唔想返教會 - cathychuyy的日誌 - Baby Kingdom - 親子王國 香港 討論區

唔想返教會

已有 16 次閱讀 18-6-29 14:58

呢排有幾單關於基督教性侵犯嘅新聞,我屋企啲家姐又喺度討論:
嘩,真係越嚟越接近末日,咩聖經已經預言:「不法​的​事​增加」,「放縱​可恥​的​肉慾」,然後再講到「民要攻打民,國要攻打國」同「一​處​接​一​處​有​糧荒​和​地震,​一切​像​產痛​一樣,只是​重重​苦難​的​開始」,再引申話而家連基督教入面都咁差,以前都唔會咁BlaBlaBla.

傻嘅咩,而家先知係咁?其實不嬲都係咁㗎啦,只係以前冇人爆,冇人夠膽公開,同教會講又冇人信,信嘅就會話返你點解你唔識寬恕人,仲叫你唔好影響教會聲譽.

唔好講好耐以前,我淨係講返K小姐嗰單嘢,3個家姐+阿哥+老豆老母都冇人聽過,當年係2012年,我都仲間唔中有返吓團契,不過自呢件事後,加上後續雙方嘅回應,同埋當年唔同教會/教牧嘅反應,更令我覺得,教會呢樣「嘢」,我真心冇任何意慾再去參與,倒是信仰我覺得都仲有可能繼續.

> 教會,你能為性侵犯受害人討回公道嗎?
> K-時代論壇 / 2012年5月28日 ([Link](https://christiantimes.org.hk/Common/Reader/News/ShowNews.jsp?Nid=72659&Pid=2&Version=1291&Cid=641&Charset=big5_hkscs))
> 陳世強回應 K小姐事件 聲明指《蘋果》《爽報》失實
> 時代論壇 / 2012年6月5日 ([Link](https://christiantimes.org.hk/Common/Reader/News/ShowNews.jsp?Nid=72846&Pid=5&Version=0&Cid=220&Charset=big5_hkscs))
> K小姐發聲明回應 指陳世強對她誣衊抹黑
> 時代論壇 / 2012年6月6日 ([Link](https://christiantimes.org.hk/Common/Reader/News/ShowNews.jsp?Nid=72882&Pid=5&Version=0&Cid=220))

當年唔少牧師都係用呢類論調講呢件事:
* 呢個只係當事人(K小姐)單方面表達,外人好難知道當晚發生咩事
* 未婚嘅男女點會訓同一間房
* 點解唔即時報警

對於呢件事,我先唔講K小姐講過乜,我只睇返陳世強嘅回應:
「當時我對發生此事情深表難過,並對K小姐表示同情」
「 本人從未勸止K小姐不要報警,更沒有說過「報警冇用」。報警是她的權利和選擇。」
「鑑於X先生與K小姐超友誼關係嚴重違反信仰原則, 我們深感傷痛,故商人團契即時處理,並要求X先生對K小姐作出交代。」

即係作為1個牧者,有人投訴個個團契團員強姦,你假到仆街咁講完表示同情,幾句後你將件事講到變「超友誼關係」,咁仆街嘅人,配得叫牧者?

好啦,K小姐由頭到尾冇話過陳世強講過「報警冇用」呢4隻字,你個強而有力嘅回應就話自己冇講過「報警冇用」呢4隻字,玩語言偽術玩到呢....

陳世強另一篇報道都令我嘔心:他(陳世強)並否認與 X先生或 K小姐腍熟,「我哋個團契有頭有面,好多人識我;佢(X先生)係團契會員,佢尊敬我先嗌我做爸爸。」([Link](https://hk.news.appledaily.com/local/daily/article/20120530/16381386))

呢件事係我離開教會嘅其中一個原因,整體上我諗教會又唔係真係咁恐佈,但去到某啲位,我自己又接受唔到嗰種膠.你當我係個唔可以太過比教會管住嘅人啦,又或者可能只係全家都返教會,只有我呢個全家最細嘅女,不嬲都係任性啲,個個返我更加唔想返.

感動流淚

清新流暢

到此一遊


豈有此理

評論 (0 個評論)

facelist

你需要登錄後才可以評論 登錄 | 註冊

© Baby-Kingdom.com Limited. All rights reserved.