4-4 04:51
隨心而行, 我撐你, 好運好快黎

facelist

你需要登錄後才可以評論 登錄 | 註冊

© Baby-Kingdom.com Limited. All rights reserved.