12日首爾+仁川之旅 - cathychuyy的日誌 - Baby Kingdom - 親子王國 香港 討論區

12日首爾+仁川之旅

已有 62 次閱讀 18-4-19 22:47

想講返呢個12日首爾+仁川之旅,好多謝我個舊同學,帶埋個女出嚟陪我玩,呢次可以咁樣有咁唔同嘅體驗,真係要多謝曬佢哋,好多人話,首爾邊玩到12日,我覺得,其實要我自己一個去,都完全冇問題,呢次仲要多個BB女陪我玩,使到我對於擁有自己家庭呢個夢想,有更大嘅衝動想實現到,如果幸運地有自己嘅小朋友,亦好想好想辛辛苦苦咁帶佢週圍去睇吓呢個花花世界.


由首爾機場行過去搭地鐵嗰條路,好多好多年前一年都行幾次,係近呢幾年次次去到就即刻租車,搞到呢次一行,就覺得呢個似曾相識嘅感覺,真係好唔錯,自己一個人,慢慢嘆杯咖啡,睇吓書,入吓T-Money,先施施然走去搭地鐵出首爾,正,自己一個嗰種自由,真係好正.


呢次首爾遊,日頭全部係去兒童設施,SeaLaLa,首爾兒童大公園,首爾兒童大公園-兒童博物館,首爾大公園-長頸鹿國家,Lilliput都去咗幾間,夜晚就自己新沙洞,明洞,Coxe,高速車站地下街,仲有唔少得要幫家姐去樂天免稅店買化妝品.


湊小朋友就係,唔可以約太早,因為小朋友要訓到自然醒先出得嚟,所以每日差唔多都差唔多要11點先Meet到佢哋,然後除非個地方有嘢食,好似Lilliput係親子餐廳要點埋餐,如果唔係就要食埋先入景點,然後3點左右又會差唔多冇電,有時會更早,所以又可以安排個Tea比大人,餵住奶比個BB女訓,大人就飲咖啡同食食食,之後4點幾5點,玩多陣就要返屋企,我就繼續去Shopping,但人地媽媽返到去仲要幫個BB同自己沖涼,食飯,陪玩,氹去便便,傾計訓覺,而家做父母都認真唔簡單.


然後第7日就拎返部車出發去返仁川,呢次去仁川,除咗重遊呢個充滿回億嘅地方,更加想還埋個心願,就係影相,話說本來準備結婚嘅我,會香港同韓國2邊都影結婚相,韓國嗰邊我已經搵好曬,點知婚結唔成,但都係想搵呢個攝影師幫自己影返輯相,當係送自己一份禮物,一份只有27歲先有嘅禮物.


認真,Model唔易做,影完大半日,成個人都梗曬.


然後仁川仲去吓月尾島餵海鷗,去咗滑室內滑雪場,松島閒逛,之後就係咁超市瘋狂買手信.


呢排返工好忙,唔係太有心機慢慢寫,寫住先啦.


ByeBye了我的12日韓國旅程.




感動流淚

清新流暢

到此一遊


豈有此理

評論 (0 個評論)

facelist

你需要登錄後才可以評論 登錄 | 註冊

© Baby-Kingdom.com Limited. All rights reserved.